واپڈا کی جانب سے جاری تازہ اعدادوشمار کے مطابق بھارت کی جانب سے دریائے چناب میں پانی کی آمد میں نمایاں کمی ریکارڈ کی گئی ہے، جس نے آبی صورتحال پر نئے سوالات کھڑے کر دیے ہیں۔
اعدادوشمار کے مطابق ہیڈ مرالہ کے مقام پر دریائے چناب میں پانی کی آمد کم ہو کر 9 ہزار کیوسک رہ گئی ہے، جبکہ پانی کا اخراج صرف 1 ہزار 100 کیوسک ریکارڈ کیا گیا۔ یہ کمی گزشتہ روز کے مقابلے میں تقریباً 11 ہزار 900 کیوسک کم ہے، جو ایک بڑی گراوٹ سمجھی جا رہی ہے۔
واپڈا کے مطابق گزشتہ روز اسی مقام پر پانی کی آمد 20 ہزار 900 کیوسک تھی جبکہ اخراج 13 ہزار 100 کیوسک ریکارڈ کیا گیا تھا۔ اسی طرح یکم مئی کو بھی پانی کی آمد 20 ہزار 900 کیوسک رہی، جبکہ 30 اپریل کو یہ مقدار 25 ہزار 200 کیوسک تک تھی اور اخراج 17 ہزار 400 کیوسک ریکارڈ کیا گیا تھا۔
ماہرین کے مطابق پانی کی اس اچانک کمی سے نہ صرف زرعی شعبے بلکہ آبی ذخائر پر بھی اثرات مرتب ہو سکتے ہیں۔ دریاؤں میں پانی کی روانی کا انحصار بالائی علاقوں میں پانی چھوڑنے پر ہوتا ہے، اس لیے ایسے حالات میں صورتحال پر مسلسل نظر رکھنا ضروری ہوتا ہے۔
یاد رہے کہ اس سے قبل بھی بھارت کی جانب سے دیگر دریاؤں، خصوصاً ستلج اور جہلم میں پانی کے بہاؤ میں تبدیلیوں کی اطلاعات سامنے آتی رہی ہیں، جس کے باعث فلڈ الرٹس اور آبی خدشات پیدا ہوئے تھے۔
ماہرین کا کہنا ہے کہ خطے میں پانی کے مسائل پہلے ہی حساس نوعیت کے حامل ہیں، اس لیے کسی بھی غیر معمولی کمی یا اضافے کو سنجیدگی سے دیکھنا ضروری ہے۔
Blog
-
دریائے چناب میں پانی کی آمد میں نمایاں کمی، واپڈا کے اعدادوشمار جاری
-
دیپالپور: شاہ پور میں نمبرداری جلسہ عام، میرٹ اور شفافیت پر زور، نادہندگان کے خلاف کارروائی کا حکم
اوکاڑہ (نامہ نگار ملک ظفر)دیپالپوراسسٹنٹ کمشنر فیصل شہزاد چیمہ کی زیر صدارت شاہ پور میں نمبرداری جلسہ عام کا انعقاد، جلسہ عام میں ریونیو افسران، نمبرداری کے درخواست گزاروں سمیت اہل دیہہ نے کثیر تعداد میں شرکت کی۔ اجلاس میں نمبرداری نظام کو مزید مؤثر بنانے، سرکاری امور میں بہتری اور عوامی مسائل کے حل کے سلسلہ میں نمبرداران کے انتخاب کے لیے درخواست گزاروں کے کوائف کا جائزہ لیا گیا، اسسٹنٹ کمشنر فیصل شہزاد چیمہ نے کہا کہ نمبرداران حکومت اور عوام کے درمیان اہم کڑی ہیں، لہٰذا وہ اپنی ذمہ داریاں ایمانداری اور فرض شناسی سے ادا کرنا انتہائی اہم ہے۔ انہوں نے کہا کہ نمبرداران کے انتخاب میں میرٹ اور شفافیت کو ملحوظ خاطر رکھا جائے گا جبکہ سرکاری واجبات کے ناد ہندگان کے ساتھ ہرگز کوئی رعایت نہیں برتی جائے گی، اجلاس میں سرکاری واجبات کی عدم ادائیگی پر سخت برہمی کا اظہار کیا گیا اور نادہندگان درخواست گزاروں کے خلاف قانونی کارروائی عمل میں لانے کے احکامات جاری کیے گئے۔ اسسٹنٹ کمشنر نے متعلقہ حکام کو ہدایت کی کہ واجبات کی ادائیگی سے گریز کرنے والے درخواست گزاروں کو فوری طور پر گرفتار کر کے قانون کے مطابق کارروائی کی جائے۔ انہوں نے مزید کہا کہ حکومتی ریونیو کی بروقت وصولی یقینی بنانے کے لیے تمام ممکنہ اقدامات کیے جائیں گے اور اس ضمن میں کسی قسم کی کوتاہی ہرگز برداشت نہیں کی جائے گی۔
-
خفیہ اطلاع پر بغیر لائسنس ادویات تیار کرنے والی فیکٹری پر چھاپہ ،ملزم گرفتار
کراچی: ایف آئی اے کارپوریٹ کرائم سرکل نے غیر قانونی ادویات بنانے والی فیکٹری کے خلاف کا رووائی کی، جس میں ملزم گرفتار کرلیا گیا ہے۔
تفصیلات کے مطابق ڈائریکٹر ایف آئی اے کراچی زون کی ہدایت پر ملیر میں بڑی کارروائی کی گئی جس سے جعلی فارما نیٹ ورک پر کاری ضرب لگائی گئی، خفیہ اطلاع پر بغیر لائسنس ادویات تیار کرنے والی فیکٹری پر چھاپہ ماراگیا۔ کارروائی کے دوران ملزم فیصل شاہد کو موقع پر گرفتار کیا گیا جو فیکٹری کا مالک اور آپر یٹر نکلا۔
چھاپے میں بڑی مقدار میں خام مال، تیار شدہ ادویات اور مشینری برآمد، جعلی پروڈکشن کا بڑا دھندا سامنے آگیا۔ برآمد شدہ سامان ڈریپ حکام کے حوالے کردیا گیا جبکہ سامان قانونی تقاضوں کے مطابق تحویل میں لے لیا گیا ہےمزید ملوث افراد کی تلاش جاری ہے اور نیٹ ورک کے مکمل خاتمے کے لیے تحقیقات تیز کردی گئی ہیں۔
-
صوبائی وزیر سعید غنی سے حمید کریم کی ملاقات، عوامی مسائل کے حل پر پیش رفت کا عزم
کشمور (رپورٹ وقار احمد اعوان) صوبائی وزیر سعید غنی سے حمید کریم کی ایک اہم اور بامقصد ملاقات ہوئی جس میں صوبے خصوصاً متعلقہ علاقوں کو درپیش مسائل مزدوروں کے حقوق روزگار کے مواقع اور سوشل پروٹیکشن کے نظام کو مؤثر بنانے جیسے اہم امور پر تفصیلی اور سنجیدہ تبادلہ خیال کیا گیا ذرائع کے مطابق ملاقات خوشگوار ماحول میں منعقد ہوئی جہاں حمید کریم نے اپنے علاقے کے عوام کو درپیش بنیادی مسائل ترقیاتی کاموں میں درپیش رکاوٹوں اور فلاحی منصوبوں کی ضرورت پر جامع انداز میں روشنی ڈالی انہوں نے خاص طور پر نوجوانوں کے لیے روزگار کے مواقع بڑھانے مزدور طبقے کے حقوق کے تحفظ اور سوشل سیکیورٹی کے نظام کو مزید فعال بنانے پر زور دیا اس موقع پر صوبائی وزیر سعید غنی نے گفتگو کرتے ہوئے کہا کہ حکومت سندھ مزدوروں اور محنت کش طبقے کی فلاح و بہبود کے لیے عملی اقدامات کر رہی ہے اور محکمہ محنت ہیومن ریسورسز و سوشل پروٹیکشن کے تحت جاری منصوبوں کو مزید مؤثر اور عوام دوست بنایا جا رہا ہے انہوں نے یقین دہانی کرائی کہ پیش کیے گئے مسائل کو ترجیحی بنیادوں پر حل کیا جائے گا اور متعلقہ حکام کو فوری ہدایات جاری کی جائیں گی ملاقات میں باہمی تعاون کے فروغ ترقیاتی عمل کو تیز کرنے اور عوامی مسائل کے پائیدار حل کے لیے مسلسل رابطے میں رہنے پر بھی اتفاق کیا گیا اس موقع پر اس عزم کا اظہار کیا گیا کہ عوام کی فلاح و بہبود اور علاقے کی ترقی کے لیے مشترکہ کوششیں جاری رکھی جائیں گی آخر میں حمید کریم نے صوبائی وزیر سعید غنی کا شکریہ ادا کرتے ہوئے امید ظاہر کی کہ اس ملاقات کے مثبت اثرات جلد سامنے آئیں گے اور عوام کو درپیش مسائل میں واضح بہتری آئے گی۔
-
ہیٹ ویو میں کے الیکٹرک کا ریلیف پلان، لوڈشیڈنگ میں نرمی
کراچی میں ممکنہ ہیٹ ویو کے پیش نظر کے الیکٹرک نے شہریوں کو ریلیف دینے کے لیے اہم اقدامات کا اعلان کیا ہے۔ ترجمان کے مطابق شدید گرمی کے دوران بجلی کی فراہمی کو بہتر بنانے کے لیے خصوصی حکمت عملی ترتیب دی گئی ہے تاکہ شہریوں کو کم سے کم مشکلات کا سامنا کرنا پڑے۔
کے الیکٹرک حکام کا کہنا ہے کہ ہیٹ ویو کے دوران سسٹم کی بہتری کے لیے کیے جانے والے تمام مینٹی ننس شٹ ڈاؤنز کو عارضی طور پر معطل کر دیا جاتا ہے۔ اس اقدام کا مقصد یہ ہے کہ کسی بھی قسم کی تکنیکی خرابی یا مرمت کے باعث بجلی کی فراہمی متاثر نہ ہو۔
ترجمان نے بتایا کہ اس وقت کے الیکٹرک کا تقریباً 70 فیصد نیٹ ورک پہلے ہی لوڈشیڈنگ سے مستثنیٰ ہے، جس سے شہریوں کی بڑی تعداد کو مسلسل بجلی فراہم کی جا رہی ہے۔
اعلامیے میں مزید کہا گیا کہ اگر شہر کا درجہ حرارت 45 ڈگری سینٹی گریڈ سے تجاوز کر جائے تو دوپہر کے اوقات میں کی جانے والی اکنامک لوڈشیڈنگ بھی فوری طور پر روک دی جاتی ہے۔ اس فیصلے کا مقصد شدید گرمی کے دوران شہریوں کو زیادہ سے زیادہ سہولت فراہم کرنا ہے تاکہ وہ ہیٹ ویو کے اثرات سے محفوظ رہ سکیں۔
کے الیکٹرک نے شہریوں سے اپیل کی ہے کہ وہ احتیاطی تدابیر اختیار کریں، غیر ضروری طور پر دھوپ میں نکلنے سے گریز کریں اور پانی کا زیادہ استعمال کریں تاکہ ہیٹ ویو کے خطرات سے بچا جا سکے۔
کمپنی کا کہنا ہے کہ وہ اپنی ذمہ داریوں کو مدنظر رکھتے ہوئے ہیٹ ویو کے دوران بجلی کی مسلسل فراہمی کو یقینی بنانے کے لیے تمام ممکنہ اقدامات کر رہی ہے۔ -
آبنائے ہرمز کی بندش: کویت کی تیل برآمدات پہلی بار صفر
گزشتہ ماہ کویت کی تیل برآمدات 35 سال میں پہلی بار مکمل طور پر رک گئیں۔
روسی میڈیا کے مطابق کویت نے اپریل 2026 میں خام تیل کی ایک بھی بیرل برآمد نہیں کی، جو 1991 کی خلیجی جنگ کے بعد پہلی بار ہوا ہے شپنگ مانیٹرنگ ڈیٹا کے مطابق اگرچہ کویت میں تیل کی پیداوار جاری رہی، تاہم برآمدات مکمل طور پر معطل رہیں،ماہرین کے مطابق اس کی بنیادی وجہ آبنائے ہرمز کی بندش ہے، جو کویت کی تیل ترسیل کا واحد راستہ ہے۔
حکام کے مطابق 17 اپریل کو کویت پٹرولیم کارپوریشن نے ’فورس میجر‘ کا اعلان کرتے ہوئے برآمدات روک دیں، کیونکہ آبنائے ہرمز سے جہازوں کی آمدور فت مؤثر طور پر بند ہو گئی تھی یہ آبی گزرگاہ دنیا کی اہم ترین توانائی راہداریوں میں شمار ہوتی ہے۔
کویت، جو امریکا کا قریبی اتحادی اور خطے میں ایک اہم لاجسٹک مرکز ہے، روزانہ تقریباً 27 لاکھ بیرل تیل پیدا کرتا تھا، جس میں سے لگ بھگ 18 لاکھ 50 ہزار بیرل برآمد کیے جاتے تھے ان برآمدات کا بڑا حصہ ایشیائی ممالک، خصوصاً چین، بھارت اور جنوبی کوریا کو جاتا تھا مئی 2026 کے آغاز تک کویت کی تیل پیداوار کم ہو کر تقریباً 12 لاکھ بیرل یومیہ رہ گئی ہے
ماہرین کا کہنا ہے کہ تیل کویت کی معیشت میں ریڑھ کی ہڈی کی حیثیت رکھتا ہے، جو مجموعی قومی پیداوار (جی ڈی پی) کا تقریباً 50 فیصد جبکہ حکومتی بجٹ کا 90 فیصد فراہم کرتا ہے۔
ایران نے مخالف جہازوں کے لیے راستہ بند رکھا ہوا ہے جبکہ امریکی بحریہ خلیج فارس میں ایرانی بندرگاہوں کے گرد سرگرم ہے اس صورتحال کے باعث عالمی منڈی میں تیل کی قیمتیں بڑھ کر 120 ڈالر فی بیرل سے تجاوز کر گئی ہیں، جو 2022 کے بعد بلند ترین سطح ہے۔
-
ساجد سدپارہ نے بڑا اعزاز اپنے نام کر لیا
پاکستان کے نامور کوہ پیما ساجد علی سدپارہ نے نیپال میں واقع دنیا کی 5ویں بلند ترین چوٹی ماؤنٹ ماکالو (8485 میٹر) کو بغیر اضافی آکسیجن کے سر کر لیا۔
مہم کے منتظم ادارے سیون سمٹ ٹریکس کے مطابق ساجد سدپارہ 2 مئی کی صبح 5 بجے کامیابی سے چوٹی پر پہنچے، ٹیم میں پاکستان سے ساجد کے علاوہ یوہانس لاؤ اور 7 شیرپا شامل تھے، جنہوں نے ایک مشکل اور تکنیکی لحاظ سے چیلنجنگ مہم کو کامیابی سے مکمل کیا۔
ساجد سدپارہ اس وقت دنیا کی تمام 14، 8 ہزار میٹر سے بلند چوٹیوں کو بغیر اضافی آکسیجن کے سر کرنے کے مشن پر ہیں، اور ماکالو کی کامیاب چڑھائی اس سلسلے میں ان کی 10ویں بڑی کامیابی ہے،وہ 4 اپریل کو نیپال پہنچے تھے جبکہ 16 اپریل کو بیس کیمپ پہنچ کر 25 اپریل کو سمٹ روٹیشن مکمل کی گئی۔
الپائن کلب آف پاکستان کے صدر عرفان ارشد نے ساجد کو مبارکباد دیتے ہوئے کہا کہ یہ کامیابی پوری قوم کے لیے فخر کا باعث ہے، نائب صدر کرار حیدری نے بھی ان کی کارکردگی کو نوجوانوں کے لیے مشعل راہ قرار دیا،29 سالہ ساجد اس سے قبل ایورسٹ، کے ٹو، نانگا پربت اور دیگر بلند چوٹیوں کو بھی سر کر چکے ہیں، جس سے وہ عالمی کوہ پیمائی برادری میں نمایاں مقام حاصل کر چکے ہیں۔
ساجد، لیجنڈری کوہ پیما محمد علی سدپارہ کے صاحبزادے ہیں، جو 2021 میں کے ٹو کی سرمائی مہم کے دوران جان کی بازی ہار گئے تھے، اپنے والد کے نقش قدم پر چلتے ہوئے ساجد نے عالمی سطح پر پاکستان کا نام روشن کیا ہے۔
-
پی ایس ایل 11: فائنل میچ کا وقت تبدیل، بادل بھی برسنےکے لیے تیار
پی ایس ایل فائنل کا وقت تبدیل کردیا گیا ہے، دوسری جانب بادل کےسائے بھی منڈلانے لگے ہیں، جس سے کرکٹ شائقین کی تشویش میں اضافہ ہوگیا ہے۔
محکمہ موسمیات نے حیدرآباد کنگزمین اور پشاور زلمی کے درمیان ہونے والے اس سنسنی خیز مقابلے کے دوران بارش کی پیشگوئی کردی ہے، جس کے باعث میچ کا وقت تبدیل کرکے 7بجے سے 8بجے کردیا گیا ہے،ڈائریکٹر فلڈ فار کاسٹنگ ڈویژن علیم الحسن کے مطابق شہر میں شام 4 بجے سے رات 10 بجے کے دوران بارش ہونے کا 60 فیصد امکان ہے، جو میچ کے اوقات پر براہِ راست اثر انداز ہو سکتا ہے۔
حکام کا کہنا ہے کہ آئندہ 24 گھنٹوں کے دوران مطلع ابر آلود رہے گا اور بارش کا سلسلہ شام کے وقت شروع ہو سکتا ہے، جو کھیل میں خلل ڈالنے کا باعث بن سکتا ہے،پی ایس ایل 11 کا یہ فیصلہ کن معرکہ جہاں دونوں ٹیمین میدان مارنے کو بیتاب ہیں، وہیں موسمی حالات اسے مزید پیچیدہ بنا سکتے ہیں۔
فائنل میچ سے قبل رنگا رنگ اختتامی تقریب کا بھی اہتمام کیا گیا ہے، جس میں معروف گلوکار عاطف اسلم، علی عظمت، عارف لوہار، آئمہ بیگ اور صابری سسٹرز اپنی پرفارمنس پیش کریں گے۔
پشاور زلمی کے کپتان بابر اعظم کا کہنا ہے کہ ہر کپتان کی خواہش ہوتی ہے کہ وہ ٹرافی اپنے نام کرے اور وہ بھی اسی عزم کے ساتھ میدان میں اتریں گے۔
دوسری جانب حیدرآباد کنگز کے کپتان مارنش لبوشین نے کہا کہ ٹیم نے سخت مقابلے کھیل کر فائنل تک رسائی حاصل کی ہے اور فیصلہ کن میچ میں بھی بہترین کارکردگی دکھائیں گے۔
چیئرمین پی سی بی محسن نقوی کی زیر صدارت اجلاس میں فائنل کے انتظامات کا تفصیلی جائزہ لیا گیا، جس میں ہدایت کی گئی کہ شائقین کرکٹ کے لیے بہترین سہولیات فراہم کی جائیں اور ایونٹ کو ہر لحاظ سے کامیاب بنایا جائےمحسن نقوی نے شائقین کو مشورہ دیا کہ اختتامی تقریب سے بھرپور لطف اندوز ہونے کے لیے شام 6 بجے تک اسٹیڈیم پہنچ جائیں۔
-
حکومت کا پاکستانی عازمین حج کیلئےسعودی عرب میں 35 جدید کلینکس قائم کرنے کا اعلان
سعودی عرب میں حج کے لیے آنے والے پاکستانی عازمین کو طبی سہولیات فراہم کرنے کے لیے حکومتِ پاکستان نے مکہ مکرمہ اور مدینہ منورہ میں جدید کلینکس فعال کرنا شروع کر دیئے ہیں۔
حکام کے مطابق مرحلہ وار منصوبے کے تحت مجموعی طور پر 35 جدید کلینکس قائم کیے جا رہے ہیں، جہاں عازمینِ حج کو جدید طبی سہولیات میسر ہوں گی، ڈائر یکٹر جنرل حج عبدالوہاب سومرو نےمکہ مکرمہ میں ایک کلینک کے دورے کے دوران بتایا کہ حکومت عازمین کی تمام طبی ضروریات پوری کرنے کے لیے پرعزم ہے،تمام سہولیات یہاں موجود ہیں، امید ہے کہ عازمین حج کو کسی قسم کی تکلیف کا سامنا نہیں کرنا پڑے گا اور ان کی تمام طبی ضروریات یہیں پوری کی جائیں گی۔
عبدالوہاب سومرو کے مطابق مکہ مکرمہ میں 35 ڈسپنسریاں جبکہ مدینہ منورہ کے مرکزیہ علاقے میں 2 ڈسپنسریاں قائم کی گئی ہیں، انہوں نے وضاحت کی کہ مر کزیہ میں کم ڈسپنسریاں اس لیے رکھی گئی ہیں کیونکہ عازمین حج وہاں سے دیگر مقامات کی جانب مسلسل نقل و حرکت میں رہتے ہیں، ہر کلینک میں 24 گھنٹے مریضوں کی سہولت کے لیے 3 سے 4 ایمبولینسز موجود ہیں، آؤٹ پیشنٹ ڈیپارٹمنٹ (او پی ڈی) کے ذریعے اب تک 8 ہزار سے زا ئد اقسام کی ادو یات مفت فراہم کی جا چکی ہیں، کلینکس میں جدید لیبارٹری سہولیات بھی دستیاب ہیں جہاں 28 اقسام کے تشخیصی ٹیسٹ کیے جا رہے ہیں۔
وزارتِ مذہبی امور کے مطابق 18 اپریل سے شروع ہونے والے پری حج فلائٹ آپریشن کے بعد سے اب تک 20 ہزار سے زائد پاکستانی عازمین مدینہ منورہ پہنچ چکے ہیں، جبکہ رواں سال مجموعی طور پر ایک لاکھ 79 ہزار سے زائد پاکستانیوں کی حج کی ادائیگی متوقع ہے حج آپریشن کے دوران عازمین کی نقل و حمل، رہائش اور دیگر انتظامات کے ساتھ طبی سہولیات کی فراہمی بھی ایک اہم جزو ہے، جس کے لیے حکومت کی جانب سے خصوصی اقدامات کیے گئے ہیں۔
-
وزیراعظم کی جاتی امراء میں میاں نواز شریف سے ملاقات
وزیرِ اعظم شہباز شریف نے جاتی امراء میں قائد مسلم لیگ ن میاں محمد نواز شریف سے ملاقات کی،اور ملکی صورتحال کے حوالے سے تبادلہ خیال کیا-
سوشل میڈیا پر جاری بیان کے مطابق وزیراعظم محمد شہباز شریف نے میاں محمد نواز شریف کو ملکی صورتحال کے حوالے بریف کیا، وزیرِ اعظم نے قائد مسلم لیگ ن کو مشرق وسطی کی صورتحال اور پاکستان کی قیام امن کیلئے کوششوں پر بھی آگاہ کیا۔
وزیرِ اعظم نے عالمی منڈی میں تیل کی قیمتوں اور عوامی ریلیف کیلئے حکومت کے اقدامات پر بھی میاں نواز شریف کو اعتماد میں لیا، ملاقات میں ملکی سیاسی صورتحال پر بھی تبادلہ خیال ہوا، ملاقات میں وزیرِ اعلی پنجاب مریم نواز بھی شامل تھیں-