ایران کے وزیر خارجہ عباس عراقچی نے پاکستان کی سیاسی اور عسکری قیادت سے ٹیلیفونک رابطے کیے ہیں جس میں خطے کی موجودہ صورتحال اور ممکنہ جنگ بندی کے امور پر تفصیلی تبادلہ خیال کیا گیا۔
ایرانی خبر رساں ادارے کے مطابق عباس عراقچی نے پاکستان کے نائب وزیراعظم اور وزیر خارجہ اسحاق ڈار اور فیلڈ مارشل سید عاصم منیر سے علیحدہ علیحدہ گفتگو کی۔ ان رابطوں میں مشرق وسطیٰ کی کشیدہ صورتحال اور خطے میں امن و استحکام کے لیے جاری کوششوں پر بات چیت کی گئی۔ذرائع کے مطابق گفتگو کے دوران جنگ بندی سے متعلق امور اور سفارتی کوششوں کو مزید مؤثر بنانے پر بھی غور کیا گیا۔
واضح رہے کہ پاکستان کی جانب سے امریکا اور ایران کے درمیان جنگ بندی اور کشیدگی میں کمی کے لیے مسلسل سفارتی کوششیں جاری ہیں۔ اس سلسلے میں وزیراعظم شہباز شریف، وزیر خارجہ اسحاق ڈار اور فیلڈ مارشل عاصم منیر مختلف ممالک کی قیادت سے مسلسل رابطے میں ہیں تاکہ خطے میں امن کی بحالی کو یقینی بنایا جا سکے۔