Category: متفرق

انسان کی تاریخ جنگوں اور لڑائیوں سے بھری پڑی ہے کبھی یہ جنگ علاقہ پر قبضہ کرنے کے لئے کی گی اور کبھی مزہب کے نام پر، فوجیں ایک دوسرے پر حملہ آور ہوتیں جو فوج تعداد میں زیادہ ہوتی وہ جیت جایا کرتی تھی۔

پھر جنگوں میں جدید ہتھیار اہم ہو گئے اور ٹیکنالوجی سب پہ حاوی ہونے لگی۔ ہتھیاروں کی دوڑ کے بعد معیشت زیادہ اہم ہوئی۔ یہ سب اصطلاح کے مطابق فرسٹ جنریشن وار فیئر، سیکنڈ جنریشن وارفیئر ، تھرڈ جنریشن وار فیئر تھے۔ فورتھ جنریشن وار فیئر میں دہشت گردی کو جنگی ہتھیار کے طور پر استعمال کیا گیا۔ مختلف ممالک میں دہشت گرد تنظیمیںپیدا ہوئیں یا کی گئیں اور انہیں اپنے مقاصد کے لئے استعمال کیا گیا۔ کچھ جگہوں پر کمزور معیشت کمزور عسکری قوت ہونے کے بعد بھی کامیابی نہ ملتی تھی اس میں قومی یکجہتی حائل ہو جاتی تھی، یکجہتی کو ختم کرنے کے لیے ففتھ جنریشن وار فیئر کی اصطلاح نکالی گئی جس سے ملکوں میں افراتفری پھیلائی جاتی اور انہیں مذہبی ثقافتی بنیادوں پر لڑایا جاتا اور ان کی قومی یکجہتی کو ختم کیا جاتا۔

ففتھ جنریشن وار ایک خاص قسم کی جنگ ہے ، جسے آج کل کی جنگوں کا طریقہ کار بھی کہتے ہیں۔ بڑی طاقتوں کو کھلی جنگ میں سیاسی طور پر بہت مزاحمت اور سفارتی سطح پر بھی مشکلات کا سامنا کرنا پڑتا ہے ۔جسکی مثالیں عراق اور افغانستان ہیں جہاں انہوں نے کھلی جنگیں کیں مگر ففتھ جنریشن وار میں کسی بھی ملک کو معاشی طورپر تباہ کرنا ،سفارتی سطح پر تنہا کرنا ،سیاسی طور پر دنیا میں بدنام کرنا ،دوسروں کی نظر میں گرانا ،میڈیا اور کسی حد تک ملٹری ، انٹیلی جنس آپریشن شامل ہیں پھر فالس فلیگ آپریشنز کیے جاتے ہیں جن میں کوئی چھوٹی موٹی کارروائی کر کے دوسروں کے نام لگا دی جاتی ہے۔ یہ خاص طور پر پاکستان اور افغانستان کے سلسلے میں ہورہا ہے ۔پاکستان میں واردات ہندوستان کرتاہے اور نام افغانستان کا لگا دیاجاتاہے

یہ ایسی خطرناک سٹریٹجی ہے جو  آپ کو چاروں طرف سے جکڑ لیتی ہے، اس کو ففتھ جنریشن وار کہا جاتا ہے، اس کے اندر میڈیا اور خاص طور پر سوشل میڈیا بہت اہم کردارا دا کرتاہے۔

آرمی چیف جنرل قمر جاوید باجوہ نے کچھ عرصہ پہلے واضح انداز میں کہا تھا کہ ہائبرڈ وار فیئر کا مقابلہ کرنے کے لئے پاکستان کو مکمل طور پر تیار رہنا چاہئے اور ففتھ جنریشن وار جو بھارت کے ساتھ دیگر ممالک پاکستان پر لانچ کیے ہوئے ہیں۔ بھارت اپنے مذموم عزائم اور خطرناک منصوبوں کے ذریعے خیبر پختونخواہ اور بلوچستان میں دھشت گردی کرنے کے ساتھ ساتھ لسانی، علاقائی اور سیاسی اختلافات کو ہوا دینے کی کوششوں میں مصروف عمل ہے جبکہ سی پیک کو محور و مرکز بنا کر اب اس کا اگلا ٹارگٹ گلگت بلتستان ہے اس وقت ہمیں ناصرف بے حد محتاط رہنا ہوگا بلکہ پاکستان کے باشعور عوام کو ارد گرد کے ماحول پر نگاہ رکھتے ہوئے اپنے ملی و قومی بیداری کے کردار کو بھرپور طور پرانجام دینا ہوگا۔

دشمن تو ہمیشہ باہر سے وار کرتا رہے گا لیکن اندر سے وار کرنے کے لیے دشمن کو اندر سے مدد چاہیے ہوتی ہے بدقسمتی سے پاکستان میں کچھ عناصر موجود ہیں جو لسانی اور مذہبی بنیادوں پر اندر سے لوگوں کو تقسیم کرنے میں لگے ہیں ہر روز ایک نیا فتنہ پیدا کیا جاتا ہے اور اس فتنے کے ختم ہونے کے بعد پھر ایک نیا فتنہ کھڑا کر دیا جاتا ہے۔ اس فتنے کو پھیلانے میں پاکستان کا پرنٹ اور الیکٹرانک میڈیا اہم کردار ادا کر رہا ہے۔

آج میں فخر سے یہ کہہ سکتا ہوں کہ ہمارے ملک میں موجود دفاعی ادارے اس پروپیگنڈا وار جسے  ففتھ جنریشن وار بھی کہا جاتا ہے کا مکمل ادراک رکھتے ہیں جس کی وضاحت آئی ایس پی آر کے سابقہ ڈی جی آصف غفور اپنی پریس کانفرنسیز میں کئی بار یہ بات کہہ چکے ہیں کہ ہم پر غیر اعلانیہ ففتھ جنریشن وار کا حملہ کیا جا چکا ہے جس کا پاکستان کی حکومت اور اسٹیبلشمنٹ کو مکمل ادراک ہے اور اس میں کوئی شک بھی نہیں کہ پاکستان نے بھارت کے مقابلے میں ففتھ جنریشن وار کو مضبوط انداز میں لڑا اور یہ کہنا غلط نہیں ہوگا کہ پاکستان نے اس جنگ میں بہتر انداز میں بھارت سے سبقت حاصل کی۔

دشمن کے ارادوں کو جانے بغیر آپ اس سے سبقت حاصل نہیں کر سکتے، ہم نے دشمن کے عزائم کو جان کر ان سے بہتر تدبیر کی اسی لئے آج میں یہ کہہ سکتا ہوں کہ ہاں ہم تیار تھے اور تیار ہیں۔ ہم اپنے بیرونی دشمنوں کو پہچانتے ہیں اب وقت آ چکا ہے کہ ہم اپنے اندرونی اختلافات اور خلفشار ختم کر دیں تاکہ ہم ایک قوم بن کر دشمن کے لیے ایک سیسہ پھلائی دیوار ثابت ہوں۔

"پاکستان زندہ باد”

Author: Faraz Rauf 

Twitter ID: @farazrajpootpti

اسلامی جمہوریہ پاکستان دنیا کا وہ واحد ملک ہے جہاں بیک وقت چار چار موسم موجود ہوتے ہیں۔۔۔ جہاں ہر قسم کی سبزی ہر قسم کا پھل اور ہر قسم کی جڑی بوٹی اگتی ہے۔۔۔ جہاں دنیا کے ذہین ترین لوگ پائے جاتے ہیں۔۔۔ جہاں دنیا کے خوبصورت ترین اور دلکش سیاحتی مقامات موجود ہیں۔ وطن پاکستان جہاں اللہ کی عطا کردہ تمام تعمتوں سے مالامال ہے وہیں وطن عزیز پاکستان کے چند علاقے ایسے ہیں جو اللہ کے بندوں کی لالچ، بغض اور حسد کی بھینڑ چڑگئے ہیں ان علاقوں میں بدصورتی راج کرتی ہے۔۔۔ ان بدنصیب علاقوں میں سے ایک علاقہ لاہور ہے۔

لاہور وہ علاقہ ہے جو موجودہ دور میں پنجاب کی سیاست کا مرکز ہے اور ماضی میں برصغیر کی قدیم تاریخ کا اہم حصہ رہا ہے لاہور میں تاریخ کے کچھ ان مٹ نقوش ابھی بھی موجود ہیں جو لاہور کے تاریخی ہونے کا منہ بولتا ثبوت ہیں مثال کے طور پر بادشاہی مسجد، شیش محل، شاہی قلع، شالیمار باغ اور مقبرہ جہانگیر وغیرہ یہ الگ بات ہے کہ ان کی دیکھ بھال اور حفاظت نہ ہونے کے برابر ہے خیر۔۔۔

لاہور پچھلے کئ سالوں سے مختلف سیاستدانوں کی آپسی رنجش اور سیاست کی وجہ سے پس رہا ہے۔۔۔ کچھ عرصہ پہلے تک لاہور کافی خوبصورت اور صاف ستھرا تھا لیکن آج کل لاہور کسی مچھلی بازار کا منظر پیش کررہا ہے لاہور میں کئی کئی گھنٹے سڑکیں بلاک رہتی ہیں (شہری بہت پریشان ہیں آئے روز سڑکیں بلاک کی وجہ سے کہیں نہ کہیں لڑائی جھگڑا ہوتا ہے شہری اپنی اپنی منزلوں پر وقت پر نہیں پہنچ پاتے)، گٹروں کا گندا پانی سڑکوں پر جمع رہتا ہے (جس کی وجہ سے ہر آنے جانے والوں کے کپڑے پلیت ہوتے ہیں اور انہیں بو الگ سونگھنی پڑتی ہے)، اکثر گاڑیاں گردو غبار اڑاتے اور دھواں چھوڑتے ہوئے گزرتی ہیں، (جس کی وجہ سے جلد کی بیماریاں نزلہ ذکام کھانسی ہوتی ہے)، پورے لاہور میں پینے کا پانی ناقابل استعمال حد تک گندا ہوچکا ہے جوکہ کئی بیماریوں کی وجہ بن رہا ہے۔

جب الیکشن قریب آتے ہیں تو سوئے ہوئے امیدوار جو پچھلی بار عوام کے ووٹوں سے ایم این اے یا ایم پی اے منتخب ہوئے ہوتے ہیں تو قرسیوں کے مزے لوٹ کر دوبارہ ووٹ مانگنے آ کھڑے ہوتے ہیں جھوٹے لارے لگا کر عوام کو بے وقوف بناکر ووٹ لے کر منتخب ہوکر پھر اگلے پانچ سالوں کے لیے غائب ہو جاتے ہیں عوام ہر بار کی طر خجل کی خجل ہوتی رہتی ہے۔ قصور عوام کا ہے جو ہر بار ایک ہی جگہ سے ٹھڈا کھاتی مگر گزرتی پھر بھی ادھر سے ہی ہے۔۔۔

لاہور کو شریف برادران نے سیاست میں آکر ایک نئی شکل دے دی۔۔۔ شریف برادران نے سیاست میں آکر جگہ جگہ میٹرو اور اورنج لائن میٹرو ٹرین کے فلائی اوورز، سڑکیں اور انڈر گراؤنڈ پاسز بنا دیے باقی لاہور ویسے کا ویسے ٹوٹا پھوٹا پڑا ہے اگر نواز حکومت نئے فلائی اوورز، سڑکیں اور انڈر پاسز بنانے کی بجائے لاہور پر توجہ دیتی، لاہور کے تمام مسائل ختم کرتی اور لاہور کو آلودگی سے پاک کرتی تو آج لاہور بہترین اور خوبصورت شہر کا حسین منظر پیش کر رہا ہوتا۔

میری حکومت وقت سے مؤدبانہ گزارش ہے کہ وہ لاہور پر توجہ دے لاہور کو صاف ستھرا کرے لاہور کے سیورج کا نظام ٹھیک کرے سڑکیں ٹھیک کرے فلٹریشن پلانٹس لگاکر پانی کو قابل استعمال بنائے، بڑی گاڑیوں کا داخل شہر میں ممنوع قرار دے اور ٹریفک کا ٹریفک کی روانگی کا مناسب انتظام کرے یعنی لاہور کی تمام خامیوں کو دور کرے تاکہ آئندہ دنیا کے خوبصورت ترین شہروں کی فہرست میں اسلام آباد کے بعد لاہور کا نام آئے۔

؎میں بھلا کب تھا سخن گوئی پہ مائل غالبؔ

شعر نے کی یہ تمنا کے بنے فن میرا

حضرت غالب کا تو کیا ہی کہنا۔ مذکورہ شعر میں لفظ سخن پر کچھ دیکھا، سنا اور پڑھا ہے جسے آج قارئین کے سامنے رکھنے کی کوشش کرتے ہیں۔فارسی زبان سے اردو زبان میں یہ لفظ آیا ہے اور اس سے مراد نطق، گفتار، قول،معاملہ اور اعتراض و شک ہے۔اگر اس کے مترادفات کی بات کروں تو سنسکرت سے بات، فارسی سے گرفت اور عربی سے کلام کو دیکھا جاسکتا ہے۔سخن کو اگر انگریزی میں دیکھیں تو اس کا مترادف Sayبنتا ہے۔اب اگر اسی Sayکو لے کر چلوں تو یہ لفظ قدیمی جرمن کے لفظ "ساخن” سے نکلا ہے۔ آج کل کہنا کو جرمنی زبان کے لفظ ساگن میں دیکھا جاسکتا ہے۔مجھے انگریزی زبان کا لفظ Saga(لمبی کہانی) اسی ساگن سے ماخوذ لگتاہے۔ قدیمی انگریزی زبان کے لفظ secganکو جرمنی زبان سے لیا گیا ہے جسے saggjanکہتے ہیں اور اس کا مطلب”کہنا”ہی ہے۔یہی بعدمیں seyenہوا اور پھر شکل بدل کر Sayہوگیا۔مفروضے کے مطابق ہندیورپی زبانوں سے قبل کے ایک لفظ Sekwسے اسے لیا گیا ہے جس کے تعلقات جرمنی کے مغربی زبانوں سے دیکھے جاسکتے ہیں۔ اب اگر فارسی و اردو کے سخن کو سامنے رکھ کر قدیمی جرمن زبان کے ساخن پر غور کریں تو معلوم ہوگا کہ کچھ نہ کچھ انسانوں کی طرح ان زبانوں میں بھی مشترکہ رہا ہے جو اپنی شکلیں تبدیل کرتے کرتے ترقی یافتہ تو ہوچکی ہیں لیکن پھر بھی کچھ نہ کچھ اصل لیے بیٹھی ہیں۔ ضمناََ عرض کردوں کہ لفظ بات کی اصل "واتترا” ہے جس سے بات نکلا اور پھر اس قدر استعمال ہوا کہ اردو زبان کا ہی لفظ بن گیا اس پر بات کسی اور دن کے لیے اٹھا رکھتے ہیں۔سخن کے مرکبات دیکھیں تو سخن سرائی،سخن سنج،سخن سناشی،سخن آرائی،سخن آفرین، سخن پروراور سخن طراز وغیرہ کی ایک لمبی فہرست ہے۔اظہر فراغ کا شعر ہے

؎اس سے ہم پوچھ تھوڑی سکتے ہیں

اس کی مرضی جہاں رکھے جس کو

اس شعر میں لفظ پوچھ کا استعمال تو ہمارے ہاں عام سی بات ہے۔اس پر کبھی غور کرنا گوارا ہی نہیں کیا کہ کون پوچھتا پھرے جہاں بھر سے۔یہ لفظ سنسکرت کے لفظ پرچھاسے بنا ہے۔ رگ وید میں یہ لفظ پرچھتی (وہ پوچھتا ہے)کی شکل میں استعمال ہوا ہے جہاں اس کا ایک اور روپ پرشتابھی ہے۔ ماہرین لغت کہتے ہیں کہ ان لفظوں میں بنیادی لفظ پرچ (Prach) ہے۔ سنسکرت کا یہ لفظ فارسی، پشتو اور روسی زبانوں کے قریب ہے۔ روسی زبان میں پوچھنا Pros ہے جو کہ روسی لفظ Prositبمعنی پوچھنا میں ظاہر ہوتا ہے۔پشتو میں یہی لفظ Pos(پوس)ہے جہاں پر”ر” گرا کر کام چلایا گیا ہے اور پھر اسی سے لفظ تاپوس بن جاتا ہے۔فارسی میں پرسیدن میں یہ شکل مجھے نظرآتی ہے۔ جب ہم روسی Vopros، پشتو تاپوس اور ہندی پرشن کو دیکھتے ہیں تو اردو والا پوچھنا ان کا خونی رشتے دار لگتا ہے۔ میری مونئرولمیزکی لغت کے مطابق پوچھنے اور دریافت کرنے جیسے لفظوں میں مادہPrachضرور آتا ہے۔جرمنی زبان کے Fragen(فراگے) کے متعلق معلوم ہوا ہے کہ یہ لفظ پہلے Vrage (وراگے)تھا جو Frahen (فراہن) سے بنا تھا۔ اس کا مادہ Prk(پرک) بتایا جاتا ہے جو پرچ کے مشابہہ لگتا ہے۔آگے ایک لمبی فہرست ہے جو کہ انگریزی زبان میں اسی مادے سے الفاظ کو مختلف شکلوں اور معنوں میں ڈھال لیتی ہے۔پشتو زبان کی طرح لاطینی زبان میں بھی "پوس” ملتا ہے جو کہ انگریزی زبان کے لفظ Postulateمیں نظر آتا ہے جوکہ لاطینی Procereسے بنا ہے۔یہ لفظوں کا سمندر تو مزید گہرا ہوتا جارہا ہے اور ہم ابھی اتنے ماہر نہیں ہوے ہیں کہ لمبی تیراکی کرسکیں۔راغب دہلوی کہتے ہیں کہ

؎قطروں سے سمندرکا بنانا نہیں مشکل

قطرے میں سمندرکوسمونے کی ادا سیکھ

19 اکتوبر 1969ء سے 19 اکتوبر 2021ء تک حریتِ فکر کے متوالوں کا یہ عظیم قافلہ سو بمنزل ہے، اس انقلابی تنظیم کی آبیاری اکابرین نے اپنے پسینے اور خون سے کی ہے۔ کراچی سے خیبر تک صالح نوجوانوں کا یہ پرعزم قافلہ قربانیوں اور جدوجہد کی لازوال داستان رکھتی ہے، آج بھی اپنے اکابرین کے دیئے ہوئے سبق کو ہم بھولے نہیں۔

نوجوان کسی بھی معاشرے کا وہ حصہ ہوتا ہے کہ جو سماج پر اثر انداز ہونے کی صلاحیت سے بھر پور ہوتا ہے دنیا میں جتنے انقلابات آئے ہیں اس میں نوجوان کا رول سب سےزیادہ ہے ۔ چونکہ نوجوانان مستقبل کے معمار ہوتے ہیں اور انہی نے تمام ذمہ داریوں سے عہدہ براں ہونا ہوتا ہیں اس لیے ان کی تعلیم وتربیت اہم ترین فریضہ ہے ۔ یہ تعلیم وتربیت تین مراحل میں ہوتی ہے،

 اول گھر، 

دوم سماج، 

سوم جامعات۔ 

بچہ سب سے پہلے والدین اور گھر کے افراد سے شعوری ولا شعوری تعلیم وتربیت پاتا ہے، 

دوسرے درجہ میں وہ گھر سے باہر گلی ومحلے میں جب قدم رکھتا ہے تو دوست واحباب اور معاشرے کے رویے اس کی شخصیت پر اثر انداز ہوتے ہیں۔ 

تیسرے درجہ میں وہ جب کسی مکتب واسکول اور جامعہ میں پہنچتا ہے تو معلم اس کو اپنے قول وفعل سے تعلیم دیتا ہے۔ تب جاکر وہ میدان عمل میں وہ داخل ہوتا ہے اور ذمہ داریوں کو نبھاتا ہے۔ ہم چونکہ دور زوال سے گزر رہے ہیں اگر ہم اپنے ماحول پر نگاہ ڈالیں تو صورتحال سامنے آتی ہے کہ اول تو شرح خواندگی کم ہے جس کی وجہ سے اکثر والدین ناخواندہ ہیں یا اگر خواندہ ہیں تو معاشی مجبوریوں یا اعلی معیار زندگی کی دوڑ نے ان کو اتنا مصروف رکھا ہے کہ وہ بچوں کی تربیت پر توجہ نہیں دے پا رہے ہیں ۔ پھر اس مادہ پرستانہ ماحول سے جو سماج بنتا ہے وہ اس بچہ ونوجوان کو مسلسل یہی پیغام دے رہا ہوتا ہے کہ اصل کامیابی مادہ کا حصول ہے اور اس کے لیے جس قسم کی چالاکی دھوکہ دہی کی جاسکتی ہے وہ جائز ہے اور اس مادہ پرستانہ ماحول سے جو اخلاقی تنزلی پیدا ہوتی ہے وہ ہمارے پورے معاشرے سمیت ان نونہالان پر اثر انداز ہوتی ہے۔

تیسرے نمبر پر جو معاصر جامعات ہیں وہاں پر گو عصری فنون کا تعارف تو پڑھایا جاتا ہے لیکن فکری ونظریاتی تربیت وہاں ناپید ہے، اسی طرح جو دینی مدارس ہیں وہاں علوم عربیہ تو پڑھائے جاتے ہیں لیکن نظریاتی تربیت وہاں بھی نہیں ہے۔ یہی وجوہات ہیں کہ مدارس کا نوجوان شدت پسندی اور جذباتیت کا شکار ہور ہا ہے اور کالج کا نوجوان اخلاقی بے راہ روی کا شکار بنتاہے اور فکری لحاظ سے مغرب کے سامنے مایع بنتا جارہا ہے۔ اسی حالات کو مد نظر رکھ کر جمعیت علمائے اسلام نے نوجوانوں کی فکری وسیاسی تربیت کے لیے جمعیت طلبائے اسلام قائم کی ہے ، تاکہ مسٹر وملا کے فرنگی گمراہ کن تقسیم کو ختم کیا جاسکے اور مدرسہ اور اسکول کے طلباء کو ایک پیج پر جمع کیا جاسکے اور انکی باہم منافرت کو، باہمی اخوت میں بدلا جاسکے، اسلامی خطوط پر ان کی فکر ی ونظریاتی تربیت ہوسکے۔

ماضی کی تاریخ اگر ہم مطالعہ کریں تو بعض جہات میں اس تنظیم نے بہترین خدمات پیش کیے ہے اس تنظیم نے سینکڑوں نوجوانوں کی فکری وسیاسی تربیت کی ہے چنانچہ مولانا فضل الرحمن اسی شجر کا میوہ ہے اور الحمد اللہ موصوف جمعیت علماء کی بہترین اندازمیں قیادت فرما رہے ہیں۔ اب چونکہ ایک طرف جذباتیت اور دوسری طرف مغرب سے مرعوبیت کا چیلنج در پیش ہے بلکہ اس دور میں تو نوجوانوں کو سیکولر ازم اور لبرل ازم سے ہوتے ہوئے فکری الحاد کا بھی سامنا ہے اس لیے اس دور میں جمعیت طلباء کی از حد اہمیت بڑھ جاتی ہے ۔

جمعیت طلباء کے حوالے سے ہنگامی طور پر ان کاموں کی طرف توجہ کرنی چاہیے کہ وہ ہر صوبہ ہر ضلع ہر تحصیل اور ہر یونٹ کی سطح پر معلمین کا انتخاب کرے اور ہفتہ وار درس اور مجلس مذاکرہ کا انتظام کرے، اور اپنا سابقہ لٹریچر ہر یونٹ کی سطح تک پہنچائے، مطالعہ اور دروس کا سلسلہ تیز کرے ماہانہ بنیاد پر تربیتی ورکشاپس رکھوائے ، نوجوانوں میں تقریر وتحریر کے مہارات پیدا کرے، ان کی اخلاقی تربیت کے ساتھ ساتھ ان کو سوشل میڈیا کے درست استعمال سے واقف کرائے، قصبہ قصبہ ، دیہات اور شہروں میں داعیوں کی ٹیمیں تشکیل دے اور امت کے نسل نو تک اسلام کا معتدل اور متناسب پیغام پہنچائے۔باقی عہد جدید کے تقاضوں کے مطابق نصاب میں تبدیلی اور اضافات کی ضرورت ہے جس پر مرکزی جماعت اور ذیلی جماعت کے ذمہ داران کو باہم بیٹھنا چاہیے تاکہ فوری طور پر اس پر عمل در آمد ممکن ہوسکے۔ چونکہ جمعیت علماء اسلام کا میدان فقط انتخابی سیاست نہیں بلکہ ہمہ جہت انقلاب ہے، اس کے لیے مکاتب ، رسائل ، شعبہ دعاۃ وغیرہ کا انتظام بھی ہے اس حوالے سے بھی باہمی غور فکر کی ضرورت ہے۔

جمعیت طلباءاسلام پاکستان   یومِ تاسیس کے موقع پر اپنے اکابرین سے تجدیدِ عہدِ وفا کرتے ہیں کہ ہم نئے جذبے، ولولے سے سامراجی قوتوں کے خلاف میدانِ کارزار میں جدوجہد کرتے رہیں گے۔ ان شاء اللہ وطن عزیز میں اسلام کا بول بالا کرینگے یا جان دے دیں گے۔ درمیان میں کوئی تیسرا راستہ قبول نہیں۔

خونِ دل دے کر نکھاریں گے رخِ برگِ گلاب

      ہم گلشن کی تحفظ کی قسم کھائی ہے

Twitter /  @IhsanMarwat_786

بریسٹ کینسر جیسے اردو زبان میں چھاتی کا سرطان کہا جاتا ہے۔پاکستان میں ہر سال تقریباً چالیس ہزار خواتین چھاتی کے سرطان کی وجہ سے جان کی بازی ہار دیتی ہیں وجہ آگاہی نہ ہونا خصوصاً ہماری دیہات کی خواتین تو اس بیماری کے نام سے بھی نا واقف ہیں علاج تو پھر دور کی بات ہے۔ ہمارے معاشرے کی یہ ذہنی پسماندگی کہہ لیں عورت چاہے پڑھی لکھی ہو یا انپڑھ  اپنے جسم کے پوشیدہ گوشوں میں درد کوئی تکلیف محسوس کریں گی تو خود سے دوائیاں کھا لیں گی مگر  بے پردگی جھجک شرم میں ڈاکٹر کے پاس نہیں جائیں گی چاہے موت بھی سامنے ہو ایڑیاں رگڑنے پر مجبور ہو جائیں گی مگر مجال ہے لبوں سے اپنی اذیت بیان کریں اور چھاتی کا سرطان بھی جسم کے حساس حصّے کا کینسر ہے اس پر ہمارے معاشرے میں  بات کرنا بہت ہی مشکل چیلنج ہے۔ ہمارے ملک میں کئ علاقوں میں لیڈی ڈاکٹر نہ ہونے کی وجہ سے بھی خواتین مرد ڈاکٹرز کے پاس جانے کی ہمت ہی نہیں کر پاتی ہیں اور ایسے میں وقت ہاتھ سے نکل جاتا۔
اکثر آپ نے اپنے اردگرد دیکھا ہو گا عورت بیمار ہے جی فلاں نے جادو کر دیا پیر سائیں کے پاس دم کروایا ہے وغیرہ وغیرہ باتیں سننے کو ملتی ہیں اور اس چکر میں بیماری کا بر وقت علاج نہ ہونے کی وجہ سے عورت ایک زندہ لاش بن جاتی ہے۔ چھاتی کے سرطان جیسی بیماری میں چھاتی میں گلٹی محسوس ہوتی ہے درد اتنا نہیں ہوتا اور ایسے میں ان دم کرنے والوں کی چاندنی ہو جاتی ہے اور مریضہ گھر کے کام کاج با آسانی کر رہی ہوتی ہے تو اسے لگتا ہاں جی میں ٹھیک ہوں ایسے کرتے بیماری کی ایک سٹیج کراس ہو جاتی ہے یعنی کے لا علمی یہی وجہ ہے کہ پہلی سٹیج پر تشخیص چار فیصد سے بھی کم ہے۔
اس وقت پاکستان میں ہر نو میں سے ایک خاتون کو چھاتی کے سرطان کا خطرہ لاحق ہے یہلے ہم یہ سنتے تھے کہ یہ مرض بڑی عمر کی خواتین میں پایا جاتا ہے لیکن اب کم عمر بچیاں بھی اس بیماری میں مبتلا ہو رہی ہیں۔ اس موذی بیماری سے متعلق  شعور اجاگر کرنے کے لئے عالمی دنیا سمیت پاکستان میں اکتوبر کے مہینے کو بریسٹ کینسر سے بچاؤ کے طور پر منایا جاتا یے۔ مختلف پروگرامز منعقد کئے جاتے ہیں ڈاکٹرز ٹاک شوز کے ذریعے اس بیماری سے متعلق آگاہی دے رہے ہوتے ہیں۔
اس مہینے آپ کسی کو فون کریں آپ کو چھاتی کے سرطان سے آگاہی کا پیغام  سنائی دے رہا ہو گا جس کا فائدہ یہ ہوا کہ اب لوگ اس بیماری پر بات کرتے ہیں انہیں شعور آیا ہے جس تیزی سے یہ بیماری پھیل رہی ہے اس طرح کے پروگرام  بس اکتوبر کے مہینے تک محدود نہیں رکھنے چائیے بلکہ ہر ماہ  دیہی علاقوں میں خاص کر ایسے پروگرامز منعقد کرانے چائیں تاکہ خواتین باشعور ہونے کے ساتھ خود اعتماد بھی ہو سکیں۔
اب  بات کر لیتے ہیں چھاتی کے سرطان کی علامات پر سب سے پہلے عورت کو یہ پتا ہونا ضروری ہے کہ چھاتی دکھتی کیسی ہے تاکہ اگر کسی قسم کی تبدیلی ہو تو وہ بر وقت جان سکے اپنا جسمانی معائنے کے ساتھ وہ میمو گرام اور کلینیکل بریسٹ ایگزام کروا سکے یہ ہی وہ ٹیسٹ ہیں جس کی وجہ سے کینسر کی تشخیص ممکن ہوتی ہے۔ علامات پر ہم نظر ڈالیں تو چھاتی میں درد محسوس ہونا جلد کا سرخ کھردرا ہونا چھاتی کے مختلف  حصوں یا پوری چھاتی پر سوجن جلن کا ہونا دھبے پڑ جانا بغل یا چھاتی پر گلٹی کا ہونا نپل میں تبدیلی سرخ ہونا  سخت ہونا سائز اور ان کی ساخت میں تبدیلی کا ہونا چھاتی  سے دودھ کے علاوہ خون یا کسی اور مادے کا اخراج یا پیپ کا نکلنا۔ اس کے علاؤہ جینیاتی وجوہات، خاندانی ہسٹری ماہواری میں بے قاعدگی،بچوں میں وقفے کی دوائیوں کا استعمال الکوحل کا زیادہ استعمال موٹاپا وغیرہ  اگر ان میں سے لگے یہ علامات آپ کو ہیں تو فوراً ڈاکٹر سے رجوع کریں خود سے ڈاکٹر نہ بنیں یہ بھی ضروری نہیں کہ یہ چھاتی کا سرطان ہی ہو گلٹی کی کئ اور بھی وجوہات ہوتی ہیں اس لیے وقت ضائع کئے بغیر اپنے معالج سے رابطہ کریں۔
خواتین کو چاہیے کہ تیسں سال کی عمر میں پہنچ کر پانچ سال میں ایک مرتبہ اپنا میمو گرافی لازمی کروائیں اگر چالیس سال میں ہیں تو ہر دو سال کے بعد اپنا معائنہ کروائیں کیوں کہ چھاتی کے سرطان کا خطرہ اوسط چالیس سال کی عمر میں زیادہ ہوتا ہے اور پچاس سال کی عمر میں پہنچ کر ہر سال میمو گرافی کروانی چاہیے۔ چھاتی کے سرطان کی تشخیص کے لئے میمو گرافی کے علاؤہ تھری ڈی میموگرافی بریسٹ الٹراساونڈ ایم آرآئی ٹیسٹ بھی کیے جاتے ہیں انکے فوائد بھی ہوتے ہیں رسک بھی اس لئے خواتین ڈاکٹر کے مشورے سے ہی ٹیسٹ کروائیں۔
ڈاکٹروں کے مطابق چھاتی کے سرطان کو چار سٹیج میں تقسیم کیا گیا ہے پہلی سٹیج میں سرطان چھاتی تک محدود رہتا دوسری سٹیج میں بغل تک تیسری میں گردن تک اور چوتھی سٹیج میں پھیپھڑوں، جگر،ہڈیوں اور جسم کے دوسرے دور دراز حصوں تک پہنچ جاتا۔ ہمارے یہاں دیکھا گیا ہے کہ چھوٹے شہر کی بات کریں یا کسی بڑے شہر کی پڑھے لکھے لوگ بھی اکثر ڈاکثر کے پاس جانے میں دیر کر دیتے ہیں اگر مریض پہلی یا دوسری سٹیج پر ڈاکٹر کے پاس جاتا ہے تو اس سٹیج میں مرض قابل علاج ہوتا ہے مریض ڈاکٹر کی ہدایات پر عمل کرے تو وہ مکمل صحت یاب ہو جاتا ہے۔سٹیج تیسری اور چوتھی میں مریض کا مکمل علاج بہت مشکل ہوتا ہے جتنا مرضی اچھا علاج کروا لے پیچیدگیوں کا سامنا درپیش رہتا ہے۔ مریض کو کس قسم کے علاج کی ضرورت ہے اس کا انحصار کینسر کی سٹیج اور اس کی قسم پر منحصر ہوتا ہے۔ضرورت اس بات کی ہے کہ لوگ اس چیز کو سمجھیں کہ چھاتی کے سرطان کا اگر بروقت علاج کیا جائے تو یہ بیماری قابل علاج ہے۔
خود کو بیماریوں سے محفوظ رکھنے کے لئے اپنا طرز زندگی بدلیں گھر کے کاموں سے فارغ ہو کر ورزش کریں روانہ کچھ دیر چہل قدمی کریں متوازن غذا کا استعمال کریں میں نے کوشش کی بہت سادہ الفاظ میں اس بیماری سے متعلق آگاہی فراہم کروں الفاظ کا چناؤ ایسا کروں کہ ہر کوئی میری بات با آسانی سمجھ سکے۔
اپنا اور اپنے پیاروں کا خیال رکھیں ان سے بات کرتے رہیں انہیں وقت دیں اللّٰہ سب کو اپنی حفظ وامان میں رکھے آمین ثم آمین۔۔!!
از قلم : شائستہ سرور آرائیں
@Shasii_Arain