Category: بلاگ

طوفان الاقصیٰ اور غزہ میٹرو
از قلم غنی محمود قصوری
گذشتہ سال 7 اکتوبر 2023 سے ابتک حماس اور اسرائیل کے مابین جنگ جاری ہے جس میں ہر آنے والے دن کیساتھ اضافہ ہوتا چلا جا رہا ہے، وزارت صحت غزہ کی جاری کردہ رپورٹ کے مطابق اسرائیلی جارحیت کے باعث ابتک اس جنگ میں فلسطینی شہداء کی تعداد 31,553 اور زخمیوں کی تعداد 73,546 ہو گئی ہے جن میں 70 فیصد عورتیں اور بچے شامل ہیں جبکہ 23 لاکھ لوگ بے گھر ہوئے ہیں اور لاکھوں کی تعداد میں رہائشی عمارتیں،مساجد،سکول، ہسپتال و دیگر املاک مکمل تباہ ہو چکی ہیں،حماس نے اس جنگ کو طوفان الاقصیٰ کا نام دیا ہے

اسرائیل اور حماس کے مابین یہ جنگ کوئی پہلی نہیں اس سے پہلے بھی یہ جنگیں ہو چکی ہیں مگر موجودہ جنگ سب سے زیادہ خطرناک ترین ہے
حماس کا مقصد اسرائیل کا جدید ترین دفاعی نظام آئرن ڈوم تباہ کرنا ہے جو کہ راکٹ شکن دفاعی نظام ہے جو اپنی 300 کلومیٹر کی حدود میں آنے والے مخالف راکٹ وغیرہ کو فضاء میں تباہ کرنے کی صلاحیت رکھتا ہے

اسے اسرائیلی Advance Defance System Rafael نے 210 ملین ڈالر کی لاگت سے تیار کیا جس کا وزن 90 کلوگرام اور اس کی لمبائی 3 میٹر ہے،اس وقت تقریباً 6 ممالک آئرن ڈوم استعمال کر رہے ہیں مگر اسرائیل میں نصب آئرن ڈوم دنیا کا جدید ترین مانا جاتا ہے کیونکہ یہ 20 سے 45 سیکنڈ تک ریڈار کے ذریعے اپنے مخالف ہدف کو تلاش کرکے تباہ کرنے کی صلاحیت رکھتا ہے

ویسے تو اس نظام کو 2005 میں اسرائیل میں تیار کیا گیا تاہم اسے 2007 میں نصب کیا گیا جس کے خاطر خواہ نتائج نا نکلے تو 2012 میں امریکہ کی مدد سے اسے اپ گریڈ کرکے کامیاب ترین قرار دیا گیا ،اسرائیلی ٹیکنالوجی میں آئرن ڈوم کلیدی اہمیت رکھتا ہے

جس طرح اسرائیل کے دفاع میں آئرن ڈوم کلیدی اہمیت رکھتا ہے بالکل اسی طرح حماس کی سرنگیں حماس کیلئے ریڑھ کی ہڈی کا درجہ رکھتی ہیں اور اسرائیل کی راہ میں سب سے بڑی رکاوٹ یہی سرنگیں ہیں

اسرائیل کا مقصد ان سرنگوں کو تباہ کرنا ہے اور اسرائیل ان سرنگوں کو غزہ میٹرو کا نام دیتا ہے، 5 ماہ سے زیادہ کی اس جنگ میں اسرائیل ان سرنگوں کا 20 فیصد بھی تباہ نہیں کر سکا،اسرائیلی فوج نے ان سرنگوں کو تباہ کرنے کے لئے بے پناہ فضائی بمباری کی،ٹینکوں کا استعمال کیا اور جدید ترین ڈرونز کے ذریعے ان سرنگوں کا کھوج لگانے کوشش کی اور کچھ پکڑی جانے والی سرنگوں میں سمندر کا پانی داخل کیا تاہم ناکام رہا،

حماس نے اسرائیلی کے 132 سے زیادہ قیدی انہی سرنگوں میں رکھے ہوئے ہیں جن میں سے 28 ہلاک ہو چکے ہیں

امریکی فوجی اکیڈمی کے مطابق اس وقت غزہ میں 500 کلومیٹر تک لمبی 1300 جدید ترین سرنگیں موجود ہیں جو کہ 30 میٹر گہری ہیں اور ان کے نیچے مکانات،مساجد اور حماس کے ٹریننگ کیمپوں کے علاوہ اسلحہ ساز فیکٹریاں بھی موجود ہیں،یہ سرنگیں اس قدر جدید ہیں کہ فضاء سے ان کی نشاندہی ممکن نہیں ان کی نشاندہی کیلئے پورے غزہ کی تلاشی ضروری ہے،ان میں سے بیشتر سرنگیں اسرائیل کے اندر تک موجود ہیں ،اگر ہم ان سرنگوں کی جدت کا اندازہ لگائیں تو ذہن نشین کر لیں کہ لندن میں انڈر گراؤنڈ ٹرین سسٹم 400 کلومیٹر لمبا ہے مگر یہ سرنگیں 500 کلومیٹر تک لمبی ہیں

ایک طرف دنیا کا جدید ترین ایٹمی ملک اسرائیل ہے تو دوسری طرف اس کے مدمقابل 35 سے 40 ہزار حماس کے تربیت یافتہ افراد جن کے بارے اسرائیل نے دعوی کیا ہے کہ 10 ہزار سے زائد حماس جنگجو شہید ہو چکے ہیں مگر دوسری طرف عسکری تجزیہ نگار پوچھتے ہیں کہ اگر اتنی تعداد میں حماس کے مجاہدین شہید ہو چکے ہیں تو ابتک اسرائیل خاطر خواہ نتائج کیوں نہیں حاصل کر سکا اور ابتک 1200 سے زائد اسرائیلی کیوں مر چکے ہیں؟یہ ایک ایسا سوال ہے جس کا جواب اسرائیلی ڈیفینس فورسز کے پاس نہیں

گمان ہوتا ہے کہ یہ جنگ لمبا عرصہ چلے گی کیونکہ دونوں طرف ٹیکنالوجی میں جدت ہے، ہاں اسرائیل کے پاس فوجی قوت اور اسلحہ زیادہ ہے مگر اس کے مدمقابل حماس کے مجاہدین بہت کم ہیں مگر حماس کے مجاہدین وہ ہیں جو 2014 کی حماس اسرائیل جنگ میں 18 سال سے کم عمر کے نوجوان تھے اور جنہوں نے اپنے خاندانوں کو اسرائیلی فوج کے ہاتھوں بہت برے طریقے سے شہید ہوتے دیکھا اور اب وہ انتقام کیلئے ہر حد تک جاسکتے ہیں

ناجائز اوور بلنگ اور مہنگی بجلی, حکومت عملی اقدامات کرے
تحریر:میاں عدیل اشرف
پوری دنیا میں جہاں بھی، جس ملک میں بھی ترقی ہو رہی وہاں لوگوں کی زندگیاں آسان ہو رہی ہیں لیکن بد قسمتی سے پاکستان واحد ملک ہے جہاں ظاہری طور پر ترقی تو ہو رہی ہے لیکن لوگوں کی زندگیاں مشکل سے مشکل تر ہوتی جا رہی ہیں۔

ہر ملک بجلی پیدا کرکے عوام کو سستی بجلی مہیا کر رہا ہے لیکن پاکستان میں آئے روز بجلی مہنگی ہو رہی، ایک طرف لوگوں کو مہنگی بجلی نے پریشان کر رکھا ہے تو دوسری جانب واپڈا ملازمین کی ناجائز اوور بلنگ کی وجہ سے نہ صرف عوام پریشان ہے بلکہ پاکستان کی ریڑھ کی ہڈی کا کردار ادا کرنے والے کسان بھی بہت زیادہ مشکلات کا شکار ہیں۔

واپڈا ملازمین جان بوجھ کر لوگوں کے بجلی بلوں میں ناجائز طور پر زائد یونٹ ڈال کر لاکھوں روپے کا بل بھیج دیتے ہیں، جو کسان اور عام عوام بالکل بھی ادا نہیں کر سکتے۔ عام مزدور جس کی یومیہ اجرت اتنی کم ہے کہ وہ گھر کے افراد کا کھانا پورا نہیں کر سکتا ،جب اسے مہینے کا ہزاروں روپے بل آتا تو وہ فاقے کرنے پر مجبور ہو جاتا ہے۔

اسی طرح کسان جو اپنی بوئی ہوئی فصل کو چار یا پانچ ماہ بعد برداشت کرتے ہیں تو اس کی بچت اتنی زیادہ نہیں ہوتی بلکہ بجلی کے بل اس کی بچت سے بھی زیادہ ہوتا ہے۔ جس کی وجہ سے کسان زرعی زمینوں میں لگے بجلی کے کنیکشن منقطع کروانے پر مجبور ہو چکے ہیں۔

غریب مزدور لوگ اپنے گھروں کے کنیکشن منقطع کروا رہے ہیں لیکن محکمہ واپڈا کے ملازمین کی عیاشیاں عروج پر ہیں، ملک میں بجلی مہنگی ہونے اور پیداوار کم ہونے کے باوجود واپڈا ملازمین کی فری بجلی بند نہیں ہو سکی، انہیں ہر مہینے اربوں روپے کی فری بجلی دی جا رہی جس سے نہ صرف وہ اپنے گھروں میں ہیٹر، گیزر، اور اے سی چلاتے بلکہ دیگر گھروں کو ناجائز طور پر بجلی چوری کر کے فراہم کرتے ہیں اور بدلے میں پیسے وصول کرتے ہیں۔

بجلی چوری کروانے میں بھی محکمہ واپڈا ملازمین ہی ملوث ہیں ان کے بغیر بجلی چوری ہو ہی نہیں سکتی لیکن حکومت ان ملازمین کی فری بجلی بند کرنے کی بجائے آئے روز عام عوام پر بوجھ ڈال رہی، واپڈا ملازمین چوری کی بجلی چلانے والوں کے خلاف سخت کارروائی کرنے کی بجائے وقتی طور پر ان کا کنیکشن کاٹتے ہیں اور دوسرے روز ہی چوروں کا کنیکشن لگا دیتے اور رشوت وصول کرتے ہیں۔ ہر طرف سے عوام کو ہی لوٹا جا رہا ہے اور ان کے حقوق پر ڈاکہ ڈالا جارہا جو کہ عام عوام کے ساتھ سخت زیادتی ہے۔

محکمہ واپڈا کو اگر پرائیویٹ کر دیا جائے اور ملازمین کی فری بجلی ختم کر دی جائے تو ملک میں بجلی چوری بھی کم ہو جائے گی اور پیداوار بھی پوری ہو جائے گی۔ کیونکہ بجلی چوری کروانے میں خود محکمہ واپڈا کےملازمین ہی ملوث ہیں۔

پاکستان میں سب سے اہم شعبہ جس پر ملک کا دارومدار ہے وہ زراعت ہے، حکومت کو چاہیے کسانوں کو سستی بجلی اور دیگر زرعی اشیاء سستے داموں فراہم کریں لیکن حکومت پاکستان آئے روز اپنی بری پالیسیوں کے ذریعے کسانوں کے لیے مشکلات ہی بڑھا رہی ہے، اس طرح نہ صرف کسانوں کے چولہے ٹھنڈے پڑ رہے ہیں، بلکہ ملکی زرمبادلہ کے ذخائر میں بھی کمی واقع ہو رہی ہے۔

سستی بجلی کی فراہمی نہ ہونے کی وجہ سے لوگ سولر لگاوانا شروع کر رہے ہیں جو کہ موجودہ دور میں تو فائدہ مند نظر آتے ہیں لیکن مستقبل میں اس سولر کی وجہ سے موسمیاتی طور پر نقصان ہو گا،اس لیے گورنمنٹ کو چاہیے کہ محکمہ واپڈا کی نج کاری کر کے ملازمین کی فری بجلی بند کریں۔ جہاں باقی سارے محکموں کے ملازمین بجلی بل ادا کرتے ہیں واپڈا ملازمین بل کیوں نہیں ادا کر سکتے۔

عام عوام اور کسانوں نے کئی بار ملک گیر احتجاج کیا لیکن ناجائز لاکھوں روپے کی اوور بلنگ کا خاتمہ نہیں ہو سکا۔ حکومت پاکستان اس حوالے سے عملی اقدامات کرے اوور بلنگ کا خاتمہ کر کے صرف استعمال شدہ یونٹ کا ہی بل عوام کو بھجیں۔ تاکہ ہر فرد آسانی سے بجلی کا بل ادا کر سکے۔

ریاست پاکستان عام مزدوروں کے حالات پر رحم کرے ان کی اجرت سے زیادہ بجلی مہنگی نہ کرے۔

اور کسانوں کو سستی بجلی کی فراہمی یقینی بنائے تاکہ وہ زرعی اجناس کی زیادہ پیداوار حاصل کریں اور ملک کی معیشت کی بہتری کے لیے اپنا بہتر کردار ادا کر سکیں۔ سستی بجلی کی فراہمی اور ناجائز اوور بلنگ کا خاتمہ حکومت پاکستان کا عوام پر بہت بڑا احسان ہو گا۔

سردار کی آمد مرحبا
از قلم غنی محمود قصوری
سردار لفظ عربی کا ہے جس کے معنی قائد،امیر اور حاکم کے ہیں،سردار وہ ہوتا ہے جو بڑا اور اعلی ظرف ہوتا ہے اور جس میں ایثار و قربانی دینے کا جذبہ زیادہ ہو اور جو اپنے ماتحتوں کی حفاظت کرنا جانتا ہو ،ایسا سمجھیں کہ جب کوئی عام شحض لڑنے کی ٹریننگ کرکے واپس آتا ہے تو وہ لڑنے کے قابل ہو جاتا ہے اور اپنی باقی زندگی خود کی اور دوسروں کی حفاظت کے قابل ہو جاتا ہے تو وہ سردار ہوتا ہے اور محافظ ہوتا ہے

اس جہان میں ہر چیز کا سردار ہے سو اسی لئے مہینوں کا بھی سردار مہینہ ماہ رمضان ہے اور ماہ رمضان کی آمد بالکل قریب تر ہے،یہ وہ مہینہ ہے جس میں ہم بھوکے پیاسے رہ کر اور عبادات میں پختگی حاصل کرکے باقی سارا سال حالات سے لڑنے کے قابل ہو کر اپنے رب سے سرٹیفکیٹ حاصل کرتے ہیں کہ یاالہی ہماری عبادات اور صبر سب آپ ہی کے لئے ہے ہم آپکی رضا کی خاطر جہاں بھوکے پیاسے رہ سکتے ہیں وہاں فرضی عبادات کیساتھ نفلی عبادات بھی کرنے کی توفیق مانگتے ہیں،

اس ماہ مبارک کی بہت زیادہ حرمت ہے جس بابت سورہ البقرہ میں ارشاد باری تعالیٰ ہے
رمضان کا مہینہ (وہ ہے) جس میں قرآن اُتارا گیا ہے جو لوگوں کے لئے ہدایت ہے اور (جس میں) رہنمائی کرنے والی اور (حق و باطل میں) امتیاز کرنے والی واضح نشانیاں ہیں، پس تم میں سے جو کوئی اس مہینہ کو پالے تو وہ اس کے روزے ضرور رکھے اور جو کوئی بیمار ہو یا سفر پر ہو تو دوسرے دنوں (کے روزوں) سے گنتی پوری کرے، ﷲ تمہارے حق میں آسانی چاہتا ہے اور تمہارے لئے دشواری نہیں چاہتا، اور اس لیے کہ تم گنتی پوری کر سکو اور اس لئے کہ اس نے تمہیں جو ہدایت فرمائی ہے اس پر اس کی بڑائی بیان کرو اور اس لئے کہ تم شکر گزار بن جاؤ

اللہ تعالی نے ہمیں بتلا دیا کہ یہ ماہ مبارک ہمارے لئے گناہوں سے بچنے اور اجر و بلند مقام حاصل کرنے کا بہت بڑا ذریعہ ہے اور ہم اس ماہ کی مشقت سے ایک مضبوط اور پکے مومن بن سکتے ہیں اور بھوک و پیاس کی برداشت کی گئی سختیاں ہمیں احساس دلاتی ہے کہ رب نے کس قدر نعمتیں ہمارے لئے پیدا کی ہیں اور ان نعمتوں کو کمزور لوگوں میں بانٹا جائے تاکہ ہمارے اندر ایثار و قربانی کا جذبہ پروان چڑھے

ویسے تو سارا سال ہی ہر اچھے کام پہ نیکی ملتی ہے مگر اس ماہ میں نیکیوں کے اجر میں انتہاء کا اضافہ ہو جاتا ہے مگر روزے دار کی فضیلت اور روزے کے اجر بارے حدیث رسول ہے کہ
نبی کریم صلی اللہ علیہ وسلم نے فرمایا ابن آدم کا ہر عمل دوگنا ہو تا ہے نیکی کا اجر دس سے لیکر سات سو گنا تک بڑھ جاتا ہے

اللہ عزّوجل نے فرمایا روزہ میرے لئے ہے اور میں ہی اسکا اجر دوں گا کیونکہ اس میں میرا بندہ اپنی شہوت اور کھانے پینے کو میری وجہ سے چھوڑ دیتا ہے روزے دار کے لئے دو خوشیاں ہیں ایک خوشی اسکے افطار کے وقت اور دوسری اپنے رب سے ملاقات کے وقت اسکے منہ کی بو اللہ کو کستوری کی خوشبو سے زیادہ پسندیدہ ہے

ہمیں چائیے کہ اس ماہ مقدس میں روزے رکھنے کے ساتھ عبادات میں پختگی حاصل کریں اور زیادہ سے زیادہ نیکیاں کمائیں تاکہ ہمارے سال کے باقی ماہ رمضان جیسے گزریں اور بعد از مرگ ہم اپنے رب سے اس کے وعدے کے مطابق انعام حاصل کریں،اس ماہ مقدس میں خود بھی روزہ رکھیں اور اپنے ارگرد کے غرباء کو بھی سحری و افطاری میں شامل کریں اور لوگوں میں راشن پیک تقیسم کریں کیونکہ جو کسی کو روزہ رکھواتا یا افطار کرواتا ہے اسے بھی اس کے برابر اجر دیا جاتا ہے اور اس روزہ دار کے اجر میں سے کوئی کٹوتی نہیں کی جاتی

نیز ماہ مبارک کی برکت یہ ہے کہ نبی اکرم صلی اللہ علیہ وآلہ وسلم نے فرمایا جب ماہ رمضان کی پہلی رات ہوتی ہے شیطانوں اور سرکش جنوں کو بیڑیاں پہنا دی جاتی ہیں اور جہنم کے دروازے بند کر دیے جاتے ہیں اور ان میں سے کوئی دروازہ کھولا نہیں جاتا، اور جنت کے دروازے کھول دیے جاتے ہیں پس ان میں سے کوئی دروازہ بند نہیں کیا جاتا ایک ندا دینے والا پکارتا ہے اے طالب خیر! آگے آ، اے شر کے متلاشی! رک جا، اور اللہ تعالیٰ کئی لوگوں کو جہنم سے آزاد کر دیتا ہے ماہ رمضان کی ہر رات یونہی ہوتا رہتا ہے

تو ہمیں چائیے اس ماہ مقدس میں اپنے رب کو زیادہ سے زیادہ منا کر اپنے اوپر جنت کے دروازے کھولیں اور جہنم کے دروازے بند کروا لیں
اللہ تعالی ہم سب کو اس ماہ مقدس کے روزے رکھنے کی توفیق عطا فرمائے. آمین