Blog


یوکرین کے صدر ولودیمیر زیلنسکی نے خبردار کیا ہے کہ ایران میں جاری تنازع کے باعث امریکا کی توجہ یوکرین سے ہٹ رہی ہے، جس سے جنگی محاذ پر مشکلات بڑھ سکتی ہیں۔
امریکی میڈیا کو دیے گئے انٹرویو میں زیلنسکی نے کہا کہ اگر واشنگٹن کی توجہ مسلسل مشرقِ وسطیٰ کی جانب منتقل ہوتی رہی تو یوکرین کو ہتھیاروں اور دفاعی وسائل کی کمی کا سامنا کرنا پڑ سکتا ہے، جو جنگ کے نتائج پر اثر انداز ہو سکتا ہے۔
‎انہوں نے کہا کہ ایران میں طویل جنگ روس کے لیے فائدہ مند ثابت ہو رہی ہے، خاص طور پر اس کی تیل پر مبنی معیشت کو تقویت مل رہی ہے۔ زیلنسکی نے الزام عائد کیا کہ روس ایران کی حمایت کے ساتھ ساتھ اسے سیٹلائٹ تصاویر اور جنگی تجربات بھی فراہم کر رہا ہے۔
‎ان کے مطابق روس ایران کے ساتھ وہی حکمت عملی اختیار کر رہا ہے جو اس نے یوکرین میں اپنائی تھی، جبکہ ممکنہ طور پر امریکی اور اتحادی اڈوں سے متعلق معلومات بھی شیئر کی جا رہی ہیں۔
‎زیلنسکی کا کہنا تھا کہ یوکرین نے مشرقِ وسطیٰ کے رہنماؤں کو اس حوالے سے اہم معلومات فراہم کر دی ہیں تاکہ صورتحال کے اثرات سے نمٹا جا سکے۔
‎انہوں نے زور دیا کہ ایران کے تنازع کا حل جلد از جلد سفارتی ذرائع سے نکالا جانا چاہیے، کیونکہ اگر امریکا کی توجہ مشرقِ وسطیٰ پر مرکوز رہی اور روس پر پابندیوں میں نرمی آئی تو یہ یوکرین کے لیے سنگین خطرہ بن سکتا ہے۔


ایرانی صدر مسعود پزشکیان نے دوٹوک انداز میں کہا ہے کہ جاری جنگ کا خاتمہ ایران کی اپنی شرائط پر ہی ہوگا اور کسی دباؤ کو قبول نہیں کیا جائے گا۔
اپنے بیان میں انہوں نے کہا کہ ایران اپنے عوام کی عزت اور قومی مفادات کا ہر قیمت پر تحفظ کرے گا۔ ان کا کہنا تھا کہ موجودہ حالات میں ایران مضبوطی کے ساتھ کھڑا ہے اور عالمی سطح پر ایک باوقار مقام رکھتا ہے۔
‎مسعود پزشکیان نے ایرانی مسلح افواج کے کردار کو سراہتے ہوئے کہا کہ ملک کی سلامتی اور دفاع میں افواج نے تاریخی کردار ادا کیا ہے، جس پر پوری قوم کو فخر ہے۔
‎دوسری جانب ایرانی وزارت خارجہ کے ترجمان اسماعیل بقائی نے واضح کیا ہے کہ امریکا کے ساتھ کوئی براہ راست مذاکرات نہیں ہو رہے بلکہ پیغامات صرف ثالثوں کے ذریعے پہنچائے جا رہے ہیں۔
‎انہوں نے امریکی مطالبات کو غیر حقیقت پسندانہ اور حد سے زیادہ قرار دیتے ہوئے کہا کہ ان شرائط کے تحت کسی معاہدے کا امکان کم ہے۔
‎ماہرین کے مطابق ایران کا سخت مؤقف ظاہر کرتا ہے کہ خطے میں کشیدگی کے خاتمے کے لیے سفارتی کوششیں مزید پیچیدہ ہو سکتی ہیں، جبکہ مذاکرات کا عمل بھی مشکل مرحلے میں داخل ہو گیا ہے۔

واشنگٹن: ڈونلڈ ٹرمپ کی برطانیہ پر ناراضی ایک بار پھر کھل کر سامنے آگئی ہے، جہاں انہوں نے ایران کے خلاف جاری جنگ میں تعاون نہ کرنے پر سخت بیانات دیے ہیں۔

امریکی صدر نے ماضی میں بھی برطانیہ کے مؤقف پر ناپسندیدگی ظاہر کی تھی، خاص طور پر اس وقت جب جنگ کے آغاز پر برطانیہ نے امریکہ کو ڈیگو گارشیا بیس استعمال کرنے کی اجازت دینے سے انکار کردیا تھا۔ یہ اڈہ بحرِ ہند میں واقع ایک اہم مشترکہ فوجی تنصیب ہے۔گزشتہ ہفتے ٹرمپ نے ایک بار پھر برطانوی پالیسی کو نشانہ بناتے ہوئے وزیر اعظم سر کیئر اسٹارمر کو شدید تنقید کا نشانہ بنایا۔ انہوں نے کہا کہ اسٹارمر نے “بڑی غلطی” کی اور برطانوی جنگی جہازوں کو “کھلونے” قرار دیا۔ٹرمپ نے اس سے قبل بھی برطانیہ کی جانب سے ایران کے خلاف کارروائی میں حصہ نہ لینے پر ردعمل دیتے ہوئے کہا تھا کہ اسٹارمر “ونسٹن چرچل جیسے رہنما نہیں ہیں”۔امریکی صدر نے مزید کہا کہ وہ برطانوی وزیر اعظم کے فیصلے سے “بہت مایوس” ہیں، خاص طور پر اس وقت جب ابتدائی حملوں میں امریکہ کو برطانوی فضائی اڈے استعمال کرنے کی اجازت نہیں دی گئی۔

ٹرمپ نے آبنائے ہرمز کا حوالہ دیتے ہوئے حالیہ بیان میں برطانیہ کو طنزیہ مشورہ دیا کہ وہ اپنا تیل خود حاصل کرے۔ اپنے سوشل میڈیا پلیٹ فارم پر جاری پیغام میں انہوں نے کہا “جو ممالک آبنائے ہرمز کی صورتحال کی وجہ سے جیٹ فیول حاصل نہیں کر پارہے، جیسے برطانیہ، انہیں چاہیے کہ یا تو امریکہ سے خریدیں یا خود جا کر حاصل کریں۔”انہوں نے مزید کہا کہ “امریکہ ہمیشہ مدد کے لیے موجود نہیں ہوگا، جیسے آپ ہمارے ساتھ نہیں تھے۔”

بعد ازاں برطانوی حکومت نے وضاحت کی کہ اس نے صرف “دفاعی نوعیت” کی امریکی کارروائیوں کے لیے اپنے اڈے استعمال کرنے کی اجازت دی ہے۔تجزیہ کاروں کے مطابق ایران جنگ کے معاملے پر امریکہ اور برطانیہ کے درمیان اختلافات مغربی اتحاد میں دراڑ کی نشاندہی کر رہے ہیں، جو مستقبل کی عالمی سفارتکاری پر اثر انداز ہوسکتے ہیں۔

بھارت کی شورش زدہ ریاست منی پور میں حریف گروپوں کے درمیان جھڑپوں میں ایک ناگا گروپ کے چار ارکان ہلاک گئے۔

یہ واقعہ بھارت میانمار سرحد پر واقع ضلع کامجونگ میں کسوم کھلن بلاک کے علاقے ہانگبی کے قریب پیش آیا۔عہدیداروں نے بتایا کہ نیشنل سوشلسٹ کونسل آف ناگالیم (این ایس سی این) کے ایک دھڑے سے تعلق رکھنے والے کارکنوں پر ایک دوسرے حریف دھڑے کے مشتبہ ارکان نے سرحدی علاقے میں لکڑی اور دیگر سرگرمیوں کی نگرانی سے واپسی کے دوران گھات لگا کر حملہ کیا۔ حملے کے دوران چھ میں سے چار ارکان مارے گئے جبکہ دو دیگر زخمی ہو کر فرار ہونے میں کامیاب ہو گئے۔مرنے والوں کی شناخت سوچیپم پھنگشوک، زائرے واسہ، بہنلے اہلہپیا اور تھانسومی واشی کے طور پر ہوئی ہے۔

گروپ نے ایک بیان میں اپنے ارکان کی ہلاکت پر دکھ کا اظہار کرتے ہوئے دعویٰ کیا کہ انہیں اپنے فرائض کی انجام دہی کے دوران گولی مار دی گئی۔ اس نے الزام لگایا کہ گروپوں کے درمیان پہلے سے بات چیت کے باوجود حملہ آوروں نے اعلیٰ حکام کے حکم پر فائرنگ کی۔