Category: بلاگ

جب کوفہ میں ضمیر قید ہوا اور سچائی تنہا رہ گئی.مکہ سے کربلا تک کا سفر.چار محرم 61 ہجری
تحریر: سیدریاض حسین جاذب

اسلامی تاریخ کے سب سے دردناک سانحات میں سے ایک واقعۂ کربلا محض میدانِ نینوا کا واقعہ نہیں، بلکہ اس سے قبل کے سیاسی و سماجی حالات بھی گہرے تجزیے کے متقاضی ہیں۔ چار محرم الحرام 61 ہجری کو کوفہ میں پیش آنے والے چند اہم واقعات نے تاریخ کا رخ بدل دیا اور امام حسینؑ کی تنہائی کو یقینی بنانے میں فیصلہ کن کردار ادا کیا۔ یہ دن ایک دھمکی آمیز خطبے سے شروع ہوا اور ضمیر کے قیدیوں کے زخموں پر ختم۔

کوفہ کا گورنر عبید اللہ بن زیاد، جسے یزید نے امام حسینؑ کی آمد روکنے کے لیے مقرر کیا تھا، نے اسی دن مسجدِ کوفہ میں ایسا خطبہ دیا جو جبر اور خوف کی علامت بن گیا۔ اس نے امام حسینؑ کا ساتھ دینے والوں کو قتل کی دھمکیاں دیں اور قاضی شریح کا فتویٰ سنایا، جس میں امامؑ کے خون کو مباح قرار دیا گیا۔ یہ فتویٰ اس کوشش کی علامت تھا کہ ظلم کو شرعی رنگ دے کر جائز ٹھہرایا جائے۔

ابن زیاد نے کوفہ کے تمام راستے بند کرا دیے تاکہ کوئی بھی فرد یا قافلہ امام حسینؑ کی نصرت کو نہ پہنچ سکے۔ یہ اقدام محض ایک فوجی یا سیاسی چال نہیں، بلکہ سچائی سے کوفہ کو کاٹ دینے کی شعوری سازش تھی۔ ایک طرف عوام کو دھمکایا گیا، دوسری جانب مال و منصب کا لالچ دے کر خریدنے کی کوشش کی گئی۔ یوں بہت سے لوگ خوف یا مفاد کی بنیاد پر ابن زیاد کے ساتھ جا ملے۔

جن لوگوں پر امام حسینؑ سے عقیدت یا حمایت کا شبہ تھا، انہیں قید کر دیا گیا۔ یہی قیدی بعد ازاں "توابین” کہلائے—وہ لوگ جنہیں اپنے جرمِ خاموشی پر ندامت تھی۔ ان کا ضمیر انہیں چین سے بیٹھنے نہ دیتا تھا، اور آخرکار انہوں نے توبہ کے طور پر بنو امیہ کے خلاف علمِ بغاوت بلند کیا۔

توابین نے سلیمان بن صرد خزاعی کی قیادت میں امام حسینؑ کے خون کا بدلہ لینے اور اپنی کوتاہی کا کفارہ ادا کرنے کا عزم کیا۔ انہوں نے اپنے ضمیر کی آواز پر لبیک کہا اور یزیدی حکومت کے خلاف جنگ کی، یہاں تک کہ وہ بھی میدانِ شہادت میں اتر گئے۔ ان کی تحریک اس بات کی علامت بنی کہ تاریخ خاموش تماشائیوں کو معاف نہیں کرتی۔

کوفہ کا قبیلوی نظام بھی امام حسینؑ کی تنہائی کا سبب بنا۔ بیشتر قبائل نے اپنے سرداروں کی اطاعت میں امام کا ساتھ دینے سے انکار کیا۔ سردار یا تو بنو امیہ سے قربت رکھتے تھے یا ابن زیاد کی طرف سے ملنے والے مفادات کے اسیر ہو چکے تھے۔ یوں ضمیر قبیلوی وفاداری کے نیچے دفن ہو گیا، اور عام قبائلی افراد بھی حق کا ساتھ نہ دے سکے۔

چار محرم الحرام 61 ہجری کا دن محض تاریخ کا ایک صفحہ نہیں، بلکہ امتِ مسلمہ کے لیے ایک آئینہ ہے۔ ابن زیاد کا خطبہ، قاضی شریح کا فتویٰ، اور کوفہ کی خاموشی.یہ سب مل کر امام حسینؑ کی تنہائی کا پس منظر بنے۔ مگر انہی اندھیروں میں سے "توابین” جیسی روشنی بھی نکلی، جو یاد دلاتی ہے کہ اگر ضمیر جاگ جائے تو توبہ بھی قربانی کا راستہ چن لیتی ہے۔

کربلا کا پیغام صرف ظلم کے خلاف آواز بلند کرنے تک محدود نہیں، بلکہ یہ بھی ہے کہ خاموشی بھی جرم ہے۔ اور کبھی، تاخیر سے جاگا ہوا ضمیر بھی تاریخ میں جگہ پا لیتا ہے.اگر وہ سچائی کے لیے لڑ مرنے کا حوصلہ رکھتا ہو۔

20 ننھے جنازے، کوئی قاتل نہیں؟
تحریر:ڈاکٹرغلام مصطفیٰ بڈانی
کمشنر ساہیوال نے پاکپتن کے ڈسٹرکٹ ہیڈکوارٹر ہسپتال (ڈی ایچ کیو) میں 16 سے 22 جون 2025 کے دوران 20 بچوں کی اموات کا نوٹس لے کر ایک نئی انکوائری کمیٹی تشکیل دی ہے جو ساہیوال ٹیچنگ ہسپتال کے تکنیکی عملے پر مشتمل ہے۔ یہ کمیٹی پانچ دن میں نئے سرے سے تحقیقات مکمل کر کے رپورٹ پیش کرے گی۔ ذرائع کے مطابق ان چھ دنوں میں چلڈرن وارڈ میں 20 بچوں کی اموات رپورٹ ہوئیں جن میں 15 نومولود اور 5 ایک سال سے کم عمر بچے شامل تھے۔ خاص طور پر 19 جون کو 5 بچوں کی موت ہوئی۔ والدین نے الزام لگایا کہ عملے کی غفلت، آکسیجن کی کمی اور ادویات کی عدم دستیابی نے ان معصوم جانوں کو نگل لیا۔ ایک والد نے بتایا کہ ان کے نومولود کو آکسیجن کی ضرورت تھی لیکن وارڈ میں عملہ غیر حاضر تھا اور جب ڈاکٹر آیا تو بہت دیر ہو چکی تھی۔ ایک ماں نے بیان کیا کہ ان کے بچے کو بخار کی دوا تک بروقت نہ دی گئی اور جب تک معائنہ ہوا، بچہ دم توڑ چکا تھا۔ یہ سانحہ نہ صرف پاکپتن بلکہ پورے ملک کے لیے ایک دردناک لمحہ ہے، جو نظام صحت کی زبوں حالی کو بے نقاب کرتا ہے۔

حیران کن طور پر ابتدائی سرکاری انکوائری رپورٹ نے ڈاکٹرز اور نرسز کو کسی بھی قسم کی غفلت سے بری الذمہ قرار دیا اور کوئی ذمہ دار شناخت نہ کیا۔ رپورٹ میں کہا گیا کہ عملے کی تربیت ناکافی تھی لیکن اسے جرم یا غفلت قرار نہ دیا گیا۔ اس کے بجائے صرف نچلے درجے کے ملازمین جیسے سویپرز اور وارڈ بوائز کو ہٹانے کی سفارش کی گئی۔ یہ رپورٹ انصاف کے بجائے ایک ایسی کوشش لگتی ہے جو ہسپتال کے اعلیٰ حکام اور انتظامیہ کی ناکامیوں پر پردہ ڈالتی ہے۔ اگر عملہ تربیت یافتہ نہیں تھا تو اسے حساس نیونیٹل وارڈ میں کس نے تعینات کیا؟ کیا تربیت کی کمی کو جواز بنا کر 20 بچوں کی اموات کو نظر انداز کیا جا سکتا ہے؟ کیا یہ اصل ذمہ داروں کو بچانے کی کوشش نہیں؟

پاکپتن کے ڈی ایچ کیو ہسپتال میں بنیادی طبی سہولیات جیسے آکسیجن، ادویات اور تربیت یافتہ عملے کی شدید کمی رہی۔ والدین کے مطابق وارڈ میں اکثر اوقات ڈاکٹرز غیر حاضر ہوتے تھے اور نرسز کی تعداد بھی ناکافی تھی۔بے روزگاری ،غربت اور بجلی کے بھاری بلوں کی وجہ سے سرکاری ہسپتالوں پر دباؤ بڑھ گیا۔ نجی ہسپتالوں کے اخراجات برداشت نہ کرنے کی وجہ سے غریب عوام سرکاری ہسپتالوں کا رخ کرتے ہیں، لیکن وہاں بدحالی اور سہولیات کی کمی نے صورتحال کو مزید سنگین بنا دیا۔ صحت کا شعبہ براہ راست وزیراعلیٰ پنجاب مریم نواز کے دائرہ اختیار میں آتا ہے۔ اگر سوات میں 12 افراد کے ڈوبنے پر کے پی حکومت اور وزیراعلیٰ علی امین گنڈاپورذمہ دار ہیں اور ان سے استعفےٰ کا مطالبہ جائز ہے تو پاکپتن میں 20 بچوں کی اموات پر پنجاب حکومت کی خاموشی کیوں؟کیا ان 20 معصوموں کی ہلاکت کی ذمہ دار مریم نواز نہیں ہیں ؟ کیا یہ دوہرا معیار نہیں؟

یہ سانحہ صرف ایک ہسپتال کی ناکامی نہیں بلکہ پورے نظام صحت کی زبوں حالی کا ثبوت ہے۔ اگر 20 معصوم بچوں کی اموات کے بعد بھی کوئی جوابدہ نہیں تو یہ نظام غریب کے لیے موت کا پروانہ ہے۔ ہسپتال جو زندگی کی امید ہوتے ہیں، آج پاکستان میں موت کے گہوارے بن چکے ہیں۔ کمشنر ساہیوال کی نئی انکوائری کمیٹی سے امید کی جا رہی ہے کہ وہ اس سانحے کی غیر جانبدارانہ چھان بین کرے گی ، لیکن سوال یہ ہے کہ کیا یہ کمیٹی اصل ذمہ داروں کو بے نقاب کر پائے گی؟ اس سانحے کی مکمل اور شفاف تحقیقات کے لیے ایک آزاد جوڈیشل انکوائری ناگزیر ہے۔ جنہوں نے غیر تربیت یافتہ عملے کو بھرتی کیا، جنہوں نے سہولیات کی فراہمی میں کوتاہی برتی اور جنہوں نے والدین کی چیخوں کو نظر انداز کیا، ان سب کو قانون کے کٹہرے میں لانا ہوگا۔ صرف نچلے درجے کے ملازمین کو قربانی کا بکرا بنانا انصاف نہیں بلکہ ناانصافی ہے۔

حکومت کو چاہیے کہ سرکاری ہسپتالوں میں بنیادی سہولیات کو یقینی بنایا جائے، طبی عملے کی تربیت کے لیے فوری اقدامات کیے جائیں اور ہیلتھ کارڈ جیسے پروگراموں کو بحال کیا جائے تاکہ غریب عوام کو علاج کی سہولت مل سکے۔ پاکپتن کے 20 ننھے جنازوں نے ہر پاکستانی کے ضمیر کو جھنجھوڑا ہے۔ یہ صرف ایک واقعہ نہیں بلکہ اس نظام کی عکاسی ہے جو طاقتور کو تحفظ دیتا ہے اور غریب کی جان کو معمولی سمجھتا ہے۔ کیا ہم اس نظام کو بدلنے کے لیے آواز اٹھائیں گے؟ کیا 20 معصوم جانوں کا خون رائیگاں جائے گا؟ کیا وزیراعلیٰ پنجاب اس سانحے کی ذمہ داری قبول کریں گی؟ کیا نئی انکوائری کمیٹی محض ایک رسمی کارروائی ثابت ہوگی یا انصاف کی طرف پہلا قدم؟ کیا ہمارے ہسپتال کبھی زندگی کی امید بن پائیں گے یا موت کے گہوارے ہی رہیں گے؟ یہ چبھتے سوالات ہر پاکستانی کے ذہن میں گونج رہے ہیں اور ان کے جوابات ہی ہمارے معاشرے کے مستقبل کا تعین کریں گے۔

فرات پر پہرہ اور امام کا عزم:مکہ سے کربلا تک کا سفر ،3 محرم
تحریر:سید ریاض حسین جاذب
محرم الحرام کی ہر تاریخ اپنے دامن میں قربانی، صبر، اور بیداری کا پیغام لیے ہوئے ہے، مگر جب ہم تین محرم کی تاریخ پر نگاہ ڈالتے ہیں تو کربلا کی سرزمین پر جاری ظلم و ستم اور امام حسینؑ کی استقامت ہمیں بے اختیار رُلا دیتی ہے۔
یہ وہ دن ہے، جب امام عالی مقامؑ، ان کے اہلِ بیتؑ اور وفادار اصحاب کو عملی طور پر دریائے فرات سے محروم کر دیا گیا اور مظالم کے پہاڑ توڑے جانے لگے۔

امام حسینؑ کا قافلہ مکہ سے روانہ ہوا تو ان کا مقصد واضح تھا: یزید کی بیعت سے انکار، دینِ محمدی ﷺ کی بقا اور امت کو خوابِ غفلت سے جگانا۔
یہ سفر اقتدار یا حکومت کے لیے نہیں بلکہ حق و صداقت کے لیے تھا۔ امامؑ کے ہمراہ اہلِ بیت کے علاوہ وہ جانثار اصحاب بھی تھے جو صبر، وفا، اور قربانی کا استعارہ بنے۔

تاریخی روایات بتاتی ہیں کہ قافلے کے ہمراہ دو سو سے زائد اونٹوں پر صرف پانی کے مشکیزے لادے گئے تھے تاکہ راستے میں قافلے کے افراد، دیگر مسافروں، جانوروں اور یہاں تک کہ دشمنوں کی پیاس بھی بجھائی جا سکے۔جب حر بن یزید کا لشکر قافلے کے قریب پہنچا تو امام حسینؑ نے نہ صرف انہیں پانی پلایا بلکہ ان کے جانوروں کو بھی سیراب کیا۔ یہ عمل امام کی اعلیٰ ظرفی اور انسان دوستی کو تاریخ میں امر کر گیا۔

افسوس! تین محرم کو وہی امامؑ، جو دشمنوں کو بھی پانی پلاتے تھے، خود اور ان کا قافلہ فرات کے کنارے ہوتے ہوئے بھی پیاسا کر دیا گیا۔
یزیدی لشکر نے دریا پر پہرہ بٹھا دیا تاکہ امامؑ کے خیموں تک ایک قطرہ بھی نہ پہنچ سکے۔
خیموں میں بچوں کی سسکیاں، عورتوں کی بے قراری اور پیاس کی شدت نے قیامت کا منظر پیدا کر دیا، مگر امامؑ نے صبر کا دامن نہ چھوڑا۔

اسی کٹھن گھڑی میں امام حسینؑ نے حضرت زینبؑ کے ہمراہ اپنے دیرینہ دوست اور صحابیٔ رسول ﷺ، حبیب بن مظاہر کو خط لکھا۔
خط کا مضمون سادہ مگر پراثر تھا:

"اے حبیب! میں کربلا میں ہوں، میرا ساتھ دو۔”

حبیب نے خط پڑھتے ہی اپنے قبیلے اور اہلِ خانہ کو چھوڑا اور فوراً امامؑ کی مدد کو روانہ ہو گئے۔
یہ واقعہ امام حسینؑ کی حکمت، روابط اور اعتماد کا مظہر ہے، اور حضرت زینبؑ کی شراکت نے اس لمحے کو روحانی عظمت عطا کی۔

اسی روز امام حسینؑ نے اپنے اصحاب سے فرمایا:
"رات کی تاریکی ہے، تم جا سکتے ہو۔ دشمن صرف مجھے چاہتا ہے، تم پر کوئی جبر نہیں۔”

مگر تمام جانثاروں نے یک زبان ہو کر کہا:

"ہم آپ کو کیسے چھوڑ سکتے ہیں؟ ہم نے آپ کے ساتھ جینا ہے اور آپ کے ساتھ مرنا ہے۔”

یہی وہ لمحہ تھا جب وفا اپنی انتہا کو پہنچ گئی۔
تین محرم ہمیں یہ سکھاتا ہے کہ سچائی، صبر اور استقامت کی راہ پر چلتے ہوئے پیاس، تکلیف اور قربانی بھی سر بلندی کا باعث بنتی ہے۔

امام حسینؑ نے فرمایا:

"ہم نہ بیعت کریں گے، نہ ظلم تسلیم کریں گے۔ پیاسا مرنا قبول ہے، مگر ذلت کی زندگی ہرگز نہیں۔”

یہ دن ہمیں یاد دلاتا ہے کہ باطل کے سامنے جھکنا مومن کا شیوہ نہیں۔
حق پر قائم رہنا مشکل ضرور ہے، مگر یہی قربانی تاریخ میں زندہ رہتی ہے۔

آج جب دنیا ظلم و ناانصافی سے بھری ہوئی ہے، تو تین محرم ہمیں حسینؑ کے راستے کی یاد دلاتی ہے — وہ راستہ جو صبر، قربانی، حق گوئی اور مظلوم کے ساتھ کھڑے ہونے کا راستہ ہے۔

سانحہ سوات: سیاح بہہ گئے، تبدیلی رہ گئی
تحریر: ڈاکٹر غلام مصطفےٰ بڈانی
26 جون 2025 کو دریائے سوات کے کنارے ایک دلخراش سانحہ پیش آیا جب سیالکوٹ سے آئے ایک خاندان سمیت 17 سیاح اچانک آنے والے سیلابی ریلے میں بہہ گئے۔ 11 افراد کی لاشیں نکال لی گئیں، 4 کو بچایا گیا جبکہ 2 کی تلاش جاری ہے۔ یہ واقعہ محض ایک قدرتی آفت نہیں بلکہ خیبر پختونخوا میں پاکستان تحریک انصاف (پی ٹی آئی) کی 12 سالہ حکمرانی کی انتظامی ناکامی کا عکاس ہے۔ پی ٹی آئی نے "تبدیلی” کا نعرہ لگایا لیکن سوات کا یہ المناک سانحہ بتاتا ہے کہ سیاحوں کی حفاظت، ہنگامی صورتحال سے نمٹنے اور عوامی فلاح کے وعدے محض کاغذی نعروں تک محدود رہے۔

خیبر پختونخوا سیاحت کا گہوارہ ہے، جہاں سوات اور چترال جیسے دلکش مقامات لاکھوں سیاحوں کو کھینچتے ہیں۔ پی ٹی آئی نے 2013 سے اپنی حکمرانی میں سیاحت کے فروغ کے بلند بانگ دعوے کیے مگر زمینی حقائق اس کے برعکس ہیں۔ دریائے سوات کے کنارے غیر قانونی تجاوزات اور غیر محفوظ ناشتہ پوائنٹ اس بات کی گواہی دیتے ہیں کہ سیاحت کے بنیادی ڈھانچے کی بہتری کے لیے کوئی ٹھوس منصوبہ بندی نہیں کی گئی۔ 2 جون سے دفعہ 144 کے تحت دریا کے کنارے جانے پر پابندی تھی، لیکن نہ سیاحوں کو روکا گیا اور نہ ہی انتظامیہ نے اس پابندی کو نافذ کیا۔ انتباہی بورڈ تو لگے تھے مگر پولیس اور مقامی انتظامیہ کی غیر فعالیت نے انہیں بے اثر کر دیا۔ محکمہ موسمیات کی یکم جولائی تک موسلادھار بارشوں کی پیشگوئی کے باوجود سیلاب کی پیشگی اطلاع کا نظام یا موسمیاتی خطرات کے انتظام کا کوئی موثر طریقہ موجود نہ تھا، جس نے اس سانحے کی شدت کو بڑھایا۔

ریسکیو 1122 اور صوبائی ڈیزاسٹر مینجمنٹ اتھارٹی (پی ڈی ایم اے) ہنگامی حالات سے نمٹنے کے کلیدی ادارے ہیں لیکن ان کی کارکردگی اس سانحے میں شرمناک حد تک ناکافی رہی۔ متاثرین نے بتایا کہ ریسکیو 1122 کی ٹیمیں بروقت نہ پہنچیں اور نہ ہی ان کے پاس ضروری سازوسامان جیسے کشتیاں یا جال تھے۔ مردان کے روح الامین جو خود توبچ گیا لیکن انہوں نے اپنی بیٹی اور کزن کو اس سانحے میں کھو دیا، نے کہا کہ ریسکیو ٹیمیں موقع پر پہنچیں لیکن کوئی مدد نہ کر سکیں۔ پی ڈی ایم اے نے خوازہ خیلہ میں پانی کی بلند سطح پر ہائی الرٹ جاری کیا، لیکن پیشگی اقدامات نہ ہونے کے برابر تھے۔ 120 سے زائد ریسکیو اہلکار تعینات تھے مگر خراب موسم اور پانی کے تیز بہاؤ نے امدادی کارروائیوں کو معطل کر دیا، جس کے باعث پاک فوج کو طلب کرنا پڑا۔ یہ صورتحال صوبائی اداروں کی محدود صلاحیت اورناکامی کو بے نقاب کرتی ہے۔

سانحے کے بعد وزیراعلیٰ علی امین گنڈاپور نے ایڈیشنل ڈپٹی کمشنر سمیت چار افسران کو معطل کر کے تفتیشی کمیٹی بنائی، لیکن کیا صرف نچلے درجے کے افسران کو قربانی کا بکرا بنانا کافی ہے؟ صوبے کے چیف ایگزیکٹو ہوتے ہوئے کیا علی امین گنڈاپور پر کوئی ذمہ داری عائد نہیں ہوتی؟ اس سانحے نے 11 قیمتی جانیں چھین لیں، جن میں ایک ہی خاندان کے 10 افراد شامل تھے۔ کیا ان اموات کی ذمہ داری وزیراعلیٰ پر نہیں آتی؟ عوامی حلقوں میں یہ سوال گونج رہا ہے کہ صوبائی قیادت نے سیاحوں کی حفاظت کے لیے بنیادی ڈھانچہ کیوں نہ بنایا؟ کیا وفاقی حکومت اس سانحے پر نوٹس لے کر گنڈاپور کی لاپرواہی اور غفلت کے باعث ہونے والے اس ناقابل تلافی نقصان پر انہیں ذمہ دار ٹھہرائے گی؟ پولیس کی تاخیر، غیر قانونی تجاوزات کی روک تھام میں ناکامی اور ہوٹل مالکان کی لاپروائی اس بات کی نشاندہی کرتی ہے کہ انتظامیہ نے اپنی ذمہ داری ادا نہیں کی۔ وزیراعلیٰ نے افسوس کا اظہار کیا، لیکن نہ وہ جاں بحق ہونے والوں کے جنازوں میں شریک ہوئے اور نہ ہی ورثاء سے ملے۔ یہ رویہ ظاہر کرتا ہے کہ صوبائی قیادت کی ترجیحات عوامی مسائل سے زیادہ سیاسی مفادات ہیں۔ عوام پوچھ رہے ہیں کہ کیا پی ٹی آئی کی قیادت صرف احتجاج اور سیاسی مہمات تک محدود ہو کر رہ گئی ہے؟

پی ٹی آئی کی 12 سالہ حکمرانی میں نہ صرف سیاحت بلکہ بنیادی ڈھانچے، صحت اور تعلیم کے شعبوں میں بھی کوئی خاطر خواہ پیش رفت نہ ہوئی۔ صوبے کی سڑکیں، ہسپتالوں کی ناقص سہولیات اور تعلیمی اداروں کی بدحالی اس بات کی گواہی دیتی ہیں کہ "تبدیلی” صرف نعروں کی زینت رہی۔ معاشی اعدادوشمار بتاتے ہیں کہ خیبر پختونخوا میں غربت اور بے روزگاری کی شرح میں کوئی خاص کمی نہ آئی۔ سوات جیسے سیاحتی مقامات پر ہسپتالوں کی خراب حالت اور ایمرجنسی سہولیات کی کمی نے اس سانحے کے اثرات کو اور سنگین کر دیا۔ عوام سوال اٹھاتے ہیں کہ کیا پی ٹی آئی نے صوبے کے وسائل کو عوامی فلاح کے بجائے سیاسی مقاصد کے لیے استعمال کیا؟

دریائے سوات کا سانحہ ایک دردناک آئینہ ہے جو خیبر پختونخوا کی صوبائی حکومت کی ناکامیوں کو عیاں کرتا ہے۔ سیاح بہہ گئے، لیکن تبدیلی کہیں پیچھے رہ گئی۔ کیا صوبائی حکومت اس سانحے سے کوئی سبق سیکھے گی؟ کیا سیاحوں کی جانوں کی حفاظت کے لیے سیلاب کی پیشگی اطلاع کا نظام اور موثر ہنگامی خدمات قائم ہوں گی؟ کیا وزیراعلیٰ علی امین گنڈاپور اپنی توجہ سیاسی مہمات سے ہٹا کر عوام کے دکھوں کی طرف موڑیں گے؟ کیا پی ٹی آئی اپنے "تبدیلی” کے وعدوں کو عملی جامہ پہنائے گی یا یہ سانحہ بھی ایک اور فراموش شدہ خبر بن کر رہ جائے گا؟ جب ایک ہی خاندان کے 10 افراد اپنی جانوں سے ہاتھ دھو بیٹھے، کیا صوبائی قیادت کے ضمیر کو کوئی جھٹکا بھی لگا؟ یہ سوالات خیبر پختونخوا کے ہر شہری کے دل میں گونج رہے ہیں اور ان کے جوابات کا انتظار سوات کے کنارے بہہ جانے والے معصوم سیاحوں کے لواحقین کی چیخیں مانگ رہی ہیں۔ کیا صوبائی حکومت ان چیخوں کو سن پائے گی یا یہ خاموشی بدستور ان کی ترجیحات کو بیان کرتی رہے گی؟

سکوٹیاں اور ٹریفک پولیس
تحریر: ملک ظفر اقبال بھوہڑ
یہ کالم سکوٹی استعمال کرنے والے بچوں اور خواتین میں ٹریفک قوانین کی آگاہی کی کمی اور حکومتی غفلت کو اجاگر کرتا ہے۔ مصنف نے اس بات پر زور دیا ہے کہ سکوٹی کی تقسیم سے پہلے تربیت اور لائسنس کا باقاعدہ نظام ہونا چاہیے تھا، تاکہ بڑھتے ہوئے حادثات کی روک تھام کی جا سکے۔ ٹریفک پولیس اور متعلقہ اداروں کی فوری توجہ اس اہم مسئلے کی ضرورت ہے۔

پاکستانی معاشرہ پہلے ہی بے راہ روی کا شکار ہے۔ سگنل توڑنا، بغیر کٹ کے گاڑی موڑ لینا اور دورانِ سفر اشارہ نہ دینا، ہماری روزمرہ ترجیحات میں شامل ہو چکا ہے۔ ہمارے معاشرے میں مثبت پہلو کم جبکہ منفی کرداروں کی کوئی کمی نہیں۔

ان ہی حالات میں آج کل گورنمنٹ کی سطح پر سکوٹیاں تقسیم کی جا رہی ہیں، جبکہ پرائیویٹ سیکٹر میں بھی عورتیں اور بچے ان کے خریدار بن رہے ہیں۔ تاہم، سکوٹیاں تو فراہم کی جا رہی ہیں لیکن انہیں چلانے والے بچوں اور خواتین کے لیے کسی قسم کے مناسب حفاظتی یا تربیتی اقدامات نہیں کیے گئے۔

ہم نے ہمیشہ عوامی منصوبوں کو بغیر کسی منظم منصوبہ بندی یا حکمت عملی کے نافذ کرنے کی کوشش کی ہے، جس کا نتیجہ منفی اثرات کی صورت میں سامنے آیا ہے۔ یہی حال سکوٹی چلانے والوں کا ہے۔ شہروں اور گردونواح میں حادثات کی بڑی وجہ یہی ہے کہ بچوں اور خواتین کو ٹریفک قوانین اور ڈرائیونگ اصولوں سے آگاہی حاصل نہیں۔ نہ لائسنس، نہ تربیت اور نتیجتاً حادثات معمول بنتے جا رہے ہیں۔

ضرورت اس امر کی ہے کہ ضلعی سطح پر ان بچوں اور خواتین کی باقاعدہ تربیت اور آگاہی کے لیے پروگرامز ترتیب دیے جائیں، تاکہ حادثات میں کمی لائی جا سکے اور یہ عمل سست روی کا شکار نہ ہو۔

کاش سکوٹیاں تقسیم کرنے سے قبل ٹریننگ سیشنز کا اہتمام کیا جاتا اور باقاعدہ لائسنس جاری کیے جاتے۔ نرمی اختیار کی جا سکتی تھی، لیکن مکمل غفلت اختیار کرنا موجودہ حالات میں شدید نقصان دہ ہے۔ مگر افسوس، حالات اس کے بالکل برعکس دکھائی دیتے ہیں ، وجہ وہی پرانی: ڈنگ ٹپاؤ پالیسی۔ سوال یہ ہے کہ یہ سلسلہ آخر کب تک جاری رہے گا؟

آئی جی پنجاب ٹریفک پولیس کو موجودہ صورتحال کے پیش نظر اس جانب فوری توجہ دینی چاہیے۔ یقیناً وہ ایسا کریں گے۔ ممکن ہے کسی مصروفیت یا لاعلمی کے باعث تاحال اس مسئلے پر توجہ نہ دی جا سکی ہو، لیکن ہمیں امید کا دامن کبھی نہیں چھوڑنا چاہیے۔

کربلا: جہاں قافلۂ حق نے قیام کیا.مکہ سے کربلا تک سفر: 2 محرم
تحریر:سید ریاض حسین جاذب
بعض سرزمینیں صرف مٹی کی چادر اوڑھے ویران نہیں ہوتیں، وہ وقت کے سینے میں دفن صداؤں کی گونج رکھتی ہیں۔ کربلا بھی ایسی ہی ایک سرزمین ہے: خاموش، مگر سچ بولتی ہوئی۔ یہ وہ مقام ہے جہاں تاریخ، تقدیر اور قربانی ایک دوسرے سے آ ملے۔

جب امام حسینؑ کا قافلہ صحرا کی تپتی وسعتوں کو عبور کرتا ہوا فرات کے قریب پہنچا، تو حر بن یزید ریاحی نے مؤدب ہو کر عرض کی:
"مولا! یہاں قیام کیجیے، فرات قریب ہے، پانی میسر ہے، زمین ہموار ہے۔”

امام حسینؑ نے ایک لمحے کو قدم روکے، زمین کی طرف دیکھا، پھر سوال کیا:
"اس جگہ کا نام کیا ہے؟”
جواب ملا: "یہ کربلا ہے۔”

نام سنتے ہی امامؑ کے چہرے کا رنگ بدل گیا۔ گہری خاموشی چھا گئی۔ ایک آہ، جو صدیوں کے دکھ میں لپٹی ہوئی تھی، سینے سے نکلی۔ امامؑ نے فرمایا:
"یہ کرب (غم) اور بلا (مصیبت) کا مقام ہے۔”

یہ نام فقط ایک جغرافیائی پہچان نہ تھا۔ یہی وہ مقام تھا جہاں حضرت علی صفین جاتے ہوئے ٹھہرے تھے، اور پوچھا تھا:
"یہ جگہ کون سی ہے؟”
جب نام سنا، تو فرمایا:
"یہی وہ سرزمین ہے جہاں ان کا خون بہے گا، جہاں خاندانِ محمدؐ کا قافلہ اترے گا۔”

اب وہ لمحہ آ چکا تھا۔ قافلہ اتر گیا، ساز و سامان کھولا گیا، خیمے نصب ہوئے۔ لیکن امامؑ کا دل اضطراب سے بھرا ہوا تھا۔ یہ دو محرم 61 ہجری کا دن تھا۔

امام حسینؑ نے اپنے اہلِ خاندان کو جمع کیا۔ بیٹے، بھتیجے، بھائی، بھانجے سب سامنے موجود تھے۔ ایک نظر سب پر ڈالی، وہ نگاہ جو محبت سے لبریز اور آگاہی سے پر تھی۔ پھر آپؑ کی آنکھیں نم ہو گئیں اور امامؑ نے آسمان کی طرف رخ کر کے وہ دعا مانگی جو رہتی دنیا تک مظلوموں کی زبان بن گئی:

"اللهم انا عترة نبيك محمد، وقد اخرجنا وطردنا، وازعجنا عن حرم جدنا، وتعدت بنو امية علينا، اللهم فخذ لنا بحقنا، وانصرنا على القوم الظالمين”

"اے اللہ! ہم تیرے نبیؐ کا خاندان ہیں، ہمیں ہمارے وطن سے نکالا گیا، ہمیں حرمِ نبویؐ سے ہراساں اور بے دخل کیا گیا، اور بنو امیہ نے ہم پر ظلم ڈھائے؛ اے اللہ! ان سے ہمارا حق لے لے اور ہمیں ان ظالموں پر نصرت عطا فرما!”

یہ صرف ایک ذاتی فریاد نہ تھی، بلکہ ظلم کے خلاف کھڑے ہونے والے ہر حریت پسند کی زبان تھی۔ یہ پکار تھی ہر اس دل کی جو اقتدار کے ایوانوں میں بند سچائی کو آزاد دیکھنا چاہتا ہے۔

اسی لمحے امامؑ نے اپنے باوفا ساتھیوں کی طرف رخ کیا اور وہ جملہ کہا جو صدیوں سے اہلِ حق کے لیے آئینہ اور اہلِ دنیا کے لیے تنبیہ ہے:

"الناس عبيد الدنيا، والدين لعق على السنتهم، يحوطونه ما درت معايشهم، فإذا محصوا بالبلاء قل الديانون”
"لوگ دنیا کے غلام ہیں، دین صرف ان کی زبانوں پر ہے، جب تک ان کے مفادات محفوظ رہیں، دین کے پیچھے کھڑے ہوتے ہیں؛ لیکن جب آزمائش آتی ہے تو سچے دیندار بہت کم رہ جاتے ہیں۔”

یہ ہے کربلا کی روح ، حق کی وہ کسوٹی جو ہر دور کے باطن کو بے نقاب کرتی ہے۔

امام حسینؑ نے صرف روحانی تیاری پر اکتفا نہ کیا بلکہ عمل کے میدان میں بھی قدم رکھا۔ آپؑ نے کربلا کی زمین کو نینوی اور غاضریہ کے باشندوں سے چھے ہزار درہم میں خریدا اور شرط رکھی کہ وہ آپ کی قبر کی طرف آنے والوں کی رہنمائی کریں گے اور کم از کم تین دن تک ان کی مہمانی کریں گے۔

اس عمل نے یہ طے کر دیا کہ کربلا صرف ایک معرکہ نہیں، بلکہ یاد، شعور، زیارت، اور بیداری کا مرکز ہے۔ ایک سوال آج بھی زندہ ہے: کربلا آج بھی ہمیں بلاتی ہے۔

پوچھتی ہے کہ:
کیا تم دین کو زبان تک محدود رکھتے ہو؟ یا بلاء کی گھڑی میں بھی حسینؑ کے قافلے میں شامل ہو سکتے ہو؟

یہ محض ایک تاریخی واقعہ نہیں ، یہ ایک جاری سوال ہے، جو ہر دل کے دروازے پر دستک دیتا ہے:

حق کے ساتھ ہو؟ یا خاموش تماشائی؟