Category: جرائم و حادثات

سیالکوٹ (باغی ٹی وی، بیوروچیف شاہد ریاض) سیالکوٹ میں ایک ہی دن کے دوران قتل، بہیمانہ تشدد، قحبہ خانے پر پولیس چھاپہ اور ڈی ایس پی دفتر کے باہر فائرنگ جیسے متعدد سنگین واقعات نے شہریوں میں خوف و ہراس پھیلا دیا ہے۔ دوبرجی ملیاں میں پولیس نے قحبہ خانے پر کارروائی کرتے ہوئے تین خواتین سمیت 12 افراد کو گرفتار کر لیا۔ پتوکی کی رہائشی یاسمین نامی خاتون کرائے کے مکان میں غیرقانونی دھندہ چلا رہی تھی جو مختلف شہروں سے لڑکیاں بلا کر قحبہ خانہ چلاتی تھی۔ پولیس نے سب انسپکٹر عدیل فاضل کی مدعیت میں مقدمہ درج کر کے تفتیش شروع کر دی ہے۔

تھانہ نیکاپورہ کے علاقے میں پسند کی شادی کی رنجش پر ملزم حمزہ بٹ نے اپنے بہنوئی محمد ابرار کو اس وقت فائرنگ کر کے قتل کر دیا جب وہ اپنی بیوی کی وفات کے بعد قبرستان جا رہا تھا۔ پولیس نے مقدمہ درج کر کے ڈی ایس پی سٹی طارق محمود ڈھڈی کی نگرانی میں تفتیش مکمل کی، جس پر عدالت نے قاتل کو سزائے موت سنا دی۔

ادھر جامکے چیمہ میں گوجرانوالہ پولیس سے برخاست ہونے والے سابق انسپکٹر ملک عرفان نے موبائل چوری کے شبے میں اپنے ڈیرے پر کام کرنے والے نوجوان کاشف مسیح کو روایتی پولیس طریقے سے بہیمانہ تشدد کا نشانہ بنایا، جس کے باعث نوجوان موقع پر دم توڑ گیا۔ پولیس نے مقدمہ تو درج کر لیا مگر مرکزی ملزم تاحال گرفتار نہ ہو سکا۔ واقعے کے خلاف مقامی مسیحی برادری نے سڑک پر ٹائر جلا کر احتجاج کیا۔

اسی روز ڈی ایس پی پسرور کے دفتر کے باہر دیرینہ دشمنی پر مخالف فریق نے فائرنگ کر کے چار افراد کو زخمی کر دیا، جن میں تین افراد عدالت میں پیشی کے لیے آئے تھے جبکہ ایک زخمی عرضی نویس تھا۔ تمام زخمیوں کو فوری طور پر سیالکوٹ اسپتال منتقل کر دیا گیا۔

ان پے در پے واقعات نے سیالکوٹ میں امن و امان کی صورتحال پر سنگین سوالات اٹھا دیے ہیں جبکہ شہری حلقے پولیس سے بھرپور کارروائی کا مطالبہ کر رہے ہیں۔

سیالکوٹ (باغی ٹی وی،بیوروچیف شاہدریاض) ڈی جی پی ایچ اے جنید تاج بھٹی کی مبینہ خودکشی کی کوشش، حالت تشویشناک

ابتدائی اطلاعات کے مطابق پنجاب ہارٹیکلچر اتھارٹی (پی ایچ اے) سیالکوٹ کے ڈائریکٹر جنرل جنید تاج بھٹی نے اپنے دفتر میں مبینہ طور پر خود کو سر میں گولی مار کر خودکشی کی کوشش کی ہے۔ واقعے کے فوراً بعد انہیں شدید زخمی حالت میں اسپتال منتقل کیا گیا، جہاں ان کی حالت نازک بتائی جا رہی ہے۔

واقع کی اطلاع ملتے ہی ڈی پی او سیالکوٹ فیصل شہزاد پولیس کی بھاری نفری کے ہمراہ موقع پر پہنچے، جبکہ فرانزک اور تفتیشی ٹیموں نے جائے وقوعہ سے شواہد اکٹھے کر کے قانونی کارروائی کا آغاز کر دیا ہے۔

ڈی پی او فیصل شہزاد کا کہنا ہے کہ واقعے کی تمام پہلوؤں سے تحقیقات کی جا رہی ہیں اور جلد اصل حقائق منظرعام پر لائے جائیں گے۔ پولیس کا کہنا ہے کہ واقعے کی نوعیت، وجوہات اور محرکات کو سامنے لانے کے لیے مکمل شفاف تفتیش کی جا رہی ہے۔

سیالکوٹ (باغی ٹی وی بیوروچیف شاہد ریاض) تھانہ کوٹلی لوہاراں کے علاقے سے چھ ماہ قبل لاپتہ ہونے والا دو سالہ محمد ولی مردہ حالت میں ایک تالاب سے برآمد ہو گیا۔ معصوم بچہ کھیلتے کھیلتے گھر سے باہر نکلا تھا اور اس کے بعد سے لاپتہ تھا۔ اس واقعہ کی ایف آئی آر بچے کے والد غلام فرید کی مدعیت میں تھانہ کوٹلی لوہاراں میں درج کی گئی تھی۔

اہل علاقہ کے مطابق تالاب کی صفائی کے دوران بچے کی نعش اچانک برآمد ہوئی، جس پر فوری طور پر پولیس کو اطلاع دی گئی۔ مقامی پولیس موقع پر پہنچ گئی اور نعش کو تحویل میں لے کر پوسٹ مارٹم کے لیے بھجوا دیا گیا ہے۔

پولیس حکام کے مطابق واقعے کی تحقیقات کا آغاز کر دیا گیا ہے اور تمام پہلوؤں کو مدنظر رکھتے ہوئے تفتیش کی جا رہی ہے۔ پولیس کا کہنا ہے کہ پوسٹ مارٹم رپورٹ اور دیگر شواہد کی روشنی میں یہ طے کیا جائے گا کہ یہ قتل ہے یا کوئی حادثہ۔