Category: کاروبار

‎حکومتی اقدامات سے ٹیکس محصولات میں نمایاں اضافہ ہوا ہے۔ اعداد و شمار بتاتے ہیں کہ مالی سال 2025 میں وفاقی حکومت نے ٹیکس اور لیویز کی مد میں 13 ٹریلین روپے سے زائد رقم جمع کی۔ یہ وصولیاں ملکی مجموعی پیداوار (جی ڈی پی) کے تقریباً 11.3 فیصد کے برابر ہیں۔
‎موجودہ رفتار جاری رہنے پر وفاقی ٹیکس وصولیاں جون 2028 تک جی ڈی پی کے 15 فیصد ہدف کو حاصل کرنے کی طرف بڑھ رہی ہیں۔ مشیرِ خزانہ خرم شہزاد کا کہنا ہے کہ صوبائی حکومتوں کو وفاق کی طرز پر ٹیکس وصولی کے نظام کو مزید مؤثر بنانے کی ضرورت ہے۔
‎صوبائی حکومتیں مجموعی طور پر جی ڈی پی کے صرف 0.85 فیصد ٹیکس وصول کر رہی ہیں، حالانکہ ان کے پاس خدمات، زراعت جیسے مؤثر ٹیکس ذرائع موجود ہیں۔ مشیرِ خزانہ نے زور دیا کہ وفاق اور صوبوں کو مل کر متوازن اصلاحات لانے چاہییں تاکہ ہر سطح پر ٹیکس وصولی مضبوط ہو۔
‎وفاقی حکومت کی جانب سے 13 ٹریلین روپے کی وصولی ایک حوصلہ افزا قدم ہے، جس سے ٹیکس اصلاحات کی مثبت سمت واضح ہوتی ہے۔


پاکستان اسٹاک ایکسچینج میں جمعہ کے روز کاروباری ہفتے کے آخری دن تیزی کا رجحان رہا۔ کاروبار کے آغاز پر ہی مارکیٹ میں مثبت رجحان دیکھنے کو ملا اور ہنڈرڈ انڈیکس میں اضافہ ہوا۔
‎ابتدائی طور پر ہنڈرڈ انڈیکس 1,881 پوائنٹس اضافے کے ساتھ 183,338 پر پہنچ گیا اور کچھ دیر بعد مجموعی طور پر 2,575 پوائنٹس کا اضافہ دیکھا گیا۔ کاروبار کے دوران مارکیٹ میں مزید تیزی آئی اور ہنڈرڈ انڈیکس 3,152 پوائنٹس اضافے کے بعد ایک لاکھ 84 ہزار 600 سے تجاوز کر گیا۔
‎آج ڈیڑھ گھنٹے میں اسٹاک ایکسچینج کا انڈیکس تقریباً 1.7 فیصد اوپر گیا، جس سے سرمایہ کاروں میں اعتماد میں اضافہ دیکھا گیا۔

‎وفاقی حکومت نے پیٹرول اور ڈیزل کی قیمتیں برقرار رکھنے کا فیصلہ کیا ہے، جس کا باضابطہ نوٹیفکیشن پیٹرولیم ڈویژن کی جانب سے جاری کر دیا گیا ہے۔
‎نوٹیفکیشن کے مطابق پیٹرول کی قیمت 253 روپے 17 پیسے فی لیٹر پر برقرار رہے گی، جبکہ ڈیزل کی قیمت بھی 257 روپے 8 پیسے فی لیٹر برقرار رکھنے کا فیصلہ کیا گیا ہے۔
‎پیٹرولیم ڈویژن کے اعلامیے میں کہا گیا ہے کہ یہ قیمتیں آئندہ پندرہ روز کے لیے برقرار رہیں گی۔


وزیراعظم محمد شہباز شریف نے کہا ہے کہ آئندہ سال پاکستان ریلوے کے ترقیاتی منصوبوں کے لیے مناسب بجٹ مختص کیا جائے گا، کیونکہ ریلوے کی کارکردگی بہتر بنانے کے اقدامات دہائیوں سے ناگزیر تھے۔
‎وزیراعظم کی زیر صدارت پاکستان ریلوے کی کارکردگی سے متعلق اجلاس منعقد ہوا، جس میں نجی شعبے کے ماہرین سے مشاورت کی گئی۔ اجلاس میں ریلوے کے موجودہ نظام، اصلاحاتی اقدامات اور مستقبل کے ترقیاتی منصوبوں پر تفصیلی غور کیا گیا۔
‎وزیراعظم نے کہا کہ نجی شعبے کے ماہرین سے مشاورت اصلاحاتی عمل کا اہم حصہ ہے اور ریلوے کو جدید تقاضوں کے مطابق بہتر بنانا وقت کی ضرورت ہے۔ انہوں نے وفاقی وزیر ریلوے اور ان کی ٹیم کی کارکردگی کو سراہتے ہوئے کہا کہ ان کی کوششیں قابلِ تحسین ہیں۔
‎اجلاس کے اختتام پر وزیراعظم شہباز شریف نے پاکستان ریلویز کو ہدایت کی کہ وہ آئندہ ہفتے ریلوے کی بہتری اور ترقی سے متعلق جامع روڈ میپ پیش کرے۔

لاہور سمیت پنجاب بھر میں گندم ریٹس میں 700 روپے فی من تک کا اضافہ ہوگیا، دس روز میں 3700 روپے فی من گندم کا ریٹ 4400 روپے ہوگیا۔ لاہور کے متعدد علاقوں میں 10 اور 20 کلو سستے آٹے کا تھیلا نایاب ہوگیا۔

ذرائع کے مطابق راولپنڈی میں گندم فی من 4800 روپے ہوگئی، گوجرانوالہ اور گجرات میں گندم کا فی من ریٹ 4500 روپے ہوگیا، ملتان میں 4450، بہاولپور اور ڈی جی خان میں 4400 روپے جبکہ اسلام آباد میں بھی گندم کا ریٹ فی من 4400 روپے تک پہنچ گیا۔ذرائع کا کہنا ہے کہ لاہور کے متعدد علاقوں میں سستا آٹا نایاب، ہوگیا، 15 کلو آٹے کا تھیلا 1750 روپے میں فروخت ہونے لگا۔مرکزی چیئرمین فلار ملز ایسوسی ایشن کا کہنا ہے کہ گندم کی قلت کے باعث گندم مہنگی کی۔ڈی ڈی فوڈ محکمہ خوراک کا کہان ہے کہ آٹے کی قلت نہیں، بازار میں وافر مقدار میں موجود ہے، 10 اور 20 کلو آٹے کا تھیلا دکانوں پر دستیاب ہے۔

وزارت خزانہ کے مطابق پاکستان اگلے تین سال کے دوران 2.75 ارب ڈالر مالیت کے بین الاقوامی بانڈز جاری کرنے کا منصوبہ رکھتا ہے۔ رواں ماہ کے آخر یا فروری میں 25 کروڑ ڈالر مالیت کے پانڈا بانڈ کے اجرا کی تیاری ہے، جس کی مالیت بتدریج ایک ارب ڈالر تک لے جانے کا ہدف ہے۔
ذرائع کا کہنا ہے کہ پانڈا بانڈز کے علاوہ چینی مارکیٹ اور بین الاقوامی کیپٹل مارکیٹ سے بھی سرمایہ کاری حاصل کی جائے گی۔ اگلے مالی سال تک بانڈز کا حجم بڑھ کر ایک ارب ڈالر تک پہنچنے کا امکان ہے۔
‎بین الاقوامی بانڈز کے اجرا سے بیرونی کمرشل فنانسنگ میں بہتری آئے گی اور آنے والے برسوں میں مالیاتی خلا کو کم کرنے میں مدد ملے گی۔ وزارت خزانہ کے حکام کے مطابق عالمی ایجنسیوں کی جانب سے پاکستان کی کریڈٹ ریٹنگ میں بہتری آرہی ہے، اور میکرو اکنامک صورتحال میں مزید استحکام سے بیرونی سرمایہ کاری کے مواقع بڑھیں گے۔


وزیراعظم محمد شہباز شریف، چیف آف آرمی اسٹاف اور چیف آف ڈیفنس فورس فیلڈ مارشل سید عاصم منیر، اور ڈائریکٹر جنرل آئی ایس آئی و پاکستان کے قومی سلامتی کے مشیر لیفٹیننٹ جنرل محمد عاصم ملک نے حکومتِ پاکستان اور ایس سی فنانشل ٹیکنالوجیز ایل ایل سی کے درمیان مفاہمتی معاہدے پر دستخط کی تقریب میں شرکت کی۔
ایس سی فنانشل ٹیکنالوجیز ایل ایل سی ورلڈ لبرٹی فنانشل کی منسلک کمپنی ہے۔ مفاہمتی معاہدے کے تحت سرحد پار لین دین کے لیے ڈیجیٹل ادائیگی کے نظام کی تیاری پر تعاون کیا جائے گا۔
‎معاہدے پر حکومتِ پاکستان کی جانب سے وفاقی وزیرِ خزانہ محمد اورنگزیب جبکہ ورلڈ لبرٹی فنانشل کی جانب سے چیف ایگزیکٹو آفیسر زیکری وٹکوف نے دستخط کیے۔