Blog

پینٹاگون نے تسلیم کیا ہے کہ ایران کیخلاف جنگ میں امریکی فوج کے 13 اہلکار ہلاک 365 زخمی ہوئے، اربوں ڈالرز مالیت کے طیارے اور ڈرونز بھی تباہ ہوگئے۔

پینٹاگون نے ایران جنگ میں جانی و مالی نقصان کی تفصیلات جاری کردیں۔ امریکی حکام کے مطابق 13 اہلکار ہلاک اور 365 زخمی ہوئے، زخمیوں میں 243 امریکی فوج، 63 نیوی اور 36 ایئرفورس کے اہلکار شامل ہیں، حال ہی میں مشرق وسطیٰ پہنچنے والی یو ایس میرینز کے 19 اہلکار بھی زخمیوں میں شامل ہیں۔پینٹاگون نے رپورٹ میں امریکا کا ایک ریڈار طیارہ، 3 ٹینکر طیارے، 4 ایف 15 اور درجنوں ڈرونز کے تباہ ہونے کی تصدیق کردی، جن کی مالیت اربوں ڈالر ہے۔رپورٹ میں بتایا گیا ہے کہ ایران جنگ میں طیارہ بردار بحری جہاز یو ایس ایس جیرالڈ فورڈ میں بھی آگ بھڑک اٹھی تھی جس کے بعد اسے مرمت کیلئے یورپ لے جانا پڑا، ایک اندازے کے مطابق امریکا کو روزانہ ایک ارب ڈالر سے زائد نقصان کا سامنا کرنا پڑ رہا ہے۔

دوسری جانب امریکی اور ایرانی افواج ایرانی حدود میں لاپتہ ہونیوالے امریکی پائلٹ کو تلاش کررہی ہیں، ایران نے امریکی پائلٹ کو زندہ پکڑنے والے کیلئے ایک لاکھ ڈالر انعام کا اعلان کردیا، ایرانی قبائل بھی سرچ آپریشن میں شامل ہوگئے۔ایرانی میڈیا کے مطابق صوبہ خوزستان میں بختیاری قبائل نے رائفلیں اٹھائے پہاڑوں کا رخ کرلیا۔ میڈیا سے گفتگو میں ایرانی قبائل نے کہا فکر نہ کریں ہم اسے ڈھونڈ لیں گے۔ایرانی حکام نے امریکی پائلٹ کو زندہ پکڑنے والے کیلئے ایک لاکھ ڈالر انعام کا اعلان کر رکھا ہے،تہران میں امریکی طیارہ مار گرانے پر جشن منایا جارہا ہے، شہریوں نے ایرانی پرچم اٹھائے کار ریلی نکالی۔

ریاض میں امریکی سفارتخانے پر ایرانی حملوں سے ہونے والی تباہی کے حوالے سے امریکی میڈیا نے نئی تفصیلات جاری کرتے ہوئے انکشاف کیا ہے کہ نقصان ابتدائی طور پر بتائی گئی صورتحال سے کہیں زیادہ شدید ہے۔

میڈیا رپورٹس کے مطابق حملے کے دوران ایران کا ایک ڈرون سفارتخانے کی عمارت سے ٹکرایا جس کے نتیجے میں عمارت میں بڑا شگاف پڑ گیا۔ رپورٹ میں بتایا گیا ہے کہ محض ایک منٹ کے اندر دوسرا ڈرون بھی اسی مقام پر آ ٹکرایا، جس سے عمارت کے محفوظ ترین حصے بھی متاثر ہوئے۔ دھماکوں کے بعد لگنے والی آگ پر قابو پانے میں امدادی ٹیموں کو شدید مشکلات کا سامنا رہا اور آگ تقریباً آدھے دن تک بجھائی نہ جا سکی۔امریکی میڈیا کے مطابق امریکی وزیر خارجہ کی جانب سے نقصانات کے حوالے سے دی گئی ابتدائی معلومات درست نہیں تھیں، جبکہ حقیقت میں آگ اور دھماکوں سے سفارتخانے کو کہیں زیادہ نقصان پہنچا۔ رپورٹ میں کہا گیا ہے کہ عمارت کی کم از کم تین منزلیں شدید متاثر ہوئیں اور حساس نوعیت کا سی آئی سےاسٹیشن بھی حملے کی زد میں آیا۔
مزید بتایا گیا ہے کہ ابتدائی حملے کے چند گھنٹوں بعد مزید ڈرونز داغے گئے، تاہم انہیں میزائل دفاعی نظام کے ذریعے تباہ کر دیا گیا۔ ایک ڈرون کے بارے میں خدشہ ظاہر کیا گیا کہ وہ سعودی عرب میں تعینات اعلیٰ امریکی سفارتکار کی رہائش گاہ کو نشانہ بنا سکتا تھا، جو سفارتخانے سے چند سو فٹ کے فاصلے پر واقع ہے۔

دوسری جانب سابق سی آئی اے اہلکار کا کہنا ہے کہ اس حملے سے ظاہر ہوتا ہے کہ ایران ریاض میں کسی بھی ہدف کو نشانہ بنانے کی صلاحیت رکھتا ہے۔ انہوں نے مزید انکشاف کیا کہ ایران نے پرنس سلطان ایئر بیس پر بھی حملہ کیا، جس میں ایواکس اور ری فیولنگ طیاروں کو نشانہ بنایا گیا، جبکہ امریکی میزائل دفاعی نظام ان حملوں کو مکمل طور پر روکنے میں ناکام رہا۔رپورٹس کے مطابق ایران نے جمعے کے روز امریکی فضائیہ کے دو لڑاکا طیاروں، اے-10 اور ایف-15 کو نشانہ بنایا، جبکہ پاسداران انقلاب نے دعویٰ کیا ہے کہ ایک ایف-35 طیارہ بھی نشانہ بنایا گیا۔ اس کے علاوہ ایران نے کویت میں ایک امریکی ہیلی کاپٹر تباہ کرنے کا دعویٰ بھی کیا ہے۔

تہران: دفاعی محاذ پر ایران کو نقصان پہنچانے میں ناکامی کے بعد امریکا اور اسرائیل نے حکمتِ عملی تبدیل کرتے ہوئے ایرانی انفرااسٹرکچر کو نشانہ بنانا شروع کر دیا ہے۔ تازہ حملوں میں تعلیمی، فلاحی اور طبی مراکز کو بھی نشانہ بنائے جانے کی اطلاعات سامنے آئی ہیں، جس پر عالمی سطح پر تشویش بڑھ گئی ہے۔

ذرائع کے مطابق ایران کی معروف جامعات میں شمار ہونے والی شہید بہشتی یونیورسٹی پر بمباری کی گئی، جس سے عمارت کے مختلف حصوں کو شدید نقصان پہنچا۔ عینی شاہدین کا کہنا ہے کہ حملے کے بعد علاقے میں خوف و ہراس پھیل گیا جبکہ ریسکیو ٹیمیں فوری طور پر جائے وقوعہ پر پہنچ گئیں۔دوسری جانب جنوبی ایرانی شہر بوشہر میں ہلال احمر کے ایک گودام کو ڈرون حملے میں نشانہ بنایا گیا۔ اس حملے کے نتیجے میں امدادی سامان کو نقصان پہنچنے کی اطلاعات ہیں، جس سے متاثرہ علاقوں میں انسانی امداد کی فراہمی متاثر ہونے کا خدشہ پیدا ہو گیا ہے۔

عالمی ادارہ صحت کے مطابق حالیہ حملوں میں اب تک کم از کم 20 طبی مراکز تباہ ہو چکے ہیں، جس کے باعث زخمیوں کو بروقت طبی امداد کی فراہمی میں شدید مشکلات کا سامنا ہے۔ ماہرین کا کہنا ہے کہ صحت کے نظام پر یہ حملے انسانی بحران کو مزید سنگین بنا سکتے ہیں۔گزشتہ روز امریکی افواج نے دارالحکومت تہران اور صنعتی شہر کراج کو ملانے والے خطے کے سب سے بڑے پل کو بھی تباہ کر دیا، جس سے نقل و حمل کا نظام شدید متاثر ہوا اور شہریوں کو مشکلات کا سامنا کرنا پڑ رہا ہے۔

دریں اثنا ایران کے مذہبی شہر قم میں سابق چیف آف اسٹاف عبدالرحیم موسوی کو سپرد خاک کر دیا گیا۔ ان کی نماز جنازہ میں بڑی تعداد میں شہریوں اور حکومتی شخصیات نے شرکت کی اور انہیں خراجِ عقیدت پیش کیا۔اسی طرح ایرانی نیوی کے کمانڈر علی رضا تنگسیری کی نماز جنازہ بھی ادا کی گئی، جس میں ہزاروں افراد نے شرکت کی۔ شرکاء نے مرحومین کی خدمات کو سراہتے ہوئے قومی یکجہتی کا اظہار کیا۔

علاوہ ازیں ایرانی صدر مسعود پزشکیان کا کہنا ہے کہ جب امریکی عوام سے مخاطب تھا تب ہمارے رہنماؤں پر حملے کیے گئے۔انہوں نے کہا کہ خارجہ پالیسی کے سربراہ کو نشانہ بنایا گیا، ان کی اہلیہ بھی شہید ہوگئیں۔ایرانی صدر مسعود پزشکیان نے شکوہ کرتے ہوئے کہا کہ دنیا فیصلہ کرے کہ کون مذاکرات کا حامی اور کون دہشت گردی میں ملوث ہے؟۔

دوسری جانب ایران کی اسرائیل پر یلغار، صیہونی ریاست پر میزائلوں کی بوچھاڑ کردی، 7 شہروں میں 17 مقامات پر میزائل داغ دیے۔رپورٹ کے مطابق تل ابیب سمیت مختلف علاقوں میں سائرن بج اٹھے، ہر طرف تباہی کے مناظر، آگ بھڑک اٹھی، بنی براک میں متعدد اسرائیلی شہری زخمی ہوگئے۔

امریکی صدر ڈونلڈ ٹرمپ نے کہا کہ ایف 16 طیارےکی تباہی سے ایران سے مذاکرات پر اثر نہیں پڑےگا۔

صدر ٹرمپ نے کہا یہ جنگ ہے اور ہم حالت جنگ میں ہیں، جنگی طیارے کی تباہی سے سفارتی عمل متاثر نہیں ہوگا، انہوں نے یہ بھی کہا کہ ابھی نہیں کہہ سکتاکہ لاپتا عملے کے رکن کو نقصان پہنچایاگیا تو امریکاکیا اقدام کرےگا۔

واضح رہے کہ ایران نے ایک ہی روز میں امریکا کے تین طیارے مار گرائے ہیں۔پاسداران انقلاب کا کہنا ہےکہ ایرانی فوج نے امریکا کا ایف تھرٹی فائیو طیارہ وسطی ایران میں مار گرایا ہے۔امریکا کے ایک تباہ طیارے کا پائلٹ ایران میں سیکیورٹی فورسز کی جانب سے گرفتار کیے جانے کی متضاد اطلاعات ہیں۔پاسداران نے امریکا کے اے 10 لڑاکا طیارے کو جنوبی ایران میں خلیجی فارس میں آبنائے ہرمز کے قریب مار گرایا ہے تاہم برطانوی میڈیا کے مطابق پائلٹ بچ نکلا،ایران نے امریکا کے ایف 15 طیارے کو بھی نشانہ بنایا، جسے ریسکیو کرنے کے لیے آئے دو ہیلی کاپٹروں پربھی حملے کیے گئے،یہ ہیلی کاپٹر پائلٹ کو ریسکیو کر کے لے جارہے تھے۔ فائرنگ سے ان ہیلی کاپٹروں کا عملہ زخمی ہوا۔مغربی میڈیا کا دعویٰ ہے کہ ہیلی کاپٹر لینڈ کر گئے مگر ایرانی میڈیا نے ایک ویڈیو جاری کی ہے جس میں دکھایا گیا ہےکہ ایک ہیلی کاپٹر نشانہ بنائے جانے سے آگ لگ گئی اور وہ نیچے جاگرا۔ایرانی میڈیا کے مطابق جمعہ امریکی فضائیہ کے لیےایران میں سیاہ ترین دن رہا۔ ایرانی فوج نے امریکا کا ایک لڑاکا طیارہ اور پانچ دیگر ایئرکرافٹ تباہ کردیے ہیں۔غیر ملکی میڈیا کے مطابق ایران میں داخل ہونے والا ہر طیارہ ملک کے فضائی دفاعی نظام نے کیمرے سے دیکھ لیا تھا اور اسے باآسانی ہدف بنایا گیا۔

ایران کی سیکیورٹی فورس پاسداران انقلاب نے دعویٰ کیا ہے کہ اس نے اسرائیل کے اہم شہر تل ابیب میں واقع خفیہ ایجنسی موساد کے ہیڈکوارٹر کو میزائل حملے میں تباہ کر دیا ہے۔

میڈیا رپورٹس کے مطابق حملے کے دوران ایک بلند و بالا عمارت کے قریب زور دار دھماکے کی آواز سنی گئی جبکہ فضا میں آگ کا بڑا گولہ بلند ہوتا بھی دیکھا گیا۔ تاہم اسرائیلی حکام کی جانب سے اس دعوے کی تاحال باضابطہ تصدیق یا تردید سامنے نہیں آئی۔عینی شاہدین کے مطابق ایرانی میزائل حملوں کے دوران شہریوں میں شدید خوف و ہراس پھیل گیا اور کئی افراد نے محفوظ مقامات پر پناہ لینے کی کوشش کی۔ رپورٹس میں یہ بھی بتایا جا رہا ہے کہ کچھ شہری ایک اسرائیلی وزیر کے گھر میں قائم شیلٹر تک پہنچے، تاہم مبینہ طور پر وزیر کی جانب سے دروازہ نہیں کھولا گیا، جس پر عوامی سطح پر غم و غصہ دیکھا جا رہا ہے۔

دوسری جانب پاسداران انقلاب نے اپنے بیان میں آج کے دن کو امریکا کے لیے “سیاہ دن” قرار دیتے ہوئے دعویٰ کیا ہے کہ جدید ترین فضائی دفاعی نظام کے ذریعے 2 طیارے، 5 ڈرونز اور 2 کروز میزائل تباہ کر دیے گئے ہیں۔

خلیجی خطے میں جاری کشیدگی نے اب عالمی ٹیکنالوجی کے شعبے کو بھی اپنی لپیٹ میں لے لیا ہے، جہاں ایران کے حالیہ حملوں کے نتیجے میں ایمازون کی کلاؤڈ سروس، ایمازون ویب سروس، کے بحرین اور دبئی میں موجود اہم ڈیٹا سینٹرز کو شدید نقصان پہنچا ہے۔

ذرائع کے مطابق ان حملوں کے باعث دونوں مقامات پر موجودا یمازون ویب سروس کے “ایویلیبیلٹی زونز” (Availability Zones) میں سے کچھ مکمل طور پر بند ("ہارڈ ڈاؤن”) ہو چکے ہیں جبکہ دیگر جزوی طور پر متاثر ہونے کے باوجود محدود پیمانے پر کام کر رہے ہیں۔ اندرونی کمپنی مراسلے کے مطابق ان سروسز کی بحالی میں طویل وقت لگ سکتا ہے۔ایمازون ویب سروس کے اندرونی پیغام میں ملازمین کو ہدایت دی گئی ہے کہ بحرین اور دبئی کے متاثرہ ریجنز کو فی الحال کم ترجیح دی جائے۔ مراسلے میں کہا گیا "یہ دونوں ریجنز اب بھی متاثر ہیں، اور سروسز سے یہ توقع نہیں رکھی جا سکتی کہ وہ معمول کی کارکردگی اور استحکام کے ساتھ چلیں گی۔”مزید بتایا گیا کہ کمپنی متاثرہ صارفین کو دیگر محفوظ ریجنز میں منتقل کرنے کے لیے ہنگامی بنیادوں پر اقدامات کر رہی ہے، اور سسٹمز کو کم سے کم وسائل پر چلانے کی ہدایت دی گئی ہے تاکہ صارفین کی منتقلی میں آسانی ہو۔

اطلاعات کے مطابق بحرین میں ایمازون ویب سروس کے ڈیٹا سینٹرز پر متعدد بار حملے کیے گئے، جن میں ایک حملہ بدھ کے روز ہوا جس کے نتیجے میں آگ بھڑک اٹھی۔ اسی طرح متحدہ عرب امارات، خصوصاً دبئی میں بھی ان تنصیبات کو نشانہ بنایا گیا، جس سے انفراسٹرکچر کو شدید نقصان پہنچا۔ایمازون ویب سروس کے ہر ریجن میں عام طور پر تین ایویلیبیلٹی زونز ہوتے ہیں، تاہم موجودہ صورتحال میں بعض مکمل طور پر بند جبکہ دیگر جزوی طور پر متاثر ہو چکے ہیں۔

ایرانی پاسداران انقلاب کی جانب سے مزید امریکی ٹیکنالوجی کمپنیوں کو بھی نشانہ بنانے کی دھمکیاں سامنے آئی ہیں، جن میں گوگل،مائیکروسافٹ اور ایپل شامل ہیں۔ ماہرین کے مطابق یہ صورتحال عالمی ڈیجیٹل انفراسٹرکچر کے لیے ایک سنگین خطرہ بن سکتی ہے۔ایمازن کے ترجمان نے تصدیق کی ہے کہ کمپنی متاثرہ صارفین کو دیگر ایمازون ویب سروس ریجنز میں منتقل کرنے میں مدد فراہم کر رہی ہے، اور بڑی تعداد میں صارفین پہلے ہی کامیابی سے اپنی ایپلی کیشنز کو منتقل کر چکے ہیں۔”ہم مسلسل متاثرہ صارفین کی مدد کر رہے ہیں اور انہیں متبادل ریجنز میں منتقل کیا جا رہا ہے۔”

یہ واضح نہیں کہ بحرین اور دبئی کے ڈیٹا سینٹرز کب مکمل طور پر بحال ہو سکیں گے، جس سے خطے میں ڈیجیٹل سروسز اور آن لائن کاروباروں کو شدید مشکلات کا سامنا ہے۔