Baaghi TV

Blog

  • مختلف علاقوں میں گرج چمک کے ساتھ بارش اورژالہ باری کا امکان

    مختلف علاقوں میں گرج چمک کے ساتھ بارش اورژالہ باری کا امکان

    ملک کے مختلف علاقوں میں گرج چمک کے ساتھ بارش اور ژالہ باری کی پیشگوئی کر دی گئی،این ڈی ایم اے نے الرٹ جاری کر دیا-

    این ڈی ایم اے کے مطابق مختلف علاقوں میں آئندہ 24 گھنٹوں کے دوران گرج چمک کے ساتھ بارش اورژالہ باری کا امکان ہے پنجاب کے مختلف اضلاع میں تیز ہواؤں اور گرج چمک کے ساتھ بارش ہونے کی توقع ہے ،چند مقامات پر ژالہ باری بھی ہو سکتی ہے، اسلام آباد، راولپنڈی، مری، اٹک، چکوال، تلہ گنگ، گوجر خان، جہلم، سیالکوٹ، میں تیز ہواؤں اور گرج چمک کے ساتھ بارش کا امکان ہے نارووال، لیہ، گجرات، گوجرانوالہ، حافظ آباد، منڈی بہاؤالدین، لاہور، فیصل آباد اور ساہیوال میں تیز ہواؤں اور گرج چمک کے ساتھ بارش ہونے کی توقع ہے ۔

    گلگت بلتستان اور آزاد کشمیر کے مختلف علاقوں میں بھی گرج چمک کے ساتھ بارش ہونے کی توقع ہے گلگت، اسکردو، ہنزہ، نگر، غذر، دیامر، استور، گھانچے، شگر، کھرمنگ، مظفرآباد، نیلم ویلی، باغ، حویلی، پونچھ، راولاکوٹ، کوٹلی، میرپور اور بھمبر میں بارش کا امکان ہے جب کہ خیبرپختونخوا کے مختلف اضلاع میں بھی گرج چمک کے ساتھ بارش کا امکان ہے ، ایبٹ آباد، ڈی ائی خان، بنوں، مالم جبہ اور دیر میں بھی بارش ہونے کی توقع ہے۔

  • امریکی وزیر خارجہ روم اور ویٹیکن کا دورہ کریں گے

    امریکی وزیر خارجہ روم اور ویٹیکن کا دورہ کریں گے

    امریکا کے وزیر خارجہ مارکو روبیو اس ہفتے اٹلی کے دارالحکومت روم اور ویٹیکن کا دورہ کریں گے-

    اطالوی حکومتی ذریعے کے مطابق مارکو روبیو، جو خود بھی کیتھولک ہیں،ویٹیکن کے سیکریٹری آف اسٹیٹ پیٹرو پیرولن اور اٹلی کے وزیر خارجہ انتونیو تاجانی سے ملاقات کریں گےاطالوی میڈیا کے مطابق وہ اپنے دورے کے دوران وزیر دفاع گویڈو کروسیٹو سے بھی ملاقات کریں گے،یہ دورہ ایسے وقت میں ہو رہا ہے جب چند ہفتے قبل امریکی صدر ڈونلڈ ٹرمپ اور پوپ لیو چہاردہم کے درمیان سخت بیانات کا تبادلہ سامنے آیا تھا یہ دورہ امریکا اور ویٹیکن کے درمیان تعلقات میں کشیدگی کم کرنے کی کوشش کے طور پر دیکھا جا رہا ہے۔

    واضح رہے کہ پوپ لیو چہاردہم نے امریکا کی ایران کے خلاف پالیسی اور جنگی بیانات پر تنقید کی تھی، جس پر ڈونلڈ ٹرمپ نے سخت ردعمل دیا تھا،پوپ لیو چہاردہم نے 7 اپریل کو ایران کے خلاف امریکی دھمکیوں کو ‘ناقابل قبول’ قرار دیتے ہوئے امن کی اپیل کی تھی، جس کے جواب میں ٹرمپ نے سوشل میڈیا پر پوپ کو تنقید کا نشانہ بنایا اور ان کی پالیسیوں کو کمزور قرار دیا۔

    دوسری جانب اطالوی وزیر اعظم جورجیا میلونی نے پوپ کے حق میں بیان دیتے ہوئے ٹرمپ کی تنقید کو ‘ناقابل قبول’ کہا، جس پر ٹرمپ نے میلونی کو بھی تنقید کا نشانہ بنایا اور ان کی قیادت پر سوال اٹھایا ذرائع کے مطابق مارکو روبیو کا یہ دورہ دونوں فریقین کے درمیان کشیدہ تعلقات کو بہتر بنانے کی ایک اہم سفارتی کوشش سمجھا جا رہا ہے، جبکہ عالمی سطح پر امریکا، یورپ اور ویٹیکن کے تعلقات پر بھی اس کے اثرات مرتب ہو سکتے ہیں۔

  • پی ایس ایل 11 کا فائنل:لاہور میں سیکیورٹی کے خصوصی انتظامات مکمل

    پی ایس ایل 11 کا فائنل:لاہور میں سیکیورٹی کے خصوصی انتظامات مکمل

    پاکستان سپر لیگ 11 کے فائنل کے موقع پر لاہور میں ٹریفک پولیس نے خصوصی انتظامات مکمل کر لیے ہیں-

    سی ٹی او لاہور کے مطابق فائنل میچ کے دوران ٹریفک کی روانی برقرار رکھنے کے لیے 8 ڈی ایس پیز، 90 ٹریفک انسپکٹرز اور 500 سے زائد وارڈنز ڈیوٹی انجام دیں گے اس کے ساتھ ساتھ غلط پارکنگ کی روک تھام کے لیے 11 لفٹرز بھی تعینات کیے گئے ہیں۔

    شائقین کے لیے پانچ خصوصی پارکنگ اسٹینڈز قائم کیے گئے ہیں جن میں گورنمنٹ کالج فار بوائز اور سی بی ڈی پارکنگ شامل ہیں مغل پورہ اور گڑھی شاہو سے آنے والے شہری اپنی گاڑیاں مین بلیوارڈ گلبرگ اور لبرٹی کے اطراف میں پارک کر سکیں گے مال روڈ، جیل روڈ اور کینال روڈ سمیت اہم شاہراہیں ٹریفک کے لیے کھلی رہیں گی تاکہ شہریوں کی آمد و رفت متاثر نہ ہو۔

    دوسری جانب سیکیورٹی کے سخت انتظامات بھی کیے گئے ہیں آئی جی پنجاب کے مطابق فائنل میچ کے دوران 7 ہزار سے زائد پولیس اہلکار سیکیورٹی ڈیوٹی پر تعینات ہوں گے تاکہ غیر ملکی اور ملکی کھلاڑیوں، آفیشلز اور شائقین کو مکمل تحفظ فراہم کیا جا سکے، اسٹیڈیم، کھلاڑیوں کی رہائش گاہوں اور روٹس کے اطراف سرچ آپریشنز اور انٹیلی جنس بنیادوں پر کارروائیاں جاری ہیں، حساس مقامات اور بلند عمارتوں پر اسنائپرز بھی تعینات کیے گئے ہیں،تمام ادارے باہمی رابطے میں ہیں تاکہ پی ایس ایل 11 کے فائنل کا انعقاد پُرامن اور محفوظ ماحول میں یقینی بنایا جا سکے۔

  • نئی دہلی کی رہائشی عمارت میں خوفناک آتشزدگی، بچے سمیت 9 افراد ہلاک

    نئی دہلی کی رہائشی عمارت میں خوفناک آتشزدگی، بچے سمیت 9 افراد ہلاک

    نئی دہلی کے علاقے ویوک وہار میں اتوار کی علی الصبح 4 منزلہ رہائشی عمارت میں لگنے والی خوفناک آگ کے نتیجے میں کم از کم 9 افراد جان سے گئے اور 4 زخمی ہو گئے۔

    ابتدائی معلومات کے مطابق آگ کی وجہ ایئر کنڈیشنر (اے سی) میں دھماکا قرار دی جا رہی ہے، تاہم حتمی وجہ کی تحقیقات جاری ہیں،حکام کے مطابق آگ کی اطلاع صبح 3:47 بجے ملی جس کے بعد فوری طور پر 12 سے 14 فائر ٹینڈرز موقع پر پہنچائے گئے، آگ نے تیزی سے عمارت کی دوسری، تیسری اور چوتھی منزل کو اپنی لپیٹ میں لے لیا، جس کے باعث ریسکیو آپریشن میں مشکلات پیش آئیں۔

    پولیس کے مطابق جاں بحق افراد میں 5 لاشیں دوسری منزل سے، 3 سیڑھیوں کے حصے سے جبکہ ایک شخص کی لاش پہلی منزل سے ملی، ہلاک ہونے والوں میں ایک سالہ بچہ بھی شامل ہے، جس نے واقعے کو مزید دلخراش بنا دیا،مجموعی طور پر حادثے میں 4 مرد، 4 خواتین اور ایک بچے کی موت ہوئی، تیسر ی منزل پر رہنے والے ایک ہی خاندان کے 3 افراد بھی جان سے گئےریسکیو اہلکاروں نے اب تک 10 سے 15 افراد کو عمارت سے نکال لیا ہے، جن میں سے کچھ کو معمولی چوٹیں آئی ہیں اور انہیں اسپتال منتقل کیا گیا ہے۔

    بھارتی وزیراعظم اور دہلی انتظامیہ نے واقعے پر افسوس کا اظہار کرتے ہوئے متاثرہ خاندانوں سے ہمدردی کا اظہار کیا ہے اور زخمیوں کی جلد صحتیابی کی دعا کی ہے،حکام کے مطابق امدادی کارروائیاں جاری ہیں اور ہلاکتوں میں اضافے کا خدشہ بھی ظاہر کیا جا رہا ہے۔

  • کینیڈا میں پارک ٹریل کو پاکستانی نژاد ہارون خان کے نام ے منسوب کردیا گیا

    کینیڈا میں پارک ٹریل کو پاکستانی نژاد ہارون خان کے نام ے منسوب کردیا گیا

    کینیڈا کے مسسگا شہر میں ایک اہم عوامی مقام کو خدمات کے اعتراف میں معروف سماجی رہنما ہارون خان کے نام سے منسوب کر دیا گیا ہے۔

    کینیڈا کے شہر مسسگا کی سٹی کونسل نے اپنے 5 نومبر کے اجلاس میں فیصلہ کیا تھا کہ ٹلز ڈاؤن پارک سے گزرنے والی کثیر المقاصد پگڈنڈی کو ‘ہارون خان ٹریل’ کا نام دیا جائے یہ اعزاز ہارون خان کی 4 دہائیوں پر محیط انسان دوست خدمات کے اعتراف میں دیا گیا ہے۔

    ہارون خان نے پاکستان، بنگلہ دیش، بوسنیا اور صومالیہ سمیت مختلف ممالک میں فلاحی سرگرمیوں میں نمایاں کردار ادا کیا، جبکہ انہوں نے پسماندہ بچوں کے لیے تعلیمی ادارے بھی قائم کیے وہ مقامی سطح پر بھی مختلف تنظیموں کے ساتھ رضاکارانہ خدمات انجام دیتے رہے ہیں تقریب کے دوران پارک میں باضابطہ طور پر نئے نام کی تختی نصب کی گئی۔ اس موقع پر شہر کی میئر کیرولین پیرش، مقامی کونسلرز اور پولیس حکام نے شرکت کی اور ہارون خان کی خدمات کو خراج تحسین پیش کیا۔

    واضح رہے کہ ہارون خان کو ماضی میں متعدد اعزازات سے بھی نوازا جا چکا ہے جن میں کینیڈا کی 125ویں سالگرہ کی یادگاری تختی اور اونٹاریو والنٹیئر سروس ایوارڈ شامل ہیں۔

  • اسرائیل کی جنوبی لبنان میں فضائی بمباری، 41 افراد شہید

    اسرائیل کی جنوبی لبنان میں فضائی بمباری، 41 افراد شہید

    لبنان میں جنگ بندی کے اعلان کے باوجود اسرائیلی فضائی حملوں کا سلسلہ جاری ہے، جس کے نتیجے میں گزشتہ 24 گھنٹوں کے دوران کم از کم 41 افراد شہید ہو گئے۔

    لبنان کی وزارت صحت کے مطابق گزشتہ 24 گھنٹوں میں اسرائیلی فضائی حملوں کے نتیجے میں مزید 41 افراد شہید ہوئے ہیں یہ حملے ایسے وقت میں جاری ہیں جب 17 اپریل کو جنگ بندی کا اعلان کیا گیا تھا، مارچ سے جاری کشیدگی کے بعد مجموعی شہادتوں کی تعداد 2,659 جبکہ 8,183 افراد زخمی ہو چکے ہیں۔

    رپورٹس کے مطابق جنوبی لبنان کے مختلف علاقوں میں اسرائیلی افواج نے متعدد فضائی حملے کیے، جن میں نبطیہ، بنت جبیل، شوکین، کفر دجال اور دیگر علاقے شامل ہیں ان حملوں میں رہائشی مکانات اور گاڑیوں کو بھی نشانہ بنایا گیا۔

    لبنانی نیشنل نیوز ایجنسی کے مطابق نبطیہ کے علاقے شوکین پر حملے میں 3 افراد، جبکہ کفر دجال پر گاڑی کو نشانہ بنانے سے 2 افراد شہید ہوئے اسی طرح لوازیہ میں ایک گھر پر حملے میں 3 افراد جان کی بازی ہار گئے اسرائیلی فضائیہ نے نبطیہ کے قریب القدس چوک اور ضلع ٹائر کے علاقے صدیقین کے گرد بھی حملے کیے، جس کے نتیجے میں مزید جانی نقصان ہوا۔

    دوسری جانب اسرائیل کا مؤقف ہے کہ اس کے حملے حزب اللہ کے ٹھکانوں کو نشانہ بنانے کے لیے ہیں، تاہم مقامی رپورٹس کے مطابق زیادہ تر ہلاک ہونے والوں میں عام شہری شامل ہیں ادھر حزب اللہ نے بھی اسرائیلی افواج پر جوابی حملوں کا دعویٰ کیا ہے اور کہا ہے کہ اس نے جنوبی لبنان میں مختلف مقامات پر اسرائیلی فوجی اہداف کو نشانہ بنایا ہے۔

  • ایران نے مذاکرات کیلئےامریکا کو 14 نکاتی نئی جوابی تجاویز بھیج دیں

    ایران نے مذاکرات کیلئےامریکا کو 14 نکاتی نئی جوابی تجاویز بھیج دیں

    ایران نے پاکستان کے ذریعے امریکا کو اپنے 14 نکاتی جوابی تجاویز بھیج دیں-

    ایران کی نیم سرکاری خبر ایجنسی تسنیم کی رپورٹ کے مطابق، ایران نے پاکستان کے ذریعے امریکا کو اپنے 14 نکاتی جوابی تجاویز بھیجی ہیں، جو امریکی 9 نکاتی جنگ بندی تجویز کے جواب میں پیش کی گئی ہیں ایرانی حکام نے اس بات پر زور دیا ہے کہ یہ تجاویز "جنگ بندی” کی بجائے "جنگ کے مکمل خاتمے” پر مرکوز ہیں، جس کے لیے امریکا کو ایرانی اثاثوں کی بحالی اور پابندیوں کے خاتمے سمیت سخت شرائط پر عمل کرنا ہوگا۔

    رپورٹ کے مطابق امریکا نے اپنی تجویز میں 2 ماہ کی جنگ بندی کی درخواست کی تھی، تاہم ایران نے اس کے برعکس مؤقف اختیار کرتے ہوئے کہا ہے کہ تمام مسائل کو 30 دن کے اندر حل کیا جائے اور جنگ بندی میں توسیع کے بجائے جنگ کے خاتمے پر توجہ دی جائے۔

    ایران کی جانب سے پیش کی گئی 14 نکاتی تجویز میں متعدد اہم امور شامل ہیں، جن میں دوبارہ جارحیت نہ کرنے کی ضمانت، ایران کے اطراف سے امریکی افواج کا انخلا، ایرانی بندرگاہوں پر امریکی بحری ناکہ بندی اور معاشی پابندیوں کا فوری خاتمہ، ایران کے منجمد اثاثوں کی واپسی، ہرجانے کی ادائیگی، پابندیوں کا خاتمہ اور لبنان سمیت تمام محاذوں پر جنگ کا مکمل خاتمہ شامل ہے جبکہ آبنائے ہرمز کے لیے ایک نئے طریقہ کار کی تجویز بھی ایرانی منصوبے کا حصہ ہے اور ایران اس وقت اپنی تجاویز پر امریکا کے باضابطہ ردعمل کا انتظار کر رہا ہے۔

    امریکی نیوز ویب سائٹ ایگزیوس نے بھی اس خبر کی تصدیق کرتے ہوئے کہا ہے کہ ایران نے جمعرات کو امریکا کو 14 نکاتی نظرثانی شدہ تجویز پیش کی ہے۔

    اس تجویز سے آگاہ دو ذرائع کے مطابق اس میں ایک ماہ کی مدت مقرر کی گئی ہے جس کے دوران آبنائے ہرمز کو دوبارہ کھولنے، امریکی بحری ناکہ بندی ختم کرنے اور ایران و لبنان میں جنگ کے مستقل خاتمے پر معاہدہ کیا جائے گا۔ ایرانی تجویز کے مطابق اس ابتدائی معاہدے کے بعد مزید ایک ماہ کی بات چیت کا آغاز کیا جائے گا تاکہ جوہری پروگرام سے متعلق معاہدے تک پہنچا جا سکے۔

    صدر ٹرمپ کو جمعرات کے روز امریکی سینٹرل کمانڈ کے سربراہ ایڈمرل بریڈ کوپر نے ایران کے خلاف ممکنہ فوجی کارروائی کے نئے منصوبوں پر بریفنگ دی۔ اس کے بعد کوپر خطے کے دورے پر روانہ ہوئے اور ہفتے کے روز بحیرہ عرب میں موجود امریکی بحری جہاز یو ایس ایس ٹرپولی پر تعینات اہلکاروں سے ملاقات کی۔

    جمعے کو صدر ٹرمپ نے ایک بار پھر کہا کہ وہ ایرانی تجویز سے مطمئن نہیں ہیں، تاہم ہفتے کے روز پام بیچ سے میامی روانگی سے قبل انہوں نے صحافیوں کو بتایا کہ وہ پرواز کے دوران اس کا جائزہ لیں گے ایران نے ابھی تک اپنے اقدامات کی مکمل قیمت ادا نہیں کی اور ضرورت پڑنے پر اس کے خلاف دوبارہ فوجی کارروائی کی جا سکتی ہے انہوں نے واضح کیا کہ ایران پر دوبارہ حملے خارج از امکان نہیں ہے۔

  • جمائما گولڈ اسمتھ کی ارب پتی تاجر سے منگنی ،جلدشادی کی تیاری

    جمائما گولڈ اسمتھ کی ارب پتی تاجر سے منگنی ،جلدشادی کی تیاری

    عمران خان کی سابق اہلیہ جمائما گولڈ سمتھ مبینہ طور پر دوبارہ شادی کے بندھن میں بندھنے جا رہی ہیں-

    برطانوی میڈیا رپورٹ کے مطابق جمائما گولڈ سمتھ ایک سال سے ڈبلن میں پیدا ہونے والے بزنس مین کیمرون او ریلی کے ساتھ رشتے میں ہیں، جو ایک ارب پتی فنانسر اور معروف بزنس مین ہیں بتایا گیا ہے کہ دونوں نے منگنی کر لی ہے، 62 سالہ کیمرون او ریلی، آنجہانی بین الاقوامی رگبی کھلاڑی سر انتھونی او ریلی کے بیٹے ہیں، جوڑا اس وقت ایک ساتھ رہ رہا ہے اور اپنا وقت سوئٹزرلینڈ میں کیمرون کے گھر اور لندن میں جمائما کے گھر کے درمیان گزارتا ہے۔

    رپورٹس کے مطابق دونوں کی پہلی ملاقات دستاویزی فلموں سے متعلق کام کے دوران ہوئی تھی اور ابتدا میں وہ دوست رہے ایک قریبی ذریعے نے کہا کہ ‘وہ تقریباً ایک سال سے ساتھ ہیں، کیمرون ایک نہایت نجی شخصیت ہیں اور جمائما ان کی نجی زندگی کو محفوظ رکھنا چاہتی ہیں، جمائما کے اہلِ خانہ بھی اس رشتے سے خوش ہیں، اور ان کے بھائی رابن برلے، جو لندن کے معروف کلب فائیو ہارٹ فورڈ اسٹریٹ کے مالک ہیں، کیمرون او ریلی سے ملاقات بھی کر چکے ہیں۔

    واضح رہے کہ جمائما گولڈ سمتھ اس سے قبل پاکستان کے سابق وزیرِاعظم عمران خان کی اہلیہ رہ چکی ہیں، دونوں کی شادی 1995 میں ہوئی تھی اور 2004 میں علیحدگی ہو گئی تھی ان کے دو بیٹے قاسم اور سلیمان ہیں۔

  • ایران پر دوبارہ حملے کرنے کے امکانات موجود ہیں،ٹرمپ

    ایران پر دوبارہ حملے کرنے کے امکانات موجود ہیں،ٹرمپ

    امریکی صدر ڈونلڈ ٹرمپ نے کہا ہے کہ ایران پر دوبارہ حملے کرنے کے امکانات موجود ہیں، ایران نے جو کچھ کیا ہے اب تک ایران نے اس کی زیادہ بڑی قیمت ادا نہیں کی۔

    ٹروتھ سوشل پر جاری بیان میں ڈونلڈ ٹرمپ نے کہا کہ ایران سے ہماری مذاکرات کی صلاحیت لامحدود ہے، آبنائے ہرمز کی ناکا بندی انتہائی دوستانہ ہے مجھے ایران سے ڈیل کی تجویز سے آگاہ کر دیا گیا ہے، مجھے اس تجویز کے اصل الفاظ سے جلد آگاہ کیا جائے گا، جلد ہی جائزہ لوں گا، یہ سوچ نہیں سکتا کہ ایران کی تجاویز قابل قبول ہوں گی، کہ انہوں نے گزشتہ 47 سالوں میں انسانیت اور دنیا کے ساتھ جو کچھ کیا ہے اس کی کوئی بڑی قیمت ادا نہیں کی ہے۔ جرمنی سے 5 ہزار سے زائد امریکی فوجی اہلکاروں کو نکال رہے ہیں۔

    دوسری جانب عالمی خبر رساں ادارے کے مطابق ٹرمپ نے ایران کے بعد اپنے نئے ہدف کے طور پر کیوبا کا نام لیا ہے اور امریکی جنگی پالیسی پر کھل کر گفتگو کی ہے فلوریڈا میں ایک تقریب سے خطاب کرتے ہوئے امریکی صدر نے کہا کہ ایران جنگ کے بعد واپسی پر امریکی بحریہ کا ایک بڑا طیارہ بردار جہاز کیوبا کے ساحل کے قریب تعینات کیا جا سکتا ہے، جنگی بحری بیڑے کی تعیناتی کی وجہ سے کیوبا خود ہی ہتھیار ڈالنے پر مجبور ہوجائے گا اور امریکا اس ملک کا کنٹرول سنبھال لے گا۔ یہ سب بہت جلد ممکن ہے۔

  • میرپورخاص سول ہسپتال: سیکیورٹی اور بھرتیوں پر سنگین سوالات، شفاف انکوائری کا مطالبہ

    میرپورخاص سول ہسپتال: سیکیورٹی اور بھرتیوں پر سنگین سوالات، شفاف انکوائری کا مطالبہ

    میرپورخاص سول ہسپتال: سیکیورٹی یا سازش؟ عوامی جان و مال داؤ پر!میرپورخاص (رپورٹ سید شاہزیب شاہ ): کیا عوام کی جان و مال کی حفاظت کے لیے مامور اسٹاف اب خود ایک سوالیہ نشان بن چکی ہے؟ میرپورخاص کا سول ہسپتال، جسے تحفظ اور علاج کی علامت ہونا چاہیے تھا، اب سنگین الزامات اور شکوک و شبہات کی زد میں ہے۔ڈاکٹر اسٹاف اور اکاونٹ انچارج پر سنگین الزامات سول ہسپتال میرپورخاص کے اکاونٹ انچارج کے خلاف سنگین شکایات کے سامنے آئی ہیں۔ عوامی حلقوں اور ملازمین کی جانب سے اٹھائے گئے سوالات نے ہسپتال انتظامیہ کی کارکردگی پر مہرِ تصدیق ثبت کر دی ہے:بغیر تصدیق بھرتیاں کے : الزام ہے کہ ہسپتال میں اسٹاف کو بغیر کسی پولیس ویریفکیشن اور شناختی کارڈز کی مکمل جانچ پڑتال کے بھرتی کیا گیا ہے۔ کیا کسی بھی شخص کو بغیر کسی کولیفکشن اور بغیر تجربہ کے ڈیوٹی پر رکھنا عوام کی زندگیوں سے کھیلنا نہیں ہے؟اقربا پروری (نیپوٹزم): میرٹ کو پسِ پشت ڈالتے ہوئے ایک ہی برادری کے افراد کو بڑی تعداد میں بھرتی کرنے کے الزامات ہیں۔ کیا یہ تعیناتیاں قابلیت کی بنیاد پر کی گئیں یا "اپنوں کو نوازنے” کی پالیسی اپنائی گئی اور عوام کی زندگی سے کھیلنا کھاں کا انصاف ھے یہ نہ صرف بدانتظامی ہے بلکہ کھلی ناانصافی اور انسانی حقوق کی خلاف ورزی ہے۔
    حساس ذمہ داری اور انتظامی خاموشیسوال یہ پیدا ہوتا ہے کہ کیا ایسے شخص کو اکاؤنٹنٹ کی حساس ذمہ داری سونپی جانی چاہیے جس پر اتنے سنگین الزامات ہوں؟ کیا انتظامیہ کسی بڑے حادثے کا انتظار کر رہی ہے؟ بے چینی اور انتظامیہ کی خاموشی کسی بڑے طوفان کا پیش خیمہ ثابت ہو سکتی ہے۔مطالبات: شفاف انکوائری کا وقت تعین کیا جاےعوامی حلقوں اور متاثرہ عوام کی جانب سے درج ذیل مطالبات سامنے آئے ہیں:
    ایس ایس پی میرپورخاص فوری طور پر ان الزامات کی شفاف انکوائری کا حکم دیں۔اگر الزامات ثابت ہو جاتے ہیں، تو ذمہ داران کے خلاف سخت قانونی کارروائی عمل میں لائی جائے۔یہ محض ایک انتظامی مسئلہ نہیں بلکہ ہزاروں مریضوں اور شہریوں کے زندگی کے تحفظ کا سوال ہے۔ اب خاموشی اختیار کرنا مزید خطرات کو دعوت دینے کے مترادف ہے۔ سچ کا سامنے آنا اور انصاف ہونا ناگزیر ہے!