Blog

عمان کے وزیر خارجہ سید بدر البوسعیدی نے کہا ہے کہ خطے میں جاری جنگ کا مقصد صرف ایران نہیں بلکہ پورے خطے کو کمزور کرنا اور اس کی نئی تشکیل کرنا ہے۔
ان کا کہنا تھا کہ اس جنگ کے ذریعے ایران کو کمزور کرنے اور خطے میں اسرائیل کے ساتھ تعلقات معمول پر لانے کے ایجنڈے کو آگے بڑھانے کی کوشش کی جا رہی ہے۔
‎وزیر خارجہ نے واضح کیا کہ عمان کسی جنگی اتحاد یا کونسل کا حصہ نہیں بنے گا اور نہ ہی اسرائیل کے ساتھ تعلقات معمول پر لانے کا ارادہ رکھتا ہے۔
‎انہوں نے کہا کہ سلطنت عمان مسلسل اس بات کی کوشش کر رہی ہے کہ جنگ کو روکا جائے اور سفارت کاری کے ذریعے مسئلے کا حل نکالا جائے کیونکہ جاری تنازع عمان اور پورے خطے کے مفادات کے لیے نقصان دہ ہے۔
‎سید بدر البوسعیدی نے مزید کہا کہ عمان نے اس جنگ یا کسی بھی جنگ میں کسی قسم کی مدد فراہم کرنے سے انکار کیا ہے اور خطے میں جاری بڑی تبدیلیوں کے باوجود عمان اپنی خارجہ پالیسی کے اصولوں پر قائم رہے گا۔

دبئی انٹرنیشنل ایئرپورٹ کے قریب دو ایرانی ڈرون گرنے کے نتیجے میں چار افراد زخمی ہو گئے ہیں جبکہ خطے میں کشیدگی کے باعث کئی بین الاقوامی پروازیں منسوخ کر دی گئی ہیں۔

مشرق وسطیٰ میں جاری جنگ کے باعث خلیجی خطے میں توانائی کی ترسیل اور فضائی سفر بھی متاثر ہو رہا ہے، جہاں ایران، اسرائیل اور امریکا کے درمیان حملوں کا سلسلہ جاری ہے۔

نیدرلینڈز کی ایئرلائن کے ایل ایم نے اعلان کیا ہے کہ خطے میں جاری جغرافیائی سیاسی کشیدگی کے باعث دبئی کے لیے تمام پروازیں 28 مارچ تک معطل کر دی گئی ہیں۔

ایئرلائن کے مطابق دبئی میں پھنسے مسافروں کو واپس اپنے ممالک پہنچانے کے لیے خصوصی انتظامات کیے جائیں گے جو نیدرلینڈز کی وزارت خارجہ کے تعاون سے انجام دیے جائیں گے۔

رپورٹس کے مطابق ایران نے خلیج فارس میں متعدد تجارتی جہازوں کو بھی نشانہ بنایا جبکہ دبئی ایئرپورٹ کو ہدف بنانے کے واقعے نے خطے میں کشیدگی کو مزید بڑھا دیا ہے۔


حزب اللہ نے لبنان سے میزائل حملہ کر کے اسرائیلی فوج کے کمیونیکیشن سسٹم کو نشانہ بنانے کا دعویٰ کیا ہے۔ رپورٹس کے مطابق حملے کے دوران ایک میزائل کو سیٹلائٹ کمیونیکیشن اسٹیشن سے ٹکراتے دیکھا گیا جبکہ اس واقعے میں دو اسرائیلی فوجی زخمی بھی ہوئے۔
حزب اللہ کے مطابق جس سیٹلائٹ اسٹیشن کو نشانہ بنایا گیا وہ اسرائیلی فوج کے کمیونیکیشنز اور سائبر ڈیفنس ڈویژن سے منسلک تھا۔
‎رپورٹس میں یہ بھی بتایا گیا ہے کہ رام اللہ میں اسرائیلی فوج کے ہوم فرنٹ کمانڈ ہیڈکوارٹر ریہوام بیس کو بھی حملے میں نشانہ بنایا گیا۔
‎دوسری جانب لبنان کی وزارت صحت کے مطابق اسرائیلی حملوں میں آج مزید 21 افراد جاں بحق ہو گئے جس کے بعد 2 مارچ سے جاری بمباری میں ہلاکتوں کی مجموعی تعداد 570 تک پہنچ گئی ہے جبکہ 1400 سے زائد افراد زخمی ہوئے ہیں۔
‎وزارت صحت کے مطابق جاں بحق افراد میں 86 بچے اور 45 خواتین بھی شامل ہیں جبکہ اسرائیلی حملوں کے باعث اب تک تقریباً ساڑھے سات لاکھ افراد بے گھر ہو چکے ہیں۔


شمالی کوریا نے ایران کے نئے سپریم لیڈر مجتبیٰ خامنہ ای کی تقرری کی حمایت کرتے ہوئے امریکا اور اسرائیل کی جانب سے ایران پر ہونے والے حملوں کی سخت مذمت کی ہے۔
سرکاری خبر رساں ادارے کے سی این اے کے مطابق شمالی کوریا کی وزارت خارجہ کے ترجمان نے کہا کہ ایران میں نئے سپریم لیڈر کے انتخاب کے بعد شمالی کوریا ایرانی عوام کے اس حق اور فیصلے کا احترام کرتا ہے۔
‎ترجمان کا کہنا تھا کہ امریکا اور اسرائیل کی جانب سے ایران پر کیا گیا فوجی حملہ غیر قانونی ہے جو خطے کے امن و سلامتی کو نقصان پہنچا رہا ہے اور عالمی سطح پر عدم استحکام کو بڑھا رہا ہے۔
‎انہوں نے مزید کہا کہ شمالی کوریا اس جارحیت پر گہری تشویش کا اظہار کرتا ہے اور اس کی شدید مذمت کرتا ہے۔


امریکی صدر ڈونلڈ ٹرمپ نے ایک امریکی نیوز ویب سائٹ سے گفتگو کرتے ہوئے کہا ہے کہ ایران میں اب نشانہ بنانے کے لیے زیادہ کچھ باقی نہیں رہا اور جاری جنگ جلد ختم ہو جائے گی۔
ٹرمپ کا کہنا تھا کہ ایران کے خلاف جاری کارروائیوں کے بعد صورتحال بدل چکی ہے اور جنگ کے خاتمے کا وقت قریب ہے۔
‎انہوں نے مزید کہا کہ جب وہ چاہیں گے ایران کے ساتھ جاری جنگ ختم ہو سکتی ہے، کیونکہ اس حوالے سے فیصلہ ان کے اختیار میں ہے۔
‎امریکی صدر کے اس بیان کے بعد خطے میں جاری کشیدگی اور جنگ کے مستقبل کے بارے میں نئی بحث شروع ہو گئی ہے۔


ایرانی ہلال احمر سوسائٹی نے کہا ہے کہ جاری جنگ کے دوران ایران میں تقریباً 20 ہزار شہری عمارتوں کو نقصان پہنچا ہے۔
ادارے کے مطابق ابتدائی جائزے میں معلوم ہوا ہے کہ مجموعی طور پر تقریباً 19 ہزار 734 شہری عمارتیں متاثر ہوئی ہیں۔ ان عمارتوں میں اسپتال، تعلیمی ادارے اور امدادی مراکز بھی شامل ہیں۔
‎رپورٹ کے مطابق حملوں کے نتیجے میں 77 طبی مراکز کو نقصان پہنچا جبکہ 65 تعلیمی ادارے بھی متاثر ہوئے ہیں۔
‎ایرانی ہلال احمر نے بتایا کہ اس کی اپنی 16 امدادی تنصیبات کو بھی نقصان پہنچا ہے جس سے امدادی سرگرمیوں پر اثر پڑا ہے۔
ادارے نے کہا کہ متاثرہ علاقوں میں صورتحال کا مزید جائزہ لیا جا رہا ہے اور نقصان کی مکمل تفصیلات بعد میں سامنے آ سکتی ہیں۔


رپورٹس کے مطابق آبنائے ہرمز میں ایک کارگو جہاز "مایوری ناری بنکاک” کو حملے کا نشانہ بنایا گیا جس کے بعد جہاز میں آگ لگ گئی اور عملہ جہاز چھوڑنے پر مجبور ہو گیا۔
اطلاعات کے مطابق یہ جہاز متحدہ عرب امارات کے شہر دبئی سے روانہ ہوا تھا اور آبنائے ہرمز سے گزر رہا تھا جب اسے نشانہ بنایا گیا۔ واقعے کے بعد جہاز کو شدید نقصان پہنچا جبکہ بیشتر عملے کو ریسکیو کر لیا گیا۔
رپورٹس میں بتایا گیا ہے کہ جہاز پر حملے کے بعد عملے نے لائف بوٹس کے ذریعے جہاز چھوڑ دیا جبکہ کچھ افراد کو سمندر سے بچا لیا گیا۔
یہ واقعہ ایسے وقت میں پیش آیا ہے جب ایران، امریکا اور اسرائیل کے درمیان بڑھتی ہوئی کشیدگی کے باعث آبنائے ہرمز کے علاقے میں تجارتی جہازوں کے لیے خطرات میں اضافہ ہو گیا ہے اور کئی جہازوں کو نشانہ بنائے جانے کی اطلاعات سامنے آ رہی ہیں۔


کینیڈا نے ایران کے خلاف جاری جنگ میں شامل نہ ہونے کا اعلان کر دیا ہے۔ کینیڈین وزیراعظم مارک کارنی کا کہنا ہے کہ کینیڈا امریکا اور اسرائیل کی فوجی کارروائیوں میں شریک ہے اور نہ ہی اس میں حصہ لے گا۔
اپنے بیان میں کینیڈین وزیراعظم نے کہا کہ کینیڈا کی پالیسی واضح ہے اور اس کا بنیادی مقصد یہ ہے کہ ایران کو ایٹمی ہتھیار حاصل کرنے سے روکا جائے۔
‎انہوں نے کہا کہ کینیڈا خطے میں کشیدگی کم کرنے اور سفارتی حل کی حمایت کرتا ہے جبکہ جنگ میں براہ راست شرکت کا کوئی ارادہ نہیں۔