Blog

نیشنل ڈیزاسٹر مینجمنٹ اتھارٹی کے نیشنل ایمرجنسیز آپریشن سینٹر (این ای او سی) نے 19 سے 26 مئی کے دوران ملک بھر میں گرمی کی شدت میں اضافے کا الرٹ جاری کر دیا ہے، جس کے مطابق سندھ، جنوبی پنجاب اور مشرقی بلوچستان کے کئی علاقوں میں درجہ حرارت 42 ڈگری سینٹی گریڈ سے تجاوز کرنے کا خدشہ ہے۔

این ڈی ایم اے کے مطابق موجودہ موسمی صورتحال ادارے کی جانب سے 3 سے 4 ماہ قبل جاری کیے گئے موسمی جائزے اور پیشگی الرٹس کے عین مطابق ہے، جبکہ آئندہ چند روز کے دوران شدید گرمی کی لہر مختلف علاقوں کو اپنی لپیٹ میں لے سکتی ہے۔الرٹ کے مطابق پنجاب میں بہاولپور، رحیم یار خان، بہاولنگر، ملتان، ڈیرہ غازی خان، مظفر گڑھ، راجن پور، سرگودھا، لودھراں، خانیوال، وہاڑی اور لاہور شدید گرمی سے متاثر ہونے والے شہروں میں شامل ہیں۔اسی طرح سندھ میں کراچی، حیدر آباد، جیکب آباد، خیرپور، سکھر، لاڑکانہ، دادو، نوشہرو فیروز، کشمور، تھرپارکر، شہید بینظیر آباد، مٹیاری، عمرکوٹ، میرپورخاص، بدین، کمبر اور شہداد کوٹ میں شدید ہیٹ ویو کا خدشہ ظاہر کیا گیا ہے۔بلوچستان کے علاقوں تربت، سبی، اُتھل، جھل مگسی، ڈیرہ مراد جمالی، نصیر آباد، جعفر آباد، استا محمد، کچھی، لسبیلہ اور پنجگور بھی شدید گرمی کی لپیٹ میں رہیں گے۔

این ڈی ایم اے نے خبردار کیا ہے کہ درجہ حرارت میں غیر معمولی اضافہ صحت کے مسائل کا باعث بن سکتا ہے، لہٰذا شہری شدید دھوپ اور گرمی کے اوقات میں غیر ضروری طور پر باہر نکلنے سے گریز کریں، بچوں، بزرگوں اور بیمار افراد کا خصوصی خیال رکھیں اور پانی و نمکیات کی کمی سے بچنے کے لیے زیادہ سے زیادہ پانی استعمال کریں۔

دوسری جانب این ای او سی نے آج سے 23 مئی تک شمالی علاقہ جات میں بڑھتے درجہ حرارت کے باعث گلیشیئرز پگھلنے کے خطرات سے متعلق بھی الرٹ جاری کیا ہے۔ ادارے کے مطابق گلیشیائی جھیلوں کے پھٹنے، سیلابی ریلوں اور لینڈ سلائیڈنگ کے امکانات موجود ہیں۔الرٹ میں خردوپین، اشکومن، دسوات، شسپر، ہنارچو، ہنڈر، گلکن، درکوت، رعشن، بریپ، بونی، پنڈورو، چاٹ، چھٹی بوئی، لاشٹ، سردارگول، ٹھلو ون اور ٹو، ارکاری اور اوری سمیت متعدد علاقوں کو حساس قرار دیا گیا ہے۔این ڈی ایم اے نے شہریوں کو ہدایت کی ہے کہ وہ گلیشیائی جھیلوں کے قریب جانے اور خطرناک ڈھلوانوں پر قیام سے اجتناب کریں، جبکہ متاثرہ علاقوں کے مکین مقامی انتظامیہ اور موسمی ایڈوائزری پر عمل کریں۔ ادارے نے بروقت معلومات کے لیے پاک این ڈی ایم اے ڈیزاسٹر الرٹ ایپ استعمال کرنے کی بھی ہدایت کی ہے۔

این ڈی ایم اے کے مطابق تمام متعلقہ اداروں کو الرٹ رہنے اور پیشگی حفاظتی اقدامات یقینی بنانے کی ہدایات جاری کر دی گئی ہیں۔

ڈسٹرکٹ اینڈ سیشن کورٹس اسلام آباد میں ٹک ٹاکر ثناء یوسف قتل کیس کی سماعت ہوئی، ملزم عمر حیات نے اعترافی بیان ماننے سے انکار کردیا۔

ملزم عمر حیات نے کہا کہ مجھے اعترافی بیان کا علم ہی نہیں ہے، میں نے قتل کا کوئی اعترافی بیان نہیں دیا۔،ملزم نے عدالت میں اپنی عمر بتانے سے انکار کردیا،کہا میں وکیل کی غیر موجودگی میں کوئی جواب نہیں دوں گا، میرا ثناء یوسف سےکوئی جھگڑا یا رابطہ نہیں تھا اورنہ ہی میں نے کبھی ملاقات کی درخواست کی،

واضح رہے کہ ملزم نے اس سے قبل مجسٹریٹ کے سامنے قتل کا اعتراف کیا تھا۔

اسلام آباد کے ایڈیشنل سیشن جج افضل مجوکہ کو کم عمر ٹک ٹاکر ثناء یوسف قتل کیس کی سماعت کے دوران ملزم کے وکیل رضوان الہی نے سخت سنا دیں،کمرہ عدالت میں موجود رپورٹرز کے مطابق ملزم کے وکیل رضوان الہی نے ویڈیو بناءی جس پر جج افضل مجوکہ برہم ہوئے،کہا کہ موبائل مجھے دیں، ویڈیو ڈیلیٹ کریں، وکیل رضوان الہیٰ نے کہا کہ موبائل کیوں دوں؟ آپ مجھ سے موبائل نہیں مانگ سکتے، معلوم ہو کہ آپ موبائل سے میرے نمبر نکال لیں، ہماری بات تو آپ ریکارڈ پر لاتے نہیں، جس پر جج نے کہا کہ اگر ویڈیو وائرل ہوئی تو مس کنڈکٹ ہو گا،

وزیرِ اعظم شہباز شریف کی زیر صدارت رواں اور آئندہ مالی سال کے ترقیاتی بجٹ کے منصوبوں پر جائزہ اجلاس ہوا

اجلاس میں فیصلہ ہوا کہ بہتر کارکردگی کی حامل وزارتوں کو ترقیاتی منصوبوں کیلئے ترجیحی بنیادوں پر بجٹ فراہم کیا جائے گا.وزیراعظم شہباز شریف کا کہنا تھا کہ ایسے ترقیاتی منصوبوں میں عوام کا پیسہ لگائیں گے جن کے نتائج یقینی ہوں.آبی ذخائر اور پن بجلی کے منصوبے ترقیاتی بجٹ خرچ کرنے کی ترجیحات میں شامل ہیں.وزیرِ اعظم نے پانڈا بانڈز کے کامیاب اجراء اور اسکی مارکیٹ میں پزیرائی پر وزیرِ خزانہ کی تعریف کی،محمدشہبازشریف نےریلوے، آئی ٹی اور وزارت پاور کی کارکردگی کی تعریف کی اور کہا کہ ترقیاتی منصوبوں میں پبلک پرائیویٹ پارٹنرشپ کی زیادہ سے زیادہ حوصلہ افزائی کی جائے.پانی کے ذخائر کو بڑھانے کے منصوبوں کو ترجیح دی جائے گی.اجلاس میں رواں برس کے پی ایس ڈی پی پر جائزہ اور آئندہ برس کے مجوزہ ترقیاتی منصوبوں اور ان کے لئے درکار فنڈز پر تفصیلات سے آگاہ کیا گیا.اجلاس کو قومی نوعیت کے پانی ذخیرہ و پن بجلی کے منصوبوں بشمول داسو، دیامر بھاشا اور مہمند ڈیمز کی تعمیر پر پیش رفت سے بھی آگاہ کیا گیا