Category: ادب و مزاح

وہ نومبر کی سرد رات تھی۔ مہندی کی تقریب میں جہاں تمام لوگ مہندی کی رسم میں مگن تھے وہیں چند قدم کے فاصلے پر موجود کمرے میں ایک خوبصورت نوجوان صوفے پہ برا جمان بیٹھا نشے کے ابتدائی قدم سگریٹ کے لمبے لمبے کش لے رہا تھا۔ جو گزشتہ دنوں ہی والد کے شفقت بھرے سائے سے محروم ہوا تھا۔ اور ماں کا عزم تھا کہ بیٹے کو معاشرے کے لئے مسیحا یعنی بہترین ڈاکٹر بنائے۔لیکن وہ کہاں جانتی تھی کہ جسے وہ معاشرے کے لئے مسیحا بنانے کے خواب دیکھ رہی تھی وہ تو معاشرتی لعنت نشے کا ابتدائی سفر طے کرتے ہوئے خود کو موت کے منہ میں دھکیل رہا تھا۔ پھر کافی ماہ گزر گئے اور وہ شہر میں مقیم بظاہرتو ڈاکٹر لیکن خفیہ طور پر نشے کی لعنت سے موت تک کا سفر طے کر رہا تھا۔ پھر ایک دن ماں کو واٹس ایپ پر ایک تصویر موصول ہوئی جسے دیکھتے ہی وہ ایک نہ ختم ہونے والی اذیت میں مبتلا ہو گئی۔ اس کا لختِ جگر اپنے دو عزیز دوستوں کے ساتھ بیٹھا شیشہ پینے جیسی لعنت میں مبتلا تھا۔ اور اب بہت دیر ہو چکی تھی۔ دو دن بعد ہی ماں کو پتہ چلا کہ اس کا اکلوتا بیٹا کینسر جیسے تکلیف دہ مرض میں مبتلا ہسپتال میں موجود ہے۔ ماں آنسوؤں کے سمندر کو حلق سے اتار کر وہاں پہنچی۔ سامنے اپنے عزیز جان بیٹے کو دیکھا تو پہلے سے موجود شدید اذیت میں اور اضافہ ہوا۔ اور پھر وہ نوجوان مسلسل 53 دن کینسر جیسے مرض کے ساتھ زندگی موت کی کشمکش میں گزار کر آخر کار ایک شام دنیا سے چلا گیا اور تنہا ماں عمر بھر کے لئے ایک شدید اذیت ناک حالت میں مبتلا ہو کر اپنے حوش و حواس کھو بیٹھی۔
یہ ہمارے معاشرے میں بہت سے گھرانوں کی کہانی ہے جن کا اغاز سگریٹ سے ہوتا ہے اور پھر نشے کی سیڑھیاں عبور کرتے ہوئے خود کو موت کے گھاٹ اتار دیتے ہیں لیکن اپنے سے جڑے لوگوں کو بھی ہمیشہ کی اذیت میں مبتلا کر جاتے ہیں۔
سگریٹ نوشی کے بارے میں کہا جاتا ہے:
"گھر پھونک تماشا دیکھ”
سگریٹ نوشی جسے نشے کی حرام لعنت کی پہلی سیڑھی کہا جاتا ہے۔ اور پھر اس کے بعد کئی اور تاریک سیڑھیاں ہوتی ہیں جو انسان کو تباہی کے دہانے پہ لے جاتی ہیں۔ بد قسمتی سے سگریٹ نوشی ہمارے معاشرے میں فیشن کے نام پر چھوت کی طرح پھیل رہی ہے۔ اور المیہ یہ ہے کہ اکثریت سگریٹ پینا برا نہیں سمجھتی۔ لیکن اس کے جان لیوا نتائج کسی سے چھپے نہیں۔ پھر بھی کھلا تضاد پایا جاتا ہے کہ ایک طرف سگریٹ پینے والوں کی حوصلہ افزائی کی جاتی ہے اور اور دوسری طرف اس کے اذیت ناک نتائج بھی سب کو بھگتنے پڑتے ہیں۔ بہت سے نوجوان جن میں لڑکیاں بھی شامل ہیں۔ وہ جنہوں نے اپنا مستقبل شاندار بنانا ہوتا ہے اس لعنت میں مبتلا ہو کر موت کو پکار رہے ہوتے ہیں۔ اور اپنے ہی ہاتھوں سے اپنی موت کا پروانہ تحریر کر رہے ہوتے ہیں۔ یہ بہت تکلیف دہ ہے کہ جس قوم کے افراد ہی غیر صحت مند سرگرمیوں میں مشغول ہوں یا ان کی صحت ہی انحطاط پذیر ہو وہ قوم اپنی ترقی اور خوشحالی کے عظیم الشان منصوبوں پر کیسے عمل پیرا ہو کر اپنی آنے والی نسلوں کے بہتر مستقبل کی ضمانت دے سکتی ہے۔؟سگریٹ نوشی انسانی صحت کے لئے انتہائی مہلک کردار ادا کر کے تمام جسمانی اور ذہنی صلاحیتوں کو مفلوج کر دیتا ہے۔ سگریٹ نوشی معاشرے کے لئے زہرِ قاتل کی حثیت رکھتی ہے۔ لوگوں کی کثیر تعداد ایسی ہے جن کا کہنا ہے کہ وہ کام کے بوجھ اور ذہنی تناؤ دور کرنے لئے سگریٹ کا استعمال کرتے ہیں۔ لیکن میڈیکل تحقیقات سے ثابت ہے کہ ان اقوال میں کوئی صداقت نہیں ہے۔ انسان کو سگریٹ پیتے ہوئے ایسا لگتا ہے کہ تناؤ کم ہو رہا ہے لیکن ایسا نہیں ہوتا دراصل کچھ لمحے کام سے وقفہ مل جاتا ہے اور پھر سگریٹ میں موجود نیکوٹین دماغ کو متاثر کرتی ہے۔ اور انسان جب کام کرنے لگتا ہے تو سگریٹ کی طلب پھر سے ہونے لگتی ہے یوں وہ اس لعنت کا عادی ہوجاتا ہے۔ اور کیفییت ایسی ہوجاتی ہے کہ:
"چھٹتی نہیں ہے منہ سے یہ کافر لگی ہوئی”
ہماری قومی دولت کا ایک بہت بڑا حصہ محض سگریٹ نوشی جیسی فضول عادت کی نذر ہوجاتا ہے اور پھر اس عادت کے باعث پیدا ہونے والے مہلک امراض کے مقابلے میں ہمارا گراں قدر زر مبادلہ ضائع ہوجاتا ہے۔ کچھ عرصہ قبل عالمی صحت کے مطابق سگریٹ نوشی کرنے والوں میں سے زیادہ تر لوگوں کے مرنے کی وجہ سگریٹ نوشی ہی ہوتی ہے۔ سگریٹ نوشی سے ہر سال مرنے والوں کی تعداد ستر لاکھ ہے۔ دنیا بھر میں اسی فیصد سگریٹ نوشی کرنے والے ترقی پذیر اور پسماندہ ممالک سے تعلق رکھتے ہیں ۔ اسلامی ممالک میں بھی بہت سے لوگ سگریٹ نوشی پر اربوں ڈالر خرچ کرتے ہیں۔ صرف پاکستان میں سگریٹ نوشی اور اس سے پیدا ہونے والی بیماریوں کے علاج پر تین کھرب روپے خرچ ہوتے ہیں۔ جبکہ سعودی عرب میں اٹھائیس ارب ڈالر، مصر میں گیارہ ارب پاؤنڈ اسی پر خرچ کئے جاتے ہیں۔ ترکی میں صرف سگریٹ نوشی سے بیماریوں کا شکار ہونے والوں پر گیارہ ارب ڈالر کی رقم خرچ ہوتی ہے۔ اس طرح دنیا بھر میں آٹھ لاکھ نوے ہزار بچے ہر سال سگریٹ کے دھوئیں سے زہر آلودہ فضا کی وجہ سے مر جاتے ہیں۔ جو خود تو سگریٹ نوشی نہیں کرتے لیکن سگریٹ نوشی جیسے مضر اثرات کا شکار ہوجاتے ہیں۔ دنیا بھر میں ہر سال پینسٹھ کھرب ڈالر کی خطیر رقم سگریٹ بنا کر اسے دھوئیں کی نظر کر دینے پر خرچ ہوتی ہے۔ اتنی بڑی رقم کو کنویں میں اڑانے کی بجائے اگر غربا اور ضرورتمندوں میں خرچ کیا جائے تو دنیا بھر کے ضرورتمندوں کا ایک بہت بڑا حصہ اس سے فائدہ اٹھا کر اپنی زندگی بہتر کر سکتا ہے۔ اور سگریٹ نوشی سے مرنے والے لاکھوں لوگ اپنی زندگیاں محفوظ بنا سکتے ہیں۔
سگریٹ نوشی صرف خود سگریٹ پینے والوں کو ہی نہیں بلکہ ان کے ارد گرد موجود لوگوں کو بھی نقصان پہنچاتی ہے۔ ایسے افراد جو خود سگریٹ نہیں پیتے صرف اس دھوئیں سے سانس لیتے ہیں ان کے لئے دل کے دورے کا خطرہ بڑھ جاتا ہے۔
سگریٹ نوشی ایک ایسی لعنت ہے جو بہت سی بیماریوں کا سبب بنتی ہے۔ بہت سے لوگ پھیپھڑوں کے امراض میں مبتلا ہوجاتے ہیں ۔ کچھ کینسر جیسے امراض کا شکار ہوجاتے ہیں۔ اخلاقی اعتبار سے دیکھیں تو بھی سگریٹ نوشی قابلِ مذمت ہے اس سے اور بہت سی اخلاقی بیماریاں پھیلتی ہیں۔ بہت سے لوگ گمراہ ہوجاتے ہیں۔ یہ ایک ایسا فعل ہے جسے کسی بھی مذہب میں جائز نہیں سمجھا جاتا۔ آپ اسلام سے ہٹ کر کسی اور سکالر سے پوچھ لیں جس نے واقعی سگریٹ پر تحقیق کی ہو تو اس کے خلاف بہت کچھ بتا دے گا۔ اور اسلام کی بات کریں تو شریعت میں دو آراء پائی جاتی ہیں۔ ایک کے مطابق یہ مکروہ ہے اور ایک کے مطابق حرام ہے اور حرام والی رائے زیادہ مضبوط ہے۔
اللہ نے قرآن میں فرمایا:
وَ لَا تُلۡقُوۡا بِاَیۡدِیۡکُمۡ اِلَی التَّہلُکَةِ
ترجمہ: اور اپنے ہاتھوں ہلاکت میں نہ پڑو۔
سورۃ البقرہ: 195
اور سگریٹ نوشی کرنے والا خود کو موت کے منہ میں دھکیل کر ہلاکت کو دعوت دیتا ہے۔
اِنَّ الۡمُبَذِّرِیۡنَ کَانُوۡۤا اِخۡوَانَ الشَّیٰطِیۡنِ ؕ وَ کَانَ الشَّیۡطٰنُ لِرَبِّهٖ کَفُوۡرًا ﴿۲۷﴾
ترجمہ: بے جا خرچ کرنے والے شیطانوں کے بھائی ہیں اور شیطان اپنے پروردگار کا بڑا ہی ناشکرا ہے۔
سورۃ بنی اسرائیل:27
اور سگریٹ نوشی پر ایک خطیر رقم فضول خرچی کے طور پر خرچ کر کے اس شیطانی فعل کو انجام دیا جاتا ہے۔
اور کھانا تو رزق ہوتا ہے۔ اگر سگریٹ رزق ہوتا تو آپ اسے پینے سے پہلے بسم اللہ پڑھتے۔ اسے پینے کے بعد الحمدللہ پڑھتے۔ اور کیا روٹی کا ٹکرا بچا کر اسے پاؤں میں کچل دیا جاتا ہے اسی طر ح اگر آپ چاول کھا رہے ہوں تو کیا آپ تھوڑے سے بچا کر یوں مسل کر پھینک دیں گے نہیں آپ ایسا نہیں کریں گے کیونکہ وہ رزق ہے۔ لیکن سگریٹ تو رزق نہیں ہے۔ یہ ہی وجہ ہے کہ انسان اسے پاؤں تلے روند دیتا ہے۔
آپ صرف اپنی فطرت سے پوچھیں جو اللہ نے آپ کو دی ہے۔ جس فطرت کی بنا پر اللہ نے آپ کو تخلیق کیا۔ اللہ نے آپ کو فطرتِ سلیم پر پیدا کیا ہے۔ آپ اپنے اندر سے پوچھیں یہ حلال ہے یا حرام؟ جواب خود ہی آجائے گا۔ کہ یہ اچھی چیزوں میں سے نہیں ہے۔ اگر آپ اس لت میں ملوث ہیں تو چھوڑ دیجئے۔ ایک مسلمان جو اپنے آپ کو پاکیزگی کی طرف لے جاتا ہے اسے یہ عمل زیب نہیں دیتا۔ اور اللہ توبہ کرنے والوں اور پاک صاف رہنے والوں سے محبت کرتا ہے۔ تو اس گھناؤنے فعل سے توبہ کیجئے اور پاکیزگی اختیار کیجیے۔
جزاکم اللہ خیراً کثیرا
@Nusrat_writes

پاکستان کی معیشت کو اندرونی اور بیرونی طور پر بہت سے چیلنجز کا سامنا ہے۔ اندرونی طور پر معیشت کو درپیش مساٸل میں کم برآمدی شعبے ، سستی درآمدات پر زیادہ انحصار ، ایندھن اور توانائی کی زیادہ قیمت ، اعلی شرح سود ، کم تربیت یافتہ لیبر فورس ، سرمایہ کاری پر کم منافع ، جدید ٹیکنالوجی کی کمی وغیرہ شامل ہے ۔ان معاشی مسائل نے ایک بڑی آبادی کے لیے موثر طریقے سے پیداوار کی فراہمی کو مشکل بنا دیا ہے اور ان سب کی وجہ سے بالواسطہ طور پر بیرونی معاشی بحران پیدا ہوا ہے۔ بین الاقوامی سطح پر ہماری برآمدات کم اور درآمدات زیادہ ہونے کی وجہ سے توازنِ اداٸیگی میں بگاڑ ہیدا ہوتا جس نے ملک کو ایک بار پھر آئی ایم ایف کے قرض کے بوجھ تلے دبا دیا اور آٸی ۔ایم ۔ایف کی سخت پالیسیز کو اپنانے پہ مجبور کر دیا۔گھریلو صنعت اور پیداوار کو برقرار رکھنے اور بڑھانے کے لیے ہمیں معاشی پالیسیز کو بہتر بنانے کی اشد ضرورت ہے۔ اگر صنعت کو بڑھانے کے لیے مزید درآمدات کی جاٸیں تو اس طرح ہمارے اپنے غیر ملکی ذخائر میں کمی واقع ہو گی یا وہ ختم ہو جاٸیں گے۔ غیر ملکی ذخائر میں کمی ناپسندیدہ کرنٹ اکاؤنٹ خسارے کا باعث بنتی ہے جس سے ہماری معیشت مزید ابتری کی طرف جاۓگی۔ ہمیں اپنی درآمدات کو کم سے کم کرنا ہو گا اور متبادل ذراٸع دریافت کرنا ہوں گے تا کہ کرنٹ اکاٶنٹ خسارے سے بچا جا سکے ۔
آئی ایم ایف کی سخت پالیسیز اور سود کی شرح میں اضافہ کی وجہ سے ہماری معیشت مزید کمزور ہو رہی ۔ ملک کا یہ کمزور معاشی ڈھانچہ ایک تنگ صنعتی بنیاد ، کم برآمدات ، زیادہ ایندھن اور توانائی کی قیمتوں ، متضاد تجارتی پالیسیوں ، غیر صنعت کاری کا نتیجہ ہے۔فاٸنل اشیاء کی برآمدات اور خام مال کی درآمدات ملکی وساٸل کا بہترین استعمال نہ کرنا یہ سب ناقص معاشی کارکردگی کی وجہ بنتی ہیں جب برآمدات درآمدات سے کم ہوتی ہیں تجارتی خسارہ پیدا ہوتا ہے۔ یہ تجارتی خسارہ ملک کے قیمتی غیر ملکی ذخائر کو کھا جاتا ہے۔ یہ تجارتی خسارہ کرنٹ اکاؤنٹ خسارہ بھی پیدا کرتا ہے۔ پاکستان کی برآمدات تقریبا $ billion 22 فراہم کرتی جبکہ اس کی درآمدات $ 52bn کے گرد گھوم رہی ہیں۔ 30 بلین ڈالر کا تجارتی خسارہ جو ہوا اسے قرض لے کر پورا کیا جاتا پھر world Bank ہو یا IMF یہ ترقی یافتہ ممالک کے اصولوں پہ عمل کرتے ہوۓ ترقی پزیر ممالک کو سخت شراٸط پر قرض دیتے جس سے آہستہ آہستہ ہماری معیشت مزید خسارہ کا شکار ہونے لگتی
آئی ایم ایف سے قرض لینے سے عارضی طور پر تو کرنٹ اکاٶنٹ خسارہ کنٹرول ہو جاتا ۔ لیکن یہ مصنوعات کو مہنگا کر دے گا ہماری روپے کی قدر مزید گر جاتی اور اس طرح مہنگائی میں مزید اضافہ ہو جاتا ۔ یہ معیشت کے لیے غیر متنازعہ صورتحال پیدا کرتا ۔
موجودہ حکومت کے اقتدار میں آنے کے ایک سال بعد ڈالر کے مقابلے میں ہمارے روپے کی قدر مزید گری اور ڈالر 112 سے 165 روپے تک مہنگا ہوا۔ پاکستان قدرتی زخاٸر سے مالا مال ملک ہے ہمارے پاس وہ تمام وساٸل موجود ہیں جن کو بہتر طریقے سے استعمال کر کے ہم معیشت کے بہت سے مساٸل پر قابو پا سکتے۔ہمارے پاس لیبر فورس کی بھی کوٸی کمی نہیں لیکن ہمیں اس لیبر فورس کو ٹرینگز دینا ہو گی انہیں سکلز سکھانا ہونگی ۔ ہمارے پاس خام مال کے وسیع زخاٸر ہیں ہم ان وساٸل کو استعمال کر کے اشیاء کو اپنے ملک میں پیدا کرنے پر ترجیح دیں اور فاٸنل پروڈکٹس کو عالمی منڈی میں پیش کریں۔ ہماری صنعت تباہ حالی کا شکار اسلیے بھی ہے کیونکہ ہم خام مال سستے داموں درآمد کرتے اور مہنگے داموں ان سے اشیاء خریدتے جسکی وجہ سے توازن اداٸیگی بگڑ جاتا۔ لیکن اگر ہم اس خام مال سے خود اشیاء تیار کریں گے تو اس سے ہماری معیشت پر اچھا اثر پڑے گا ہماری گھریلو صنعت کو فروغ حاصل ہو گا لوگوں کو روزگار ملے گا اور ہمارے زرمبادلہ میں بہتری آۓگی
ہزاروں مسائل سے دوچار معیشت کی بحالی کے لیے مزید ٹھوس اقدامات کی بھی ضرورت ہے۔ پاکستان قرضوں کے بوجھ تلے دبا ہوا ہے اور صرف اتنا ہی نہیں قرضوں کا یہ سلسلہ ہماری آنے والی نسلوں تک جا رہا 2018 کی رپورٹ کے مطابق پاکستان میں پیدا ہونے والا ہر بچہ تقریباً 130,000 کا مقروض ہے جو وقت کے ساتھ بڑھتا ہوا ہی نظر آ رہا۔ اس وقت بیرونی قرضہ 116.3 بلین ڈالر ہے۔معیشت کی بحالی کے لیے آئی ایم ایف ڈیل پر انحصار کرنا ایک خوفناک غلطی ہوگی۔ ہمیں اپنے وساٸل اپنی لیبر فورس اور انسانی سرماۓ کے وساٸل کو بروۓ کار لانا ہو گا ایک بہترین انتظامی ڈھانچہ تشکیل دینا ہو گا جو معیشت کو بحالی کی طرف لے جاۓ ورنہ مستقبل میں ہمیں مزید نقصان اٹھانا پڑے گا۔

@b786_s

قارئین محترم تمباکو نوشی پہ متعدد مضامین اور تحقیقات نظر سے گزریں ہر تحریر میں تمباکو نوشی کو مضر صحت لکھا گیا.
مگر کیا کہنے ان شعراء کے ان کانٹینٹ کریٹرز کے جنہوں نے سگریٹ نوشی کو مضر صحت تو لکھا مگر اس کے نقصانات کو اسقدر رومانوی انداز میں بیان کیا اور پردے پر دکھایا کہ دیکھنے والے کو سب بھول گیا مگر انگلیوں میں سگریٹ دبائے وجاہت سے بھرپور ہیرو یاد رہ گیا.
شعراء حضرات کے ہاں سگریٹ کچھ یوں ہے

کمرے میں پھیلتا سگریٹ کا دھواں
میں بند کھڑکیوں کی طرف دیکھتا رہا
کفیل آزرامروہوی

سگرٹیں چائے دھواں رات گئے تک بحثیں
اور کوئی پھول سا آنچل کہیں نم ہوتا ہے
والی آسی

گریباں چاک دھواں جام ہاتھ میں سگریٹ
شبِ فراق عجب حال میں پڑا ہوں میں
ہاشم رضا جلالپوری
اور شاعر افضل خان تو باقاعدہ ایک غزل لکھ بیٹھے سگریٹ کی شان میں
نہیں تھا دھیان کوئی توڑتے ہوئے سگریٹ
میں تجھکو بھول گیا چھوڑتے ہوئے سگریٹ

الغرض انصاف ادب و سخن پہ بھی سگریٹ کا دھواں اپنے نشانات چھوڑنے سے باز نہ آیا
اگر کبھی کسی طالبعلم کو تمباکو کے مضر صحت ہونے پہ لیکچر دینا چاہا بھی تو اس نے اقبال کے آخری ایام کا تذکرہ کر دیا کہ جی علی بخش تو ان کو حقہ دیا کرتا تھا وہ بھی تو پکے مومن تھے اب بندہ کیا کہے اردو ادب سگریٹ اور اقبال اور ہماری گہری خاموشی.
اب اس جملے سے ادب میں سگریٹ کی اہمیت کا اندازہ لگائیے
مشرف عالم ذوقی صاحب فرماتے ہیں

"سگریٹ اور چائے میں ان دو بڑی عادتوں کا غلام ہوں”

سگریٹ اور غمگین زندگی کا تو پوچھئے مت

سو یوں ہوا کہ پریشانیوں میں پینے لگا
غمِ حیات سے منہ موڑتے ہوئے سگریٹ

کسی فلم یا ڈرامے کے ہیرو کو غمگین ہونے کے بعد سگریٹ یا شراب پینا گویا حکایت ہو گئی
اور ہو بھی کیوں نہ پہلے دس بار اقساط میں ہیرو کے ساتھ انسیت اور ہمدردی کے جذبات ابھارے جاتے ہیں اور ہیرو کی عادات سے مرعوب کیا جاتا ہے
ہیرو کی دس اچھی عادتوں کا قائل ناظر کیا اس کی گیارہویں بری عادت کو برا گردانے گا؟

امیرانہ زندگی کا کون ہواہشمند نہ ہوگا.ہمارا ادب ہمارا میڈیا سگریٹ نوشی کو اتنا جاذب اور پرکشش بنا کر پیش کرتا ہے کہ نوجوان نسل ان ہیروز کو ان شعراء کو آئیڈیلائز کرتے ہوئے بھی اس لت کا شکار ہو جاتے ہیں.

تمباکو نوشی کے خلاف ہر مہم ناکامیاب اس لیے رہ رہی ہے کہ تمباکو نوشی کے خلاف ایک دن منایا جاتا ہے اور اس کے استعمال پہ سارا سال اشتہار اور اشعار چلتے ہیں.
کاروبار صحت پہ سبقت لے جاتا ہے سگریٹ کو انڈسٹری کہہ کر پلا جھاڑ لیا جاتا ہے. گھر کے گھر تباہ ہو گئے اس انڈسٹری کے ہوتے ہوئے.
دنیا میں ایسی کمپنیاں ہیں جو سگریٹ نوشی کرنے والوں کو نوکریاں نہیں دیتیں.بہت سے مقامات پہ سگریٹ نوشی ممنوع ہے.
اگر روک تھام کے لیے سنجیدگی سے اقدامات کیے جائیں تو ممکن ہے چند سالوں میں یہ لعنت ختم کی جا سکے.
ابھی حال ہی میں کرونا ویکسین لگانے پہ جس طرح مجبور کیا گیا اسی طرح ہر ادارے میں اگر میڈیکل ریپورٹ لازمی قرار دی جائے سگریٹ نوشی کرنے والے اور نشے کے عادی ملازمتوں سے برطرف کیا جائے اور بھرتی کے قوانین میں بھی یہ شق شامل کر لی جائے.یہ ایک ناممکن تجویز ہے لیکن اگر چاہت ہو تو کیا نہیں ممکن.
اور سگریٹ کو رومانوی انداز میں پیش کرنے والے ہیروز اس سے ہونے والی بربادی بھی بیان کرتے ہیں
مگر وہ بربادی سبق آموز انداز میں بیان نہیں کی جاتی.

خدا سے دعا ہے کہ ہم تمباکو نوشی اور دیگر منشیات کے خلاف حقیقی معنوں میں اقدامات کریں محض دن منانے سے کچھ نہیں ہوتا.

سگریٹ پہ میرا پسندیدہ شعر

میری بھی کیوں خراب کی مٹی
جاتے جاتے بتا تو دے سگریٹ

اور ہم سب جانتے ہیں سگریٹ کچھ نہیں بتائے گا قارئین بتائیں گے کہ یہ تحریر کا حد تک حقیقت رکھتی ہے آپکی آراء کی منتظر

@Hsbuddy18