Category: جرائم و حادثات

سیالکوٹ (باغی ٹی وی بیوروچیف شاہد ریاض)ایف آئی اے امیگریشن نے سیالکوٹ ایئرپورٹ پر کامیاب کارروائی کرتے ہوئے جعلی دستاویزات کے ذریعے بیرون ملک سے آنے والے ایک مسافر کو گرفتار کر لیا۔ گرفتار مسافر کی شناخت عبدالحمید کے نام سے ہوئی ہے جو فلائٹ نمبر G9552 کے ذریعے کینیا سے پاکستان پہنچا تھا۔

ایف آئی اے ترجمان کے مطابق عبدالحمید کے پاسپورٹ پر کینیڈا کا جعلی ویزا چسپاں تھا۔ ابتدائی تفتیش سے معلوم ہوا کہ مذکورہ شخص گزشتہ ماہ کینیا گیا تھا اور وہاں سے ایک مقامی ایجنٹ کے ذریعے جعلی ویزا حاصل کیا۔ مسافر کی نیت پاکستان سے کینیڈا روانگی کی تھی جو جعلی ویزے کی بنیاد پر ممکن نہ ہو سکی۔

حکام نے بتایا کہ ملزم کو مزید تفتیش اور قانونی کارروائی کے لیے ایف آئی اے کے اینٹی ہیومن ٹریفکنگ سرکل گجرات کے حوالے کر دیا گیا ہے، جہاں اس کے خلاف مزید قانونی اقدامات کیے جا رہے ہیں۔

سیالکوٹ(باغی ٹی وی، بیوروچیف شاہد ریاض)گھریلو ناچاقی پر شوہر نے بیوی کو فائرنگ کر کے قتل کر دیا، ملزم گرفتار

سیالکوٹ کے نواحی علاقے بٹر گاؤں میں افسوسناک واقعہ پیش آیا ہے جہاں ایک شخص نے گھریلو جھگڑے کے دوران طیش میں آکر اپنی بیوی کو گولی مار کر قتل کر دیا۔ مقتولہ کی شناخت ارم کے نام سے ہوئی ہے جو تین بچوں کی ماں تھی۔

یہ واقعہ تھانہ صدر کی حدود میں پیش آیا۔ مقامی افراد کے مطابق میاں بیوی کے درمیان کافی عرصے سے گھریلو ناچاقی چل رہی تھی۔ بدھ کی صبح معمولی تلخ کلامی نے شدت اختیار کی اور ملزم عمران نے طیش میں آ کر پستول سے فائرنگ کر دی، جس سے ارم موقع پر ہی جاں بحق ہو گئی۔

فائرنگ کی آواز سن کر اہل علاقہ جمع ہو گئے جنہوں نے فوری طور پر پولیس کو اطلاع دی۔ پولیس نے بروقت کارروائی کرتے ہوئے ملزم عمران کو آلہ قتل سمیت گرفتار کر لیا۔ پولیس کا کہنا ہے کہ ابتدائی تفتیش کے مطابق واقعہ گھریلو ناچاقی کا نتیجہ ہے، تاہم مزید تحقیقات جاری ہیں۔

مقتولہ کی لاش کو ضروری قانونی کارروائی کے بعد پوسٹ مارٹم کے لیے سول ہسپتال سیالکوٹ منتقل کر دیا گیا ہے۔ پولیس ذرائع کے مطابق مقتولہ کے ورثاء کی مدعیت میں مقدمہ درج کر کے مزید قانونی کارروائی کا آغاز کر دیا گیا ہے۔

سیالکوٹ (باغی ٹی وی، بیوروچیف شاہد ریاض)سیالکوٹ پولیس نے عید تعطیلات کے دوران نہروں اور دریاؤں میں نہانے پر عائد پابندی کی خلاف ورزی کرنے والے 105 افراد کو گرفتار کر کے ان کے خلاف مقدمات درج کر لیے ہیں۔ یہ کارروائیاں دفعہ 144 کی خلاف ورزی پر ڈسٹرکٹ پولیس آفیسر فیصل شہزاد کی خصوصی ہدایات کے تحت عمل میں لائی گئیں۔

تفصیلات کے مطابق سیالکوٹ پولیس کی جانب سے شہر بھر میں نہروں، دریاؤں اور دیگر آبی مقامات پر سخت نگرانی کے لیے خصوصی ٹیمیں تشکیل دی گئیں تھیں جنہوں نے مختلف مقامات پر چھاپے مار کر دفعہ 144 کا مذاق اڑانے والے افراد کو موقع پر گرفتار کیا۔ گرفتار افراد کے خلاف متعلقہ تھانوں میں قانونی کارروائی شروع کر دی گئی ہے۔

ڈی پی او فیصل شہزاد کا کہنا ہے کہ یہ اقدامات شہریوں کی قیمتی جانوں کے تحفظ اور ڈوبنے جیسے مہلک حادثات کی روک تھام کے لیے کیے جا رہے ہیں۔ انہوں نے والدین سے اپیل کی کہ وہ اپنے بچوں کو نہروں یا دریاؤں میں نہانے سے سختی سے روکیں اور ان پر نظر رکھیں تاکہ کسی بھی افسوسناک واقعے سے بچا جا سکے۔

سیالکوٹ پولیس نے واضح کیا ہے کہ دفعہ 144 کی خلاف ورزی کرنے والوں کے خلاف بلا امتیاز کارروائی جاری رہے گی اور قانون کی عملداری کو ہر حال میں یقینی بنایا جائے گا۔