Baaghi TV

Category: جرائم و حادثات

  • بہاولپور: تیز رفتار کار کی ٹکر سے موٹرسائیکل سوار جاں بحق، ایک زخمی

    بہاولپور: تیز رفتار کار کی ٹکر سے موٹرسائیکل سوار جاں بحق، ایک زخمی

    اوچ شریف (باغی ٹی وی، نامہ نگار حبیب خان) بہاولپور کے قریب اشرف شوگر مل کے مقام پر افسوسناک ٹریفک حادثے میں ایک موٹرسائیکل سوار موقع پر جاں بحق جبکہ دوسرا شدید زخمی ہو گیا۔

    ریسکیو ذرائع کے مطابق حادثہ اُس وقت پیش آیا جب تیز رفتار کار نے موٹرسائیکل کو پیچھے سے ٹکر مار دی۔ ٹکر اس قدر شدید تھی کہ عبدالحمید ولد منظور احمد، عمر 36 سال، ساکن اڈا نور پور چوک، سر پر گہری چوٹ لگنے کے باعث موقع پر ہی دم توڑ گیا، جب کہ دوسرا موٹرسائیکل سوار مشتاق ولد علی احمد، عمر 45 سال، ساکن خانقاہ شریف، متعدد فریکچرز کا شکار ہوا۔ ریسکیو ٹیم نے زخمی کو فوری طبی امداد دے کر بہاول وکٹوریہ اسپتال منتقل کر دیا۔

    جاں بحق شخص کی لاش ضروری قانونی کارروائی کے بعد ورثاء کے حوالے کر دی گئی ہے۔ پولیس نے واقعے کی تحقیقات شروع کر دی ہیں۔

  • گوجرانوالہ: تھانہ کینٹ پولیس کی کارروائی، منشیات فروش اور پتنگ فروش گرفتار، اسلحہ و چرس برآمد

    گوجرانوالہ: تھانہ کینٹ پولیس کی کارروائی، منشیات فروش اور پتنگ فروش گرفتار، اسلحہ و چرس برآمد

    گوجرانوالہ (باغی ٹی وی، نامہ نگار محمد رمضان نوشاہی)تھانہ کینٹ پولیس نے منشیات فروشوں، ناجائز اسلحہ رکھنے والوں اور پتنگ فروشوں کے خلاف بھرپور کریک ڈاؤن کرتے ہوئے شاندار کارکردگی کا مظاہرہ کیا۔ پولیس نے کارروائی کے دوران بدنام زمانہ منشیات فروش اشرف عرف اچھو کو گرفتار کر کے اس کے قبضہ سے 3 کلو 580 گرام چرس، ایک رائفل 222 بور، ایک 30 بور پسٹل اور متعدد گولیاں برآمد کر لیں۔

    ایس پی سول لائن محمد عمران خان کی زیر ہدایت، ایس ایچ او تھانہ کینٹ انسپکٹر غازی عدنان اعجاز نے پولیس ٹیم کے ہمراہ گشت و ناکہ بندی کے دوران مخبر کی اطلاع پر کارروائی کرتے ہوئے یہ کامیابی حاصل کی۔ گرفتار ملزم اشرف عرف اچھو نے انکشاف کیا ہے کہ وہ بیرونِ اضلاع سے منشیات لا کر گوجرانوالہ میں فروخت کرتا تھا۔ ملزم سے مزید تفتیش جاری ہے۔

    اسی طرح پتنگ بازی اور پتنگ فروشی کے خلاف کارروائی کرتے ہوئے ایک اور ملزم نعیم کو گرفتار کیا گیا، جس کے قبضہ سے 27 عدد رنگ برنگی پتنگیں اور 2 عدد ڈور کی گوٹیں برآمد ہوئیں۔

    سٹی پولیس آفیسر محمد ایاز سلیم نے اس کامیاب کارروائی پر ایس ایچ او تھانہ کینٹ اور ان کی ٹیم کو شاباش دیتے ہوئے کہا کہ منشیات فروشوں، ناجائز اسلحہ رکھنے والوں اور پتنگ فروشوں کے خلاف زیرو ٹالرنس کی پالیسی پر سختی سے عملدرآمد جاری ہے۔ قانون شکن عناصر کسی بھی قسم کی رعایت کے مستحق نہیں۔ پولیس کا یہ کریک ڈاؤن آئندہ بھی جاری رہے گا۔

  • اوکاڑہ: خانہ بدوشوں میں رشتے کا تنازع، سالا اور بہنوئی قتل

    اوکاڑہ: خانہ بدوشوں میں رشتے کا تنازع، سالا اور بہنوئی قتل

    اوکاڑہ (نامہ نگار: ملک ظفر) تھانہ گوگیرہ کے نواحی گاؤں چک خان محمد میں رشتے کے تنازع پر خانہ بدوش قبیلے کے دو افراد قتل ہو گئے۔ مقتولین شاہد اور فرمائش آپس میں سالا اور بہنوئی تھے۔

    پولیس ذرائع کے مطابق شاہد نے اپنے دو ساتھیوں کے ہمراہ بہنوئی فرمائش کی جھگی میں جا کر دستی اسلحہ سے فائرنگ کی اور اسے قتل کر دیا۔ فائرنگ کے بعد شاہد کے ساتھی موقع سے فرار ہو گئے، جبکہ مقتول کے عزیز و اقارب نے قاتل شاہد کو موقع پر ہی پکڑ لیا اور وحشیانہ تشدد کا نشانہ بنایا، جس سے وہ شدید زخمی ہو گیا۔

    واقعے کی اطلاع پر ایس ایچ او تھانہ گوگیرہ پولیس نفری کے ہمراہ موقع پر پہنچے اور شواہد اکٹھے کیے۔ مقتول فرمائش کی لاش کو پوسٹمارٹم کے لیے منتقل کر دیا گیا جبکہ قاتل شاہد کو زخمی حالت میں پولیس حراست میں ہسپتال لے جایا گیا، جہاں وہ زخموں کی تاب نہ لاتے ہوئے دم توڑ گیا۔

    ڈی پی او کے نوٹس پر پولیس نے مقتول فرمائش کی والدہ کی درخواست پر شاہد اور اس کے ساتھیوں کے خلاف مقدمہ نمبر 723/25 درج کر لیا۔ دوسری جانب شاہد کی موت کے بعد اس کے ورثاء کی درخواست پر کراس ورژن بھی درج کر لیا گیا ہے۔

    پولیس تھانہ گوگیرہ نے دوہرے قتل کے اس پیچیدہ کیس کی میرٹ اور سائنسی بنیادوں پر تفتیش کے لیے اعلیٰ افسران پر مشتمل ٹیمیں تشکیل دے دی ہیں۔ پولیس ترجمان کے مطابق دونوں فریقین کے بیانات، شواہد اور فرانزک رپورٹ کی روشنی میں قانونی کارروائی مکمل کی جائے گی۔

  • ہیڈ مرالہ: سیر کے دوران افسوسناک حادثہ، 4 سالہ بچی ڈوب گئی، ریسکیو آپریشن جاری

    ہیڈ مرالہ: سیر کے دوران افسوسناک حادثہ، 4 سالہ بچی ڈوب گئی، ریسکیو آپریشن جاری

    سیالکوٹ (باغی ٹی وی، سٹی رپورٹر مدثر رتو) نارووال سے فیملی کے ہمراہ ہیڈ مرالہ سیر کے لیے آئی چار سالہ حرم فاطمی دختر بابر دریائے چناب میں ڈوب گئی۔

    تفصیلات کے مطابق فیملی پکنک منانے ہیڈ مرالہ پہنچی جہاں کنارے پر کھڑی ایک کشتی میں بیٹھ کر تصاویر بنائی جا رہی تھیں کہ اسی دوران کمسن بچی اچانک کشتی سے نیچے گر گئی اور پانی کے تیز بہاؤ میں بہہ گئی۔

    واقعے کی اطلاع ملتے ہی ریسکیو 1122 کی ٹیمیں موقع پر پہنچ گئیں۔ ڈسٹرکٹ ایمرجنسی آفیسر انجینئر نوید اقبال کی نگرانی میں سرچ آپریشن کا آغاز کر دیا گیا ہے، تاہم تاحال بچی کا سراغ نہیں مل سکا۔

    اہل خانہ غم سے نڈھال ہیں جبکہ علاقے کی فضا افسردہ ہو گئی ہے۔

  • قصور: 19 وارداتوں میں ملوث خطرناک اشتہاری ڈاکو پولیس مقابلے میں ہلاک

    قصور: 19 وارداتوں میں ملوث خطرناک اشتہاری ڈاکو پولیس مقابلے میں ہلاک

    قصور (باغی ٹی وی، ڈسٹرکٹ رپورٹر طارق نوید سندھو) سی سی ڈی ٹیم پتوکی کی کامیاب کارروائی میں 03 مقدمات میں اشتہاری اور 19 وارداتوں میں ملوث خطرناک ڈاکو مارا گیا۔ ہلاک ہونے والے ڈاکو کی شناخت بین الاضلاعی گینگ کے سرغنہ غلام دستگیر عرف دستگیری ولد رانا منگت، سکنہ خانکے موڑ پھولنگر کے طور پر ہوئی ہے۔

    تفصیلات کے مطابق ملتان روڈ پر 5 سے 6 ڈاکو درخت رکھ کر شہریوں سے لوٹ مار میں مصروف تھے کہ اسی دوران سی سی ڈی ٹیم پتوکی نے خفیہ اطلاع پر فوری ایکشن لیتے ہوئے ریڈنگ پارٹی تشکیل دی اور علاقے کو گھیرے میں لے لیا۔ پولیس ٹیم کو دیکھتے ہی ڈاکوؤں نے مختلف اطراف سے فائرنگ شروع کر دی۔ فائرنگ کے تبادلے کے دوران ایک ڈاکو اپنے ہی ساتھیوں کی فائرنگ سے ہلاک ہو گیا جبکہ باقی ڈاکو اندھیرے کا فائدہ اٹھاتے ہوئے فرار ہونے میں کامیاب ہو گئے۔

    سی سی ڈی ٹیم نے فرار ہونے والے ڈاکوؤں کی گرفتاری کے لیے خصوصی ٹیم تشکیل دے دی ہے۔ ڈسٹرکٹ آفیسر سی سی ڈی قصور نے اس موقع پر کہا کہ سی سی ڈی ڈیپارٹمنٹ عوام کے جان و مال کے تحفظ کے لیے ہمہ وقت چوکس ہے اور جرائم پیشہ عناصر کے خلاف کارروائیاں جاری رہیں گی۔

  • گھوٹکی:کچے میں گھیراؤ، تاوان کیلئے اغواء خانیوال کا شخص بازیاب

    گھوٹکی:کچے میں گھیراؤ، تاوان کیلئے اغواء خانیوال کا شخص بازیاب

    میرپورماتھیلو (باغی ٹی وی، نامہ نگار مشتاق علی لغاری) ایس ایس پی گھوٹکی ڈاکٹر سمیع اللّٰہ سومرو کی قیادت میں گھوٹکی پولیس نے کچے کے علاقے میں ایک بڑی اور کامیاب کارروائی کرتے ہوئے اغواء کاروں کا گھیرا تنگ کیا اور تاوان کے لیے اغواء کیے گئے مغوی کو بحفاظت بازیاب کرا لیا۔

    پولیس کے مطابق کچھ دن قبل ضلع کشمور کے کچہ ایریا سے خانیوال پنجاب کے رہائشی خورشید احمد ولد مخیار احمد قریشی کو اغواء کیا گیا تھا۔ اغواء کاروں نے اسے تاوان کے لیے قید کر رکھا تھا۔ آج ایس ایچ او تھانہ شہید دین محمد لغاری صفیع اللّٰہ انصاری نے بھاری نفری کے ہمراہ کچہ رونتی میں اغواء کاروں کے خلاف آپریشن کیا، جس میں مغوی کو بحفاظت بازیاب کرا لیا گیا۔

    پولیس حکام کا کہنا ہے کہ اغواء کار پولیس کا گھیرا تنگ ہوتا دیکھ کر مغوی کو چھوڑ کر فرار ہو گئے۔ بازیابی کے بعد مغوی خورشید احمد نے تصدیق کی کہ اسے تاوان کے لیے کشمور سے اغواء کیا گیا تھا۔ پولیس نے مغوی کو بحفاظت تھانے منتقل کر لیا ہے، جہاں قانونی کارروائی کے بعد اسے اس کے ورثاء کے حوالے کر دیا جائے گا۔

    ایس ایس پی گھوٹکی ڈاکٹر سمیع اللّٰہ سومرو نے پولیس پارٹی کی کامیاب کارروائی پر ان کی کارکردگی کو سراہتے ہوئے شاباش، تعریفی سرٹیفکیٹ اور نقد انعام دینے کا اعلان کیا ہے۔ عوامی حلقوں نے بھی پولیس کی بروقت کارروائی اور مغوی کی بازیابی کو سراہا ہے۔

  • تنگوانی: مسلح افراد کی فائرنگ سے نوجوان قتل، 3 ملزم گرفتار

    تنگوانی: مسلح افراد کی فائرنگ سے نوجوان قتل، 3 ملزم گرفتار

    تنگوانی (باغی ٹی وی – نامہ نگار منصور بلوچ)تنگوانی کے نواحی گاؤں باران خان باجکانی میں جدید اسلحے سے لیس مسلح افراد نے فائرنگ کر کے نوجوان محمد خان بکھرانی کو قتل کر دیا۔ واقعے کے بعد مقتول کے گھر میں کہرام برپا ہو گیا۔

    عینی شاہدین کے مطابق ملزمان مبینہ طور پر ڈکیتی کے ارادے سے گزر رہے تھے کہ مقتول نے انہیں روکنے کی کوشش کی، جس پر ڈاکوؤں نے جدید ہتھیاروں سے اس پر اندھا دھند فائرنگ کر دی، جس کے نتیجے میں وہ موقع پر ہی جاں بحق ہو گیا۔

    واقعے کے بعد مقتول کے ورثاء نے جائے وقوعہ کے قریب گاؤں نظیر ڈہانی میں پیروں کے نشانات ڈالے، جس پر پولیس اور مقتول کے لواحقین نے مشترکہ کوشش کے ذریعے تین افراد کو گرفتار کر لیا۔ ملزمان کو تھانے منتقل کر کے ان کے خلاف دہشتگردی ایکٹ کے تحت مقدمہ درج کر لیا گیا ہے۔

    درج شدہ مقدمہ میں ملزمان چاکر ڈہانی، نظیر ڈہانی، عبدالکریم ڈہانی اور دو نامعلوم افراد کو نامزد کیا گیا ہے۔
    پولیس کا کہنا ہے کہ باقی مفرور ملزمان کی گرفتاری کے لیے چھاپے مارے جا رہے ہیں جبکہ علاقے میں خوف و ہراس کی فضا قائم ہے۔

  • اوکاڑہ: دیور نے بیوہ بھابھی کو مکان کے تنازع پر قتل کردیا، مقدمہ درج

    اوکاڑہ: دیور نے بیوہ بھابھی کو مکان کے تنازع پر قتل کردیا، مقدمہ درج

    اوکاڑہ (باغی ٹی وی، نامہ نگار ملک ظفر)تھانہ منڈی احمد آباد کی حدود میں افسوسناک واقعہ، دیور نے وراثتی مکان کے تنازع پر 4 بچوں کی ماں بیوہ بھابھی کو ٹولے کے وار کر کے قتل کر دیا۔ واقعہ گاؤں چاہ موہری والا داخلی جھگیاں غلام فرید میں پیش آیا جہاں مقتولہ زاہرا بی بی، جو کہ بیوہ اور چار بچوں کی ماں تھی، اپنے دیور محمد یونس کی طرف سے مکان پر ناجائز قبضے کی دھمکیوں کے باعث جان بچا کر بچوں سمیت لاہور چلی گئی تھی۔

    پولیس ایف آئی آر کے مطابق، وقوعہ کے روز زاہرا بی بی اپنے جیٹھ خالد کے گھر گاؤں واپس آئی تو ملزم محمد یونس نے اپنے ساتھی محمد عاشق کے ہمراہ موقع پر گھات لگا رکھی تھی۔ دونوں نے زاہرا بی بی پر ٹولے سے پے در پے وار کیے جس سے وہ موقع پر ہی جاں بحق ہو گئی۔ واردات کے بعد دونوں ملزمان فرار ہو گئے۔

    پولیس نے مقتولہ کے بھائی کی مدعیت میں مقدمہ نمبر 529/25 درج کر کے تفتیش کا آغاز کر دیا ہے، جبکہ مقتولہ کی لاش کو پوسٹ مارٹم کے لیے اسپتال منتقل کر دیا گیا ہے۔ واقعے پر علاقے میں افسوس اور غم کی فضا ہے، جبکہ ورثاء نے انصاف کی اپیل کی ہے۔

  • موٹر وے ایم فائیو پر خوفناک حادثہ، نوجوان جاں بحق، چار افراد زخمی

    موٹر وے ایم فائیو پر خوفناک حادثہ، نوجوان جاں بحق، چار افراد زخمی

    میر پور ماتھیلو (باغی ٹی وی، نامہ نگار مشتاق علی لغاری)موٹر وے ایم فائیو پر مرید شاخ کے قریب پیر طالب شاہ کے مقام پر ایک افسوسناک ٹریفک حادثے میں 23 سالہ نوجوان سجاد ولد اقبال میرانی موقع پر جاں بحق ہو گیا، جبکہ اسی خاندان کے چار افراد شدید زخمی ہو گئے۔

    تفصیلات کے مطابق کراچی سے واپس اپنے آبائی گاؤں جانے والی میرانی برادری کی کار مقبول موڑ کے قریب تیز رفتاری کے باعث ایک ٹرالر کے پیچھے جا ٹکرائی۔ حادثے میں اقبال، امداد، رشید اور محمد عیسیٰ میرانی زخمی ہو گئے، جنہیں فوری طور پر قریبی اسپتال منتقل کر دیا گیا، جہاں ان کی حالت تشویشناک بتائی جا رہی ہے۔

    موٹر وے پولیس موقع پر پہنچ گئی اور حادثے کی قانونی کارروائی کا آغاز کر دیا گیا۔ حادثے کے بعد علاقے میں افسوس کی فضا پھیل گئی ہے۔ جاں بحق نوجوان سجاد میرانی کی میت آبائی گاؤں روانہ کر دی گئی ہے۔

    ذرائع کے مطابق حادثہ غیر ذمہ دارانہ ڈرائیونگ، تیز رفتاری اور اچانک کٹنگ کے نتیجے میں پیش آیا۔ شہریوں نے موٹر وے پر حفاظتی اقدامات مزید بہتر بنانے کا مطالبہ کیا ہے تاکہ ایسے المناک واقعات سے بچا جا سکے۔

  • اوچ شریف: ہوٹلوں پر آوارہ کتوں کا قبضہ، میونسپل کمیٹی غفلت کا شکار، شہری سراپا احتجاج

    اوچ شریف: ہوٹلوں پر آوارہ کتوں کا قبضہ، میونسپل کمیٹی غفلت کا شکار، شہری سراپا احتجاج

    اوچ شریف (باغی ٹی وی، نامہ نگار حبیب خان)تحصیل احمد پور شرقیہ کا مرکزی و مصروف ترین شہر اوچ شریف آوارہ کتوں کی یلغار سے شدید متاثر ہے۔ جلال پور پیر والا روڈ، ریسٹ ہاؤس، الشمس چوک، محلہ گیلانی، جگ پورہ، عمر ٹاؤن اور ناصر ٹاؤن جیسے گنجان آباد علاقے مکمل طور پر کتوں کے رحم و کرم پر ہیں۔ ہوٹلوں کے باہر دندناتے کتوں کے غول نہ صرف مسافروں کو خوف میں مبتلا کیے ہوئے ہیں بلکہ مقامی خواتین، بچے اور بزرگ بھی گھروں میں محصور ہو چکے ہیں۔

    عینی شاہدین کے مطابق کتوں کے حملوں میں موٹر سائیکل سوار زخمی ہو چکے ہیں، جبکہ ہوٹلوں کے باہر خوف کا سماں ہے۔ شہریوں نے الزام عائد کیا ہے کہ "کتا مار مہم” صرف کاغذی کارروائیوں اور جعلی بلوں تک محدود ہے، حالانکہ میونسپل کمیٹی کو اس مقصد کے لیے باقاعدہ بجٹ فراہم کیا جاتا ہے۔ نہ کوئی ٹیم نظر آتی ہے، نہ کسی کتے کی تلفی کا ریکارڈ موجود ہے۔

    مقامی سماجی کارکنان رجب حسین، محمد اسحاق، طارق آرائیں، ملک زاہد اور نعمان سمیت دیگر شہریوں نے ضلعی حکومت اور ڈپٹی کمشنر بہاولپور سے فوری نوٹس لینے کا مطالبہ کرتے ہوئے کہا ہے کہ میونسپل کمیٹی اوچ شریف کو جوابدہ بنایا جائے اور فوری مؤثر کارروائی کے ذریعے عوام کو آوارہ کتوں کے عذاب سے نجات دلائی جائے۔ انہوں نے سوال اٹھایا کہ کیا شہریوں کی جان و مال کی حفاظت صرف اعلانات تک محدود رہے گی؟ یا واقعی انتظامیہ عملی اقدام بھی کرے گی؟