Category: پنجاب


مظفرگڑھ کے اسپورٹس گراؤنڈ میں دھی رانی پروگرام کے چوتھے مرحلے کے تحت 207 اجتماعی شادیوں کی ایک پروقار تقریب منعقد ہوئی، جس میں 3 غیر مسلم مستحق جوڑے اور 4 معذور جوڑے بھی شامل تھے۔
‎تقریب میں صوبائی وزیر سماجی بہبود سہیل شوکت بٹ نے بطور مہمانِ خصوصی شرکت کی اور وزیر اعلیٰ پنجاب مریم نواز کی عوامی فلاح اور دوراندیش قیادت کو سراہا۔
‎اس موقع پر رکن صوبائی اسمبلی اجمل چانڈیا، ایم پی اے عون حمید ڈوگر، ڈائریکٹر جنرل سوشل ویلفیئر طارق قریشی، ڈپٹی ڈائریکٹر سوشل ویلفیئر اظہر یوسف، ڈپٹی کمشنر عثمان طاہر جپہ اور ڈسٹرکٹ پولیس آفیسر سید غضنفر علی شاہ بھی موجود تھے۔
‎رکن صوبائی اسمبلی اجمل چانڈیا نے خطاب کرتے ہوئے اجتماعی شادیوں اور دھی رانی پروگرام کے اقدامات کو سراہا اور وزیر اعلیٰ پنجاب کی فلاحی پالیسیوں کو خراج تحسین پیش کیا۔
‎صوبائی وزیر سماجی بہبود سہیل شوکت بٹ نے کہا کہ وزیر اعلیٰ کے وژن کے مطابق دھی رانی پروگرام کے تحت مستحق بچیوں کے حقوق اور سہولیات کا عملی تحفظ یقینی بنایا گیا ہے۔ انہوں نے بتایا کہ گزشتہ دو برسوں میں محکمہ سماجی بہبود نے ہمت کارڈ، وہیل چیئرز اور دیگر فلاحی منصوبوں کا کامیاب اجرا کیا ہے۔
‎ان کا کہنا تھا کہ دھی رانی پروگرام کے تحت تمام منصوبے شفاف انداز میں نافذ کیے گئے ہیں اور ہر مستحق جوڑے کو دو لاکھ روپے کی مالی امداد براہِ راست اے ٹی ایم کے ذریعے فراہم کی گئی ہے۔
‎صوبائی وزیر نے اس عزم کا اظہار کیا کہ وزیر اعلیٰ پنجاب ایک ماں کے جذبے کے تحت مستحق جوڑوں کی شادیوں کی ذمہ داری نبھا رہی ہیں۔

‎پنجاب کے تمام بورڈز آف انٹرمیڈیٹ اینڈ سیکنڈری ایجوکیشن نے میٹرک اور انٹرمیڈیٹ کے امتحانات میں بائیومیٹرک حاضری کو لازمی قرار دے دیا ہے۔ لاہور بورڈ کی جانب سے تمام پرنسپلز اور ہیڈ ماسٹرز کو خطوط جاری کیے گئے ہیں، جن میں کہا گیا ہے کہ چیف منسٹر کے ٹاسک فورس برائے امتحانی اصلاحات کی ہدایات اور ہائر/اسکول ایجوکیشن ڈیپارٹمنٹ کے احکامات کے مطابق تمام امیدواروں کی امتحانی مراکز پر لائیو بایومیٹرک حاضری لازمی ہوگی۔
‎خط میں مزید کہا گیا ہے کہ امیدواروں کے دونوں انگوٹھوں کے فنگر پرنٹس اسکین کرنا لازمی ہوگا اور ادارے کے سربراہ اس عمل میں کسی قسم کی غفلت یا تاخیر کے ذمہ دار ہوں گے۔
‎ریگولر اور پرائیویٹ طلبہ اپنے متعلقہ اسکول یا کالج میں بائیومیٹرک رجسٹریشن کرائیں گے، جہاں بورڈ کی فراہم کردہ سافٹ ویئر یا ایپلیکیشن کے ذریعے اسکین کا عمل مکمل کیا جائے گا۔

‎امریکی ناظم الامور نیٹلی بیکر بسنت کی تقریبات میں شرکت کے لیے لاہور کے دہلی گیٹ پہنچیں، جہاں پنجاب کی سینئر وزیر مریم اورنگزیب اور صوبائی وزیر اطلاعات عظمیٰ بخاری نے ان کا پرتپاک استقبال کیا۔
‎بسنت کے موقع پر نیٹلی بیکر اور امریکی سفارتی وفد نے روایتی لباس زیب تن کیا اور پتنگ بازی میں حصہ لیا۔ ان خوشگوار لمحات میں لاہور میں تعینات امریکی قونصل جنرل اسٹیٹسن سینڈرز بھی وفد کے ہمراہ موجود تھے۔
‎تقریب کے دوران مریم اورنگزیب نے امریکی سفیر، قونصل جنرل اور انڈر سیکریٹری کو پتنگ اڑانے کے طریقے سکھائے اور بسنت کے حوالے سے کی گئی خصوصی سجاوٹ اور انتظامات سے آگاہ کیا۔
‎امریکی وفد نے پتنگ بازی کے ساتھ ساتھ لاہوری کھانوں، مقامی ثقافت اور پاکستانی مہمان نوازی کو بھی سراہا۔
‎اس موقع پر مریم اورنگزیب کا کہنا تھا کہ ثقافتی سرگرمیاں قوموں کو قریب لانے میں اہم کردار ادا کرتی ہیں، جبکہ بسنت جیسے تہوار پاکستان کی پُرامن اور مثبت شناخت کو اجاگر کرتے ہیں۔ انہوں نے مزید کہا کہ غیر رسمی ماحول میں ہونے والی ایسی ملاقاتیں باہمی اعتماد اور دوطرفہ تعلقات کو مضبوط بناتی ہیں۔


وزیراعلیٰ پنجاب مریم نواز نے وزیراعلیٰ خیبرپختونخوا سہیل آفریدی کو تنقید کا نشانہ بناتے ہوئے کہا ہے کہ کے پی حکومت جب ترقی کا حوالہ دیتی ہے تو کہتی ہے کہ ہم نے آپ کو شعور دیا، لیکن کیا شعور کسی کا پیٹ بھر سکتا ہے؟ کیا لوگ روٹی کی جگہ شعور کھائیں گے؟
انہوں نے کہا کہ ورکر اور ووٹر کے بچے جیل میں ہیں جبکہ اپنے بچے برطانیہ میں ہیں، اور جیل میں بیٹھا شخص کہتا ہے کہ بچوں پاکستان نہ آئیں تاکہ انہیں گرم ہوا نہ لگے۔
راجن پور میں گرین الیکٹرک بسوں کی افتتاحی تقریب سے خطاب کرتے ہوئے مریم نواز نے کہا کہ جعلی حکومت وہ ہوتی ہے جو عوام کے حقوق اور ترقی کو کھا جاتی ہے۔
‎انہوں نے مزید کہا کہ خیبرپختونخوا کی حکومت میں عام ورکرز اور حکمرانوں کے بچوں کے لیے شعور مختلف ہے، اور جب تک عوام اپنے حکمرانوں سے سوال نہیں کریں گے، وہ ناکامی کا مظاہرہ کرتے رہیں گے۔
‎مریم نواز نے بانی پی ٹی آئی پر بھی تنقید کی کہ وہ اپنے بچوں کو برطانیہ بھیج کر پاکستان نہ آنے کی تلقین کرتے ہیں، جبکہ ورکرز کے بچوں کے لیے مشکلات پیدا کی جاتی ہیں۔
‎انہوں نے کہا کہ وہ جہاز لے کر منصوبوں کا افتتاح کرتے ہیں، لیکن یہ جہاز عوام کے لیے نہیں بلکہ اپنے ذاتی مفاد کے لیے ہیں، کیونکہ اڈیالا میں کبھی جہاز نہیں اترتے۔
‎تقریب کے دوران وزیراعلیٰ پنجاب نے راجن پور میں گرین الیکٹرک بسوں کے منصوبے کا افتتاح کیا۔


رحمان بابا ایکسپریس میں سفر کے دوران ایک خاتون نے بچی کو جنم دیا۔
ریلوے پولیس کے مطابق، ٹرین انجن کے خراب ہونے کی وجہ سے دھابیجی اسٹیشن پر کھڑی تھی، اسی دوران خاتون نے بچی کو جنم دیا۔
‎ٹرین میں موجود ایک ڈاکٹر نے فوری طور پر خاتون کو طبی امداد فراہم کی۔
‎ریلوے پولیس نے بتایا کہ ماں اور بچی دونوں کی حالت خطرے سے باہر ہے۔


صوبائی وزیر اطلاعات عظمیٰ بخاری نے بسنت کے تہوار کو ذمہ داری کے ساتھ منانے کی اپیل کی ہے اور شہریوں سے کہا ہے کہ احتیاطی تدابیر پر عمل کریں۔
عظمیٰ بخاری کے مطابق پنجاب حکومت نے بسنت کے حوالے سے قواعد و ضوابط طے کر دیے ہیں۔ ٹریفک پولیس نے 10 لاکھ سیفٹی راڈز موٹرسائیکلوں پر مفت نصب کیے ہیں اور ضلعی انتظامیہ کی ٹیمیں ایس او پیز پر سختی سے عملدرآمد کروا رہی ہیں۔ ڈور کے پنے، ہر پتنگ اور گڈے پر خصوصی کیو آر کوڈ لگائے گئے ہیں، جبکہ پتنگیں فروخت کرنے والے اور خریدنے والوں کا مکمل ڈیٹا بھی محفوظ رکھا جائے گا۔
‎بسنت کے تین دن شہریوں کو الیکٹرک بسیں، رکشے اور ٹیکسیوں کی مفت سہولت فراہم کی جائے گی۔ وزیر اطلاعات نے کہا کہ وزیراعلیٰ مریم نواز نے 25 سال بعد عوام کو بسنت جیسے ثقافتی تہوار کو محفوظ انداز میں منانے کا موقع فراہم کیا ہے اور پنجاب کی ثقافت کی بحالی کا کریڈٹ مریم نواز کو جاتا ہے۔