Blog

جرمنی کے فرینکفرٹ ائیرپورٹ پر مسافروں کی بورڈنگ سے قبل ایک نیا بوئنگ 787-9 طیارہ اچانک نوز گیئر بیٹھ جانے کے باعث زمین سے ٹکرا گیا، جس کے نتیجے میں عملے اور زمینی اسٹاف کے متعدد افراد زخمی ہوگئے۔

میڈیا رپورٹس کے مطابق لفتھانسا ایئرلائن کا بوئنگ 787-9 ڈریم لائنر جمعرات کے روز فرینکفرٹ ائیرپورٹ کے برج A15 پر لاس اینجلس جانے والی پرواز LH-450 کے لیے تیار کھڑا تھا کہ اچانک اس کا اگلا لینڈنگ گیئر (نوز گیئر) گر گیا، جس سے طیارے کا اگلا حصہ دھڑام سے زمین پر آ گرا،حادثے کے وقت طیارے میں کوئی مسافر سوار نہیں تھا اور بورڈنگ کا عمل شروع ہونے والا تھا۔ طیارے میں صرف کیبن کریو اور زمینی عملے کے ارکان موجود تھے۔

لفتھانسا ایئرلائن کے ترجمان کے مطابق حادثے میں متعدد افراد کو معمولی نوعیت کی چوٹیں آئیں۔ زخمیوں میں کیبن کریو کے دو ارکان اور گراؤنڈ ہینڈلنگ کمپنی کے کئی ملازمین شامل ہیں، جنہیں طبی معائنے اور علاج کے لیے اسپتال منتقل کر دیا گیا۔متاثرہ بوئنگ 787-9 طیارہ صرف پانچ ماہ قبل لفتھانسا کے بیڑے میں شامل کیا گیا تھا اور اس نے رواں سال جنوری میں اپنی پہلی تجارتی پرواز انجام دی تھی،واقعے کے بعد ائیرپورٹ اور ایئرلائن حکام نے حادثے کی وجوہات جاننے کے لیے تحقیقات کا آغاز کر دیا ہے، جبکہ طیارے کو سروس سے عارضی طور پر ہٹا دیا گیا ہے۔

روس کے صدر ولادیمیر پیوٹن نے پاکستان سے متعلق منفی سوال کرنے پر بھارتی صحافی کو لاجواب کر دیا،بھارتی صحافی کو روسی صدر کے سامنے منہ کی کھانا پڑ گئی

سینٹ پیٹرزبرگ اکنامک فورم کے دوران بھارتی صحافی کے سوال پر روسی صدر پیوٹن نےکہا یہ کہنا غلط ہے کہ پاکستان چین کے زیر اثر ہے، پاکستان ایک بڑا ملک ہے اور اس کے مختلف ملکوں سے تعلقات ہیں، روس نے چین کے ساتھ ہمیشہ فوجی میدان میں تعاون کیا اور ایسا کرنا جاری رکھیں گے،

ایران سے متعلق سوال پر پیوٹن کا کہنا تھا کہ روس کا ایران کے ساتھ اعتماد کا تعلق ہے، بحران حل کرنے میں مدد کرسکتے ہیں،انہوں نے مزید کہا کہ روس نے حال ہی میں یوکرین کا 2ہزار 440 مربع کلومیٹر کا علاقہ قبضے میں لیا، ہم یوکرین کے ساتھ پرامن طریقے سے ڈیل کرنے کیلئے بھی تیار ہیں،

‎امریکا اور ایران کے درمیان جاری مذاکرات ایک اہم مرحلے میں داخل ہو چکے ہیں اور دونوں ممالک ممکنہ معاہدے کے قریب پہنچ گئے ہیں، تاہم ایران کے منجمد مالی اثاثوں کی رہائی کا معاملہ اب بھی حتمی اتفاقِ رائے میں بڑی رکاوٹ بنا ہوا ہے۔
‎ذرائع کے مطابق واشنگٹن اور تہران کے درمیان ہونے والے مذاکرات میں اس بات پر تفصیلی غور کیا جا رہا ہے کہ معاہدے کے تحت ایران کے منجمد فنڈز کا ایک حصہ کس طریقہ کار کے ذریعے جاری کیا جائے گا۔ یہ معاملہ مذاکرات کے آخری مرحلے میں سب سے پیچیدہ اور حساس موضوعات میں شمار کیا جا رہا ہے۔
‎ذرائع نے بتایا کہ اگرچہ مجوزہ معاہدے کے متعدد اہم نکات پر پیش رفت ہو چکی ہے، لیکن منجمد اثاثوں کے اجرا، ان کے استعمال اور تقسیم کے طریقہ کار پر دونوں فریق اب بھی مشاورت کر رہے ہیں۔ ماہرین کے مطابق یہ مسئلہ حتمی معاہدے کی کامیابی کے لیے کلیدی حیثیت رکھتا ہے۔
‎مذاکرات سے باخبر ذرائع کا کہنا ہے کہ مجموعی طور پر معاہدہ اپنے آخری مراحل میں داخل ہو چکا ہے اور سفارتی سطح پر کوششیں جاری ہیں تاکہ باقی ماندہ اختلافات کو دور کر کے باضابطہ معاہدے کی راہ ہموار کی جا سکے۔
‎حالیہ پیش رفت ایسے وقت میں سامنے آئی ہے جب عالمی سطح پر یہ توقعات بڑھ رہی ہیں کہ کئی ماہ سے جاری مذاکرات کے بعد امریکا اور ایران جلد کسی جامع سمجھوتے تک پہنچ سکتے ہیں۔ دونوں ممالک کے درمیان تعلقات گزشتہ کئی برسوں سے مختلف سیاسی اور اقتصادی تنازعات کے باعث کشیدہ رہے ہیں۔
‎ذرائع کے مطابق امریکی صدر ڈونلڈ ٹرمپ نے ثالثی کرنے والے فریقوں کو واضح پیغام دیا ہے کہ وہ معاہدے پر باضابطہ دستخط سے قبل ایران کے کسی بھی منجمد فنڈ کی رہائی کے حق میں نہیں ہیں۔ ان کا مؤقف ہے کہ تمام شرائط کو حتمی شکل دیے بغیر مالی معاملات پر عملدرآمد نہیں ہونا چاہیے۔
‎سیاسی مبصرین کا کہنا ہے کہ منجمد فنڈز کے معاملے پر اختلافات کے باوجود مذاکرات کا جاری رہنا ایک مثبت اشارہ ہے اور اگر باقی رکاوٹیں دور ہو گئیں تو دونوں ممالک کے درمیان ایک اہم سفارتی پیش رفت سامنے آ سکتی ہے۔

‎امریکی صدر ڈونلڈ ٹرمپ نے ایوان نمائندگان میں منظور ہونے والی اس قرارداد پر شدید تنقید کی ہے جس کا مقصد ایران کے خلاف مزید فوجی کارروائیوں کے حوالے سے صدارتی اختیارات کو محدود کرنا ہے۔ صدر ٹرمپ نے اس اقدام کو "بے معنی” قرار دیتے ہوئے کہا ہے کہ یہ ایسے وقت میں کیا گیا جب ایران کے ساتھ مذاکرات انتہائی اہم مرحلے میں داخل ہو چکے ہیں۔
‎صدر ٹرمپ نے جمعرات کو اپنے سوشل میڈیا پلیٹ فارم ٹروتھ سوشل پر جاری بیان میں کہا کہ ایوان نمائندگان میں ہونے والے ووٹ میں چار ریپبلکن ارکان اور تمام ڈیموکریٹس نے ان کے اختیارات محدود کرنے کی کوشش کی۔ ان کے مطابق یہ اقدام ایسے وقت میں سامنے آیا جب واشنگٹن اور تہران کے درمیان مذاکرات اپنے حتمی مراحل میں ہیں۔
‎امریکی صدر نے کہا کہ جب سفارتی کوششیں جاری ہوں اور اہم پیش رفت متوقع ہو تو اس قسم کی سیاسی کارروائیاں قومی مفادات کے خلاف تصور کی جا سکتی ہیں۔ انہوں نے الزام عائد کیا کہ بعض سیاسی عناصر ان کی کامیابیوں کو تسلیم کرنے کے بجائے سیاسی مخالفت کو ترجیح دے رہے ہیں۔
‎ٹرمپ نے قرارداد کے حق میں ووٹ دینے والے چار ریپبلکن ارکان کو بھی تنقید کا نشانہ بنایا اور کہا کہ انہیں اپنے فیصلے پر شرمندہ ہونا چاہیے۔ ان کا مؤقف تھا کہ اس قسم کے اقدامات امریکا کے مذاکراتی مؤقف کو کمزور کر سکتے ہیں۔
‎واضح رہے کہ امریکی ایوان نمائندگان نے بدھ کے روز 208 کے مقابلے میں 215 ووٹوں سے ایک قرارداد منظور کی تھی جس کا مقصد صدر کو ایران کے خلاف مزید فوجی کارروائیوں سے روکنا ہے۔ اس قرارداد کی حمایت میں تمام ڈیموکریٹس کے علاوہ چار ریپبلکن ارکان نے بھی ووٹ دیا تھا۔
‎یہ چوتھی مرتبہ ہے کہ امریکی قانون ساز ادارہ صدر ٹرمپ کے جنگی اختیارات کو محدود کرنے کی کوشش کر رہا ہے۔ تاہم یہ قرارداد ابھی امریکی سینیٹ سے منظور ہونا باقی ہے، جہاں ریپبلکن پارٹی کو اکثریت حاصل ہے۔
‎سیاسی تجزیہ کاروں کے مطابق اگر قرارداد سینیٹ سے منظور بھی ہو جاتی ہے تو صدر ٹرمپ اسے ویٹو کر سکتے ہیں۔ ایسی صورت میں کانگریس کو صدارتی ویٹو ختم کرنے کے لیے دونوں ایوانوں میں دو تہائی اکثریت درکار ہوگی، جو حاصل کرنا آسان نہیں سمجھا جا رہا۔

‎دنیا کے معروف کاروباری شخصیت اور ٹیکنالوجی کمپنیوں کے سربراہ ایلون مسک نے موٹروے زیادتی کیس میں پاکستانی عدالت کے فیصلے کو سراہتے ہوئے اس پر مثبت ردعمل کا اظہار کیا ہے۔ ان کی جانب سے یہ ردعمل اس وقت سامنے آیا جب لاہور ہائی کورٹ نے کیس کے دونوں مجرموں کی سزاؤں کے خلاف دائر اپیلیں مسترد کر دیں۔
‎لاہور ہائی کورٹ نے موٹروے گینگ ریپ کیس کے مجرموں عابد ملہی اور شفقت بگا کی سزائے موت کے خلاف اپیلوں پر فیصلہ سناتے ہوئے انسدادِ دہشت گردی عدالت کی جانب سے دی گئی سزائیں برقرار رکھنے کا حکم دیا۔ عدالت نے فریقین کے دلائل مکمل ہونے کے بعد فیصلہ محفوظ کیا تھا، جسے بعد ازاں سنایا گیا۔
‎یاد رہے کہ موٹروے زیادتی کا یہ واقعہ ملک بھر میں شدید غم و غصے کا سبب بنا تھا اور اس نے خواتین کے تحفظ اور قانون نافذ کرنے والے اداروں کی کارکردگی پر اہم بحث کو جنم دیا تھا۔ بعد ازاں انسدادِ دہشت گردی عدالت نے 20 مارچ 2021 کو دونوں ملزمان کو زیادتی کے جرم میں سزائے موت سنائی تھی۔
‎عدالتی فیصلے کے بعد دونوں مجرموں نے 25 مارچ 2021 کو لاہور ہائی کورٹ سے رجوع کرتے ہوئے سزا کے خلاف اپیلیں دائر کی تھیں۔ طویل قانونی کارروائی اور مختلف سماعتوں کے بعد عدالت نے اپیلیں مسترد کرتے ہوئے سزائے موت برقرار رکھنے کا فیصلہ سنایا۔
‎رپورٹس کے مطابق ایلون مسک نے اس عدالتی فیصلے کو انصاف کی فراہمی کے تناظر میں مثبت قرار دیا اور اس پر اطمینان کا اظہار کیا۔ ان کے تبصرے کے بعد سوشل میڈیا پر بھی اس معاملے پر مختلف آراء سامنے آئیں اور متعدد صارفین نے فیصلے کو اہم قرار دیا۔
‎قانونی ماہرین کا کہنا ہے کہ لاہور ہائی کورٹ کے فیصلے کے بعد مقدمہ اپنے ایک اہم مرحلے میں داخل ہو گیا ہے۔ یہ کیس پاکستان میں خواتین کے خلاف جرائم اور ان کے خلاف قانونی کارروائیوں کے حوالے سے نمایاں مقدمات میں شمار کیا جاتا ہے۔