Blog

‎بھارتی فوج کے ایک اسپیشل فورسز افسر کی جانب سے یورپ میں سیاسی پناہ کی درخواست دینے کی اطلاعات نے عسکری نظام اور حکومتی پالیسیوں سے متعلق نئی بحث چھیڑ دی ہے۔
‎باخبر ذرائع کے مطابق بھارتی فوج کے میجر شیرف بھونسلے سرکاری اجلاس میں شرکت کے لیے بیرونِ ملک روانہ ہوئے تھے، تاہم بعد ازاں انہوں نے یورپ میں سیاسی پناہ (اسائلم) کے لیے درخواست دے دی۔ رپورٹس کے مطابق افسر مبینہ طور پر حکومتی پالیسیوں، فوج میں بڑھتی سیاسی مداخلت اور داخلی ماحول سے ناخوش تھے۔
‎ذرائع کا کہنا ہے کہ میجر بھونسلے اگست 2014 میں سالانہ رخصت پر بیرونِ ملک گئے تھے لیکن اس کے بعد وہ واپس بھارت نہیں لوٹے۔ یہ وہی عرصہ تھا جب ملک میں سیاسی تبدیلیوں کے بعد سکیورٹی اور قومی پالیسیوں کے حوالے سے نئی حکمتِ عملی اپنائی جا رہی تھی۔
‎بھارتی فوج کی اندرونی تحقیقات میں مبینہ طور پر یہ بات بھی سامنے آئی کہ افسر نے ملٹری انٹیلیجنس کی لازمی کلیئرنس کے بغیر پیرا جمپنگ سرگرمی کے لیے اسپین کا سفر کیا۔ عسکری حلقوں کے مطابق اس اقدام کو ضابطہ کار کی خلاف ورزی تصور کیا گیا۔
‎بعد ازاں سوشل میڈیا سرگرمیوں کی بنیاد پر انہیں ناروے میں موجود ہونے سے متعلق اطلاعات سامنے آئیں، تاہم دستیاب معلومات کے مطابق گزشتہ ایک دہائی کے دوران بھارتی حکام ان کے حتمی مقام کی باضابطہ تصدیق نہیں کر سکے۔

‎منی پور کے ایک مسلح گروہ نے دعویٰ کیا ہے کہ آج صبح 11 بجے لِیتان کے علاقے میں انہوں نے آسام رائفلز یونٹ سے تعلق رکھنے والے 13 اہلکاروں کو حراست میں لے لیا۔
‎گروہ کے مطابق یہ اہلکار بھارتی فوج کے ساتھ مل کر کارروائیاں کر رہے تھے اور مبینہ طور پر مظاہرین پر فائرنگ اور گھروں کو نذرِ آتش کرنے میں ملوث تھے۔ بیان میں الزام لگایا گیا کہ یہ اقدامات بھارتیہ جنتا پارٹی (بی جے پی) حکومت کی حمایت میں کیے جا رہے تھے۔
‎اس واقعے سے متعلق بھارتی حکام کی جانب سے فوری طور پر کوئی باضابطہ ردعمل سامنے نہیں آیا، جبکہ دعووں کی آزاد ذرائع سے تصدیق بھی نہیں ہو سکی ہے۔


اسرائیل نے اتوار کو اعلان کیا کہ وہ مقبوضہ مغربی کنارے کے ایک بڑے حصے میں زمین کے انتظام (لینڈ ریگولیشن) کا متنازع عمل شروع کرے گا، جس سے اس علاقے پر اسرائیلی کنٹرول مضبوط ہو سکتا ہے۔
پاکستان نے اس فیصلے کی شدید مذمت کرتے ہوئے عالمی برادری سے مطالبہ کیا ہے کہ وہ اسرائیلی اقدامات کے خلاف ٹھوس اقدامات کرے اور بین الاقوامی قوانین کے احترام کو یقینی بنائے۔ دفتر خارجہ کے بیان میں کہا گیا کہ یہ اقدام بین الاقوامی قانون اور اقوام متحدہ کی متعلقہ قراردادوں کی صریح خلاف ورزی ہے۔
‎بیان میں مزید کہا گیا کہ ’قابض طاقت کا بین الاقوامی قانون کی مسلسل نظر انداز اور اشتعال انگیز اقدامات خطے میں منصفانہ، جامع اور دیرپا امن کے امکانات کو کمزور کر رہے ہیں۔‘ پاکستان نے فلسطینی عوام کے حق خودارادیت اور 1967 سے قبل کی سرحدوں پر مبنی ایک آزاد فلسطینی ریاست کے قیام کے لیے مکمل حمایت کا اعادہ بھی کیا۔
‎اسرائیلی آباد کاری مخالف گروپ ’پیس ناؤ‘ نے کہا کہ یہ عمل فلسطینی زمین پر بڑے پیمانے پر قبضے کے مترادف ہے اور اسرائیل کو ایریا سی کے تقریباً تمام حصے پر کنٹرول حاصل کرنے کی اجازت دیتا ہے، جو مغربی کنارے کے 60 فیصد حصے پر محیط ہے اور مکمل طور پر اسرائیلی فوجی کنٹرول میں ہے۔


سابق امریکی صدر باراک اوباما نے ایلینز کے حوالے سے اپنے بیان کی وضاحت کرتے ہوئے کہا ہے کہ زمین پر خلائی مخلوق کی آمد کے امکانات موجود ہیں لیکن اس کی تصدیق کا کوئی ثبوت نہیں ملا۔
ہفتے کے روز ایک پوڈکاسٹ میں اوباما نے کہا تھا کہ "ایلیئنز حقیقت میں ہوتے ہیں لیکن میں نے انہیں نہیں دیکھا” اور یہ کہ ایریا 51 میں کوئی خلائی مخلوق یا زیرِ زمین تنصیب نہیں رکھی گئی۔
‎بعد ازاں اوباما نے انسٹاگرام پر وضاحت جاری کی کہ کائنات وسیع ہے اور کہیں نہ کہیں زندگی کے امکانات ہو سکتے ہیں، تاہم اپنی صدارت کے دوران انہیں کسی خلائی مخلوق کے زمین سے رابطے کا ثبوت نہیں ملا۔
‎اوباما نے کہا کہ ابتدائی بیان ایک مختصر "لائٹننگ راؤنڈ” کے دوران دیا گیا تھا، جہاں سوالات تیز رفتاری سے کیے جا رہے تھے، اس لیے بیان کو صحیح سیاق و سباق میں سمجھنا ضروری ہے۔