Category: بلاگ

یہ ایک ایسا سوال ہے جس کا جواب زیادہ تر لوگ بیرونی عوامل یا رجحانات کو دیکھ کر دیتے ہیں۔ شوشل میڈیا پر آپ کہیں بھی سیر کر آئیں تقریبا تمام لوگ دوسروں کی آراء کو ہوبہو فروغ دیتے دکھائی دیں گے یا لوگوں کے رویوں پر مکمل منحصر ہو کر رد عمل دیں گے۔ نتیجے کے طور پر وہ دونوں انتہائی اقدام میں سے ایک کو اپنا لیتے ہیں۔ یا تو بالکل اکیلے رہنا یا ہر وقت دوست احباب میں۔ معاشرے میں موجود تمام لوگ جن سے آپ لین دین رکھتے ہوں سب کے حقوق ہیں جن کے تحت وہ اہمیت اور توجہ کے مستحق ہیں۔ دوست احباب کے علاوہ آپ کا اپنا کنبہ ہے جسکو کسی صورت نظرانداز نہیں کیا جا سکتا۔  ان تمام تر صورتحال میں آپکو ایک سوچ کے تحت معاملات کو دیکھنا چاہیے۔

میری رائے میں اس سوال کا جواب کسی بیرونی رجحان یا عوامل کا براہ راست محتاج نہیں۔

اللہ تعالی نے انسان کو اشرف المخلوقات بنایا ہے اور یہ اعزاز اسکو عقل وشعور کی بدولت حاصل ہے جس کے زریعے وہ صحیح اور غلط میں فرق جان سکتا ہے۔ اللہ تعالی نے انسان کو مختلف جزبات بھی عطا کیے ہیں جسکا اظہار اسکے حالات کی عکاسی کرتا ہے۔ ان جزبات کی کیفیات تھوڑے سے وقت میں تیزی سے بدلتی رہتی ہیں۔ بالکل پرندے کےاس پر کی مانند جو ہوا کی لہروں کے ساتھ الٹتا پلٹتا رہتا ہے۔ ایک لمحے انسان کچھ سوچتا ہے اور اسکے اگلے ہی لمحے انسان کا مزاج کسی اور نقطہءنظر کا حامی ہو جاتا ہے۔ انسان کو جو چیز جانوروں سے ممتاز کرتی ہے وہ اسکا اپنے جزبات پر ضبط اور انکو قابو میں رکھنے کی صلاحیت ہے۔ اور یہ صلاحیت اسکو عقل عطا کرتی ہے۔ کسی بھی پریشانی یا مصیبت میں جب انسان تزبزب کا شکار ہوتا ہے تو اپنی عقل کی توانائیوں کو بروئے کار لاتا ہے اور اس کا سدباب تلاش کرتا ہے۔ جو سوال میں نے شروع میں پوچھا اس کے جواب کا اشارہ تو مل ہی چکا ہو گا اب تک۔

کوئی بھی انتہائی قدم کسی صورت آپکو زیب نہیں دے گا کہ ساری زندگی اسی کو اپنائے معاشرے میں رہ سکیں۔

انسان ایک معاشرتی حیوان ہے۔ معاشرے میں موجود تمام افراد سے اسکا کسی نہ کسی صورت تعلق واسطہ ضرور ہوتا ہے۔ ان سب سے انسان اپنے آپ کو لاتعلق نہیں کہہ سکتا۔ کوئی آپ کا رشتہ دار، کوئی دوست یا کوئی ہمسایہ ہو گا۔ سب کے حقوق ہیں جن کی ادائیگی شریعت نے آپ پر لاگو کی ہے۔ معاشرے سے کٹ کر انسان اپنی بقا بھی خطرے میں ڈال دیتا ہے۔ گزرتے وقت کے ساتھ تمام بدلتے رجحانات اور جدید تقاضوں پر نظر رکھنا ایک ناگزیر امر بن چکا ہے۔ دنیا حیرت انگیز تیزی سے ترقی کر رہی ہے۔ اس انقلابی ترقی کے فوائد اور نقصانات سے باخبر رہنا بہت ضروری ہے۔ تاکہ ان چیزوں کے برے اثرات سے خود کو محفوظ رکھا جا سکے۔ لہزا معاشرے کیساتھ جڑے رہنا چاہیے۔ 

کچھ لوگوں کے بارے میں چیزیں بالکل واضح ہیں۔ مثال کے طور پر آپ اپنے گھر والوں کو کسی صورت نہیں چھوڑ سکتے سوائے اس کے کہ انکا کوئی حکم احکام الہی سے متصادم ۔ اسی طرح برے لوگوں کی صحبت اختیار کرنے سے آپ کو منع کیا گیا ہے۔ 

ایک طبقہ ایسے لوگوں کا بھی ہے جن کا میں خصوصی طور پر ذکر کرنا چاہوں گا۔ ان لوگوں کی ذہنی کیفیت پر تعجب ہوتا ہے جو خواہ مخواہ خود کو مظلوم سمجھتے ہیں۔ دنیا کی مشقت اور وحشت کو اپنے زہن واعصاب پر اس قدر حاوی کر لیتے ہیں کہ ان کے نزدیک سب کچھ ناممکن ہو جاتا ہے۔ مایوسی کو اپنی دھن سمجھ کر اسمیں رہتے ہیں۔ جی ہاں میں بات کر رہا ہوں ان حضرات کی جو افسانوی دنیا کے دلدادہ ہوتے ہیں۔ حقیقت کو اپنانے میں عار محسوس کرتے ہیں۔ جو فلموں، ڈراموں یا افسانوی تحاریر میں دیکھتے پڑھتے ہیں اسکو اپنی حقیقی زندگی سے تشبیہ دینے کی ناکام کوشش کرتے ہیں۔ یہ محض خیالی پلاؤ ہوتے ہیں جنکی رنگینیوں اور چاشت کا سہارا وہ سست اور کمزور لوگ لیتے ہیں جو مشقت کرنے سے کتراتے ہیں۔ کوئی بھی چیز بغیر محنت حاصل نہیں کی جا سکتی۔ ایسے ناکام لوگ بجائے محنت کرنے کے دنیا سے گلہ کرتے دکھائی دیتے ہیں کہ ساری دنیا بے وفا اور ظالم ہے۔ اس قسم کی تنہائی بھی سراسر بے وقوفی ہے۔

غوروفکر کرنے کیلیے تنہائی بہترین ہے۔ البتہ ایک مخصوص وقت اور مقصد کا تعین لازمی ہے۔ قرآن پاک میں سورتہ الحدید کی ستائیسویں آیت میں اللہ تعالی نے ان لوگوں کا ذکر کیا ہے جو خود سے ایسی چیزیں ایجاد کرکے اپنے آپ کو مشقت اور قید و تنہائی کی اذیت میں ڈال دیتے ہیں جو اللہ تعالی نے ان پر فرض ہی نہیں کی تھیں۔ اس قسم کی تنہائی بھی بلاجواز کہلائے گی جسکا حاصل محض معاشرے سے دوری کے سوا کچھ نہ گا۔

کچھ لوگ وہ ہیں جو ہر وقت دوست احباب کا پرچار کرتے رہتے ہیں۔ اسی رفاقت میں اپنے والدین اور گھر والوں کے حقوق بھول جاتے ہیں۔ یہ بات درست ہے کہ اپنے دسترخوان کو دوستوں کی محفل سے بارونق رکھنا لمبی عمر پانے کا راز ہے۔ مگر دوسری طرف آپ کو خیال رکھنا ہو گا کہ آپ اپنے گھر والوں اور دوسرے وابستہ لوگوں کے حقوق سلب نہیں کر رہے۔ سب کے حقوق ہیں جنکی ادائیگی آپ پر فرض ہے۔ 

دونوں انتہائی اقدام لمبے عرصے کے لیے کارگر ثابت نہ ہوں گے۔ نہ تو آپ کے لیے ہمیشہ تنہا رہنا کارگر ثابت ہوگا اور نہ ہی ہر وقت دوستوں میں رہنا درست ہو۔ لمبے عرصے کے لیے آپ کو ان دونوں انتہائی اقدام میں اعتدال لانا ہوگا۔ چیزوں کو سمجھ بوجھ کر انکی اہمیت کے مطابق وقت دیں۔ بلاشبہ عقل آپ کو استعمال کرنے کیلیے عطا کی گئ ہے۔ المختصر تنہائی اور رفاقت میں توازن کیساتھ چلنا بہترین انتخاب ہوگا۔

پاکستان سمیت دنیا بھر میں انسداد تمباکو نوشی کا عالمی دن منانے مقصد انسانی صحت کو لاحق خطرات اور اس کے مضر اثرات کے متعلق عوام کو آگاہی فراہم کرنا ہے۔31 مئی کے دن دنیابھر کی طرح پاکستان کے تمام چھوٹے بڑے شہروں میں بھی محکمہ صحت اور مختلف سماجی تنظیموں کے زیر اہتمام تمباکو نوشی کیخلاف سیمینارز،واکس اور مختلف تقاریب کا اہتمام کیا جاتا ہے جس میں مقررین تمباکو نوشی کی تباہ کاریوں سے عوام کو آگاہ کرتے ہیں۔ عالمی ماہرین صحت کے مطابق تمباکو نوشی دنیا بھر میں ہائی بلڈ پریشر کے بعداموات کی دوسری بڑی وجہ ہے۔ آپ کو جان کر حیرت ہوگی کہ دنیا بھرکی ایک ارب سے زائدآبادی سگریٹ و تمباکو نوشی کی لت میں مبتلا ہے۔ عالمی ادارہ صحت کی رپورٹ کے مطابق دنیا بھر میں سگریٹ و تمباکو نوشی کے باعث ہر چھ سیکنڈ کے بعد ایک شخص موت کو گلے لگا رہا ہے ، ا س طرح دنیا بھر میں ہر سال ساٹھ لاکھ افراد تمباکو نوشی کے باعث موت کے منہ میں چلے جاتے ہیں، جن میں سے تقریباً چھ لاکھ سے زیادہ افراد ایسے ہوتے ہیں جو خود تمباکونوشی نہیں کرتے بلکہ تمباکونوشی کے ماحول میں موجود ہونے کے سبب اس کے خطرناک دھوئیں کا شکار ہوجاتے ہیں۔ پاکستان، بھارت، فلپائن، تھائی لینڈ اور کمبوڈیا میں سگریٹ و تمباکو نوش لوگوں کی شرح تیزی سے بڑھ رہی ہے اور اس اضافے کا بڑا سبب ان ممالک کا نوجوان طبقہ ہے۔

سگریٹ، پائپ، سگار، حقہ، شیشہ اور تمباکو کو کھانے والا استعمال جیسا کہ پان، چھالیہ، گٹکا وغیرہ اور تمباکو سونگھناتمام تر عادات انتہائی خطرناک ہیں۔ سگریٹ میں موجود نکوٹین انسان کے اعصاب پراس طرح سوار ہوتی ہے کہ وہ سگریٹ پئے بغیر نہیں رہ سکتا۔ تمباکو میں موجود نکوٹین دماغ میں موجود کیمیکل مثلاً ڈوپامائن اور اینڈروفائن کی سطح بڑھادیتا ہے جس کی وجہ سے نشہ کی عادت پڑ تی ہے۔ یہ کیمیکل خوشی یا مستی کی حسیات کو بیدار کردیتے ہیں جس سے جسم کو تمباکو مصنوعات کی طلب ہونا شروع ہوجاتی ہے۔ ان عادات کو ترک کرنا کسی بھی فرد کے لئے بہت مشکل ہوجاتا ہے کیونکہ جسم میں نکوٹین کی کمی سے طبیعت میں پریشانی، اضطراب، بے چینی، ڈپریشن کے ساتھ ذہنی توجہ کا فقدان رہنے لگتا ہے۔ تمباکو نوشی بہت آہستگی کے ساتھ جسم کے مختلف اعضاء کو نقصان پہنچانا شروع کرتی ہے اور متاثرہ افراد کو کئی سالوں تک اپنے اندر ہونے والے نقصانات کا علم ہی نہیں ہوپاتا، اور جب یہ نقصانات واضح ہونا شروع ہوتے ہیں تب تک جسم تمباکو کے نشے کا مکمل طور پر عادی ہوچکا ہوتا ہے اور اس سے جان چھڑانا بہت مشکل ہو جاتا ہے۔ تحقیق کے مطابق تمباکو اور اس کے دھوئیں میں تقریباً چار ہزار کیمیکل موجود ہوتے ہیں جن میں اڑھائی سو کے قریب انسانی صحت کے لئے نہایت نقصان دہ پائے گئے ہیں اور پچاس سے زائد ایسے کیمیکل موجود ہوتے ہیں جو کینسر کا باعث بن سکتے ہیں۔سگریٹ نوش سانس کی بیماریوں کا شکار ہوجاتا ہے ،جن میں برونکائٹس (COPD) اور ایفی زیما (Emphysema) قابل ذکر ہیں۔ ایفی زیما میں پھیپھڑوں میں ہوا کی جگہیں بڑھ جاتی ہیں اس سے سانس لینے میں شدید دشواری اور انفیکشن یعنی نمونیہ ہونے کاخطرہ رہتا ہے۔ اس حالت میں پھیپھڑوں کے ٹشو ہمیشہ کے لئے ٹوٹ پھوٹ جاتے ہیں جس سے مریض کو شدید کھانسی اور دمہ کی علامات پیدا ہوجاتی ہیں۔

تمباکو نوشی کی وجہ سے دل کے دورہ (ہارٹ اٹیک) ہونے کا خطرہ بہت بڑھ جاتا ہے۔ عام افراد کی نسبت سگریٹ نوش کو دل کی بیماری ہونے کا خطرہ دگنا ہوتا ہے۔ تمباکو کا دھواں خون کی شریانوں کو سخت کرنے کا باعث بنتا ہے، اس طرح دل کے پٹھوں کو خون کی فراہمی رک جاتی ہے جو ہارٹ اٹیک کا باعث بنتاہے۔ سگریٹ نوشی سے دماغ کو خون کی فراہمی بھی کم ہوجاتی ہے اور ہیمرج سٹروک ( Stroke Hemorrhagic ) جس میں دماغ میں موجود خون کی شریانیں پھٹ جاتی ہیں، کا خطرہ بہت بڑھ جاتا ہے۔ تمباکونوشی کا سب سے زیادہ اورخطرناک نقصان پھیپھڑوں کو ہوتا ہے، پھیپھڑوں کی بیماریوں میں مبتلا تقریباً نوے فیصد لوگ موجودہ یا سابقہ تمباکو نوش ہوتے ہیں۔ آپ جتنے زیادہ سگریٹ پیتے ہیں اتنا ہی پھیپھڑوں کا کینسر ہونے کا خطرہ رہتا ہے۔ سگریٹ پینے والی خواتین میں بھی بریسٹ کینسر ہونے کا احتمال رہتا ہے۔ اسی طرح سگریٹ و تمباکو نوشی منہ ،گلا، خوراک کی نالی کے کینسر، معدہ ، جگر ،مثانہ ،لبلبہ اور گردے کا کینسرکا باعث بنتا ہے۔ سگریٹ نوش کی طرح اس کے گھر اور ساتھ کام کرنے والوں میں بھی سگریٹ کے دھوئیں کی وجہ سے ان بیماریوں کا خطرہ بہت بڑھ جاتا ہے۔

اگر سگریٹ نوش کی بات کی جائے تو یہ فقط اپنی زندگی کے لیے خطرہ نہیں بنتا بلکہ اس کی وجہ سے دوسروں کی صحت کو بھی نقصان پہنچتا ہے۔ پا کستان میں سگریٹ و تمباکو نوشی کے عفریت سے نمٹنے کے لیے کوششیں کی جارہی ہیں، حکومت کی جانب سے 17 سال سے سرکاری دفاتر اور عوامی مقامات پر تمباکو نوشی پر پابندی کا قانون نافذہے، اور حکومت نے انسداد تمباکو نوشی کے لئے سگریٹ کے پیکیٹ پر رنگین تصویری تنبیہی پیغامات بھی پرنٹ کروا دیئے ہیں۔ لیکن بدقسمتی سے پاکستان میں تمباکو و سگریٹ نوشی کرنے والوں کی تعداد میں روز بروز اضافہ ہو رہا ہے، انسداد تمباکو و سگریٹ نوشی کے لئے مذید سخت اقدامات اور قوانین پر سنجیدگی سے عمل درآمد کی ضرورت ہے۔ جبکہ مضمرات سے آگاہی کے باوجود سگریٹ نوشی کرنے والوں کی بڑی تعداد پڑھے لکھے طبقے مثلاً وکلاء ، ڈاکٹرز، صحافی ، پولیس افسران و انجینئرز جیسے پیشوں سے وابستہ افراد کی ہے، جو مزید افراد کو سگریٹ نوش بنانے کا بھی ذریعہ بن رہے ہیں۔ تمباکو سے بننے والا سگریٹ انسان کے اپنے ہاتھوں بنا ایسا زہر قاتل ہے جو انسان کی تمام ترقوتوں اور صلاحیتوں کے پرخچے اڑا دیتا ہے۔ جبکہ انسان کس قدر قیمتی ہے ، اس کی قدر و قیمت کا خود اسے اندازہ ہی نہیں ۔ تمباکو نوشی کیخلاف عالمی دن کے موقع پر ہمیں یہ عہد کرنا چاہیے کہ ہم ہمیشہ سگریٹ و تمباکو نوشی کی پیشکش سے انکار کریں گے ، اور سگریٹ نوش افراد سکریٹ و تمباکو نوشی کو عادت کو ترک کرنے کی سنجیدہ کوششیں کریں گے۔

@AK_Anwar_Khan