کراچی(باغی ٹی وی رپورٹ) کورنگی کریک میں گڑھے میں لگنے والی خوفناک آتشزدگی کی وجہ سامنے آگئی ہے۔ تیل و گیس ماہرین کے مطابق، آگ گیس کے زیر زمین ذخیرے میں لگی ہو سکتی ہے، جو کم گہرائی میں موجود چھوٹا ذخیرہ ہو سکتا ہے۔
کنسٹرکشن کمپنی کے سی ای او نے بتایا کہ انہوں نے 1200 فٹ تک گہرائی میں کھدائی کی تھی اور مٹی کی ٹیسٹنگ بھی کروائی تھی، لیکن گیس کی موجودگی کی کوئی رپورٹ نہیں تھی۔ انہوں نے واضح کیا کہ کھدائی بورنگ کے پانی کے لیے کی گئی تھی۔
یہ خبر بھی پڑھیں
کراچی: کورنگی آئل ریفائنری کے نزدیک گیس پائپ لائن میں شدید آگ
چیف فائر افسر محمد ہمایوں نے بتایا کہ رات گئے آگ لگنے کے بعد فائر بریگیڈ کی گاڑیاں موقع پر پہنچائی گئیں، لیکن پانی کا چھڑکاؤ، مٹی اور ریت کا استعمال روک دیا گیا ہے۔ ان کے مطابق، آگ لگنے کی جگہ سے پانی اور ریت سمیت مختلف نمونے لیے جا رہے ہیں، جن کے ٹیسٹ رزلٹ دو سے تین گھنٹوں میں متوقع ہیں۔ ان کا کہنا ہے کہ ابھی حتمی طور پر یہ کہنا مشکل ہے کہ یہ گیس لائن ہے یا گیس پاکٹ۔
چیف فائر افسر نے مزید بتایا کہ مختلف اداروں کے ساتھ مل کر آگ بجھانے کی حکمت عملی بنائی جا رہی ہے، اور کھدائی کے دوران رات گئے اچانک آگ بھڑک اٹھی تھی۔ تحقیقات جاری ہیں تاکہ آتشزدگی کی اصل وجہ معلوم کی جا سکے۔
