Blog

‎مقبوضہ جموں و کشمیر کے علاقے کشتواڑ میں بھارتی فضائیہ کا ایک طیارہ گر کر تباہ ہونے کی اطلاعات سامنے آئی ہیں، جس کے بعد علاقے میں تشویش کی فضا پھیل گئی ہے۔ ابتدائی رپورٹس کے مطابق یہ کوئی بڑا طیارہ ہو سکتا ہے تاہم اس کی حتمی نوعیت تاحال واضح نہیں ہو سکی۔
‎ذرائع کا کہنا ہے کہ حادثہ ایک دور دراز پہاڑی علاقے میں پیش آیا، جس کے باعث امدادی کارروائیوں میں مشکلات پیش آ رہی ہیں۔ ابھی تک یہ تصدیق نہیں ہو سکی کہ گرنے والا طیارہ کس نوعیت کا تھا، تاہم قیاس آرائیاں کی جا رہی ہیں کہ یہ سی 130، سی 17 یا ایواکس طیارہ ہو سکتا ہے۔
‎بھارتی حکام کی جانب سے اس واقعے پر فوری طور پر کوئی باضابطہ بیان جاری نہیں کیا گیا، جبکہ میڈیا رپورٹس بھی محدود معلومات فراہم کر رہی ہیں۔ عینی شاہدین کے مطابق طیارہ گرنے کے بعد دھماکے کی آواز سنی گئی اور دھواں اٹھتا دیکھا گیا۔
‎ریسکیو ٹیموں کو جائے وقوعہ کی طرف روانہ کر دیا گیا ہے اور علاقے کو گھیرے میں لے لیا گیا ہے۔ حکام کا کہنا ہے کہ حادثے کی وجوہات جاننے کے لیے تحقیقات شروع کر دی گئی ہیں، تاہم خراب موسم یا تکنیکی خرابی کو ممکنہ وجوہات میں شامل کیا جا رہا ہے۔
‎ماہرین کا کہنا ہے کہ اگر واقعی کوئی بڑا فوجی طیارہ حادثے کا شکار ہوا ہے تو اس کے اثرات نہ صرف دفاعی سطح پر بلکہ سکیورٹی صورتحال پر بھی پڑ سکتے ہیں۔

ممبئی میں ایک 25 سالہ شخص کو اپنی سابق خواتین ساتھیوں کو فحش پیغامات بھیجنے اور ہراساں کرنے کے الزام میں گرفتار کر لیا گیا ہے۔

پولیس کے مطابق ملزم ارشد صدیقی کے خلاف کارروائی ایک 19 سالہ لڑکی کی شکایت پر کی گئی، جو اس کی متاثرہ ساتھیوں میں شامل ہے،شکایت کے مطابق متاثرہ لڑکی ممبئی کے علاقے مہالکشمی میں ایک کمپنی میں ٹیلی کالر کے طور پر کام کرتی تھی، جہاں اس کی ملاقات ملزم سے ہوئی۔ لڑکی کا کہنا ہے کہ دونوں کے درمیان کوئی خاص بات چیت نہیں تھی، تاہم ملزم نے آفس کے واٹس ایپ گروپ سے اس کا نمبر حاصل کر لیا۔متاثرہ کے مطابق، نمبر حاصل کرنے کے بعد ملزم نے اسے فحش ویڈیوز اور تصاویر بھیجنا شروع کر دیں اور فون کالز کے ذریعے بھی ہراساں کیا۔ اس نے نازیبا جملے بھی کہے اور دعویٰ کیا کہ اسے ہندو لڑکیاں پسند ہیں۔

پولیس تحقیقات میں یہ بھی سامنے آیا ہے کہ ملزم نے کمپنی کا ڈیٹا غلط استعمال کرتے ہوئے دیگر خواتین کے نمبر حاصل کیے اور انہیں بھی نامناسب مواد بھیجا۔ متاثرہ لڑکی کے والد کے مطابق، ملزم نے کم از کم چار خواتین کو نشانہ بنایا، جن میں زیادہ تر ہندو خواتین شامل تھیں۔پولیس کا کہنا ہے کہ ابتدائی تفتیش میں تین مزید متاثرہ خواتین سامنے آئی ہیں، جنہوں نے اپنے بیانات ریکارڈ کرانے پر رضامندی ظاہر کی ہے۔اس واقعے کی مذمت کرتے ہوئے سابق میئر کشوری پیڈنیکر نے کہا کہ ملزم بار بار اپنا نمبر تبدیل کر کے خواتین کو ہراساں کرتا رہا، تاہم پولیس کی بروقت کارروائی سے اسے گرفتار کر لیا گیا۔

پولیس نے ملزم کے خلاف مقدمہ درج کر کے مزید تفتیش شروع کر دی ہے، جبکہ اس کے اہل خانہ نے بھی قانون کے مطابق کارروائی کی حمایت کی ہے۔

بھوبال: بھارتی ریاست مدھیہ پردیش کے ضلع رائے سین میں انسانیت سوز واقعہ پیش آیا جہاں ایک 70 سالہ بزرگ کو بیٹے کے مبینہ تعلق کی وجہ سے ہجوم نے اغوا کر کے بدترین تشدد کا نشانہ بنایا اور اسے زبردستی پیشاب پینے پر مجبور کر دیا۔

پولیس کے مطابق متاثرہ شخص، بہاری بنجارہ، گاؤں اگاریا مارکھو کا رہائشی ہے۔ اس پر حملہ اس وقت کیا گیا جب اس کے بیٹے نے مبینہ طور پر ہمسایہ ضلع ودیشا کے علاقے شمش آباد کی ایک خاتون کے ساتھ فرار ہونے کی کوشش کی۔شکایت کے مطابق 10 سے 12 افراد پر مشتمل گروہ نے پہلے بنجارہ کے گھر پر دھاوا بولا، اسے اور اس کی اہلیہ کو تشدد کا نشانہ بنایا، پھر بزرگ کو زبردستی اپنے ساتھ لے گئے۔ بعد ازاں اسے تقریباً 150 کلومیٹر دور ضلع راج گڑھ کے علاقے بیاورا منتقل کیا گیا جہاں اسے بدترین تشدد کا نشانہ بنایا گیا اور بوتل میں پیشاب پلا دیا گیا۔

متاثرہ بزرگ نے بیان میں کہا،“انہوں نے مجھے بری طرح مارا پیٹا اور زبردستی پیشاب پلایا۔ میں انصاف چاہتا ہوں۔”واقعے کی سنگینی اس وقت مزید بڑھ گئی جب ملزمان نے اس تمام عمل کی ویڈیو بنا کر سوشل میڈیا پر وائرل کر دی، جس سے متاثرہ خاندان کو شدید ذہنی اذیت کا سامنا کرنا پڑا۔اہل خانہ کے مطابق ابتدائی طور پر پولیس نے کارروائی نہیں کی۔ بنجارہ کی بہو گیتا بائی نے الزام لگایا کہ ملزمان نے نہ صرف ان کے سسر کو اغوا کیا بلکہ گھر والوں کو بھی دھمکیاں دیں۔بعد ازاں متاثرہ شخص بھوبال پہنچا اور پولیس کے اعلیٰ حکام کو باقاعدہ درخواست دے کر وائرل ویڈیو بطور ثبوت پیش کی، جس کے بعد کیس نے توجہ حاصل کی۔

پولیس حکام کا کہنا ہے کہ مقدمہ درج کر لیا گیا ہے اور ملزمان کی گرفتاری کے لیے مختلف اضلاع کی پولیس مشترکہ کارروائی کر رہی ہے۔ ایس ڈی او پی پرتیبھا شرما کے مطابق واقعے کی تحقیقات جاری ہیں اور جلد ملزمان کو گرفتار کر لیا جائے گا