کراچی کے مصروف علاقے یونیورسٹی روڈ پر واقع نیپا فلائی اوور کو کے فور منصوبے کے تحت جاری کھدائی کے دوران شدید نقصان پہنچا ہے، جس کے باعث پل کا ایک بڑا حصہ بیٹھ گیا ہے اور سڑک پر خطرناک گڑھا بن گیا ہے۔ اس واقعے نے شہریوں میں تشویش کی لہر دوڑا دی ہے۔
تفصیلات کے مطابق کے فور واٹر سپلائی منصوبے کے لیے پائپ لائن بچھانے کے دوران بھاری مشینری کے استعمال اور مسلسل کھدائی کی وجہ سے فلائی اوور کی بنیادیں متاثر ہوئیں۔ ذرائع کے مطابق نیپا سے حسن اسکوائر جانے والے ٹریک پر پل کا ایک حصہ تقریباً 6 سے 7 فٹ تک نیچے دھنس گیا، جس سے ٹریفک کے لیے شدید خطرہ پیدا ہو گیا۔
انتظامیہ نے کسی بھی ممکنہ حادثے سے بچنے کے لیے فوری طور پر متاثرہ حصے کو رکاوٹیں لگا کر بند کر دیا ہے۔ تاہم اس بندش کے باعث یونیورسٹی روڈ پر شدید ٹریفک جام دیکھنے میں آ رہا ہے، جس سے طلبہ، ملازمین اور عام شہریوں کو روزمرہ کے معمولات میں مشکلات کا سامنا ہے۔
مقامی شہریوں نے اس صورتحال پر سخت ردعمل دیتے ہوئے کہا ہے کہ ترقیاتی منصوبوں کی ناقص منصوبہ بندی شہریوں کی جانوں کو خطرے میں ڈال رہی ہے۔ ان کا کہنا ہے کہ ریڈ لائن بی آر ٹی اور کے فور منصوبے ایک مسئلہ بن چکے ہیں، جن کی وجہ سے نہ صرف ٹریفک مسائل بڑھ رہے ہیں بلکہ انفراسٹرکچر بھی متاثر ہو رہا ہے۔
شہریوں نے مطالبہ کیا ہے کہ حکومت فوری طور پر پل کی مرمت کا آغاز کرے اور متاثرہ مقام پر روشنی اور حفاظتی اقدامات کو یقینی بنایا جائے تاکہ کسی بھی حادثے سے بچا جا سکے۔
دوسری جانب متعلقہ حکام کے مطابق یونیورسٹی روڈ پر کے فور منصوبے کے تحت تقریباً 2.7 کلومیٹر طویل پانی کی لائنیں بچھائی جا رہی ہیں، تاہم فلائی اوور کی مکمل مرمت کے حوالے سے تاحال کوئی حتمی ٹائم لائن نہیں دی گئی۔
ماہرین کے مطابق اگر بروقت اقدامات نہ کیے گئے تو اس طرح کے واقعات مزید خطرناک صورتحال اختیار کر سکتے ہیں۔
نیپا فلائی اوور متاثر، کے فور منصوبے کے دوران پل کا حصہ بیٹھ گیا
