Blog


ایران سے متعلق جنگی پالیسی پر اختلافات کے باعث ٹرمپ انتظامیہ کو بڑا دھچکا لگا ہے، جہاں نیشنل کاؤنٹر ٹیررازم سینٹر کے ڈائریکٹر جو کینٹ نے اپنے عہدے سے استعفیٰ دے دیا ہے۔
‎غیر ملکی خبررساں ادارے کے مطابق جو کینٹ نے احتجاجاً استعفیٰ دیتے ہوئے مؤقف اختیار کیا کہ ایران سے امریکا کو فوری طور پر کوئی براہ راست خطرہ لاحق نہیں تھا، جبکہ جنگ کا آغاز اسرائیل اور اس سے منسلک اثر و رسوخ رکھنے والے حلقوں کے دباؤ پر کیا گیا۔
‎ان کے استعفے پر وائٹ ہاؤس کی جانب سے فوری طور پر کوئی باضابطہ ردعمل سامنے نہیں آیا۔
‎جو کینٹ بطور سربراہ نیشنل کاؤنٹر ٹیررازم سینٹر دہشت گردی کے خطرات کی نگرانی، تجزیہ اور انسداد کی حکمت عملی کے ذمہ دار تھے۔
‎سرکاری ذمہ داریوں سے قبل وہ ریاست واشنگٹن سے کانگریس کے لیے انتخابی مہم بھی چلا چکے ہیں، تاہم کامیاب نہیں ہو سکے۔ اس کے علاوہ انہوں نے امریکی فوج میں گرین بیریٹ کے طور پر متعدد تعیناتیاں کیں اور بعد ازاں سی آئی اے میں بھی خدمات انجام دیں۔
‎یاد رہے کہ ان کی اہلیہ شینن کینٹ 2019 میں شام میں ایک خودکش حملے میں ہلاک ہو گئی تھیں۔


عالمی بحری تنظیم انٹرنیشنل میری ٹائم آرگنائزیشن کے سربراہ ارسینیو ڈومنگیز نے خبردار کیا ہے کہ آبنائے ہرمز سے گزرنے والے جہازوں کی حفاظت کو سو فیصد یقینی نہیں بنایا جا سکتا۔
ان کا کہنا تھا کہ موجودہ نگرانی کے نظام کے باوجود اس اہم سمندری گزرگاہ سے گزرنے والے جہاز مکمل طور پر محفوظ نہیں کہے جا سکتے، کیونکہ خطے میں جاری کشیدگی صورتحال کو غیر یقینی بنائے ہوئے ہے۔
‎ارسینیو ڈومنگیز نے مزید کہا کہ آبنائے ہرمز کو کھلا رکھنے کے لیے فوجی طاقت کا استعمال کوئی دیرپا یا پائیدار حل نہیں ہے، بلکہ اس کے لیے سفارتی اور مستقل اقدامات کی ضرورت ہے۔
‎انہوں نے اس بات پر زور دیا کہ عالمی تجارت کے لیے اس اہم راستے کی سلامتی یقینی بنانے کے لیے مشترکہ حکمت عملی اپنانا ناگزیر ہے۔

امریکی بحریہ کے جدید طیارہ بردار جہاز USS Gerald R. Ford میں گزشتہ ہفتے لگنے والی آگ پر قابو پانے میں 30 گھنٹوں سے زائد کا وقت لگ گیا، جس کے باعث جہاز پر موجود سینکڑوں اہلکار شدید مشکلات کا شکار ہو گئے۔

رپورٹس کے مطابق آگ گزشتہ جمعرات کو جہاز کے مرکزی لانڈری (کپڑے دھونے کے حصے) میں بھڑکی، جو دیکھتے ہی دیکھتے پھیل گئی۔ آگ بجھانے کے بعد معلوم ہوا کہ 600 سے زائد ملاحوں اور عملے کے افراد کے سونے کے بستر تباہ ہو گئے، جس کے باعث وہ اب فرش اور میزوں پر سونے پر مجبور ہیں۔امریکی سینٹرل کمانڈ کے مطابق واقعے میں دو اہلکار زخمی ہوئے جن کی حالت خطرے سے باہر ہے، تاہم جہاز پر موجود افراد نے بتایا کہ درجنوں اہلکار دھوئیں سے متاثر ہوئے اور انہیں سانس لینے میں مشکلات کا سامنا کرنا پڑا۔آگ کے بعد ایک غیر متوقع مسئلہ یہ بھی سامنے آیا کہ جہاز پر لانڈری کی سہولت معطل ہو گئی ہے، جس کے باعث اہلکار کئی دنوں سے کپڑے دھونے سے محروم ہیں۔

یہ واقعہ ایسے وقت پیش آیا ہے جب طیارہ بردار جہاز USS Gerald R. Ford تقریباً 10 ماہ سے مسلسل تعیناتی پر ہے۔ ماہرین کے مطابق عام طور پر ایسے مشنز چھ ماہ سے زیادہ نہیں ہوتے، اور طویل تعیناتی جہاز اور عملے دونوں کے لیے انتہائی تھکا دینے والی ثابت ہوتی ہے۔ریٹائرڈ امریکی نیوی کے ریئر ایڈمرل John Kirby نے کہا کہ طویل عرصے تک شدید نوعیت کی آپریشنل سرگرمیاں جاری رکھنا نہ صرف جہاز بلکہ عملے کی کارکردگی کو بھی متاثر کرتا ہے۔میڈیا رپورٹس کے مطابق امریکی بحریہ نے اس واقعے پر باضابطہ مؤقف دینے سے گریز کیا ہے۔ یہ طیارہ بردار جہاز اس وقت بحیرہ احمر میں ایران کے خلاف جاری امریکی فوجی کارروائیوں میں حصہ لے رہا ہے، جہاں پہلے ہی کشیدگی عروج پر ہے۔