Category: بلاگ

سمت کی تلاش. مگر کب تک؟
تحریر: ملک ظفر اقبال بھوہڑ
پاکستان کی 75 سالہ تاریخ اگر کسی ایک مقام پر کھڑی دکھائی دیتی ہے تو وہ ہے "چوراہا”ایک ایسا چوراہا جہاں سے کئی راستے نکلتے ہیں، مگر ہم نہ کبھی سمت کا تعین کر پائے، نہ منزل کی طرف بڑھ سکے۔ ہر چند سال بعد ایک نیا نعرہ، نیا خواب، نئی امید اور پھر وہی پرانا دھوکہ۔ ہم بطور قوم ہر دور میں چوراہے پر ہی کھڑے رہے جمہوریت ہو یا آمریت، سیکولرزم ہو یا مذہبی سیاست، معیشت ہو یا نظریاتی شناخت،ہر موڑ پر سوال وہی رہا: اب کیا ہوگا؟ مگر ہم نے کبھی یہ نہیں پوچھا کہ بار بار ایسا کیوں ہو رہا ہے؟

ہماری سب سے بڑی ناکامی یہ نہیں کہ ہم منزل تک نہیں پہنچے، بلکہ یہ ہے کہ ہمیں کبھی یہ معلوم ہی نہیں رہا کہ منزل ہے کیا؟ تعلیمی پالیسی ہو یا خارجہ حکمتِ عملی، صنعتی وژن ہو یا زرعی منصوبہ بندی،ہماری تمام پالیسیاں وقتی، سطحی اور سیاسی فائدے کے تابع رہی ہیں۔ ہر نئی حکومت پرانی پالیسیوں کو لپیٹ کر نئی زبان میں پیک کر دیتی ہے، مگر عملی میدان میں صفر۔ وژن 2025 ہو یا وژن 2030، یہ سب خواب کاغذوں پر تو خوبصورت لگتے ہیں مگر ان پر عملدرآمد کی نیت کہیں نظر نہیں آتی۔

ملک میں ترقی کے دعوے تو ہوتے ہیں مگر یہ صرف رپورٹوں اور پریس کانفرنسز کی زینت بنتے ہیں۔ حقیقت میں ہم آج بھی صاف پانی، بنیادی تعلیم، صحت، بجلی اور گیس جیسے بنیادی مسائل میں الجھے ہوئے ہیں۔ کسان زبوں حالی کا شکار ہے، نوجوان بے روزگار ہیں اور متوسط طبقہ مہنگائی کی چکی میں پس رہا ہے۔ مگر سیاست دانوں کے پاس ہر بار ایک نیا بیانیہ، ایک نیا خواب ضرور ہوتا ہےجس کا اختتام صرف نعروں، ٹوئٹس اور اشتہارات پر ہوتا ہے۔

ہر آنے والا حکمران "نیا پاکستان”، "ریاست مدینہ” یا "ترقی کے سنہرے دور” کے نعرے لے کر آتا ہے، مگر یہ نعرے صرف ماضی کے خوابوں کی طرح دم توڑ دیتے ہیں۔ اصل قیادت وہ ہوتی ہے جو سمت کا تعین کرے، ادارے مضبوط بنائے، طویل المدتی منصوبہ بندی کرے،نہ کہ صرف تقاریر اور تصویری مہمات پر گزارا کرے۔

یہ کہنا بھی درست ہے کہ صرف حکمران طبقہ ہی نہیں بلکہ ہم عوام بھی برابر کے ذمہ دار ہیں۔ ہم ووٹ جذبات کی بنیاد پر دیتے ہیں، فیصلے سوشل میڈیا کی افواہوں سے کرتے ہیں اور جب نتائج برآمد ہوتے ہیں تو شکوہ کرنے لگتے ہیں۔ ہم نے کبھی سنجیدہ اجتماعی سوچ کو فروغ نہیں دیا، نہ ہی طویل المدتی استحکام کو ترجیح دی۔

کب تک؟
یہ سوال اب صبر کا نہیں، بیداری کا ہے:
ہم کب تک غیر یقینی صورتحال میں زندگی گزارتے رہیں گے؟
کب ہم بحیثیت قوم اپنی سمت کا تعین کریں گے؟
کب ہم اجتماعی روڈ میپ تشکیل دیں گے؟
کب ہم نعرے بازی سے نکل کر منصوبہ بندی، ادارہ سازی اور قانون کی حکمرانی کو اپنا شعار بنائیں گے؟

اب بھی وقت ہے…
اگر ہم نے اب بھی ہوش کے ناخن نہ لیے تو وقت کا بہاؤ ہمیں پیچھے چھوڑ دے گا۔ دنیا آگے بڑھ چکی ہے، ہم اب بھی اسی چوراہے پر کھڑے ہیں۔ ہمیں فیصلہ کرنا ہوگا، اپنی منزل خود متعین کرنا ہوگا۔ وگرنہ ہم اپنی آنے والی نسلوں کو صرف سوالات، خالی وعدے اور مایوسیوں کا ورثہ دے کر جائیں گے۔

مگر… کب تک؟

اوکاڑہ: جنگلات کی بربادی ، قدرتی خزانے کے ضیاع کی داستان
تحریر: ملک ظفر اقبال بھوہڑ
ہم بحیثیت قوم وقت کا ضیاع اور وسائل کا صحیح استعمال نہ کرنا ہماری رگوں میں خون کی طرح شامل ہے۔ سرکاری اداروں کے ساتھ پبلک ریلیشن شپ نہ ہونے کی وجہ سے آج ہماری قوم نہ صرف مقروض ہے بلکہ آنے والی نسلیں بھی مقروض پیدا ہوتی رہیں گی۔

آج ہم آپ کو اوکاڑہ کی سطح پر وسائل ہونے کے باوجود منصوبہ بندی نہ کرنے کے حوالہ سے محکمہ جنگلات پر بات چیت کرتے ہوئے یہ بتائیں گے کہ کس طرح ہم درختوں کے حوالہ سے فوائد حاصل کرنے سے قاصر ہیں۔ ضلع اوکاڑہ قدرتی وسائل سے مالا مال خطہ ہے۔ زرخیز زمین، وسیع نہری نظام، سازگار موسمی حالات اور بہترین آبی وسائل اس بات کے گواہ ہیں کہ یہاں جنگلات کے فروغ کی بے پناہ گنجائش موجود ہے، مگر افسوس کہ نہ حکومتی سطح پر سنجیدگی دکھائی گئی اور نہ ہی عوامی سطح پر شعور پیدا کیا جا سکا۔

آج دنیا بھر میں ماحولیاتی تبدیلیاں تشویشناک حد تک بڑھ چکی ہیں۔ درخت اور جنگلات ہی وہ قدرتی ذریعہ ہیں جو کاربن ڈائی آکسائیڈ جذب کر کے ماحول کو متوازن رکھتے ہیں، زمین کو بنجر ہونے سے بچاتے ہیں اور ہزاروں مخلوقات کے لیے مسکن مہیا کرتے ہیں۔ لیکن بدقسمتی سے اوکاڑہ جیسے زرعی ضلع میں جنگلات کے فروغ کو کبھی حکومتی ترجیحات میں شامل نہیں کیا گیا۔

سال 2019/20 میں محکمہ جنگلات کی جانب سے اوکاڑہ میں ایک نئی امید کا چراغ روشن ہوا۔ اس وقت کے ایس ڈی او افتخار احمد جنجوعہ کی قیادت میں نہروں اور راجباہوں کے کناروں پر درخت لگانے کا ایک شاندار منصوبہ شروع ہوا۔ ان کی ٹیم نے لاکھوں درخت لگائے۔ یہ نہ صرف محکمانہ کارکردگی کی ایک مثال تھی بلکہ ایک عزم اور جذبے کی داستان بھی تھی۔ افتخار احمد جنجوعہ اور ان کی ٹیم کو بجا طور پر خراجِ تحسین پیش کیا جانا چاہیے کہ انہوں نے نہ صرف منصوبے کو عملی جامہ پہنایا بلکہ ایک نئی راہ بھی دکھائی۔

مگر بدقسمتی سے افتخار احمد جنجوعہ کی ٹرانسفر کے بعد یہ منصوبہ بھی روایتی بدانتظامی اور کرپشن کی نذر ہو گیا۔ نہ صرف نئے درخت لگانے کا عمل رک گیا بلکہ پہلے سے لگے درختوں کی دیکھ بھال بھی چھوڑ دی گئی۔ نتیجتاً مقامی بااثر افراد اور زمینداروں نے محکمانہ ملی بھگت سے اربوں روپے مالیت کے درخت چوری کر کے سرکاری خزانے کو نقصان پہنچایا۔

تحصیل دیپالپور کے مقام پپلی پہاڑ پر جنگلات کی کٹائی آج بھی جاری ہے۔ سرکاری اہلکاروں کی چشم پوشی اور بدعنوان عناصر کی سرپرستی میں سرسبز درخت کاٹے جا رہے ہیں۔ یہ قومی اثاثہ ضائع ہو رہا ہے اور کوئی پوچھنے والا نہیں۔

حیران کن بات یہ ہے کہ اوکاڑہ میں وسیع نہریں، راجباہ اور کھالوں کا جال موجود ہے، جو سارا سال پانی مہیا کرتے ہیں۔ پانی کی دستیابی کے باوجود درخت لگانا حکومتی ترجیحات میں شامل نہیں۔ یہ وہ قیمتی سرمایہ ہے جسے درست منصوبہ بندی اور نیک نیتی سے بروئے کار لایا جائے تو اوکاڑہ پورے پنجاب میں جنگلات کا ماڈل ضلع بن سکتا ہے۔

اگر حکومت سنجیدہ ہے تو فوری طور پر درج ذیل اقدامات کرنے ہوں گے:

* درختوں کی چوری میں ملوث عناصر کے خلاف سخت قانونی کارروائی کی جائے۔
* محکمہ جنگلات کو فعال کیا جائے اور مستقل نگرانی کے نظام کو بہتر بنایا جائے۔
* سرمایہ کاروں کو سہولیات دے کر جنگلات کے فروغ میں شریک کیا جائے۔
* عوام میں درختوں اور جنگلات کی اہمیت پر شعور اجاگر کیا جائے۔
* مقامی نوجوانوں کو جنگلات کی حفاظت اور نگہداشت کے لیے بھرتی کیا جائے تاکہ غربت اور بے روزگاری میں کمی آئے۔

اوکاڑہ میں جنگلات کی بربادی صرف سرکاری نااہلی کی ایک مثال نہیں بلکہ آنے والی نسلوں کے مستقبل سے کھلواڑ ہے۔ افتخار احمد جنجوعہ جیسے دیانتدار اور فرض شناس افسران کی محنت اور لگن ضائع نہ ہونے دی جائے۔

وقت کا تقاضا ہے کہ جنگلات کے فروغ کو صرف ماحولیاتی ضرورت نہیں بلکہ معاشی استحکام کے مضبوط ستون کے طور پر لیا جائے۔ اگر ہم نے آج بھی آنکھیں نہ کھولیں تو کل ہمیں اس کی بھاری قیمت چکانی پڑے گی۔

عوامی آگاہی کے لیے آج ہی اپنا کام شروع کرنا ہوگا۔ ہر پڑھے لکھے شخص کا یہ قومی فریضہ ہونا چاہئے کہ وہ درخت لگانے کی مہم میں صدقہ جاریہ سمجھ کر شامل ہو اور لوگوں کو آگاہ کرے کہ درخت کتنے ضروری ہیں۔

برسات کا موسم جولائی میں شروع ہو جاتا ہے، جو کہ درخت لگانے کا ایک اچھا موسم ہوتا ہے۔ اس کے علاوہ فروری مارچ بھی درخت لگانے کا اچھا موسم ہے۔ علاقائی آب و ہوا میں پلنے والے درخت لگانے چاہئیں۔ اوکاڑہ میں نیم، پیپل، بکین، شریں، جامن، بیری، شیشم، کیکر، آم، لسوڈا اور اس طرح کے کئی ایک درخت لگائے جا سکتے ہیں۔

سگریٹ اور تمباکو پر ٹیکس لگے گا تو غریب عوام کی پہنچ سے دور ہو گا
تحریر: راحین راجپوت
دنیا بھر میں تمباکو نوشی کو ایک مہلک عادت تسلیم کیا جاتا ہے، جس کے اثرات نہ صرف صحت بلکہ معیشت پر بھی پڑتے ہیں۔ ترقی یافتہ اور ترقی پذیر ممالک دونوں میں حکومتیں تمباکو مصنوعات پر بھاری ٹیکس لگا کر اس کے استعمال کو کم کرنے کی کوشش کرتی ہیں۔

پاکستان جیسے ملک میں جہاں غربت کی شرح بلند ہے اور صحت کی سہولیات محدود ہیں، وہاں سگریٹ اور تمباکو پر ٹیکس لگانے کی حکومتی پالیسی نہ صرف صحت عامہ کے حوالے سے اہم ہے بلکہ یہ غریب طبقے کی مالی حالت پر بھی گہرے اثرات ڈالتی ہے۔

پاکستان میں تمباکو نوشی ایک عام عادت ہے، جو نوجوانوں سے لے کر بڑی عمر کے افراد تک میں پائی جاتی ہے۔ سگریٹ، نسوار، حقہ اور پان میں استعمال ہونے والا تمباکو روز مرہ کی زندگی میں بہت عام ہے۔ پاکستان میں ہر سال لاکھوں افراد تمباکو سے جڑی بیماریوں کا شکار ہوتے ہیں، جن میں پھیپھڑوں کا سرطان، دل کی بیماریاں اور سانس کی تکالیف شامل ہیں۔ ایک اندازے کے مطابق پاکستان میں ہر سال 160,000 سے زائد اموات تمباکو نوشی سے منسلک بیماریوں کی وجہ سے ہوتی ہیں۔

جب حکومت سگریٹ اور تمباکو پر ٹیکس عائد کرتی ہے تو اس کے پیچھے دو بڑے مقاصد ہوتے ہیں:
1۔ عوام کو تمباکو نوشی سے روکنا
2۔ قومی خزانے کے لیے آمدنی اکٹھا کرنا

جب کسی چیز پر ٹیکس لگایا جاتا ہے تو اقتصادی اصول کے مطابق جب کسی چیز کی قیمت بڑھتی ہے تو اس کی مانگ کم ہو جاتی ہے۔ یہی تصور یہاں بھی کار فرما ہوتا ہے کہ سگریٹ مہنگی ہوگی تو لوگ کم خریدیں گے اور اس مہلک عادت سے باز آئیں گے۔

تاہم پاکستان جیسے ملک میں جہاں سگریٹ نوشی کی عادت کئی دہائیوں سے جمی ہوئی ہے، وہاں صرف قیمتیں بڑھانا ہی کافی نہیں۔ جب سگریٹ پر ٹیکس لگتا ہے اور اس کی قیمت بڑھتی ہے، تو سب سے زیادہ متاثر ہونے والا طبقہ غریب ہوتا ہے۔ کیونکہ وہ محدود آمدنی میں اپنی ضروریات پوری کرتے ہیں، اس لئے اگر کوئی فرد تمباکو نوشی کا عادی ہے تو وہ اپنی دیگر ضروریات جیسے کھانا، تعلیم یا دوا پر خرچ کر کے بھی سگریٹ خریدنے کی کوشش کرتا ہے۔ اس طرح ٹیکس سے تمباکو نوشی مکمل ختم تو نہیں ہوتی، لیکن غریب طبقے کی مالی حالت مزید خراب ہو جاتی ہے۔

یہ بھی دیکھا گیا ہے کہ کم آمدنی والے افراد سگریٹ کی جگہ نسوار یا دیگر سستی مگر زیادہ نقصان دہ یا اس کی متبادل اشیاء ڈھونڈ لیتے ہیں، جس پر ٹیکس کی شرح یا تو کم ہوتی ہے یا بالکل نہیں۔ نتیجتاً، ٹیکس کا مقصد یعنی صحت بہتر بنانا، مکمل طور پر حاصل نہیں ہو پاتا۔

بین الاقوامی تحقیق سے پتہ چلتا ہے کہ تمباکو پر ٹیکس لگانے سے اس کے استعمال میں کمی واقع ہوتی ہے، خاص طور پر نوجوانوں میں۔ ورلڈ ہیلتھ آرگنائزیشن (WHO) کے مطابق تمباکو پر ٹیکس میں 10 فیصد اضافہ، اس کی کھپت میں تقریباً 4 فیصد کمی کرتا ہے، اور کم آمدنی والے ملکوں میں یہ شرح اور بھی زیادہ ہو سکتی ہے۔

پاکستان میں بھی اس پالیسی کے کچھ مثبت اثرات دیکھے گئے ہیں، جیسے نوجوانوں میں سگریٹ شروع کرنے کی شرح میں معمولی کمی۔ تاہم مجموعی طور پر تمباکو نوشی کی شرح میں نمایاں کمی لانے کے لیے ٹیکس کے ساتھ ساتھ تعلیم، آگاہی اور صحت کی سہولیات بھی ضروری ہیں۔

ٹیکس ایک مؤثر ہتھیار ہے لیکن اگر اس کے ساتھ دیگر اقدامات نہ کیئے جائیں تو یہ کافی نہیں ہوتا۔ حکومت کو چاہیے کہ سگریٹ اور تمباکو نوشی کو جڑ سے اکھاڑ پھینکنے کے لیے مندرجہ ذیل اقدامات کرے:

* تمباکو نوشی کے نقصانات سے متعلق آگاہی مہم چلائی جائے۔
* سکولوں اور کالجوں میں تمباکو مخالف تعلیم کو نصاب کا حصہ بنایا جائے۔
* سگریٹ کی فروخت پر عمر کی حد کو سختی سے لاگو کیا جائے۔
* علاج معالجے کی سہولیات جیسے کہ تمباکو چھوڑنے والے مراکز قائم کیئے جائیں۔
* تمباکو مصنوعات کی تشہیر پر مکمل پابندی ہو۔

اگرچہ سگریٹ پر ٹیکس سے حکومت کو اربوں روپے کی آمدنی حاصل ہوتی ہے، لیکن ان فنڈز کا ایک حصہ صحت کے شعبے میں استعمال ہونا چاہیئے، خاص طور پر غریب طبقے کے لیے۔ حکومت اگر چاہے تو ان فنڈز کو عوامی ہسپتالوں میں صحت بہتر بنانے، تمباکو چھوڑنے کے پروگراموں اور بنیادی صحت کے مراکز کے قیام کے لیے استعمال کر سکتی ہے۔ اس طرح غریب عوام کو دو طرفہ فائدہ ہو سکتا ہے، ایک طرف صحت بہتر ہو اور دوسری طرف مالی بوجھ کم ہو۔

سگریٹ اور تمباکو پر ٹیکس ایک اہم پالیسی اقدام ہے جو صحت عامہ کے فروغ کے لیے نا گزیر ہے، لیکن اس کا نفاذ اس انداز میں ہونا چاہیئے کہ غریب عوام پر غیر ضروری بوجھ نہ پڑے۔ محض قیمتیں بڑھا دینا کافی نہیں، بلکہ اس کے ساتھ ساتھ تعلیمی مہمات، صحت کی سہولیات اور سماجی تبدیلی کے اقدامات بھی ضروری ہیں۔

اگر یہ سب عوامل ایک دوسرے کے ساتھ چلیں، تو نہ صرف تمباکو نوشی میں کمی آئے گی بلکہ ایک صحت مند، خوشحال اور با خبر معاشرہ تشکیل پائے گا۔