Blog

‎کراچی کے مصروف علاقے یونیورسٹی روڈ پر واقع نیپا فلائی اوور کو کے فور منصوبے کے تحت جاری کھدائی کے دوران شدید نقصان پہنچا ہے، جس کے باعث پل کا ایک بڑا حصہ بیٹھ گیا ہے اور سڑک پر خطرناک گڑھا بن گیا ہے۔ اس واقعے نے شہریوں میں تشویش کی لہر دوڑا دی ہے۔
‎تفصیلات کے مطابق کے فور واٹر سپلائی منصوبے کے لیے پائپ لائن بچھانے کے دوران بھاری مشینری کے استعمال اور مسلسل کھدائی کی وجہ سے فلائی اوور کی بنیادیں متاثر ہوئیں۔ ذرائع کے مطابق نیپا سے حسن اسکوائر جانے والے ٹریک پر پل کا ایک حصہ تقریباً 6 سے 7 فٹ تک نیچے دھنس گیا، جس سے ٹریفک کے لیے شدید خطرہ پیدا ہو گیا۔
‎انتظامیہ نے کسی بھی ممکنہ حادثے سے بچنے کے لیے فوری طور پر متاثرہ حصے کو رکاوٹیں لگا کر بند کر دیا ہے۔ تاہم اس بندش کے باعث یونیورسٹی روڈ پر شدید ٹریفک جام دیکھنے میں آ رہا ہے، جس سے طلبہ، ملازمین اور عام شہریوں کو روزمرہ کے معمولات میں مشکلات کا سامنا ہے۔
‎مقامی شہریوں نے اس صورتحال پر سخت ردعمل دیتے ہوئے کہا ہے کہ ترقیاتی منصوبوں کی ناقص منصوبہ بندی شہریوں کی جانوں کو خطرے میں ڈال رہی ہے۔ ان کا کہنا ہے کہ ریڈ لائن بی آر ٹی اور کے فور منصوبے ایک مسئلہ بن چکے ہیں، جن کی وجہ سے نہ صرف ٹریفک مسائل بڑھ رہے ہیں بلکہ انفراسٹرکچر بھی متاثر ہو رہا ہے۔
‎شہریوں نے مطالبہ کیا ہے کہ حکومت فوری طور پر پل کی مرمت کا آغاز کرے اور متاثرہ مقام پر روشنی اور حفاظتی اقدامات کو یقینی بنایا جائے تاکہ کسی بھی حادثے سے بچا جا سکے۔
‎دوسری جانب متعلقہ حکام کے مطابق یونیورسٹی روڈ پر کے فور منصوبے کے تحت تقریباً 2.7 کلومیٹر طویل پانی کی لائنیں بچھائی جا رہی ہیں، تاہم فلائی اوور کی مکمل مرمت کے حوالے سے تاحال کوئی حتمی ٹائم لائن نہیں دی گئی۔
‎ماہرین کے مطابق اگر بروقت اقدامات نہ کیے گئے تو اس طرح کے واقعات مزید خطرناک صورتحال اختیار کر سکتے ہیں۔

کراچی: سندھ حکومت نے صوبے بھر میں عوامی سفری سہولتوں کو مزید بہتر بنانے کے لیے بڑے فیصلے کرتے ہوئے سکھر سے شکارپور تک پیپلز بس سروس آئندہ ہفتے سے شروع کرنے کا اعلان کردیا ہے۔ اس کے ساتھ ساتھ دیگر شہروں میں بھی نئے روٹس، خواتین کے لیے خصوصی اسکیموں اور جدید بسوں کی خریداری کے منصوبوں پر پیش رفت کا فیصلہ کیا گیا ہے۔

یہ اعلان سندھ کے سینئر وزیر شرجیل انعام میمن کی زیر صدارت محکمہ ٹرانسپورٹ و ماس ٹرانزٹ کے اہم اجلاس میں کیا گیا، جس میں صوبے میں ٹرانسپورٹ کے نظام کو جدید خطوط پر استوار کرنے اور شہریوں کو آرام دہ، محفوظ اور سستی سفری سہولتیں فراہم کرنے سے متعلق مختلف تجاویز پر غور کیا گیا۔اجلاس میں فیصلہ کیا گیا کہ سکھر سے شکارپور روٹ پر پیپلز بس سروس باقاعدہ طور پر آئندہ ہفتے شروع کردی جائے گی۔ اس منصوبے سے دونوں شہروں کے درمیان سفر کرنے والے ہزاروں شہریوں کو فائدہ پہنچے گا، جبکہ روزگار، تعلیم اور کاروباری سرگرمیوں میں بھی آسانی پیدا ہوگی۔ترجمان محکمہ ٹرانسپورٹ کے مطابق خواتین کے لیے خصوصی سہولتوں کے تحت سکھر اور حیدرآباد میں پنک اسکوٹیز دینے کی تقریبات بھی جلد منعقد کی جائیں گی۔ اس اقدام کا مقصد خواتین کو بااختیار بنانا اور انہیں آزادانہ نقل و حرکت کی سہولت فراہم کرنا ہے۔اجلاس میں آئندہ مالی سال کے لیے الیکٹرک وہیکلز (EV)، ہائبرڈ اور ڈبل ڈیکر بسوں کی خریداری کا بھی فیصلہ کیا گیا۔ اس منصوبے سے نہ صرف ماحول دوست ٹرانسپورٹ کو فروغ ملے گا بلکہ شہریوں کو جدید اور آرام دہ سفری سہولتیں بھی میسر آئیں گی۔اجلاس میں اس بات پر بھی اتفاق کیا گیا کہ کراچی سمیت سندھ بھر میں ٹرانسپورٹ نیٹ ورک کو مزید وسعت دی جائے گی۔ بڑھتی ہوئی آبادی اور بڑھتے سفری تقاضوں کو مدنظر رکھتے ہوئے نئے روٹس متعارف کرانے پر بھی غور کیا گیا۔

شرجیل میمن نے اجلاس سے خطاب کرتے ہوئے کہا کہ حیدرآباد کے لیے بھی خصوصی منصوبہ بندی کی جارہی ہے۔ حیدر چوک تا کوہسار اور حیدرآباد تا ٹنڈو الہیار روٹس پر بھی جلد پیپلز بس سروس شروع کی جائے گی۔
انہوں نے کہا کہ آئندہ مالی سال مزید بسیں ٹرانسپورٹ سسٹم کا حصہ بنیں گی، جبکہ صوبے کے مختلف اضلاع میں مرحلہ وار بس سروس کا آغاز کیا جائے گا۔سینئر وزیر نے مزید بتایا کہ اس ماہ کے آخر تک ای وی ٹیکسی منصوبے سے متعلق تمام رسمی کارروائیاں مکمل کرلی جائیں گی، جس کے بعد صوبے میں جدید اور ماحول دوست ٹیکسی سروس متعارف کرائی جائے گی۔

کراچی میں منکی پاکس کے ایک اور کیس کی تصدیق ہوگئی ہے، جس کے بعد شہر میں رواں سال رپورٹ ہونے والے کیسز کی مجموعی تعداد 3 تک پہنچ گئی ہے۔ تازہ کیس ملیر کے علاقے سے سامنے آیا ہے جہاں 40 سالہ شخص میں وائرس کی موجودگی کی تصدیق کی گئی۔

حکام کے مطابق متاثرہ شخص کو طبی نگرانی میں رکھا گیا ہے اور اس کی حالت پر مسلسل نظر رکھی جا رہی ہے۔ محکمہ صحت نے کیس سامنے آنے کے بعد مریض کے قریبی رابطوں کی نشاندہی اور اسکریننگ کا عمل بھی شروع کردیا ہے تاکہ وائرس کے مزید پھیلاؤ کو روکا جاسکے۔سربراہ سندھ انفیکشیئس ڈیزیز ڈاکٹر عبدالواحد راجپوت نے بتایا ہے کہ ایک اور مشتبہ مریض کو بھی آئسولیشن وارڈ منتقل کردیا گیا ہے۔ ان کے مطابق مذکورہ شخص میں بھی منکی پاکس جیسی علامات پائی گئی ہیں اور اس کے ٹیسٹ کیے جا رہے ہیں۔انہوں نے شہریوں کو ہدایت کی کہ اگر کسی شخص میں بخار، جسم پر دانے، سوجن یا دیگر غیر معمولی علامات ظاہر ہوں تو فوری طور پر اسپتال سے رجوع کیا جائے۔ بروقت تشخیص اور احتیاطی تدابیر اختیار کرکے بیماری کے پھیلاؤ کو محدود کیا جاسکتا ہے۔

ماہرین صحت کا کہنا ہے کہ منکی پاکس ایک وائرل مرض ہے جو متاثرہ شخص کے قریبی جسمانی رابطے، آلودہ اشیا یا متاثرہ مواد کے ذریعے منتقل ہوسکتا ہے۔ عوام کو صفائی، احتیاط اور مشتبہ علامات کی صورت میں فوری طبی مشورہ لینے کی تاکید کی گئی ہے