Category: جرائم و حادثات

اوچ شریف (باغی ٹی وی، نامہ نگار حبیب خان) تھانہ چنی گوٹھ پولیس کی زیرِ حراست مقدمے کے نامزد ملزم نصار کلیم کے فرار ہونے پر پولیس کے اندر ہلچل مچ گئی۔ پولیس ذرائع کے مطابق نصار کلیم کو علاقہ مجسٹریٹ کی جانب سے جوڈیشل ریمانڈ پر جیل منتقل کرنے کے احکامات تھے، مگر پولیس اسے دوبارہ تھانے لے آئی جہاں سے وہ موقع پا کر فرار ہو گیا۔

واقعے کے بعد ڈی پی او بہاولپور نے فوری نوٹس لیتے ہوئے ایس ایچ او اسلم بلوچ، سب انسپکٹر ابرار مجید اور محرر اسد حنیف کو معطل کر دیا۔ تینوں اہلکاروں کے خلاف ایف آئی آر درج کر لی گئی ہے۔ ترجمان پولیس کا کہنا ہے کہ معاملے کی شفاف انکوائری کی جائے گی اور غفلت کے مرتکب اہلکاروں کو سخت محکمانہ کارروائی کا سامنا کرنا پڑے گا۔

دریں اثناء نئے ایس ایچ او کی فوری تعیناتی کے احکامات بھی جاری کر دیے گئے ہیں۔ پولیس نے فرار ہونے والے ملزم کی تلاش کے لیے ٹیمیں تشکیل دے دی ہیں اور ملزم کی جلد گرفتاری کا عزم ظاہر کیا گیا ہے۔

اوچ شریف (باغی ٹی وی، نامہ نگار حبیب خان) قومی شاہراہ ترنڈہ محمد پناہ پر تیز رفتاری اور ٹریفک قوانین کی سنگین خلاف ورزی نے ایک معصوم جان کا چراغ گل کر دیا۔ دو موٹر سائیکل سوار نوجوان بغیر کسی حفاظتی تدابیر کے مخالف سمت سے رانگ سائیڈ پر آ رہے تھے کہ اچانک سامنے سے آنے والے منی ٹرک سے ٹکرا گئے۔ تصادم اتنا شدید تھا کہ 14 سالہ چاند ولد سجاد، سکنہ اوچ شریف، موقع پر ہی دم توڑ گیا جبکہ دوسرا نوجوان وسیم ولد مختیار، عمر تقریباً 20 سال، شدید زخمی ہو گیا۔

ریسکیو 1122 کے مطابق حادثہ اُس وقت پیش آیا جب موٹر سائیکل سوار نوجوان غیر ذمہ داری کا مظاہرہ کرتے ہوئے مخالف سمت سے تیز رفتاری کے ساتھ آ رہے تھے۔ چاند کو سر پر گہری چوٹیں آئیں جس سے اس کی موت واقع ہو گئی، جبکہ وسیم کو ٹانگ اور پاؤں پر گہرے زخم آئے۔ ریسکیو ٹیم نے موقع پر پہنچ کر لاش ضروری قانونی کارروائی کے بعد ورثاء کے حوالے کر دی جبکہ زخمی نوجوان کو فوری طبی امداد دینے کے بعد رورل ہیلتھ سینٹر اوچ شریف منتقل کر دیا گیا، جہاں ڈاکٹروں کے مطابق اس کی حالت خطرے سے باہر ہے۔

عینی شاہدین کا کہنا ہے کہ حادثہ مکمل طور پر نوجوانوں کی غفلت، تیز رفتاری اور ٹریفک قوانین کی کھلی خلاف ورزی کا نتیجہ تھا۔ مقامی شہریوں نے انتظامیہ سے پُرزور مطالبہ کیا ہے کہ شاہراہوں پر رانگ سائیڈ پر چلنے والے موٹر سائیکل سواروں کے خلاف سخت کارروائی کی جائے تاکہ مستقبل میں ایسے دلخراش حادثات سے بچا جا سکے۔

بہاولپور ،باغی ٹی وی (نامہ نگار حبیب خان) کراچی سے لاہور جانے والی ملت ایکسپریس کی زد میں آکر ایک خاتون جان کی بازی ہار گئی۔ حادثہ ملتان روڈ بہاولپور کے قریب "فلائی اوور پھاٹک” کے مقام پر پیش آیا، جہاں خاتون ریلوے لائن کراس کرتے ہوئے ٹرین سے ٹکرا گئیں۔

جاں بحق ہونے والی خاتون کی شناخت سکینہ بی بی زوجہ ظہور احمد کے نام سے ہوئی ہے، جن کی عمر تقریباً 50 سال بتائی گئی ہے۔ انہیں سر پر شدید چوٹیں آئیں، جو جان لیوا ثابت ہوئیں۔پولیس نے فوری طور پر موقع پر پہنچ کر کارروائی کی اور لاش ورثاء کے حوالے کر دی۔ اہل خانہ نے لاش کو ہسپتال منتقل کرنے سے انکار کر دیا۔ مرحومہ کا تعلق فردوس آباد، بندرہ پُلّی، ملتان روڈ بہاولپور سے تھا

اوچ شریف (باغی ٹی وی,نامہ نگارحبیب خان) اوچ شریف کے نواحی علاقے بلہ جھلن میں رات کے وقت ایک دلخراش ٹریفک حادثہ پیش آیا، جس میں ایک ہی خاندان کے تین افراد حادثے کا شکار ہو گئے۔ موٹر سائیکل پر سوار محمد سلیم، اس کی اہلیہ فرزانہ بی بی اور کمسن بیٹی سویرا بی بی سڑک کے کنارے کھڑی ٹریکٹر ٹرالی سے ٹکرا گئے۔ حادثے کی وجہ موٹر سائیکل کی ہیڈ لائٹ کا خراب ہونا بتایا جا رہا ہے، جس کے باعث سامنے کھڑی ٹریکٹر ٹرالی نظر نہ آ سکی۔

افسوسناک حادثے میں 32 سالہ فرزانہ بی بی اور اس کی ایک سالہ بیٹی موقع پر ہی دم توڑ گئیں، جبکہ 35 سالہ محمد سلیم شدید زخمی ہو گیا۔ اطلاع ملنے پر ریسکیو 1122 کی ٹیم فوری طور پر موقع پر پہنچی اور زخمی کو ابتدائی طبی امداد فراہم کرتے ہوئے رورل ہیلتھ سینٹر اوچ شریف منتقل کر دیا۔ جاں بحق ماں بیٹی کی لاشیں ضروری قانونی کارروائی کے بعد ورثاء کے حوالے کر دی گئیں۔

حادثے کے بعد علاقے میں افسوس کی فضا چھا گئی، اہل علاقہ نے سڑکوں پر کھڑی بغیر روشنی والی گاڑیوں کے خلاف کارروائی کا مطالبہ کیا ہے۔