Category: جرائم و حادثات

اوچ شریف(باغی ٹی وی ،نامہ نگار حبیب خان)نابالغ سے جعلی نکاح کے ذریعے زیادتی، ہائی کورٹ کا سخت ایکشن، مقدمہ درج

اوچ شریف کی راؤ کالونی میں 14 سالہ عاصمہ بی بی کے ساتھ جعلی نکاح کے ذریعے زیادتی کے دل دہلا دینے والے واقعے پر بہاولپور ہائی کورٹ نے سخت نوٹس لیتے ہوئے ملوث افراد کے خلاف فوجداری مقدمات درج کرنے کا حکم دے دیا۔

متاثرہ لڑکی کی والدہ سلمیٰ بی بی نے عدالت میں درخواست دائر کی کہ ان کی بیٹی کو جنید سلیم، شاہد، محبوب، شہزاد اور مرکزی ملزم محمد زاہد نے اغوا کیا۔ بعد ازاں، قاضی محمد وسیم (نکاح خواں) اور دیگر گواہوں کی ملی بھگت سے ایک جعلی نکاح نامہ تیار کیا گیا تاکہ اس غیر قانونی فعل کو نکاح کا روپ دیا جا سکے۔

عدالت عالیہ نے نادرا ریکارڈ کے مطابق متاثرہ لڑکی کی عمر 14 سے 15 سال قرار دی اور فیصلہ سنایا کہ نابالغ لڑکی نکاح کے معاہدے کی قانونی اہلیت نہیں رکھتی۔ عدالت نے ایس ایچ او تھانہ اوچ شریف کو ہدایت کی کہ محمد زاہد، قاضی محمد وسیم، نکاح رجسٹرار اور گواہوں کے خلاف اغوا، زیادتی، جعل سازی اور چائلڈ میرج ریسٹرینٹ ایکٹ سمیت فوجداری دفعات کے تحت مقدمہ درج کیا جائے۔


عدالتی احکامات پر فوری عمل کرتے ہوئے پولیس نے مقدمہ درج کر لیا ہے اور سب انسپکٹر محمد اعتزاز احسن کو تفتیش سونپ دی گئی ہے۔ پولیس ذرائع کا کہنا ہے کہ تمام شواہد اکٹھے کیے جا رہے ہیں اور مکمل چالان جلد عدالت میں پیش کیا جائے گا۔ متاثرہ والدہ نے اعلیٰ حکام سے انصاف کی فراہمی اور ملزمان کو سخت سزا دینے کی اپیل کی ہے تاکہ معاشرے میں ایسے واقعات کی روک تھام ہو سکے۔

اس واقعے نے مقامی آبادی میں شدید غم و غصہ پیدا کیا ہے، اور رہائشیوں اور سماجی کارکنوں نے نابالغ بچیوں کے تحفظ کے لیے سخت قوانین اور ان کے نفاذ پر زور دیا ہے۔

اوچ شریف (باغی ٹی وی، نامہ نگار حبیب خان)اوچ شریف کے نواحی گاؤں چک مانک سے تعلق رکھنے والا نوجوان محمد علی اکبر مانک، جو اسلام آباد میں روزگار کے سلسلے میں مقیم تھا، تفریح کی غرض سے اپنے دوستوں کے ہمراہ غازی تربیلا ڈیم گیا، جہاں نہاتے ہوئے وہ گہرے پانی میں ڈوب گیا۔ حادثے کی اطلاع ملتے ہی ریسکیو ادارے موقع پر پہنچے اور فوری طور پر تلاش کا آپریشن شروع کر دیا گیا، تاہم 48 گھنٹے گزرنے کے باوجود نوجوان کی لاش تاحال برآمد نہ ہو سکی۔

محمد علی کے اہل خانہ شدید ذہنی اذیت اور کرب میں مبتلا ہیں، جبکہ قریبی رشتہ داروں اور اہلِ علاقہ نے اعلیٰ حکام سے مطالبہ کیا ہے کہ ریسکیو آپریشن میں جدید آلات اور اضافی وسائل شامل کیے جائیں تاکہ نوجوان کی لاش جلد از جلد بازیاب کی جا سکے۔

متاثرہ خاندان کا کہنا ہے کہ محمد علی اکبر مانک ایک محنتی، بااخلاق اور ملنسار نوجوان تھا، جو بہتر مستقبل کے لیے گھر سے دور مزدوری کر رہا تھا۔ اس سانحے نے نہ صرف اس کے گھر والوں کو بلکہ پورے علاقے کو سوگوار کر دیا ہے۔

بہاولپور / اوچ شریف (باغی ٹی وی، نامہ نگار حبیب خان)ڈی ایچ اے بہاولپور کے مین گیٹ کے قریب ششمہائی کینال روڈ پر تیز رفتاری کے باعث ایک افسوسناک ٹریفک حادثہ پیش آیا، جس میں ایک نوجوان جاں بحق جبکہ تین شدید زخمی ہو گئے۔ حادثہ اس وقت پیش آیا جب رحمت کالونی کے رہائشی چار نوجوان بی کے اے 540 نمبر پلیٹ والی سوفٹ کار میں سوار تھے کہ گاڑی بے قابو ہو کر سڑک کنارے درخت سے جا ٹکرائی۔

ریسکیو 1122 کے مطابق کار کا ڈرائیور 20 سالہ سمیر ولد محمد ناصر شدید زخمی حالت میں گاڑی کی فرنٹ سیٹ میں پھنس گیا تھا، جسے ریسکیو اہلکاروں نے خصوصی آپریشن کے ذریعے نکالا، تاہم وہ زخموں کی تاب نہ لاتے ہوئے دورانِ منتقلی دم توڑ گیا۔

دیگر زخمیوں کی شناخت 22 سالہ فلک شیر ولد حمید، 21 سالہ ذیشان ناصر، اور 20 سالہ دانش اکرم کے طور پر ہوئی ہے، جو سب کے سب رحمت کالونی کے رہائشی ہیں۔ زخمیوں کو ابتدائی طبی امداد کے بعد فوری طور پر بہاول وکٹوریہ اسپتال منتقل کر دیا گیا۔ پولیس نے حادثے کی تحقیقات کا آغاز کر دیا ہے۔