Category: کرونا اپڈیٹس

لاہور: کورونا ٹریکنگ کیلئے دہشتگردوں کا پتہ لگانے والی ٹیکنالوجی کا استعمال،بڑے بڑے بھی پکڑے جاسکتے ہیں‌،اطلاعات کے مطابق پاکستان میں انٹیلی جنس سروسز کورونا وائرس کے مریضوں اور ان سے رابطے میں رہنے والے افراد کو ٹریک کرنے کے لیے دہشت گردوں کا پتہ لگانے والی خفیہ ٹیکنالوجی استعمال کررہی ہیں۔

فرانسیسی خبررساں ادارے ‘اے ایف پی’ کی رپورٹ کے مطابق وزیراعظم عمران خان نے کہا تھا کہ حکومت وائرس سے نمٹنے میں مدد کے لیے انٹر سروسز انٹیلی جنس (آئی ایس آئی) کی مدد لے رہی ہے جو پورے پاکستان میں اب تیزی سے پھیل رہا ہے۔

مذکورہ منصوبے سے متعلق تفصیلات جاری نہیں کی گئی لیکن دو عہدیداروں نے اے ایف پی نے انٹیلی جنس سروسز کو بتایا کہ انٹیلی جنس سروسز جیو-فینسنگ اور فون مانیٹرنگ سسٹمز استعمال کررہے ہیں جو عام طور پر مقامی اور غیرملکی دہشت گردوں کے اہداف تک پہنچنے کے لیے تعینات کیے جاتے ہیں۔

جیو-فینسنگ ایک محتاط ٹریکنگ سسٹم ہے جو کسی شخص کی جانب سے مخصوص جغرافیائی علاقے سے نکلنے پر حکام کو خبردار کرتا ہے، اس سے حکام کو لاک ڈاؤن کیے گئے علاقوں کی نگرانی میں مدد ملی ہے۔اس کے ساتھ ہی حکام نگرانی کے لیے کورونا وائرس کے مریضوں کی کالز بھی سن رہے ہیں کہ ان کے رابطے میں موجود افراد علامات سے متعلق بات کررہے ہیں یا نہیں۔

انٹیلی جنس عہدیدار نے کہا کہ ٹریس اینڈ ٹریکنگ سسٹم بنیادی طور پر ہمیں کورونا مریضوں اور ان سے رابطے میں رہنے والے افراد کے موبائل فونز ٹریک کرنے میں مدد دیتا ہے۔

شناخت ظاہر نہ کرنے کی شرط پر ایک سینئر سیکیورٹی عہدیدار نے اے ایف پی کو بتایا کہ ایجنسیز اب ‘کافی مؤثر طریقے’ سے کورونا وائرس کے کیسز کو ٹریک کرنے کے لیے ٹیکنالوجی کا استعمال کررہی ہیں۔انہوں نے کہا کہ حکومت مریضوں کا پتہ لگانے میں کامیاب رہی ہے یہاں تک کہ وہ بھی سامنے آئے جو کورونا پازیٹو تھے اور اپنا مرض چھپارہے تھے۔آگاہی کی کمی اور خوف کے باعث کورونا کی علامات ظاہر ہونے کے باوجود لوگ علاج نہیں کروارہے یہاں تک کہ ہسپتالوں سے بھاگ رہے ہیں۔

وزیراعظم نے حال ہی میں اس پروگرام کی تعریف کی ہے جو کورونا وائرس کے خلاف جنگ میں استعمال ہونے پر عوام میں زیر بحث رہا۔انہوں نے کہا کہ یہ نظام دہشت گردوں کے خلاف استعمال ہوتا لیکن اب کورونا وائرس کے خلاف فائدہ مند ہے۔

اب تک پاکستان میں 61 ہزار سے زائد مریض کورونا وائرس میں مبتلا ہوچکے ہیں جبکہ 12 سو سے زائد اموات ہوئی ہیں تاہم ٹیسٹنگ محدود ہونے کے باعث حکام پریشان ہیں کہ اصل تعداد کہیں زیادہ ہوسکتی ہے۔دوسری جانب انسانی حقوق کے گروہوں نے تحفظات کا اظہار کیا ہے کہ حکام جن پر ملک کی ثقافتی اور سیاسی زندگی کے کئی پہلوؤں پر وسیع اثر و رسوخ رکھنے کا الزام ہے وہ ان اختیارات کے ذریعے سیاسی مخالفین کا پتہ لگاسکتے ہیں۔

کراچی:پاکستان کورونا کو شکست دینے والے ’ٹاپ 20‘ ممالک میں شامل ہوگیا، ،اطلاعات کے مطابق کورونا وائرس کی عالمی وبا کے تناظر میں کم تر شرحِ اموات اور اس بیماری کو شکست دے کر صحت یاب ہوجانے والوں کی ایک بڑی تعداد کے تناظر میں دنیا بھر کے 210 سے زائد ممالک میں پاکستان کا 19 واں نمبر ہے۔

اگر ایک طرف دنیا بھر میں ناول کورونا وائرس (کووِڈ 2019) سے متاثرہ افراد کی تعداد ساٹھ لاکھ کے قریب پہنچ چکی ہے اور ساڑھے تین لاکھ سے زیادہ افراد اس وبا کے ہاتھوں موت کے منہ میں پہنچ چکے ہیں تو دوسری جانب کورونا وائرس کے پچیس لاکھ سے زیادہ متاثرین اس بیماری کو شکست دے کر صحت یاب بھی ہوچکے ہیں، جو ایک خوش آئند بات ہے۔پاکستان بھی ان ٹاپ 20 ملکوں میں شامل ہے جو اس عالمی وبا کو بڑے پیمانے پر شکست دے رہے ہیں۔

تفصیلات کے مطابق، گزشتہ چوبیس گھنٹوں کے دوران 2,076 نئے کیسز کے ساتھ، پاکستان میں کورونا وائرس سے متاثرہ افراد کی کُل تعداد 61,226 ہوچکی ہے۔ البتہ، پاکستان میں اب تک کیے گئے 508,086 کورونا ٹیسٹوں کے مقابلے میں یہ تعداد صرف 12 فیصد بنتی ہے۔

پاکستان میں کورونا وائرس سے متاثرہ افراد میں سے 20,231 مکمل صحت یاب ہوچکے ہیں، جس کا مطلب یہ ہے کہ وطنِ عزیز میں کورونا کو شکست دینے والے مریضوں کی شرح 33 فیصد ہے جو ایک حوصلہ افزاء امر ہے۔

آبادی کے تناظر میں دیکھا جائے تو کورونا وائرس سے متاثرہ پاکستانیوں کی شرح 0.0278 فیصد (یعنی دس لاکھ میں سے 278) ہے جو عالمی اوسط (745 فی دس لاکھ) سے بہت کم ہے۔ پاکستان کی مجموعی آبادی کے لحاظ سے جائزہ لیں تو کورونا وائرس کے ہاتھو لقمہ اجل بننے والوں کا تناسب 0.0006 فیصد (دس لاکھ میں سے صرف 6) ہے۔ یہ بھی عالمی اوسط (45.9 فی دس لاکھ) سے بہت کم ہے۔

ان تمام نکات کی بنیاد پر پاکستان اُن 20 ملکوں میں شامل ہے جو کورونا وائرس کے خلاف بہت مؤثر انداز میں کامیاب ہورہے ہیں۔

اسلام آباد: کورونا کے خوف کے باعث مائیں بچوں کو دودھ پلانا نہ چھوڑیں، ماں کے دودھ سے بڑھ کرکوئی شئے نہیں : رپورٹ،اطلاعات کے مطابق کورونا وائرس سے دنیا بھر میں 57 لاکھ سے زائد افراد متاثر ہو چکے ہیں اور وبا کے باعث بچوں کی غذائی قلت جیسے معاملات بھی سر اٹھا رہے ہیں تاہم ایک تازہ رپورٹ میں ماؤں کو تجویز دی گئی ہے کہ وہ وبا کے ڈر سے بچوں کو دودھ پلانا نہ چھوڑیں، اس بات کے شواہد نہیں ہیں کہ کورونا ماں کے دودھ میں ہوسکتا ہے۔

یہ بات عالمی ادارہ صحت (ڈبلیو ایچ او) یونائیٹڈ نیشنز چلڈرین فنڈ (یو این سی ایف) اور انٹرنیشنل بے بی فوڈ ایکشن نیٹ ورک (آئی بی ایف اے این) کی جانب سے (چھاتی کے دودھ کے متبادل ذرائع پر عالمی معیار کے مطابق قومی درآمد) کے عنوان سے جاری رپورٹ میں کہی گئی۔

رپورٹ میں کہا گیا کہ اس بات کے بہت کم امکانات ہیں کہ بریسٹ فیڈنگ یا چھاتی کا دودھ پلائے جانے سے بچے میں وائرس منتقل ہو سکتا ہے، یہ خدشات ایسی ماؤں کی جانب سے سامنے آرہے ہیں جو کورونا میں مبتلا ہو چکی ہیں یا ان میں کورونا جیسی علامات پائی جاتی ہیں تاہم اگر کورونا میں مبتلا خواتین بھی چاہیں تو نوزائیدہ بچوں کو دودھ پلا سکتی ہیں۔

ایسی ماؤں کو مشورہ دیا گیا ہے کہ وہ الکوحل یا صابن سے بار بار ہاتھ دھوتی رہیں اور خاص طور پر جب وہ بچوں کو چھونا چاہیں تو ایسا لازمی کریں، بچے کو گود میں لینے سمیت اسے دودھ پلاتے وقت فیس ماسک کا استعمال کریں، کھانستے اور چھینکتے وقت ٹشو کا استعمال کریں اور پھر محفوظ طریقے سے اس ٹشو کو تلف کرنے کے بعد دوبارہ ہاتھ دھوئیں۔انہیں مشورہ دیا گیا ہے کہ اگر ماؤں کے پاس میڈیکل فیس ماسک نہیں ہے تو وہ انفیکشن سے محفوظ رہنے کے لیے دیگر حفاظتی اقدامات اٹھائیں مگر بچوں کو دودھ پلانا نہ چھوڑیں۔

انٹرنیشنل بے بی فوڈ ایکشن نیٹ ورک گلوبل کونسل کی عہدیدار پیٹی رنڈال کا اس حوالے سے کہنا تھا کہ کورونا کی منتقلی کے خوف کی وجہ سے دنیا بھر میں ماؤں کی جانب سے نوزائیدہ بچوں کو دودھ دینے میں کمی ہوئی ہے، کئی ممالک میں بچوں اور ماؤں کو احتیاط کی وجہ سے ایک دوسرے سے الگ رکھا جا رہا ہے، جس کے باعث جہاں بچوں کو دودھ نہیں دیا جا رہا، وہیں انہیں اسکن ٹو اسکن ریلیف بھی نہیں مل رہا اور یہ سب کچھ تصدیقی ثبوتوں کے بغیر ہی کیا جا رہا ہے۔ان کے مطابق ساتھ ہی بے بی فوڈ انڈسٹری کو غلط مشورے اور تجاویز دے کر اسے نقصان پہنچایا جا رہا ہے اور ساتھ ہی مشورے دینے والے دعویٰ کر رہے ہیں کہ وہ اس شعبے کے خیر خواہ ہیں اور وہ ان کے قابل بھروسہ ساتھی بھی ہیں۔

رپورٹ میں حاملہ خواتین، ماؤں اور نوزائیدہ بچوں کے تحفظ کے لیے کام کرنے والے ہیلتھ ورکرز کے بریسٹ ملک سبسٹی ٹیوٹ (بی ایم ایس) کے نامناسب کردار پر بھی بات کی گئی ہے اور اس میں ہیلتھ ورکرز اور طبی سہولیات کا جائزہ لے کر ان کے خلاف قانونی اقدامات کا جائزہ بھی فراہم کیا گیا ہے۔ساتھ ہی رپورٹ میں کہا گیا کہ نقصان دہ بی ایم ایس کی حوصلہ شکنی کے باوجود کئی ممالک میں والدین کو گمراہ کن معلومات فراہم کی جا رہی ہے۔

کورونا وائرس نے اس بات کی بھی اہمیت کو اجاگر کیا ہے کہ صحت کے حوالے سے جھوٹے دعوے اور غلط معلومات سمیت بی ایم ایس کے حوالے سے گمراہ کن معلومات فراہم کرنے کے حوالے سے سخت قانون سازی کی ضرورت ہے۔چھاتی کا دودھ جہاں بچے کی زندگی کو بچانے میں اہم کردار ادا کرتا ہے، وہیں وہ بچے کو اینٹی باڈیز فراہم کرنے سمیت اس کی نشو و نما میں اہم کردار ادا کرتا اور اسے بیماریوں سے محفوظ رکھتا ہے۔

مذکورہ رپورٹ میں جن 194 ممالک کا تجزیہ پیش کیا گیا ہے، ان میں سے 136 ممالک میں بی ایم ایس کی مارکیٹنگ سے متعلق عالمی قوانین کے تحت کچھ قانون سازی موجود تھی، جسے عالمی ادارہ صحت کی اسمبلی نے تجویز کیا تھا، رپورٹ میں بتایا گیا کہ دنیا بھر کے 44 ممالک نے گزشتہ 2 سال میں اس ضمن میں کوششیں لے کر مارکیٹنگ ضوابط کو مزید سخت بنایا ہے۔

صرف 79 ممالک ایسے ہیں جہاں صحت کی سہولیات کے دوران بی ایم ایس پر مکمل پابندی ہے جب کہ 51 ممالک میں بی ایم ایس کی مفت یا سستے داموں سے متعلق پابندیاں عائد ہیں تاہم بیشتر ممالک میں صحت کی سہولیات کے دوران اس کی مکمل مارکیٹنگ پر پابندی عائد نہیں ہے۔

عالمی ادارہ صحت کے نیوٹریشن اینڈ فوڈ سیفٹی ڈپارٹمنٹ کے سربراہ ڈاکٹر فرانسسکو برانکا کے مطابق بی ایم ایس کی جارحانہ مارکیٹنگ نقصان دہ ہے اور خاص طور پر اس کی پیشہ ور صحت کے رضاکاروں سے کی جانے والی مارکیٹنگ نقصان دہ ہے اور یہ عالمی سطح پر نوزائیدہ بچوں کی صحت کی بہتری میں سب سے بڑا مسئلہ ہے۔ان کا کہنا تھا کہ ہیلتھ کیئر سسٹم کو والدین کو بچوں کو دودھ پلانے کے لیے حوالے سے حوصلہ دینا چاہیے، تاکہ بچوں کی زندگی محفوظ ہو سکے۔

عالمی ادارہ صحت اور یونیسیف تجویز دیتا ہے کہ نوزائیدہ بچوں کو ابتدائی 6 ماہ تک صرف ماں کا دودھ ہی دینا چاہیے جب کہ اس کے بعد 2 سال تک ماں کے دودھ سمیت بچوں کو صحت سے بھرپور غذائیت دی جانی چاہیے۔

رپورٹ میں یہ بھی کہا گیا ہے کہ گزشتہ 2 سال میں 44 ممالک کے اندر غلط بی ایم ایس مارکیٹنگ کے خلاف سخت ضوابط نافذ کیے گئے، 2018 کے بعد 11 ممالک جن میں پاکستان کے صوبے پنجاب، بحرین، چاڈ، مصر، لاؤ پیپلز ڈیموکریٹک ری پبلک، نائیجیریا، ری پبلک آف مولڈووا، سعودی عرب، ترکی، متحدہ عرب امارات (یو اے ای) اور ازبکستان نے قوانین میں تبدیلی یا ترمیم بھی کی۔

رپورٹ میں بتایا گیا کہ پاکستان کے صوبے پنجاب نے دیگر صوبوں سے بازی لے جاتے ہیں اس طرح کی نامناسب پریکٹس کو روکنے یا اس کی حوصلہ شکنی کےلیے نئے قوانین نافذ کرائے۔ علاوہ ازیں رپورٹ میں پاکستان، نیپال اور میانمار کو اس ضمن میں بنائے گئے قوائد کے حوالے سے متعدل قرار دیا گیا ہے، دوسری جانب افغانستان، بنگلہ دیش، سعودی عرب اور بھارت جیسے ممالک کے ضوابط کو معقول قرار دیا گیا ہے۔

اس حوالے سے پاکستان نیوٹریشن کے منیجر ڈاکٹر بصیر خان اچکزئی نے ڈان سے بات کرتے ہوئے بتایا کہ چند سال تک پاکستان میں بریسٹ فیڈنگ کی شرح 38 فیصد تھی جو اب بڑھ کر 48 فیصد تک جا پہنچی ہے۔

درست انداز میں چھاتی کا دودھ پلانے کے حوالے سے ہدایات فراہم کرنے کے حوالے سے پوچھے گئے ایک سوال کے جواب میں انہوں نے بتایا کہ اس طرح کا کوئی بھی طریقہ کار نہیں ہے، جس میں ماؤں کو سمجھایا جائے کہ بچوں کو بہتر اور درست انداز میں کس طرح چھاتی کا دودھ پلایا جاتا ہے۔ایک اور سوال کے جواب میں انہوں نے کہا کہ پاکستان میں 2009 میں ایک قانون بنایا گیا تھا جس پر بی ایم ایس کمپنیوں کو بڑی مشکل سے عمل کرنے پر مجبور کیا گیا اور انہیں اس بات کا پابند بنایا گیا کہ وہ اپنی مصنوعات پر لکھیں کہ بچوں کے لیے ماں کے دودھ کا کوئی متبادل نہیں ہے۔