Blog

28 فروری سے 3 اپریل 2026 تک جاری رہنے والے مبینہ فوجی آپریشن کے دوران امریکی فضائیہ کو بھاری نقصان اٹھانا پڑا ہے۔ مختلف اوپن سورس انٹیلیجنس رپورٹس، کی جانب سے جاری کردہ اعداد و شمار کے مطابق، متعدد جدید طیارے اور فوجی اثاثے تباہ یا شدید متاثر ہوئے۔

رپورٹس کے مطابق جدید اسٹیلتھ لڑاکا طیارہ F-35 Lightning II ایرانی فضائی دفاعی نظام کی زد میں آ کر نقصان کا شکار ہوا۔ اس طیارے کی فی یونٹ لاگت تقریباً 110 ملین ڈالر بتائی جاتی ہے۔اسی طرح F-15E Strike Eagle کے چار طیارے تباہ ہوئے، جن میں سے تین کویت کے اوپر جبکہ ایک ایران کے اندر مار گرایا گیا۔ اس طیارے کی ابتدائی لاگت 1998 میں 270 ملین ڈالر تھی جو اب اندازاً 700 ملین ڈالر تک جا پہنچی ہے۔مزید برآں، قریبی فضائی مدد فراہم کرنے والا A-10 Thunderbolt II بھی ایرانی میزائل سسٹم کا نشانہ بنا، جس کی مالیت تقریباً 18.8 ملین ڈالر ہے۔اہم فضائی نگرانی طیارہ E-3 Sentry AWACS کو سعودی عرب کے پرنس سلطان ایئر بیس پر تباہ کر دیا گیا، جس کی لاگت تقریباً 40 ملین ڈالر بتائی جاتی ہے۔

ہیلی کاپٹروں کے حوالے سے بھی نقصانات رپورٹ ہوئے ہیں، جن میں ایک HH-60M Black Hawk عراق میں تباہ جبکہ دو HH-60W Jolly Green II ایران کے اوپر پرواز کے دوران نقصان کا شکار ہوئے۔ایندھن کی فراہمی کے لیے استعمال ہونے والے KC-135 Stratotanker طیاروں میں سے کم از کم دو مکمل طور پر تباہ جبکہ پانچ کو شدید نقصان پہنچا۔

ڈرونز کے محاذ پر بھی امریکی فوج کو بڑا دھچکا لگا، جہاں 17 MQ-9 Reaper یو سی اے ویز تباہ ہونے کی اطلاعات ہیں۔ ایک MQ-9 ریپر کی قیمت تقریباً 30 ملین ڈالر بتائی جاتی ہے۔

واشنگٹن: امریکی صدر ڈونلڈ ٹرمپ نے ایران کے پاس موجود 400 کلوگرام سے زائد افزودہ یورینیئم اپنے قبضے میں لینے کا امکان ظاہر کیا ہے، تاہم دفاعی ماہرین نے اس نوعیت کے کسی بھی فوجی مشن کو انتہائی خطرناک اور پیچیدہ قرار دے دیا ہے۔

امریکی صدر کے بیان کے مطابق ایران کا تقریباً 60 فیصد تک افزودہ یورینیئم گہرائی میں زیرِ زمین محفوظ ہے، جس تک رسائی حاصل کرنا نہایت مشکل عمل ہوگا۔ انہوں نے کہا کہ امریکہ اس حوالے سے مختلف آپشنز پر غور کر رہا ہے، تاہم اس منصوبے کی عملی صورت حال چیلنجز سے بھرپور ہے۔

عالمی میڈیا رپورٹس اور تحقیق کاروں کے مطابق 28 فروری کو شروع ہونے والی جنگ کے وقت ایران کے پاس تقریباً 440 کلوگرام یورینیئم 60 فیصد تک افزودہ حالت میں موجود تھا، جسے باآسانی 90 فیصد تک بڑھا کر ہتھیاروں کے معیار تک پہنچایا جا سکتا ہے۔ اس کے علاوہ ایران کے پاس تقریباً 1000 کلوگرام یورینیئم 20 فیصد جبکہ 8500 کلوگرام 3.6 فیصد تک افزودہ شکل میں موجود ہے۔ماہرین کے مطابق ایران کا زیادہ تر اعلیٰ درجے کا افزودہ یورینیئم ممکنہ طور پر اصفہان میں محفوظ ہے، جو ایران کی اہم زیرِ زمین جوہری تنصیبات میں شامل ہے۔ اس مقام کو گزشتہ برس امریکی اور اسرائیلی فضائی حملوں میں نشانہ بھی بنایا جا چکا ہے۔

دفاعی تجزیہ کاروں کا کہنا ہے کہ ایران نے اپنی جوہری تنصیبات کو مزید مضبوط اور محفوظ بنا لیا ہے۔ خاص طور پر اصفہان میں سرنگوں کے داخلی راستے مٹی سے بند کیے جا چکے ہیں، جس کے باعث کسی بھی بیرونی فوجی کارروائی کو عملی جامہ پہنانا نہایت دشوار ہو گیا ہے۔ماہرین نے خبردار کیا ہے کہ اگر امریکہ اس طرح کا کوئی آپریشن شروع کرتا ہے تو اسے نہ صرف بھاری مشینری کے استعمال کی ضرورت پڑے گی بلکہ ممکنہ ایرانی جوابی حملوں کا بھی سامنا کرنا پڑ سکتا ہے، جس سے خطے میں کشیدگی مزید بڑھنے کا خدشہ ہے۔


اسرائیلی فوج نے دعویٰ کیا ہے کہ جنوبی لبنان میں ایک کارروائی کے دوران حزب اللہ کے 15 ارکان کو نشانہ بنا کر ہلاک کر دیا گیا۔
غیر ملکی میڈیا کے مطابق اسرائیلی فوج کے ترجمان آویچی ادرائی نے بتایا کہ اسرائیل کی 146 ویں ڈویژن نے ایک گروپ کی نشاندہی کی جو مبینہ طور پر اسرائیل کی جانب اینٹی ٹینک میزائل حملے کی منصوبہ بندی کر رہا تھا۔
‎انہوں نے کہا کہ اس کے بعد فضائی کارروائی کی گئی جس میں مذکورہ افراد کو نشانہ بنایا گیا۔ اسرائیلی فوج کے مطابق کارروائی کے بعد علاقے سے متعدد ہتھیار بھی برآمد کیے گئے جن میں رائفلیں اور دستی بم شامل ہیں۔
‎دوسری جانب حزب اللہ کی جانب سے اس دعوے یا ہلاکتوں کی تاحال تصدیق سامنے نہیں آئی۔
‎یہ پیش رفت ایسے وقت سامنے آئی ہے جب ایک روز قبل حزب اللہ نے اسرائیل پر 50 سے زائد راکٹ داغنے کا دعویٰ کیا تھا، جو یہودی تہوار پاس اوور کی ابتدائی تقریبات کے دوران کیے گئے۔
‎اس حملے کے نتیجے میں اسرائیل کے مختلف علاقوں میں خطرے کے سائرن بج اٹھے اور شہریوں کی بڑی تعداد حفاظتی پناہ گاہوں میں منتقل ہو گئی تھی۔
‎خطے میں جاری کشیدگی کے باعث صورتحال مسلسل نازک ہوتی جا رہی ہے اور دونوں جانب سے کارروائیوں میں تیزی دیکھی جا رہی ہے۔