Category: جرائم و حادثات

میرپورماتھیلو،باغی ٹی وی (نامہ نگارمشتاق لغاری)شکارپور میں صحافی جان محمد مہر کا قاتل پولیس مقابلے میں مارا گیا

تفصیلات کے مطابق شکارپور کے کچے کے علاقے میں پولیس کی کارروائی کے دوران معروف صحافی جان محمد مہر کا مبینہ قاتل شیرو مہر ہلاک ہوگیا۔ شیرو مہر پر الزام تھا کہ وہ 14 اگست 2023ء کو سکھر میں پیش آنے والے صحافی کے بہیمانہ قتل میں مرکزی کردار تھا۔ شکارپور پولیس نے ڈرون کی مدد سے کارروائی کی جس کے نتیجے میں فائرنگ کا تبادلہ ہوا اور شیرو مہر مارا گیا۔

ذرائع کے مطابق مقابلے میں شیرو مہر کا بیٹا، ایک خاتون اور نصر جتوئی کا بھائی سراج عرف سرو جتوئی بھی زخمی ہوئے۔ واقعے کی تصدیق کرتے ہوئے صوبائی وزیر داخلہ ضیاء الحسن لنجار نے کہا کہ سندھ پولیس نے صحافی کے قاتل کو اس کے انجام تک پہنچا دیا، یہ کارروائی قانون کی بالادستی کے لیے ایک اہم قدم ہے۔

وزیر توانائی سندھ ناصر حسین شاہ نے بتایا کہ پولیس کی بھرپور کوشش تھی کہ ملزم کو زندہ گرفتار کیا جائے تاہم مزاحمت کے دوران فائرنگ کا تبادلہ ہوا۔ ڈی آئی جی لاڑکانہ ناصر آفتاب نے تصدیق کی کہ شیرو مہر مارا گیا، جبکہ اس کے بیٹے کی ہلاکت کی بھی اطلاعات موصول ہوئی ہیں۔ پولیس آپریشن کے دوران متعدد ڈاکوؤں کے زخمی ہونے کی بھی خبریں ہیں۔

واضح رہے کہ سندھ حکومت نے صحافی کے قتل میں مطلوب مرکزی ملزم کے سر کی قیمت 50 لاکھ روپے مقرر کی تھی۔ واقعے کی تحقیقات کے لیے 7 رکنی مشترکہ تحقیقاتی ٹیم بھی بنائی گئی تھی جس میں آئی ایس آئی، ایم آئی، رینجرز، ایف آئی اے اور دیگر حساس اداروں کے افسران شامل تھے۔

سکھر(باغی ٹی وی نامہ نگار) کرپشن کے خلاف زیرو ٹالرنس، تین پولیس اہلکار برطرف

سکھر میں پولیس کے اعلیٰ افسران کی جانب سے کرپشن اور اختیارات کے ناجائز استعمال کے خلاف سخت کارروائی عمل میں لائی گئی ہے۔ ڈی آئی جی سکھر کیپٹن (ر) فیصل عبداللہ چاچڑ نے آئی جی سندھ غلام نبی میمن کے واضح پالیسی احکامات کی روشنی میں ضلع سکھر کے تین اہلکاروں کے خلاف سخت تادیبی اقدامات اٹھائے ہیں۔

تفصیلات کے مطابق، سب انسپیکٹر عبدالرحمان کاکیپوٹو، ہیڈ کانسٹیبل ضمیر قاضی اور پولیس کانسٹیبل حضور بخش ملک پر کرپشن، غیر قانونی سرگرمیوں اور اختیارات سے تجاوز سمیت سنگین الزامات عائد تھے۔ ان الزامات پر ڈی آئی جی سکھر نے شوکاز نوٹس جاری کرتے ہوئے سکھر رینج کے ایک سینئر آفیسر کو میرٹ کی بنیاد پر محکمہ جاتی انکوائری کا حکم دیا تھا۔

انکوائری آفیسر کی رپورٹ کا بغور جائزہ لینے کے بعد ڈی آئی جی سکھر نے اردلی روم کے دوران اہم فیصلے صادر کیے۔ سب انسپیکٹر عبدالرحمان کاکیپوٹو پر تمام الزامات ثابت ہونے پر انہیں میجر پنشمنٹ کے تحت ایک سال کی سروس سے برخاست کر دیا گیا۔ اسی طرح ہیڈ کانسٹیبل ضمیر قاضی پر بھی الزامات ثابت ہونے پر انہیں ایک سال کی سروس سے برخاست کرتے ہوئے تعلقہ پنو عاقل میں دوبارہ تعیناتی پر پابندی عائد کر دی گئی۔ تاہم، پولیس کانسٹیبل حضور بخش ملک کو تنبیہ کرتے ہوئے آئندہ محتاط رہنے کی ہدایت کی گئی۔

علاوہ ازیں، برطرف کیے گئے پولیس کانسٹیبل منصور پتافی کی نوکری پر بحالی کی اپیل منظور کر لی گئی جبکہ ایک اور برطرف کانسٹیبل جاوید احمد کلهوڑو کی بحالی کی اپیل مسترد کر دی گئی۔ ڈی آئی جی سکھر نے ایک انسپیکٹر اور چار اسسٹنٹ سب انسپیکٹرز کی تبادلوں کی درخواستوں پر بھی احکامات جاری کیے۔

اپنے پیغام میں ڈی آئی جی سکھر نے واضح کیا کہ کسی بھی قسم کی غفلت، مجرمانہ سرگرمیوں، اختیارات سے تجاوز یا سماجی برائیوں میں ملوث افسران و اہلکار کسی رعایت کے مستحق نہیں ہوں گے اور ان کے خلاف سخت ترین قانونی و محکمہ جاتی کارروائی عمل میں لائی جائے گی۔ ان سخت اقدامات سے سکھر پولیس میں کرپشن کے خلاف ایک واضح پیغام دیا گیا ہے۔