Category: جرائم و حادثات

اوچ شریف (باغی ٹی وی، نامہ نگار حبیب خان)مدرسہ امیر المدارس اوچ شریف میں قانون نافذ کرنے والے اہلکاروں کا غیر قانونی دھاوا، جمعیت علماء اسلام کا شدید ردعمل، اعلیٰ سطحی تحقیقات کا مطالبہ

مدرسہ و مسجد امیر المدارس اوچ شریف میں 17 مئی بروز ہفتہ کو پیش آنے والے افسوسناک واقعے کے خلاف جمعیت علماء اسلام تحصیل احمد پور شرقیہ اور حلقہ پی پی 250 اوچ شریف کا مشترکہ و ہنگامی اجلاس مدرسہ امیر المدارس میں منعقد ہوا۔ اجلاس میں قاری سیف الرحمن راشدی، امیر جمعیت علماء اسلام ضلع بہاولپور نے بطورِ خاص شرکت کی، جبکہ تحصیل امیر پیر حماد اللہ گنمب کی زیر صدارت اس اہم اجلاس میں جمعیت کے ضلعی و تحصیلی رہنماؤں اور بڑی تعداد میں کارکنان نے شرکت کی۔

اجلاس میں مدرسہ و مسجد امیر المدارس پر سرکاری وردی میں ملبوس اہلکاروں کے ڈرامائی انداز میں داخل ہونے، چادر و چاردیواری کے تقدس کی پامالی، مسجد میں بوٹوں سمیت گھسنے، منتظمین کو زدوکوب کرنے اور حبسِ بے جا میں رکھنے جیسے غیر قانونی فعل پر تفصیلی غور کیا گیا۔ واقعے کو انتہائی تشویشناک اور دینی اقدار کے منافی قرار دیتے ہوئے، جمعیت علماء اسلام نے اسے ایک ناقابلِ برداشت عمل قرار دیا۔

اجلاس کے بعد ایک متفقہ قرارداد کے ذریعے مطالبہ کیا گیا کہ صوبائی حکومت اور ضلعی انتظامیہ بہاولپور واقعے کی اعلیٰ سطح پر شفاف تحقیقات کرائے، اور ملوث اہلکاروں کو قانون کے کٹہرے میں لا کر مثالی سزائیں دی جائیں۔ جمعیت علماء اسلام نے واضح کیا کہ اگر فوری انصاف نہ کیا گیا تو جماعت راست اقدام اُٹھانے پر مجبور ہو گی۔

اجلاس میں قاضی عمر فاروق فاروقی (تحصیل جنرل سیکرٹری)، مولانا نذیر احمد وارن، مہر غلام ربانی کاٹھیہ، مولانا اسد اللہ مدنی، مولانا محمد بابر علی صدیقی سمیت متعدد دیگر اکابرین نے بھی اظہار خیال کرتے ہوئے مدرسہ و مسجد کے تقدس کو پامال کرنے والے اقدامات کو ناقابلِ معافی جرم قرار دیا۔

یاد رہے کہ گذشتہ روز سیکیورٹی اہلکاروں کی یونیفارم ملبوس کچھ اہلکاروں نے مدرسے پر غیر قانونی اور غیر اخلاقی انداز میں دھاوا بول کر مدرسے کے مدرس اور دیگر لوگوں پر تشدد کیا، طلباء کو ہراساں کیا، حبس بے جا میں رکھا اور پھر مدرس کو اپنی گاڑیوں میں ڈال کر ساتھ لے گئے۔ راستے میں انہیں ہراساں کیا گیا، مدرسے میں مدرس کو تھپڑ مارے گئے اور ان کی تذلیل کی گئی۔ کچھ دور جا کر سیکیورٹی اہلکاروں نے مدرس سے شناختی کارڈ طلب کیا، شناختی کارڈ دیکھنے اور ڈیٹا چیک کرنے کے بعد انہیں راستے میں چھوڑ دیا۔

اوچ شریف (باغی ٹی وی، نامہ نگار حبیب خان) اوچ شریف میں بے نظیر انکم سپورٹ پروگرام (BISP) کے تحت مالی امداد لینے والی خواتین کی رقوم میں ناجائز کٹوتی کرنے کی کوشش ناکام بنا دی گئی۔ اسسٹنٹ کمشنر احمد پور شرقیہ محمد نوید حیدر کی بروقت کارروائی سے بااثر اور چالاک ایجنٹ محمد اکرام رنگے ہاتھوں گرفتار کر لیا گیا، جس کے خلاف مقدمہ درج کر کے رقم متاثرہ خاتون کو واپس دلوا دی گئی۔

تفصیلات کے مطابق گورنمنٹ شمس الدین گیلانی بوائز ڈگری کالج اوچ شریف میں قائم بی آئی ایس پی کیمپ میں ایجنٹ محمد اکرام نے نسیم اختر زوجہ سعید احمد (شناختی کارڈ نمبر 31201-9770509-2) سے 13,500 روپے کی امدادی رقم میں سے 1,000 روپے ناجائز طور پر کاٹ کر صرف 12,500 روپے ادا کیے۔ واقعے کی اطلاع اسسٹنٹ ڈائریکٹر BISP عامر شہزاد ولد علی رشید نے دی، جس پر فوری پولیس کارروائی کرتے ہوئے محمد اکرام کے خلاف مقدمہ نمبر 420 ت پ کے تحت درج کر کے تفتیش شروع کر دی گئی۔

کارروائی کے وقت موقع پر موجود گواہان میں کیمپ انچارج محمد اشرف اور نائب قاصد عبدالمناف شامل تھے۔ ایجنٹ محمد اکرام ابتدائی طور پر فرار ہو گیا، تاہم محمد فیاض ولد خلیل احمد نے اس کی زیر استعمال ڈیوائس قبضے میں لے کر پولیس کے حوالے کر دی، جس سے مزید شواہد اکٹھے کیے جا رہے ہیں۔

اسسٹنٹ کمشنر محمد نوید حیدر نے موقع پر پہنچ کر متاثرہ خاتون کو مکمل رقم واپس دلائی اور اس عمل کے ذریعے عوامی اعتماد بحال کیا۔ انہوں نے واضح کیا کہ وزیراعلیٰ پنجاب کے وژن اور کمشنر بہاولپور و ڈپٹی کمشنر کے احکامات کی روشنی میں فلاحی منصوبوں میں شفافیت یقینی بنائی جا رہی ہے، اور کسی بھی کرپشن پر سخت کارروائی ہو گی۔

بعد ازاں اسسٹنٹ کمشنر نے اوچ شریف کے مرکزی بازار میں تجاوزات کے خلاف بھی کریک ڈاؤن کیا، متعدد دکانیں سیل کی گئیں اور بھاری جرمانے عائد کیے گئے۔ شہریوں نے ان جرات مندانہ اقدامات کو سراہا اور انتظامیہ پر بھرپور اعتماد کا اظہار کیا۔