ملک بھر میں عیدالاضحیٰ 27 مئی بروز بدھ مذہبی جوش و جذبے کے ساتھ منائی جائے گی، جبکہ اس موقع پر 5 سے 6 سرکاری تعطیلات کا امکان ظاہر کیا جا رہا ہے۔
مرکزی رویت ہلال کمیٹی نے ذی الحج 1447 ہجری کا چاند نظر آنے کی تصدیق کرتے ہوئے اعلان کیا کہ یکم ذی الحج 18 مئی بروز پیر ہوگی، جس کے بعد عیدالاضحیٰ 27 مئی کو منائی جائے گی۔
سرکاری کیلنڈر کے مطابق عید کی تعطیلات 27 مئی سے 29 مئی یعنی بدھ سے جمعہ تک ہوں گی، جبکہ ہفتہ اور اتوار کی چھٹیوں کے ساتھ یہ مجموعی طور پر 5 روزہ تعطیلات بن جائیں گی۔
تاہم حکومتی ذرائع کے مطابق عوام خصوصاً پردیسیوں کو اپنے آبائی علاقوں میں عید منانے کی سہولت دینے کیلئے چھٹیوں کا آغاز 26 مئی بروز منگل سے کیے جانے کا بھی امکان ہے۔
اگر حکومت نے اس تجویز کی منظوری دے دی تو شہریوں کو مسلسل 6 روز کی تعطیلات مل سکتی ہیں۔
عوام اب اس حوالے سے وفاقی حکومت کے باضابطہ نوٹیفکیشن کا انتظار کر رہے ہیں۔
واضح رہے کہ سپارکو نے بھی قبل از وقت پیشگوئی کی تھی کہ ذی الحج کا چاند 17 مئی کی رات پیدا ہو جائے گا اور عیدالاضحیٰ 27 مئی کو ہونے کا قوی امکان ہے۔
چاند نظر آنے کے اعلان کے بعد ملک بھر میں عید کی تیاریوں، مویشی منڈیوں اور سفری سرگرمیوں میں بھی تیزی آنا شروع ہو گئی ہے۔
Blog
-
عیدالاضحیٰ 27 مئی کو، 5 سے 6 چھٹیوں کا امکان
-
گرمی کی شدت ٹوٹنے لگی، بارشوں کا نیا سسٹم کل پاکستان میں داخل ہوگا
شدید گرمی اور ہیٹ ویو سے پریشان شہریوں کیلئے خوشخبری سامنے آگئی، محکمہ موسمیات نے ملک میں نئے مغربی ہواؤں کے سسٹم کی آمد کی پیشگوئی کر دی ہے۔
محکمہ موسمیات کے مطابق آندھی، جھکڑ اور بارش لانے والا نیا سسٹم کل پاکستان میں داخل ہوگا، جس کے باعث گرمی کی شدت میں نمایاں کمی متوقع ہے۔
رپورٹ کے مطابق کل سے 22 مئی کے دوران پنجاب کے بیشتر اضلاع میں تیز ہوائیں چلنے، گرد آلود آندھی اور گرج چمک کے ساتھ بارش کا امکان ہے۔
لاہور سمیت مختلف شہروں میں بارش کے باعث موسم خوشگوار ہونے کی توقع ظاہر کی جا رہی ہے جبکہ شدید گرمی کا زور بھی ٹوٹ سکتا ہے۔
دوسری جانب آج بھی ملک کے بیشتر علاقے شدید گرمی کی لپیٹ میں رہے۔
محکمہ موسمیات کے مطابق سندھ کا شہر دادو 46 ڈگری سینٹی گریڈ کے ساتھ ملک کا گرم ترین علاقہ رہا۔
نواب شاہ اور جیکب آباد میں درجہ حرارت 45 ڈگری جبکہ سکھر اور رحیم یار خان میں 44 ڈگری سینٹی گریڈ ریکارڈ کیا گیا۔
اسی طرح بہاولپور اور حیدرآباد میں پارہ 41 ڈگری تک پہنچ گیا۔
ماہرین موسمیات کا کہنا ہے کہ نئے مغربی سسٹم کے زیر اثر مختلف علاقوں میں وقفے وقفے سے بارشیں اور ٹھنڈی ہوائیں چلنے سے موسم میں واضح تبدیلی آئے گی۔
شہریوں کو ہدایت کی گئی ہے کہ آندھی اور گرج چمک کے دوران احتیاطی تدابیر اختیار کریں جبکہ غیر ضروری طور پر کھلے مقامات پر جانے سے گریز کریں۔ -
اوکاڑہ: عید قرباں سے قبل تینوں تحصیلوں میں جدید مویشی منڈیاں قائم، انتظامات مکمل
اوکاڑہ (نامہ نگار ملک ظفر) حکومت پنجاب کی ہدایات پر ڈپٹی کمشنر احمد عثمان جاوید کی زیرِ نگرانی ضلع کی تینوں تحصیلوں میں عید قرباں کے موقع پر بیوپاریوں اور خریداروں کی سہولت کے لیے جدید سہولیات سے آراستہ مویشی منڈیاں قائم کر دی گئی ہیں۔ضلعی انتظامیہ کے افسران نے مختلف منڈیوں کے ہنگامی دورے کیے اور انتظامات کا تفصیلی جائزہ لیا۔ ایڈیشنل ڈپٹی کمشنرز نے سیکیورٹی، صفائی، پینے کے صاف پانی، لائٹنگ، چارے اور طبی امداد کے کاؤنٹرز کا معائنہ کیا۔افسران نے بیوپاریوں اور خریداروں سے ملاقات کر کے ان سے فیڈبیک بھی لیا جبکہ عملے کو سخت ہدایات جاری کی گئیں کہ شامیانوں، پارکنگ، روشنی اور دیگر سہولیات کو مزید بہتر بنایا جائے تاکہ شہریوں کو کسی قسم کی پریشانی نہ ہو۔ڈپٹی کمشنر احمد عثمان جاوید کا کہنا ہے کہ منڈیوں کے قیام کا مقصد شہریوں اور دور دراز سے آنے والے بیوپاریوں کو ایک ہی جگہ تمام بنیادی سہولیات فراہم کرنا ہے۔ انہوں نے واضح کیا کہ کسی بھی قسم کی ناجائز وصولی یا اوورچارجنگ برداشت نہیں کی جائے گی جبکہ سیکیورٹی کے فول پروف انتظامات کے لیے پولیس اور انتظامیہ مکمل طور پر الرٹ ہے۔
-
ایران اور عمان آبنائے ہرمز کیلئے نیا ٹرانزٹ میکانزم تیار کرنے لگے
ایرانی وزارتِ خارجہ کے ترجمان اسماعیل بقائی نے اعلان کیا ہے کہ ایران اور عمان آبنائے ہرمز سے گزرنے والے جہازوں کے محفوظ ٹرانزٹ کیلئے ایک نیا مشترکہ میکانزم تیار کر رہے ہیں۔
ہفتہ وار پریس بریفنگ کے دوران اسماعیل بقائی نے کہا کہ آبنائے ہرمز صرف خطے ہی نہیں بلکہ پوری دنیا کیلئے ایک نہایت اہم سمندری گزرگاہ ہے، اسی لیے ایران ہمیشہ اس راستے سے محفوظ جہاز رانی کو یقینی بنانے کی کوشش کرتا رہا ہے۔
انہوں نے کہا کہ ایران اور عمان بطور ساحلی ممالک اس بات کو اپنی ذمہ داری سمجھتے ہیں کہ اس اہم بحری راستے پر جہازوں کی نقل و حرکت مکمل تحفظ کے ساتھ جاری رہے۔
ترجمان کے مطابق اس مقصد کیلئے دونوں ممالک کے حکام مسلسل رابطے میں ہیں جبکہ گزشتہ ہفتے مسقط میں ماہرین کے درمیان ایک اہم اجلاس بھی منعقد ہوا۔
اسماعیل بقائی نے امریکا اور اسرائیل پر ایران کے خلاف جارحیت کا الزام عائد کرتے ہوئے کہا کہ تہران نے اپنی قومی خودمختاری اور سلامتی کے دفاع کیلئے بین الاقوامی قوانین کے مطابق اقدامات کیے ہیں۔
انہوں نے کہا کہ امریکی اور اسرائیلی اقدامات عالمی قوانین کی کھلی خلاف ورزی ہیں، جن کے بعد ایران نے آبنائے ہرمز پر نگرانی مزید سخت کر دی ہے۔
ایرانی ترجمان کا کہنا تھا کہ عالمی بینکوں میں منجمد ایرانی اثاثے فوری طور پر واپس کیے جائیں کیونکہ یہ ایران کا قانونی حق ہے۔
انہوں نے واضح کیا کہ ایران کسی امداد کا مطالبہ نہیں کر رہا بلکہ اپنے ہی منجمد اثاثوں کی واپسی چاہتا ہے، ساتھ ہی ایران پر عائد عالمی پابندیاں ختم کرنے کا بھی مطالبہ کیا۔
واضح رہے کہ آبنائے ہرمز دنیا کی اہم ترین توانائی گزرگاہوں میں شمار ہوتی ہے جہاں سے عالمی تیل تجارت کا بڑا حصہ گزرتا ہے، اسی وجہ سے خطے میں بڑھتی کشیدگی پر عالمی سطح پر تشویش پائی جاتی ہے۔ -
وفاقی شرعی عدالت کا خودکشی قانون سے متعلق بڑا فیصلہ
فیڈرل شریعت کورٹ نے پاکستان پینل کوڈ کی دفعہ 325 دوبارہ بحال کرتے ہوئے خودکشی کی کوشش کو ایک بار پھر قابلِ سزا جرم قرار دے دیا ہے۔
عدالت نے کرمنل لاز ایکٹ 2022 کو غیر اسلامی قرار دیتے ہوئے کالعدم کر دیا، جس کے تحت خودکشی کی کوشش کو جرم کی فہرست سے نکال دیا گیا تھا۔
یہ محفوظ فیصلہ جسٹس اقبال حمید الرحمان، جسٹس ڈاکٹر سید محمد انور اور جسٹس امیر محمد خان پر مشتمل تین رکنی بینچ نے سنایا۔
پاکستان پینل کوڈ کی دفعہ 325 کے مطابق جو شخص خودکشی کی کوشش کرے گا یا اس مقصد کیلئے کوئی قدم اٹھائے گا، اسے ایک سال تک سادہ قید، جرمانہ یا دونوں سزائیں دی جا سکتی ہیں۔
یہ مقدمہ ایڈووکیٹ حماد سعید ڈار کی درخواست پر سنا گیا، جن کا مؤقف تھا کہ خودکشی کی کوشش کو جرم کی فہرست سے نکالنا قرآن و سنت کی تعلیمات کے خلاف ہے۔
درخواست گزار نے عدالت سے استدعا کی تھی کہ کرمنل لاز ایکٹ 2022 کو اسلامی احکامات سے متصادم قرار دے کر ختم کیا جائے۔
فیڈرل شریعت کورٹ کے فیصلے کے بعد اب دفعہ 325 دوبارہ ملک بھر میں نافذ العمل ہو گئی ہے۔
واضح رہے کہ دسمبر 2022 میں اُس وقت کے صدر ڈاکٹر عارف علوی نے کرمنل لاز ایکٹ 2022 کی منظوری دی تھی، جس کے ذریعے خودکشی کی کوشش کو جرم کے دائرے سے نکال دیا گیا تھا۔
یہ ترمیمی بل پاکستان پیپلز پارٹی کے سینیٹر شہادت اعوان نے 2021 میں سینیٹ میں پیش کیا تھا، جسے بعد ازاں پارلیمنٹ سے منظور کر لیا گیا تھا۔
قانونی اور سماجی حلقوں میں فیصلے پر مختلف آراء سامنے آ رہی ہیں، جہاں بعض ماہرین اسے مذہبی اور قانونی نقطۂ نظر سے اہم قرار دے رہے ہیں جبکہ ذہنی صحت کے ماہرین کا کہنا ہے کہ خودکشی کی کوشش کرنے والے افراد کو سزا کے بجائے علاج، مشاورت اور نفسیاتی مدد کی ضرورت ہوتی ہے۔ -
سی ویو ہٹ اینڈ رن کیس، مفرور ڈرائیور بلوچستان فرار
کراچی کے علاقے سی ویو میں پیش آنے والے ہٹ اینڈ رن حادثے کے مرکزی ملزم کی تفصیلات سامنے آ گئی ہیں، جبکہ پولیس کا کہنا ہے کہ ملزم سندھ سے فرار ہو کر بلوچستان پہنچ چکا ہے۔
اے آر وائی نیوز کے مطابق حادثے میں ملوث ملزم کی شناخت نعمان علی کے نام سے ہوئی ہے، جس کا تعلق بلوچستان کے علاقے ڈیرہ مراد جمالی سے بتایا جا رہا ہے۔
پولیس حکام کے مطابق حادثے کے بعد ملزم موقع سے فرار ہوگیا تھا اور اس نے اپنے دوستوں سے بھی مدد طلب کی تھی۔
تحقیقات کے دوران معلوم ہوا کہ ملزم گاڑی کو چھپانے کے بعد ڈیفنس فیز 7 میں اپنے ایک دوست کے گھر گیا تھا۔
تفتیشی ذرائع کے مطابق ملزم کے نام پر ایک کورولا اور ایک ریوو گاڑی رجسٹرڈ ہیں۔
پولیس کا کہنا ہے کہ سپر ہائی وے کے قریب ایک نجی ہاؤسنگ سوسائٹی میں ملزم کی لوکیشن ٹریس ہونے پر وہاں چھاپہ مارا گیا، تاہم وہ پولیس پہنچنے سے پہلے ہی فرار ہو گیا۔
حکام کے مطابق ملزم اب بلوچستان فرار ہو چکا ہے، تاہم اس کی گرفتاری کیلئے مختلف علاقوں میں کارروائیاں جاری ہیں اور پولیس نے جلد گرفتاری کا دعویٰ کیا ہے۔
واضح رہے کہ یہ افسوسناک حادثہ 14 مئی کی رات سی ویو روڈ پر خیابان بخاری کے موڑ کے قریب پیش آیا تھا، جہاں ایک تیز رفتار ڈبل کیبن گاڑی نے دوسری گاڑی کو ٹکر مار دی تھی۔
حادثے کے نتیجے میں سلمان نامی نوجوان موقع پر جاں بحق ہوگیا جبکہ گاڑی میں موجود دو افراد زخمی ہو گئے تھے۔
حادثے کے بعد ملزم اپنی گاڑی سمیت موقع سے فرار ہوگیا تھا، جس کے بعد پولیس نے ہٹ اینڈ رن کیس درج کرکے تحقیقات شروع کر دی تھیں۔ -
ایران کسی غیر ملکی طاقت کے سامنے نہیں جھکے گا، صدر پزشکیان
ایرانی صدر مسعود پزشکیان نے کہا ہے کہ ایران کبھی کسی غیر ملکی طاقت کے سامنے نہیں جھکے گا اور نہ ہی آرام و آسائش کیلئے اپنی عزت اور خودمختاری قربان کرے گا۔
اپنے بیان میں صدر پزشکیان نے کہا کہ ایران منطق، سفارتکاری اور عوامی طاقت کے ذریعے دنیا کے ساتھ تعلقات آگے بڑھائے گا۔
انہوں نے زور دیتے ہوئے کہا کہ سچ بولنا ضروری ہے کیونکہ محض نعرے بازی منطقی مکالمے اور سنجیدہ سفارتکاری کا متبادل نہیں ہو سکتی۔
ایرانی صدر کا کہنا تھا کہ موجودہ عالمی حالات میں قومی وقار، خودمختاری اور عوامی اتحاد ایران کی سب سے بڑی طاقت ہیں۔
انہوں نے توانائی بحران اور ملکی کھپت پر بھی تشویش کا اظہار کرتے ہوئے کہا کہ ایران میں توانائی کا استعمال یورپی ممالک کے مقابلے میں تقریباً تین گنا زیادہ ہے۔
مسعود پزشکیان نے کہا کہ اگر توانائی کی قلت سے بچنا ہے تو ملک کو اپنی توانائی پالیسی اور استعمال کے طریقہ کار کو بہتر بنانا ہوگا۔
انہوں نے عوام سے اپیل کی کہ وسائل کے مؤثر استعمال اور بچت کو قومی ذمہ داری سمجھا جائے تاکہ مستقبل میں توانائی بحران سے بچا جا سکے۔
سیاسی تجزیہ کاروں کے مطابق صدر پزشکیان کا بیان ایسے وقت میں سامنے آیا ہے جب ایران کو خطے میں بڑھتی کشیدگی، عالمی دباؤ اور معاشی چیلنجز کا سامنا ہے۔ -
ووٹر کی عمر کی حد 18 سال سے 25 سال کرنے کی تجویز کسی صورت قبول نہیں،خالد مسعود سندھو
مرکزی مسلم لیگ کے صدر خالد مسعود سندھو نے کہا ہے کہ وزیراعظم کے مشیر رانا ثناء اللہ کی جانب سے ووٹر کی عمر کی حد 18 سال سے 25 سال کرنے کی تجویز کو کسی صورت قبول نہیں کریں گے،مرکزی مسلم لیگ حکومتی غلط فیصلوں کے خلاف سڑکوں پر نکلے گی اور ذاتی مفادات کی تکمیل کے لئے حکمرانوں کو من مانی کرنے کی اجازت نہیں دی جائے گی
خالد مسعود سندھو کا کہنا تھا کہ کلمہ کے نام پر حاصل کیا گیا ملک پاکستان کسی کی جاگیر نہیں، عوام پاکستان،وطن عزیز کے وارث ہیں، کسی بھی سیاسی جماعت کو آئینی ترمیم کے نام پر ووٹر کو ووٹ کے حق سے محروم رکھنے کا کھلواڑ نہیں کرنے دیںگے، 18 سال کی عمر میں شادی کا بل حکمرانوں نے ہی منظور کروایا اگر 18 برس کی عمر میں شادی ہو سکتی ہے تو ووٹ کیوں نہیں دیا جا سکتا، شناختی کارڈ بننے کے بعد ووٹ کا اندراج خود بخود ہو جاتا ہے،ذاتی مفادات اور حکمرانی کی لالچ نے حکمرانوں کو اندھا کر دیا ہے،تین چار کروڑ افراد کو ووٹ کے حق سے محروم کرنے کی تجویز حکمرانوں کی بوکھلاہٹ کانتیجہ ہے،اگر ایسی کوئی بھی ترمیم آئی تو سیاسی جماعتوں کے ساتھ ملکر ملک گیر احتجاج کریںگے، نوجوان پاکستان کا مستقبل ہیں، نوجوانوں کو ووٹ کے حق سے کسی صورت محروم نہیں رکھا جا سکتا،ہم عوام کے جذبات کی ترجمانی کریں گے اور حکمرانوں کو کوئی غلط فیصلہ نہیں کرنے دیں گے.
-
ملکہ کونین پنکی کے جسمانی ریمانڈ میں 4 دن کی توسیع
جوڈیشل مجسٹریٹ جنوبی، جیل کمپلیکس میں انمول عرف پنکی کے خلاف بغدادی تھانے میں درج قتل کے مقدمے کی سماعت ہوئی، عدالت نے ملزمہ انمول عرف پنکی کے جسمانی ریمانڈ میں 4 دن کی توسیع کردی۔
تفتیشی افسر نے مدعی مقدمہ کا دفعہ 164 کے تحت بیان ریکارڈ کروانے کی درخواست عدالت میں دائر کی، عدالت نے تفتیشی افسر کی درخواست منظور کرتے ہوئے ہدایت کی کہ 21 مئی کو مدعی مقدمہ کا 164 کا بیان ریکارڈ کروایا جائے۔عدالت نے سیکیورٹی خدشات کے باعث ملزمہ انمول عرف پنکی کو پیشی سے استثنیٰ دے دیا، عدالت کے مطابق مدعی کا 164 کا بیان ملزمہ کے وکلاء کی موجودگی میں ریکارڈ کیا جائے گا۔سیشن جج ساؤتھ نے قرار دیا کہ ملزمہ پہلے ہی جسمانی ریمانڈ پر ہے، اگر مزید تفتیش درکار ہے تو متعلقہ جوڈیشل مجسٹریٹ سے رجوع کیا جائے۔
دوسری جانب سول سوسائٹی پاکستان کے صدر عبداللہ ملک نے انمول عرف پنکی کیس کی سپریم کورٹ میں سماعت کے لئے چیف جسٹس کو خط لکھ دیا۔ میڈیا رپورٹ کے مطابق خط میں کہا گیا ہے کہ منشیات کے حوالے سے 2018 میں چیف جسٹس ثاقب نثار نے ازخود نوٹس لیا تھا، جو ابھی تک زیر سماعت ہے، انمول پنکی کے کیس میں اس حوالے سے اہم شواہد مل سکتے ہیں۔ خط میں استدعا کی ہے کہ انمول عرف پنکی کو با اثر مافیا راستے سے ہٹا سکتے ہیں اس لیے اسے فول پروف سیکیورٹی دی جائے اور تمام آئی جیز سے منشیات کے حوالے سے رپورٹس مانگی طلب کی جائیں۔
-
خیبرپختونخوا میں گورننس نام کی کوئی چیز موجود نہیں، عطا تارڑ
وفاقی وزیر اطلاعات عطا تارڑ نے خیبر پختونخوا حکومت پر شدید تنقید کرتے ہوئے کہا ہے کہ صوبے میں گورننس نام کی کوئی چیز موجود نہیں اور کرپشن و بدعنوانی عروج پر پہنچ چکی ہے۔
اپنے بیان میں انہوں نے کہا کہ خیبر پختونخوا میں شاہانہ اخراجات کیے جا رہے ہیں جبکہ عوامی پیسہ سیاسی مقاصد کے لیے استعمال ہو رہا ہے۔ ان کا کہنا تھا کہ صوبائی کابینہ کی تعداد میں مسلسل اضافہ کیا جا رہا ہے، تاہم وزراء اور مشیران کے انتخاب میں اہلیت کے بجائے دیگر عوامل کو ترجیح دی گئی۔عطا تارڑ نے سوال اٹھایا کہ کیا کابینہ کی تعداد بڑھانے سے گورننس بہتر ہو جائے گی، جبکہ گزشتہ 12 برس سے زائد عرصے میں صوبے کی کارکردگی میں بہتری نہیں آ سکی۔ انہوں نے کہا کہ خیبر پختونخوا کے حالات اس نہج پر کبھی نہیں پہنچے تھے اور صوبے کے معاملات انتہائی خراب ہو چکے ہیں۔
وفاقی وزیر اطلاعات نے مزید کہا کہ عوام کو بنیادی سہولیات کی فراہمی کے بجائے سیاسی سرگرمیوں پر وسائل خرچ کیے جا رہے ہیں، جس سے صوبے میں انتظامی مسائل میں اضافہ ہوا ہے۔