اسلام آباد: ایران کے وزیر خارجہ عباس عراقچی کی آج رات مختصر وفد کے ہمراہ اسلام آباد آمد متوقع ہے، جہاں وہ اہم سفارتی سرگرمیوں میں حصہ لیں گے۔
حکومتی ذرائع کے مطابق ایرانی وزیر خارجہ کی آمد کا مقصد پاکستان کی مصالحتی ٹیم کے ساتھ اہم مذاکرات کرنا ہے، جن کے نتیجے میں امریکا اور ایران کے درمیان اسلام آباد میں امن مذاکرات کے دوسرے دور کے انعقاد کا قوی امکان ظاہر کیا جا رہا ہے۔ذرائع کا کہنا ہے کہ پاکستان کی سفارتی کوششوں کے باعث دونوں ممالک کے درمیان کشیدگی کم کرنے کے لیے مثبت پیش رفت ہوئی ہے، اور اسلام آباد ایک بار پھر اہم عالمی مذاکراتی مرکز کے طور پر سامنے آ رہا ہے۔
دوسری جانب امریکا کی لاجسٹک اور سیکیورٹی ٹیم بھی مذاکراتی عمل کے لیے پہلے ہی اسلام آباد میں موجود ہے، جو اس بات کی نشاندہی کرتی ہے کہ ممکنہ مذاکرات کی تیاریاں مکمل کر لی گئی ہیں۔تجزیہ کاروں کے مطابق اگر یہ مذاکرات کامیاب ہوتے ہیں تو نہ صرف خطے میں استحکام آئے گا بلکہ عالمی سطح پر بھی اس کے مثبت اثرات مرتب ہوں گے۔