Blog

‎عرب میڈیا کے مطابق جنوبی لبنان سے شمالی اسرائیل کے مختلف علاقوں پر راکٹ حملہ کیا گیا ہے، جس کے بعد سرحدی علاقوں میں کشیدگی مزید بڑھ گئی۔
‎رپورٹس کے مطابق حملے کے بعد شمالی اسرائیل کے علاقے بالائی جلیل میں جنگی سائرن بجنا شروع ہو گئے جبکہ مختلف مقامات پر دھماکوں کی آوازیں بھی سنی گئیں۔
‎عرب میڈیا کا کہنا ہے کہ راکٹ حملوں کے باعث شہریوں میں خوف و ہراس پھیل گیا اور متعدد علاقوں میں حفاظتی اقدامات سخت کر دیے گئے۔
‎تاحال کسی جانی نقصان یا بڑے مالی نقصان کی فوری تفصیلات سامنے نہیں آئیں، تاہم اسرائیلی سکیورٹی فورسز نے صورتحال کا جائزہ لینا شروع کر دیا ہے۔
‎خطے میں جاری کشیدگی کے باعث لبنان اور اسرائیل کی سرحد پر سکیورٹی صورتحال پہلے ہی انتہائی حساس سمجھی جا رہی ہے۔
‎تجزیہ کاروں کے مطابق غزہ جنگ اور مشرق وسطیٰ میں بڑھتے تناؤ کے اثرات اب لبنان اسرائیل سرحد تک مزید پھیلتے دکھائی دے رہے ہیں۔

‎ایران کی پاسدارانِ انقلاب نے دعویٰ کیا ہے کہ ملک کے مغربی سرحدی علاقے میں کارروائی کے دوران امریکی اسلحے اور گولہ بارود کی بڑی کھیپ قبضے میں لے لی گئی ہے۔
‎رپورٹس کے مطابق یہ کارروائی ایران کے صوبہ کردستان کے شہر بانہ میں خفیہ معلومات کی بنیاد پر کی گئی۔
‎ایرانی حکام کا کہنا ہے کہ اسلحہ عراقی کردستان سے ایران منتقل کیا جا رہا تھا، تاہم فورسز نے بروقت کارروائی کرتے ہوئے کھیپ کو قبضے میں لے لیا۔
‎پاسدارانِ انقلاب کے حمزہ سید الشہداء ہیڈکوارٹر کے مطابق شمالی عراق میں موجود بعض مسلح گروہ امریکا اور اسرائیل کیلئے کام کر رہے ہیں اور ایران کے اندر جدید امریکی اسلحہ منتقل کرنے کی کوشش کر رہے تھے۔
‎ایرانی حکام نے دعویٰ کیا کہ قبضے میں لیے گئے اسلحے میں جدید ہتھیار اور بڑی مقدار میں گولہ بارود شامل ہے۔
‎تاحال امریکا یا اسرائیل کی جانب سے ایرانی دعوؤں پر کوئی باضابطہ ردعمل سامنے نہیں آیا۔
‎تجزیہ کاروں کے مطابق ایران اور امریکا کے درمیان جاری کشیدگی کے تناظر میں ایسے دعوے خطے میں بڑھتے سکیورٹی خدشات کی عکاسی کرتے ہیں۔

‎نیپال کے معروف کوہ پیما شیرپا کامی ریٹا نے ایک بار پھر دنیا کی بلند ترین چوٹی ماؤنٹ ایورسٹ سر کرکے نیا عالمی ریکارڈ قائم کر دیا۔
‎56 سالہ کامی ریٹا نے 32 ویں مرتبہ 8849 میٹر بلند ماؤنٹ ایورسٹ کی چوٹی تک رسائی حاصل کی اور اپنا ہی سابقہ ریکارڈ توڑ دیا، جو انہوں نے 2025 میں قائم کیا تھا۔
‎نیپالی محکمہ سیاحت کے مطابق کامی ریٹا 17 مئی کی صبح ایک کوہ پیماؤں کی ٹیم کے ہمراہ دنیا کی بلند ترین چوٹی پر پہنچے۔
‎محکمہ سیاحت نے اس تاریخی کامیابی پر انہیں مبارکباد دیتے ہوئے کہا کہ کامی ریٹا دنیا بھر کیلئے عزم، ہمت اور مستقل مزاجی کی علامت بن چکے ہیں۔
‎کامی ریٹا نے پہلی بار 1994 میں ماؤنٹ ایورسٹ سر کیا تھا، جس کے بعد وہ تقریباً ہر سال اس چوٹی تک پہنچتے رہے ہیں۔
‎وہ صرف 2014، 2015 اور 2020 میں ماؤنٹ ایورسٹ سر نہ کر سکے، کیونکہ مختلف حادثات اور کورونا وبا کے باعث کوہ پیمائی عارضی طور پر معطل کر دی گئی تھی۔
‎رپورٹ کے مطابق اس مہم میں 52 سالہ شیرپا خاتون لکھاپا بھی شامل تھیں، جنہوں نے 11 ویں مرتبہ ماؤنٹ ایورسٹ سر کیا۔
‎اب تک دنیا بھر سے 8 ہزار سے زائد افراد ماؤنٹ ایورسٹ کی چوٹی تک پہنچ چکے ہیں، تاہم کامی ریٹا سب سے زیادہ بار یہ کارنامہ انجام دینے والے کوہ پیما بن گئے ہیں۔
‎نیپالی شیرپا کوہ پیماؤں کے علاوہ برطانیہ کے Kenton Cool نے سب سے زیادہ 19 بار ماؤنٹ ایورسٹ سر کیا ہے۔

‎امریکی صدر ڈونلڈ ٹرمپ نے ایک بار پھر دعویٰ کیا ہے کہ ایران امریکا کے ساتھ معاہدہ کرنے کیلئے بے تاب ہے۔
‎امریکی جریدے کو انٹرویو دیتے ہوئے ڈونلڈ ٹرمپ نے کہا کہ موجودہ صورتحال میں جنگ کے اختتام تک کسی بھی چیز کے بارے میں حتمی اندازہ لگانا ممکن نہیں۔
‎انہوں نے ایران سے متعلق گفتگو میں کہا کہ تہران مذاکرات اور معاہدے کیلئے شدید دلچسپی رکھتا ہے، تاہم خطے کی صورتحال اب بھی غیر یقینی ہے۔
‎چین سے متعلق ایک سوال کے جواب میں امریکی صدر نے کہا کہ سب سے اہم معاملہ یہ ہے کہ امریکا مصنوعی ذہانت یعنی آرٹیفیشل انٹیلی جنس کی دوڑ میں چین کو شکست دے۔
‎ٹرمپ کا کہنا تھا کہ امریکا کو ٹیکنالوجی اور اے آئی کے شعبے میں اپنی برتری برقرار رکھنا ہوگی کیونکہ مستقبل کی عالمی طاقت کا انحصار اسی میدان پر ہوگا۔
‎امریکی صدر کے یہ بیانات ایسے وقت میں سامنے آئے ہیں جب امریکا، ایران اور اسرائیل کے درمیان کشیدگی بدستور برقرار ہے اور خطے میں سفارتی سرگرمیاں بھی جاری ہیں۔
‎سیاسی تجزیہ کاروں کے مطابق ٹرمپ مسلسل ایران پر دباؤ بڑھانے کی حکمت عملی اختیار کیے ہوئے ہیں جبکہ دوسری جانب تہران بھی اپنی شرائط پر مذاکرات کی بات کر رہا ہے۔

‎ایرانی میڈیا رپورٹس کے مطابق مزید تین ایرانی آئل ٹینکرز امریکی بحری ناکہ بندی عبور کرنے میں کامیاب ہو گئے ہیں، جس کے بعد ایران کی تیل ذخیرہ کرنے کی صلاحیت میں مزید اضافہ ہوا ہے۔
‎سیٹلائٹ ڈیٹا کے مطابق یہ ٹینکرز کامیابی کے ساتھ ایرانی آئل اسٹوریج نظام میں شامل کر لیے گئے ہیں۔
‎آئل شپمنٹ کی نگرانی کرنے والی کمپنی “ٹینکر ٹریکرز” کے مطابق تینوں ٹینکرز نے ناکہ بندی سے بچنے کیلئے مختلف حکمت عملیاں استعمال کیں۔
‎رپورٹس کے مطابق ایک ٹینکر نے اپنا خودکار ٹریکنگ سسٹم بند کر دیا، جبکہ دوسرے ٹینکر پر ایرانی پرچم کی جگہ روسی پرچم لہرایا گیا۔
‎تیسرے ٹینکر نے عمان کے ساحلی راستے کو استعمال کرتے ہوئے اپنی نقل و حرکت جاری رکھی۔
‎یہ پیش رفت ایسے وقت میں سامنے آئی ہے جب ایرانی بندرگاہوں پر امریکی بحری ناکہ بندی کو ایک ماہ سے زائد کا عرصہ گزر چکا ہے۔
‎امریکی وزیر خزانہ اسکاٹ بیسنٹ متعدد بار یہ دعویٰ کر چکے ہیں کہ ایران کے خارگ جزیرے پر تیل ذخیرہ کرنے کی گنجائش تقریباً ختم ہو چکی ہے۔
‎تاہم ٹینکر ٹریکرز کی تازہ نگرانی رپورٹ کے مطابق ایران اب بھی ایک ماہ سے زائد مدت تک تیل ذخیرہ کرنے کی صلاحیت رکھتا ہے۔
‎ماہرین کے مطابق ایران مسلسل متبادل راستے، مختلف جھنڈوں اور جدید سمندری حکمت عملیوں کے ذریعے اپنی تیل برآمدات جاری رکھنے کی کوشش کر رہا ہے۔
‎خطے میں امریکا اور ایران کے درمیان بڑھتی کشیدگی کے باعث عالمی توانائی مارکیٹ اور بحری تجارت پر بھی گہرے اثرات مرتب ہونے کا خدشہ ظاہر کیا جا رہا ہے۔

‎سعودی عرب میں حرمین شریفین کے امور کی نگرانی کرنے والی جنرل اتھارٹی نے زائرین کی سہولت کیلئے جدید تھری ڈی انٹرایکٹو نقشوں کا اجرا کر دیا ہے۔
‎عرب خبر رساں ادارے کے مطابق اس نئے نظام کا مقصد مسجد الحرام اور مقدس مقامات کے اندر زائرین کی رہنمائی کو آسان بنانا، رش کو کم کرنا اور نقل و حرکت کو بہتر انداز میں منظم کرنا ہے۔
‎رپورٹ کے مطابق یہ تھری ڈی نقشے زائرین کو ہوٹلوں، داخلی و خارجی راستوں، نماز کے مقامات، طواف اور سعی کے علاقوں سمیت مختلف سہولیات تک فوری رسائی فراہم کریں گے۔
‎جنرل اتھارٹی کا کہنا ہے کہ جدید انٹرفیس کے ذریعے صارفین کو معلومات تک آسان، تیز اور مؤثر رسائی حاصل ہوگی، جبکہ رش کے اوقات میں نقل و حرکت سے متعلق مشکلات میں بھی نمایاں کمی آئے گی۔
‎اس منصوبے میں علمی دروس، حفظِ قرآن کے حلقوں، افتا اور رہنمائی دفاتر کے مقامات بھی شامل کیے گئے ہیں تاکہ زائرین کے مذہبی اور تعلیمی تجربے کو مزید بہتر بنایا جا سکے۔
‎حکام کے مطابق انٹرایکٹو نقشوں میں موسم کی صورتحال، بیت الخلا کی معلومات اور مختلف عبادتی مقامات پر ہجوم کی تفصیلات بھی شامل ہوں گی، جس سے زائرین اپنی نقل و حرکت بہتر انداز میں پلان کر سکیں گے۔
‎یہ اقدام سعودی حکومت کی جانب سے حرمین شریفین میں جدید ٹیکنالوجی کے استعمال اور زائرین کو عالمی معیار کی سہولیات فراہم کرنے کی کوششوں کا حصہ قرار دیا جا رہا ہے۔

‎امریکا اور ایران کے درمیان جاری کشیدگی کے دوران مذاکرات کی بحالی کیلئے دونوں ممالک نے ایک دوسرے کے سامنے سخت شرائط رکھ دی ہیں، جس کے بعد سفارتی حل کے امکانات مزید پیچیدہ ہوتے دکھائی دے رہے ہیں۔
‎ایرانی میڈیا رپورٹس کے مطابق واشنگٹن نے مذاکرات کی بحالی کیلئے ایران کے سامنے پانچ اہم شرائط پیش کی ہیں، جن میں ایران سے 400 کلوگرام افزودہ یورینیم امریکا یا عالمی برادری کے حوالے کرنے کا مطالبہ شامل ہے۔
‎امریکی شرائط کے مطابق ایران کو صرف ایک ایٹمی تنصیب فعال رکھنے کی اجازت ہوگی جبکہ باقی تمام تنصیبات بند کرنا ہوں گی۔
‎رپورٹس کے مطابق امریکا نے واضح کیا ہے کہ بیرونِ ملک موجود ایران کے منجمد اثاثوں کا 25 فیصد حصہ بھی بحال نہیں کیا جائے گا۔
‎اس کے علاوہ امریکا نے حالیہ جنگی نقصانات پر ایران کو کسی بھی قسم کا معاوضہ یا ہرجانہ دینے سے بھی انکار کر دیا ہے۔
‎واشنگٹن کی جانب سے یہ شرط بھی رکھی گئی ہے کہ خطے کے تمام محاذوں پر مکمل جنگ بندی کے بعد ہی باضابطہ مذاکرات شروع کیے جائیں گے۔
‎دوسری جانب ایران نے بھی امریکی مطالبات کے جواب میں اپنی پانچ سخت شرائط پیش کر دی ہیں۔
‎تہران کا کہنا ہے کہ لبنان سمیت تمام علاقائی محاذوں پر جاری جنگ فوری اور مستقل طور پر ختم کی جائے جبکہ ایران پر عائد تمام معاشی اور سفارتی پابندیاں مکمل طور پر ہٹائی جائیں۔
‎ایران نے مطالبہ کیا ہے کہ دنیا بھر کے بینکوں میں منجمد تمام ایرانی اثاثے فوری واپس کیے جائیں۔
‎ایرانی شرائط میں حالیہ جنگی نقصانات کا مکمل معاوضہ ادا کرنے اور آبنائے ہرمز پر ایران کے حقِ خودمختاری کو تسلیم کرنے کا مطالبہ بھی شامل ہے۔
‎سفارتی ماہرین کے مطابق دونوں ممالک کی جانب سے سخت مؤقف اختیار کیے جانے کے بعد فوری پیشرفت کے امکانات کم ہوتے جا رہے ہیں، جبکہ خطے میں کشیدگی برقرار رہنے کا خدشہ بھی بڑھ گیا ہے۔