Category: بلاگ

میری عادت ہے کہ میں ہر شخص میں کوئی مثبت عادت ڈھونڈتی رہتی ہوں اسکی مثبت بات نوٹ کر لیتی ہوں اور اگر وہ مجھ میں موجود نہ ہو تو اسے اپنا لیتی ہوں کیونکہ اگر ایک انسان میں بہت ساری خوبیاں ہوتی ہیں تو وہیں اس میں چند خامیاں بھی ہوتی ہیں اور جس میں بہت ساری خامیاں ہوتی ہیں اس میں کوئی تو خوبی ہوتی ہی ہے اسلیے میں کوشش کرتی ہوں ہر انسان کی خوبی ڈھونڈوں "دنیا میں کوئی بھی فرد ایسا نہیں جسے کچھ معلوم نہ ہو اور دنیا میں کوئی ایک فرد ایسا بھی نہیں جسے سب کچھ معلوم ہو” ہمیں یہ بات سمجھ لینی چاہیے کہ ہم ہر انسان سے کچھ نہ کچھ سیکھ سکتے ہیں کیونکہ سیکھنے سکھانے کا عمل ساتھ ساتھ چلتا ہے اسلیے آپ چاہیں تو دوسروں کو سکھا بھی سکتے ہیں
اپنے قلب کو وسیع اور ذہن کو کشادہ رکھ کر ہی ہم دوسروں سے کچھ سیکھ سکتے ہیں اور یہ بھی ضروری ہے کہ ہمارے دل میں کسی کے لیے بغض اور عناد نہ رکھیں ہمیں چاہیے کہ ہم ہر انسان کو عزت کی نظر سے دیکھیں
کیونکہ جب ہم کسی کے لیے تحقیر کا جذبہ رکھتے ہیں تو ہم اس سے کچھ نہیں سیکھ سکتے کیونکہ جس نے کچھ سیکھنا ہوتا ہے تو وہ چیونٹی سے بھی سبق سیکھ لیتا ہے اور ہاری ہوئی جنگ جیت لیتا ہے
زندگی میں مشکلات اور آسانیاں کبھی یہ فیصلہ نہیں کرتیں کہ ہم کتنے ناکام ہوں گے یا کامیاب ،ہماری کامیابی یا ناکامی کا فیصلہ ہمارا ردعمل کرتا ہے اسلیے کسی مشکل یا آسانی کو ہم کبھی بھی کامیابی کی علامت نہیں کہہ سکتے نپولین کا ردعمل ہی تھا جسکی وجہ سے وہ چیونٹی سے سیکھ کر ہاری ہوئی جنگ جیت گیا۔ یہ بات بچوں کی تربیت میں شامل کریں کہ نشیب و فراز زندگی کا حصہ ہیں ہم جسطرح کے حالات سے گزرے ہیں انہیں مسائل یا وسائل کے روپ میں دیکھنا ہماری زندگی کا حصہ ہے یعنی برے حالات میں ان سے سیکھنا کہ ہم کیسے آگے بڑھ سکتے ہیں اتنی ساری حالات کی زنجیروں کے باوجود اور اچھے حالات میں آگے بڑھنا یہ بھی امتحان ہوتا ہے کہ ہم اپنی زندگی کو خود کو میسر آسودگیوں کی نظر کرنے کے بجائے ان سے بھی سیکھتے رہتے ہیں۔ اگر کوئی انسان چاہتا ہے کہ وہ مشکل حالات سے سیکھے تو اسے چاہیے کہ ان مشکل حالات کو مسئلے کی شکل نہ دے ،پریشان نہ ہو بلکہ وہ یہ سمجھے کہ یہ ایک امتحان کا مرحلہ ہے جو بہت جلد گزر جائے گا اور سب کچھ پہلے سے بھی بہتر ہو جائے گا لیکن مجھے موقع مل رہا میں ان سے کچھ سیکھوں میں آپ کو مثال دیکر سمجھاتی ہوں جو انسان حالات کی وجہ سے پیسے کی تنگی دیکھ رہا ہے اور اسکا کاروبار تباہ ہو چکا ہے تو اب وہ سیکھے گا ریسرچ کرے گا ،کتابیں پڑھے گا ،اپنا محاسبہ کرے گا اور ایک لائحہ عمل تیار کرے گا کہ اس کے پیچھے کونسی وجوہات تھیں اور دوبارہ سے وہ اپنا بزنس کیسے کھڑا کر سکتا ہے تو اس سب پہ عمل کرے گا اور جلد ہی دربارہ سے اپنے پیروں پہ کھڑا ہو جائے گا جبکہ جو انسان ہار تسلیم کرلے نہیں سیکھے گا وہ ان حالات میں جی بھی مشکل پائے گا اب کوئی انسان اس کی قدر نہیں کرتا کہ اسکا کاروبار تباہ ہو گیا ہے اور دوسری کوشش کر رہا پتہ نہیں کیا بنتا ہے اسکا اسکی کیا ویلیو ہے عین ممکن ہے کہ اسکا کاروبار بہت جلد پہلے سے بھی زیادہ ترقی کرے اور آپ اسکی ناقدری کرکے اس کے ملے تجربے سے بھی محروم ہو جائے گا
اگر آپ کو کوئی انسان اس وجہ سے ناگوار گزرے کہ اس میں کوئی خامی ہے تو اس خامی یا بری عادت کو دور کرنے کا طریقہ یہ نہیں ہے کہ آپ اسکی برائی کےبہت جگہ گُن گاتے پھریں اسکا طریقہ یہ ہے کہ آپ اسے الگ بلائیں اور انتہائی موزوں الفاظ کے ساتھ نرم لہجے میں اسے سمجھائیں کہ آپ ویسے تو اچھے ہیں لیکن تھوڑا سا یہ مسئلہ ہے اسے آپ ٹھیک کر لیں
اس طرح وہ انسان بھی آپ کے اچھے رویے سے بہت کچھ سیکھے گا اور آپ بھی انسانوں کی قدر کرکے ان سے بہت کچھ سیکھ سکیں گے
حُسنِ قدرت
Twitter: @HusnHere

ایک ایسی ہستی جنھوں نے اپنی پوری زندگی اُردو ادب کی خدمت کے لئے وقف کردی ۔آپ ایک بہترین ناول نگار ، افسانہ نگار، مضمون نگار ، کالم نگار ،شاعرہ اور مدیر ہیں۔آپ بھارت کے شہر دہلی میں22-دسمبر 1940ء میں پیدا ہوئیں ۔قیامِ پاکستان کے وقت آپ اپنے خاندان کے ہمراہ پاکستا ن آئیں ۔آپ کا اصل نام مبارک شاہی بیگم تھا۔ پاکستان میں آپ کا خاندان لائل پور(فیصل آباد) میں آکر آباد ہوا۔
آپ کا بچپن نامساعد حالات کا شکار رہا ۔جس کی وجہ سے آپ باقاعدہ سکول کی تعلیم حاصل نہ کر سکیں ۔اس کی بڑی وجہ والد کی دوسری شادی تھی ۔ آپ بے حد حساس طبیعت کی مالک ہیں ۔ اللہ تعالیٰ نے آپ کو ذہانت جیسی دولت سے نواز رکھا تھا یہی وجہ ہے کہ باقاعدہ تعلیم حاصل نہ کرنے کے باوجود آپ نے اپنی خداداد صلاحیتوں کو زنگ آلود نہیں ہونے دیا اور اپنی صلاحیتوں کو نکھارنے کے لئے کہانیاں لکھتی رہیں ۔آپ نے بہت کم عمری میں کہانیاں لکھنی شروع کر دیں تھیں ۔آپ نے جو سب سے پہلی کہانی لکھی تھی وہ اپنے ہی گھر کے متعلق لکھی تھی ۔ گھر میں کسی نے بھی آپ کی حوصلہ افزائی نہ کی مگر آپ نے چوری چھپکے اپنی کوشش جاری رکھی ۔ شادی کے بعد آپ کے خاوند اصغر مہدی نے آپ کی صلاحیتوں کو پہچانتے ہوئے باقاعدہ لکھنے کی اجازت دے دی ۔ انھی کی حوصلہ افزائی کی وجہ سے آپ نے شادی کے بعدبی -اے تک تعلیم بھی حاصل کی اور لکھنے کا شوق جاری رکھتے ہوئےدو ناول ” دِل کے رشتے“ اور ” مسافتوں کی تھکن“ لکھے ۔اس کے علاوہ سات افسانوی مجموعے بھی تحریر کئے، جن میں سے ایک پنجابی زبان میں ہے جس کا نام ”موتیے دِیاں کلیاں “ ہے۔ آپ کے اُردو افسانوی مجموعوں کے نام درج ذیل ہیں :۔

i. پت جھڑ کا آخری پتّا
ii. بیسویں صدی کی لڑکی
iii. تنہا برگد کا دکھ

iv. گد لا سمندر
v. یادوں کی طاق پہ رکھی کہانیاں
vi. کھڑکی میں بیٹھا وقت

عذرااصغرایک کامیاب کالم نگار بھی ہیں ۔آپ نے ریڈیو اور اخبارات کے لئے کالم لکھے ۔ آپ نے بنیادی طور پر معاشرتی مسائل پر کالم لکھے ۔ اس کے علاوہ سیاسی ، مذہبی اور ادبی موضوعات پر بھی کالم لکھے ۔ کالم نگاری کی کتاب”قلم پارے “ کے نام سے شائع ہو چکی ہے۔ ان کالموں کے ذریعے عذراا صغر نے معاشرے کی اصلاح وفلاح کا کام لیا ۔آپ نے ان معاشرتی مسائل کی طرف قاری کی توجہ دلائی جن کو امدادِ باہمی کے ذریعے آسانی سے حل کیا جا سکتا ہے ۔ آپ کے کالم ہر ذہنی سطح کے فرد کے لئے یکساں سود مند ہیں ۔ آپ پیچیدہ مسائل اور ان کے حل کو اتنی آسانی سے بیاں کرتی ہیں کہ پڑھنے والا متاثر ہوئے بغیر نہیں رہ سکتا۔
آپ نے بحیثیتِ مضمون نگار ادبی شخصیات پر مضامین بھی لکھے ۔ آپ کی تحریر کا یہ کمال ہے کہ اگرچہ آپ کسی شخصیت پر لکھتی ہیں مگر اسے ہدفِ تنقید نہیں بناتیں بلکہ اس شخصیت کی خامیاں اور خوبیاں اس انداز سے بیان کر دیتی ہیں کہ فریق ثانی آپ کا گرویدہ ہو جاتا ہے ۔ آپ ادبی دنیا میں نئے آنے والوں کا کھلے دِل سے خیر مقدم کرتی ہیں ان کی حوصلہ افزائی کرتی ہیں ۔ آپ نے اپنے مضامین کے ذریعے بہت سی ادبی شخصیات کو متعارف کروایا ۔ آپ ان لوگوں میں سے ہیں جو اُردو ادب کے پودے کو پھلتا پھولتا دیکھنا چاہتے ہیں ۔
آپ نے ڈرامے ، نظمیں ، ہائیکو ، ماہیے،دوہے بھی لکھے ۔آپ کا تحریر کیا ہوا ڈرامہ ”ہیڈ کوارٹر “ کے نام سے پی ٹی وی پر نشر ہوا۔اس کے علاوہ ریڈیو پر جشنِ تمثیل کے سلسلے میں لکھے جانے والے ڈرامے بھی اوّل انعام یافتہ قرار پائے ۔ آپ نے بحیثیتِ مدیر ماہنامہ”نورونار“، ”تخلیق“ اور ”تجدیدِ نَو “ کے لئے خدمات سر انجام دیں ۔ شاعری کے حوالے سے بات کی جائے تو وہ خود باقاعدہ شاعرہ نہیں کہلواتیں اس کی وجہ وہ یہ بتاتی ہیں کہ ” وہ غزل نہیں کہہ سکتیں “۔ مگر نظمیں بہت خوب لکھتی ہیں ۔اس کے علاوہ جاپانی صنفِ شاعری” ہائیکو “ میں بھی طبع آزمائی کی۔
بحیثیتِ مجموعی عذرااصغر ایک ہمہ جہت شخصیت ہیں ۔ جنھوں نے اردو ادب کی خدمتِ خاموش کے جذبے کے تحت کام کیا ۔آپ ان لوگوں میں سے ہیں جو بغیر کسی لالچ کے محنت کو اپنا شعار بناتے ہیں ۔ آپ کی ادبی خدمات کے صلے میں ہی آپ کو 2017ء میں ”تخلیق ایوارڈ “ سے نوازا گیا ۔ اگر آپ کے تخلیقی سفر کو دیکھا جائے تو آپ کا کوئی استاد نہیں۔ آپ نے حالات سے بہت کچھ سیکھا اور اسی کو اپنی تحریر کا حصہ بنایا ۔ آپ کا اسلوبِ بیاں دہلوی ہے جو اس دور میں کمیاب ہے ۔ آپ ہمار ا قومی اثاثہ ہیں ۔ ہمیں فخر ہے کہ ایسی قابل ہستی ہمیں نصیب ہوئی ۔