Blog

‎منی پور کے ایک مسلح گروہ نے دعویٰ کیا ہے کہ آج صبح 11 بجے لِیتان کے علاقے میں انہوں نے آسام رائفلز یونٹ سے تعلق رکھنے والے 13 اہلکاروں کو حراست میں لے لیا۔
‎گروہ کے مطابق یہ اہلکار بھارتی فوج کے ساتھ مل کر کارروائیاں کر رہے تھے اور مبینہ طور پر مظاہرین پر فائرنگ اور گھروں کو نذرِ آتش کرنے میں ملوث تھے۔ بیان میں الزام لگایا گیا کہ یہ اقدامات بھارتیہ جنتا پارٹی (بی جے پی) حکومت کی حمایت میں کیے جا رہے تھے۔
‎اس واقعے سے متعلق بھارتی حکام کی جانب سے فوری طور پر کوئی باضابطہ ردعمل سامنے نہیں آیا، جبکہ دعووں کی آزاد ذرائع سے تصدیق بھی نہیں ہو سکی ہے۔


اسرائیل نے اتوار کو اعلان کیا کہ وہ مقبوضہ مغربی کنارے کے ایک بڑے حصے میں زمین کے انتظام (لینڈ ریگولیشن) کا متنازع عمل شروع کرے گا، جس سے اس علاقے پر اسرائیلی کنٹرول مضبوط ہو سکتا ہے۔
پاکستان نے اس فیصلے کی شدید مذمت کرتے ہوئے عالمی برادری سے مطالبہ کیا ہے کہ وہ اسرائیلی اقدامات کے خلاف ٹھوس اقدامات کرے اور بین الاقوامی قوانین کے احترام کو یقینی بنائے۔ دفتر خارجہ کے بیان میں کہا گیا کہ یہ اقدام بین الاقوامی قانون اور اقوام متحدہ کی متعلقہ قراردادوں کی صریح خلاف ورزی ہے۔
‎بیان میں مزید کہا گیا کہ ’قابض طاقت کا بین الاقوامی قانون کی مسلسل نظر انداز اور اشتعال انگیز اقدامات خطے میں منصفانہ، جامع اور دیرپا امن کے امکانات کو کمزور کر رہے ہیں۔‘ پاکستان نے فلسطینی عوام کے حق خودارادیت اور 1967 سے قبل کی سرحدوں پر مبنی ایک آزاد فلسطینی ریاست کے قیام کے لیے مکمل حمایت کا اعادہ بھی کیا۔
‎اسرائیلی آباد کاری مخالف گروپ ’پیس ناؤ‘ نے کہا کہ یہ عمل فلسطینی زمین پر بڑے پیمانے پر قبضے کے مترادف ہے اور اسرائیل کو ایریا سی کے تقریباً تمام حصے پر کنٹرول حاصل کرنے کی اجازت دیتا ہے، جو مغربی کنارے کے 60 فیصد حصے پر محیط ہے اور مکمل طور پر اسرائیلی فوجی کنٹرول میں ہے۔


سابق امریکی صدر باراک اوباما نے ایلینز کے حوالے سے اپنے بیان کی وضاحت کرتے ہوئے کہا ہے کہ زمین پر خلائی مخلوق کی آمد کے امکانات موجود ہیں لیکن اس کی تصدیق کا کوئی ثبوت نہیں ملا۔
ہفتے کے روز ایک پوڈکاسٹ میں اوباما نے کہا تھا کہ "ایلیئنز حقیقت میں ہوتے ہیں لیکن میں نے انہیں نہیں دیکھا” اور یہ کہ ایریا 51 میں کوئی خلائی مخلوق یا زیرِ زمین تنصیب نہیں رکھی گئی۔
‎بعد ازاں اوباما نے انسٹاگرام پر وضاحت جاری کی کہ کائنات وسیع ہے اور کہیں نہ کہیں زندگی کے امکانات ہو سکتے ہیں، تاہم اپنی صدارت کے دوران انہیں کسی خلائی مخلوق کے زمین سے رابطے کا ثبوت نہیں ملا۔
‎اوباما نے کہا کہ ابتدائی بیان ایک مختصر "لائٹننگ راؤنڈ” کے دوران دیا گیا تھا، جہاں سوالات تیز رفتاری سے کیے جا رہے تھے، اس لیے بیان کو صحیح سیاق و سباق میں سمجھنا ضروری ہے۔

انڈین حکومت نے اپنی فوج کو مضبوط بنانے کے لیے تقریباً 40 ارب ڈالر کے فوجی ساز و سامان کی خریداری کی منظوری دی ہے، جس میں 114 رفال لڑاکا طیارے بھی شامل ہیں۔ اس کے علاوہ بحریہ کے لیے P-8I نیپچون جاسوس طیاروں کی خریداری بھی شامل ہے۔
‎پاکستان اور دیگر پڑوسی ممالک کے ساتھ بڑھتی ہوئی کشیدگی کے تناظر میں انڈین فوج پر جدید فوجی ساز و سامان خریدنے کا دباؤ بڑھ گیا ہے۔ یکم فروری کو پیش کیے گئے بجٹ میں بھی دفاعی اخراجات میں 15 فیصد اضافہ کیا گیا، جس کے بعد انڈیا کا مجموعی دفاعی بجٹ تقریباً 85 ارب ڈالر تک پہنچ گیا ہے۔
‎حالیہ مہینوں میں انڈین فضائیہ کے لڑاکا طیاروں کے سکواڈرن کی تعداد کم ہو کر 29 رہ گئی ہے۔ مگ 21 طیارے ستمبر 2025 میں ریٹائر ہو چکے ہیں، جبکہ کچھ مگ 29، فرانسیسی جیگوار اور میراج 20 طیارے آنے والے برسوں میں بھی فضائیہ سے ریٹائر ہو جائیں گے۔
‎انڈیا طویل عرصے سے اپنی مسلح افواج کے لیے ہتھیاروں اور مشینری کی درآمد پر انحصار کرتا رہا ہے، تاہم حالیہ برسوں میں مقامی طور پر خود انحصاری یا ’میک اِن انڈیا‘ پر توجہ دی جا رہی ہے۔ 114 رفال طیاروں کی خریداری انڈین فضائیہ کی فوری ضروریات کو پورا کرنے کے لیے ایک اہم معاہدہ سمجھا جا رہا ہے۔