کراچی کے علاقے ڈیفنس فیز سکس خیابان شہباز میں پیش آنے والے مہلک حادثے میں ملوث ڈرائیور کو پولیس نے گرفتار کر لیا ہے۔
یہ حادثہ 26 مارچ کو پیش آیا تھا جس میں ایک خاتون جاں بحق جبکہ ایک موٹرسائیکل سوار زخمی ہو گیا تھا۔ واقعے کے بعد ملزم جائے وقوعہ سے فرار ہو گیا تھا، تاہم پولیس نے تحقیقات کے بعد اسے حراست میں لے لیا۔
ذرائع کے مطابق حادثے کی سی سی ٹی وی فوٹیج بھی سامنے آ گئی ہے جس سے واقعے کی مکمل تفصیلات واضح ہوئی ہیں۔
پولیس کا کہنا ہے کہ ملزم بغیر نمبر پلیٹ کے ڈبل کیبن گاڑی چلا رہا تھا، جو حادثے کے بعد فرار ہونے میں کامیاب ہو گیا تھا۔
مزید تحقیقات میں انکشاف ہوا کہ ملزم نے گاڑی کا بمپر تبدیل کروایا تھا تاکہ شناخت سے بچ سکے، تاہم پولیس نے وہ بمپر بھی برآمد کر لیا ہے۔
حکام کے مطابق ملزم سے مزید تفتیش جاری ہے تاکہ واقعے کے تمام پہلوؤں کو سامنے لایا جا سکے اور قانون کے مطابق کارروائی عمل میں لائی جائے۔
یہ واقعہ شہر میں ٹریفک قوانین کی خلاف ورزی اور لاپرواہی کے بڑھتے ہوئے رجحان کی ایک اور مثال بن گیا ہے۔
Blog
-
ڈیفنس ٹریفک حادثہ، فرار ڈرائیور گرفتار
-
کراچی میں ہیوی ٹریفک کا ایک اور شکار، بچہ جاں بحق
کراچی میں ہیوی ٹریفک کے باعث ایک اور افسوسناک حادثہ پیش آیا ہے جس میں ایک معصوم بچہ جان کی بازی ہار گیا جبکہ ایک خاتون زخمی ہو گئی۔
رپورٹ کے مطابق یہ واقعہ شاہ فیصل کالونی میں پیش آیا جہاں ایک تیز رفتار ٹرک نے موٹر سائیکل سواروں کو کچل دیا۔ حادثے کے نتیجے میں بچہ موقع پر ہی جاں بحق ہو گیا جبکہ خاتون کو زخمی حالت میں اسپتال منتقل کر دیا گیا۔
واقعے کے بعد علاقے میں شدید غم و غصہ پایا گیا اور مشتعل افراد نے ٹرک ڈرائیور کو پکڑ کر تشدد کا نشانہ بنایا۔
اطلاع ملنے پر پولیس موقع پر پہنچ گئی اور صورتحال کو قابو میں لیتے ہوئے ڈرائیور کو حراست میں لے لیا جبکہ ٹرک کو بھی تحویل میں لے لیا گیا ہے۔
پولیس کے مطابق واقعے کی تحقیقات جاری ہیں اور ذمہ داروں کے خلاف قانونی کارروائی کی جائے گی۔
شہریوں کا کہنا ہے کہ شہر میں ہیوی ٹریفک کے باعث حادثات میں مسلسل اضافہ ہو رہا ہے، جس پر فوری اور سخت اقدامات کی ضرورت ہے تاکہ قیمتی جانوں کو ضائع ہونے سے بچایا جا سکے۔ -
آپریشن وعدہ صادق 4 کی 98 ویں لہر
ایرانی پاسدارانِ انقلاب نے اعلان کیا ہے کہ آپریشن وعدہ صادق 4 کی 98ویں لہر کے دوران امریکی اور اسرائیلی کمانڈ، آپریشنل، لاجسٹک، صنعتی اور عسکری تنصیبات کو نشانہ بنایا گیا ہے۔
پاسدارانِ انقلاب کے شعبۂ تعلقات عامہ کے مطابق آج کی کارروائیوں کو شہید میجر جنرل مجید خادمی کے نام سے منسوب کیا گیا۔ بیان میں کہا گیا کہ آپریشن کے پہلے مرحلے میں ایرانی بحریہ نے صہیونی رجیم سے منسلک کنٹینر جہاز “SDN7” کو کروز میزائل سے نشانہ بنایا، جس کے نتیجے میں جہاز میں شدید آگ بھڑک اٹھی۔
ایرانی دعوے کے مطابق تل ابیب کے شمالی و جنوبی علاقوں، حیفا کے اہم مراکز، بئر السبع میں کیمیائی تنصیبات اور پتاح تکفا میں فوجی مقامات کو بیلسٹک میزائلوں سے نشانہ بنایا گیا، جبکہ یہ بھی کہا گیا کہ اسرائیلی فضائی دفاع ان حملوں کو روکنے میں ناکام رہا۔
بیان میں مزید دعویٰ کیا گیا کہ امریکی بحریہ کے LHA-7 یو ایس ایس ٹریپولی کو بھی نشانہ بنایا گیا، جس کے بعد جہاز کو پسپائی اختیار کرنا پڑی۔ اس کے علاوہ متحدہ عرب امارات اور اسرائیل کے مشترکہ ڈرون پروڈکشن مرکز اور علی السالم بیس پر موجود فضائی اثاثوں کو بھی میزائل اور ڈرون حملوں کا نشانہ بنایا گیا۔
پاسدارانِ انقلاب کا کہنا ہے کہ خطے میں مزاحمتی قوتوں کے ساتھ مل کر دشمن کے خلاف کارروائیاں جاری رہیں گی، جبکہ آبنائے ہرمز اور خلیج فارس میں سرگرمیوں پر مسلسل نظر رکھی جا رہی ہے۔
ماہرین کے مطابق ان دعوؤں کی آزادانہ تصدیق ممکن نہیں، تاہم یہ صورتحال خطے میں بڑھتی ہوئی کشیدگی اور ممکنہ بڑے تصادم کی نشاندہی کرتی ہے۔ -
پٹرول مہنگا رہا تو صنعتیں بند ہوں گی، بزنس کمیونٹی کی وارننگ
ایوان صنعت و تجارت کے صدر فاروق یوسف نے خبردار کیا ہے کہ اگر پٹرولیم مصنوعات کی قیمتوں میں کمی نہ کی گئی تو ملک بھر میں صنعتیں بند ہونے کا خدشہ پیدا ہو سکتا ہے۔
فیصل آباد چیمبر آف کامرس کے عہدیداروں نے پٹرول پر 80 روپے فی لیٹر لیوی میں کمی کو ناکافی قرار دیتے ہوئے کہا کہ موجودہ حالات میں یہ اقدام صنعتوں کو بچانے کے لیے کافی نہیں۔
فاروق یوسف کے مطابق حکومت کے پاس 28 دن کا ایندھن ذخیرہ موجود تھا، اس کے باوجود قیمتوں میں اضافہ کیا گیا، جس سے یہ تاثر پیدا ہوا کہ جنگ کو بہانہ بنا کر پٹرول مہنگا کیا گیا۔
انہوں نے کہا کہ اس اہم فیصلے میں بزنس کمیونٹی کو شامل نہیں کیا گیا، حالانکہ کاروباری طبقہ براہ راست متاثر ہوتا ہے اور اسے اسٹیک ہولڈر سمجھا جانا چاہیے تھا۔
ان کا کہنا تھا کہ خام مال کی قیمتوں میں پہلے ہی 45 فیصد تک اضافہ ہو چکا ہے جبکہ شپنگ کمپنیوں نے وار چارجز عائد کر دیے ہیں، جس سے پیداواری لاگت میں مزید اضافہ ہوا ہے۔
انہوں نے بتایا کہ پٹرول مہنگا ہونے کے بعد گڈز ٹرانسپورٹ کے کرایوں میں 100 فیصد تک اضافہ ہو چکا ہے، جس کا براہ راست اثر صنعتوں اور برآمدات پر پڑ رہا ہے۔
فاروق یوسف نے سبسڈی کے نظام پر بھی تنقید کرتے ہوئے کہا کہ یہ شفاف نہیں اور حقیقی مستحقین تک فائدہ نہیں پہنچتا، اس لیے پٹرولیم مصنوعات کی قیمتوں میں براہ راست کمی کی جائے۔
انہوں نے مطالبہ کیا کہ حکومت آئی ایم ایف کے دباؤ میں آ کر قیمتیں بڑھانے کے بجائے لیوی ختم کرے اور ایک جامع قومی برآمداتی پالیسی متعارف کرائے تاکہ صنعتوں کو سہارا مل سکے۔ -
ایران میں امریکی پائلٹ کا ریسکیو آپریشن افزودہ یورینیم چرانے کا کور آپریشن ہوسکتا ہے: ترجمان ایرانی وزارت خارجہ
ایرانی وزارت خارجہ کے ترجمان نے دعویٰ کیا ہے کہ ایران میں امریکی پائلٹ کو نکالنے کے لیے کیا گیا مبینہ ریسکیو آپریشن دراصل افزودہ یورینیم چرانے کا ایک کور آپریشن ہو سکتا ہے۔
ترجمان کے مطابق اس امریکی کارروائی کے حوالے سے متعدد سوالات اور غیر یقینی صورتحال موجود ہے، جبکہ جس مقام پر امریکی پائلٹ کی موجودگی کا دعویٰ کیا گیا وہ اس جگہ سے کافی دور ہے جہاں طیارہ گرنے کی اطلاعات تھیں۔
انہوں نے کہا کہ ان حالات میں یہ امکان نظرانداز نہیں کیا جا سکتا کہ اس آپریشن کا اصل مقصد کسی اور نوعیت کی کارروائی ہو، جس میں حساس جوہری مواد تک رسائی بھی شامل ہو سکتی ہے۔
ایرانی ترجمان نے مزید کہا کہ یہ آپریشن امریکا کے لیے تباہ کن ثابت ہوا اور اس کے نتائج نے کئی نئے سوالات کو جنم دیا ہے۔
ماہرین کے مطابق ایسے دعوؤں کی آزادانہ تصدیق ممکن نہیں، تاہم یہ بیانات جاری کشیدگی میں بیانیہ جنگ کو مزید تیز کر رہے ہیں۔
یہ بیان ایسے وقت میں سامنے آیا ہے جب ایران اور امریکا کے درمیان کشیدگی عروج پر ہے اور دونوں جانب سے الزامات اور جوابی بیانات کا سلسلہ جاری ہے۔ -
گلشن پارک مغل پورہ میں آوارہ کتوں کے بچوں پر حملے، شہریوں کا شدید احتجاج
شہر کے مختلف علاقوں میں آوارہ کتوں کی بہتات نے شہریوں کا جینا دوبھر کر دیا۔ بار بار شکایات کے باوجود تاحال کوئی شنوائی نہ ہو سکی۔ مغل پورہ کے علاقے گلشن پارک میں آوارہ کتوں کے دو بچوں پر خوفناک حملے۔ اہل علاقہ نے شدید احتجاج کرتے ہوئے وزیراعلیٰ پنجاب مریم نواز سے اپیل کی ہے کہ آوارہ کتوں کی بہت زیادہ بڑھتی ہوئی تعداد پر قابو پانے کے لیے خصوصی اقدامات کیے جائیں اور لوگوں کی زندگیاں محفوظ بنائی جائیں۔
مغل پور ہ کے قریب حبیب پارک اور گلشن پارک کے علاقوں میں اس وقت صورت حال یہ ہے کہ آوارہ کتوں کے غول کے غول گلیوں میں پھرتے اور بھونکتے دکھائی دیتے ہیں۔ پچھلے کچھ عرصے میں کئی بچوں اور بزرگوں پر کتوں نے شدید حملے کیے ہیں ۔ خاص طور پر نماز فجر کے وقت نمازیوں کا مساجد میں جانا محال ہو چکا ہے۔ قرآن پڑھنے کے لیے بچے مسجد جاتے ہوئے ڈرتے ہیں اور والدین بھی خوف زدہ دکھائی دیتے ہیں۔ مغل پورہ کے علاقے حبیب پارک میں جامع مسجد قبا کے قریب چونکہ کچھ کھلی جگہ موجود ہے اس لیے وہاں آوارہ کتوں نے خاص طور پر ڈیرے ڈال رکھے ہیں جس سے مسجد آنے والے نمازیوں اور قرآن پڑھنے والے بچوں کو انتہائی مشکل صورت حال کا سامنا ہے۔ حبیب پارک اور گلشن پارک کے علاقوں میں آئے دن بچوں اور بزرگوں پر آوارہ کتوں کے حملوں اور کاٹنے کےو اقعات بھی پیش آئے ہیں۔ لوگ اپنے بچوں کو سکولوں اور مساجد میں قرآن پڑھنے کے لیے بھیجتے ہوئے ڈرتے ہیں۔ ان علاقوں میں کتوں کی بھرمار ہے جبکہ شکایت کے باوجود شنوائی نہ ہونے پر شہری انتہائی بے بسی سے دوچار ہیں۔ اہل علاقہ کا کہنا ہے کہ حکومت پنجاب اس خطرناک صورت کا فوری نوٹس لے اور گلیوں میں جگہ جگہ پھرنے والے آوارہ کتوں سے لوگوں کی جان چھڑائی جائے۔
واضح رہے کہ لاہور میں آوارہ کتوں کی بہت زیادہ بڑھتی ہوئی تعداد شہریوں کے لیے وبال جان بن گئی ہے اور ہر روز کتوں کے ہاتھوں زخمی ہونے والے کئی لوگ ہسپتالوں میں لائے جاتے ہیں۔ واضح رہے کہ ابھی حال ہی میں لاہور ہائی کورٹ میں ایک رپورٹ جمع کروائی گئی ہے جس میں انکشاف ہوا ہے کہ پچھلے ڈھائی سال میں آوارہ کتوں کے حملوں میں صرف پنجاب میں پانچ لاکھ سے زائد افرادزخمی ہوئے ہیں۔ ایک سال میں صرف لاہور میں بیس ہزار کے قریب آوارہ کتوں کے حملوں کا نشانہ بنے ہیں۔
-
طالبات کو ہراساں کرنے کی کوشش، انکار پر ملزم آپے سے باہر،فائرنگ
گوجرخان (قمرشہزاد) گورنمنٹ گرلز ہائی سکول ڈھونگ کے باہر میٹرک کا امتحان دے کر نکلنے والی طالبات پر فائرنگ کے ہولناک واقعے سے علاقہ مکینوں میں تشویش کی لہر دوڑ گئی۔ زرائع کے مطابق گاؤں کے ایک اوباش نوجوان مزمل حسین عرف جگا نے امتحان سے فارغ ہو کر گھر جانے والی طالبات کا راستہ روک کر انہیں ہراساں کرنے اور بات کرنے کی کوشش کی۔
طالبات کی جانب سے سخت ردعمل اور ڈانٹ ڈپٹ پر ملزم مشتعل ہو گیا اور 30 بور پستول نکال کر اندھا دھند فائرنگ شروع کر دی۔ فائرنگ کے نتیجے میں امتحانی مرکز کے باہر بھگدڑ مچ گئی اور طالبات جان بچانے کے لیے چیخ و پکار کرتی ادھر ادھر بھاگنے لگیں۔ اسی اثنا میں سکول کے ملازم ناصر حسین نے بے مثال بہادری کا مظاہرہ کیا اور اپنی جان کی پرواہ نہ کرتے ہوئے مسلح ملزم پر جھپٹ پڑا۔ ملزم نے ناصر حسین پر بھی فائرنگ کی کوشش کی تاہم ناصر حسین نے ہمت نہ ہاری اور جان جوکھوں میں ڈال کر ملزم کو قابو کر کے اس سے اسلحہ چھین لیا۔
واقعے کی اطلاع ملتے ہی تھانہ جاتلی پولیس کی نفری فوری طور پر موقع پر پہنچ گئی اور ملزم مزمل حسین ولد محمد اسلم کو اسلحہ سمیت اپنی تحویل میں لے کر تفتیش کا آغاز کر دیا۔ خوش قسمتی سے واقعے میں تمام طالبات محفوظ رہیں، تاہم امتحانی مرکز پر ناقص سکیورٹی انتظامات نے والدین اور اہل علاقہ میں شدید تشویش پیدا کر دی ہے۔ عوامی حلقوں نے ناصر حسین کی جرات کو بھرپور خراجِ تحسین پیش کیا ہے۔
-
گوجرخان میں ایل پی جی مافیا بے لگام، فی کلو قیمت 500 روپے سے متجاوز
گوجرخان (قمر شہزاد مغل) گوجرخان اور گردونواح میں ایل پی جی مافیا نے غریب عوام کی کمر توڑ کر رکھ دی، گیس کی فی کلو قیمت 500 روپے کی ریکارڈ سطح سے بھی تجاوز کر گئی۔ اوگرا کی جانب سے جاری کردہ سرکاری نرخ نامہ صرف کاغذ کا ٹکڑا بن کر رہ گیا ہے، جبکہ پلانٹ مالکان اور ڈسٹری بیوٹرز نے قانون کو جوتے کی نوک پر رکھتے ہوئے من مانے ریٹس وصول کرنا شروع کر دیے ہیں۔
شہریوں نے شدید تحفظات کا اظہار کرتے ہوئے کہا ہے کہ کمر توڑ مہنگائی کے اس دور میں اب گیس سلنڈر بھروانا ایک خواب بن چکا ہے۔ مقامی و ضلعی انتظامیہ گراں فروشوں کے خلاف کارروائی کرنے میں بری طرح ناکام نظر آتی ہے، جس سے یہ تاثر عام ہو رہا ہے کہ مافیا کو اعلی حکام کی مکمل پشت پناہی حاصل ہے۔ شہریوں نے حکومتِ پاکستان اور اعلیٰ حکام سے پرزور مطالبہ کیا ہے کہ گوجرخان میں ایل پی جی کی سرکاری نرخوں پر فراہمی کو یقینی بنایا جائے اور عوامی جیبوں پر ڈاکہ ڈالنے والے پلانٹ مالکان اور ڈسٹری بیوٹرز کو فوری طور پر قانون کے کٹہرے میں کھڑا کیا جائے۔ شہریوں کا کہنا ہے کہ اگر فوری نوٹس نہ لیا گیا تو وہ سڑکوں پر نکلنے پر مجبور ہوں گے۔
-
خواتین کی ویڈیوز بنانے والے سیاہ کار کو نوازنے کا انکشاف،انکوائری کا مطالبہ
گوجرخان (قمر شہزاد) ڈسٹرکٹ ہیلتھ اتھارٹی راولپنڈی کی کارکردگی پر اس وقت سوالیہ نشان لگ گیا جب ایک ایسے بدنامِ زمانہ اہلکار کو رورل ہیلتھ سنٹر دولتالہ میں تعینات کر دیا گیا جس پر تحصیل کہوٹہ کے سرکاری ہسپتال میں خاتون سے زیادتی اور نازیبا ویڈیوز وائرل کرنے جیسے سنگین الزامات کا سائبر کرائم میں انکوائری نمبر 1541/25 مکمل ہونے کے بعد مقدمہ نمبر 90/25 درج ہوا۔ اس شرمناک تعیناتی نے عوامی و سماجی حلقوں میں غم و غصے کی لہر دوڑا دی ہے، جبکہ سی ای او ہیلتھ راولپنڈی کی جانچ پڑتال کے نظام پر بھی سنگین شکوک و شبہات پیدا ہو گئے ہیں۔
ذرائع کے مطابق مذکورہ اہلکار نہ صرف سنگین اخلاقی جرائم میں ملوث ہے بلکہ اسی کیس میں 8 ماہ اڈیالہ جیل کی ہوا بھی کھا چکا ہے اور تاحال ٹرائل کا سامنا کر رہا ہے، جس پر رواں ماہ ہی فردِ جرم عائد ہونی ہے۔ سوشل میڈیا پر عوامی احتجاج اور شدید دباؤ کے بعد اگرچہ سی ای او ہیلتھ نے مبینہ طور پر یہ احکامات منسوخ کر دیے ہیں، مگر شہریوں نے سوال اٹھایا ہے کہ کیا اتنے بڑے عہدے پر بیٹھے افسر کو تعیناتی سے قبل اپنے عملے کے ریکارڈ کا علم نہ تھا؟ یا پھر سب کچھ جانتے بوجھتے کسی خاص مفاد کے تحت خاموشی اختیار کی گئی؟ شہری حلقوں کا کہنا ہے کہ جب سے موجودہ سی ای او نے چارج سنبھالا ہے، ڈسٹرکٹ ہیلتھ اتھارٹی راولپنڈی کے زیر سایہ چلنے والے سرکاری ہسپتال مبینہ طور پر اسکینڈلز کا گڑھ بن چکے ہیں۔ کبھی ہسپتالوں کے واش رومز میں خواتین کی ویڈیوز بننے کے واقعات سامنے آتے ہیں تو کبھی عملے کی بدتمیزی اور منظورِ نظر افراد کو نوازنے کا سلسلہ تھمنے کا نام نہیں لے رہا۔
عوامی حلقوں نے وزیر اعلیٰ پنجاب مریم نواز سے پرزور مطالبہ کیا ہے کہ اس مجرمانہ غفلت کا فوری نوٹس لیا جائے۔ شہریوں کا کہنا ہے کہ ہسپتالوں کو درندوں کے رحم و کرم پر چھوڑنے والے غیر ذمہ دار سی ای او راولپنڈی کو فی الفور عہدے سے ہٹا کر کسی فرض شناس افسر کو تعینات کیا جائے اور اس پورے معاملے کی شفاف انکوائری کر کے ذمہ داروں کو عبرت کا نشان بنایا جائے تاکہ سرکاری ہسپتالوں میں آنے والی مائیں بہنیں خود کو محفوظ تصور کر سکیں۔
-
نسیم شاہ غیر معینہ مدت کیلئے پی ایس ایل سے باہر
فاسٹ بولر نسیم شاہ انجری کے باعث غیر معینہ مدت کے لیے پاکستان سپر لیگ سے باہر ہو گئے ہیں۔
پی ایس ایل کی فرنچائز راولپنڈی پنڈیز نے بھی نسیم شاہ کے پی ایس ایل سے باہر ہونے کی تصدیق کردی ہے،فرنچائز انتظامیہ کے مطابق نسیم شاہ کو کراچی کنگز کے خلاف میچ کے دوران سائیڈ انجری ہوئی تھی، جس کے بعد وہ تاحکم ثانی ٹیم کی دستیابی سے باہر ہو گئے ہیں میڈیکل اسٹاف ان کی صحتیابی اور ری ہیب کے عمل کی مسلسل نگرانی کر رہا ہے، اور امید کی جا رہی ہے کہ فٹنس کلیئرنس ملنے کے بعد وہ ٹورنامنٹ کے آخری مرحلے میں واپسی کر سکیں گے انتظامیہ نے کہا ہے کہ وہ نسیم شاہ کے ساتھ مکمل طور پر کھڑی ہے اور انہیں بھرپور سپورٹ فراہم کی جا رہی ہے۔
شیخ حسینہ واجد سمیت 22 افراد کے خلاف جبری گمشدگی کا مقدمہ دائر
اسحاق ڈار کا پرتگال کے وزیر مملکت برائے امور خارجہ سے ٹیلی فونک رابطہ