احمد پور شرقیہ میں پولیس کی کارروائی کے دوران ایک منشیات فروش کو گرفتار کر کے مقدمہ درج کیا گیا۔
رپورٹ کے مطابق منشیات فروشوں سے تعلقات کے الزام میں تھانہ صدر احمد پور شرقیہ کے ایس ایچ او دلبر خان کو معطل کر دیا گیا۔ ڈی پی نے نوٹس لیتے ہوئے معطل ایس ایچ او کے خلاف بھی مقدمہ درج کروا دیا ہے۔
Category: جرائم و حادثات
عوام کے محافظ منشیات فروشوں کے ساتھ مل گئے، احمد پور شرقیہ ایس ایچ او معطل
سانحہ گل پلازہ کا مقدمہ سرکار کی مدعیت میں درج، غفلت اور لاپرواہی کی دفعات شامل
کراچی: سانحہ گل پلازہ کا مقدمہ سرکار کی مدعیت میں درج کرلیا گیا۔
پولیس ذرائع کے مطابق مقدمے میں غفلت اور لاپرواہی کی دفعات شامل کی گئی ہیں، تحقیقاتی رپورٹ نہیں آئی اس لئے مقدمہ نامعلوم افراد کے خلاف درج کیا گیا،مقدے میں کہا گیا کہ بجلی بند کردی گئی تھی جس سے مشکلات کا سامنا کرنا پڑا، گل پلازہ کے کئی دروازے بند تھے جس سے صورتحال خراب ہوئی۔
گل پلازہ واقعے کے مقدمے تاحال کسی کو ذمہ دار نہیں ٹھہرایا گیا، پولیس ذرائع کے مطابق ایف آئی آر کاٹنے کے بعد گل پلازہ سیل کر دیا گیا ہے۔
راولپنڈی : 14 سالہ بچی اغوا کے بعد قتل
راولپنڈی میں 14 سالہ بچی کو اغوا کے بعد قتل کردیا گیا۔
راولپنڈی ڈھوک حسو سے دو روز قبل لاپتہ ہونے والی 14 سالہ بچی کی بوری بند لاش لیڈیز پارک کیرج فیکٹری روڈ سے برآمد ہوئی،14 سالہ مصباح 22 جنوری کو گھر سے دوکان پر بوتل لینے گئی لیکن واپس گھر نہیں آئی اور لاپتہ ہو گئی تھی، بچی کے اغوا کا مقدمہ 23 جنوری کو تھانہ رتہ امرال میں اسکے بھائی کی مد عیت میں درج کیا گیا تھا۔
مدعی مقدمہ نے بچی کی لاش کو شناخت کرلیا، لاش کو پوسٹ مارٹم کے لئے اسپتال منتقل کردیا گیا، پولیس کے مطابق بچی کو جنسی زیادتی کے بعد قتل کیا گیا یا نہیں یہ بات پوسٹ مارٹم میں سامنے آئے گی،لاش ملنے کی اطلاع پر ایس ایس پی آپریشنز، ایس ایس پی انوسٹیگیشن، ایس پی راول پولیس نفری کے ہمراہ موقع پر پہنچ گئے، موقع سے شواہد اکٹھے کیے جا رہے ہیں، وقوعہ کی تمام زاویوں سے تحقیقات کی جا رہی ہیں۔
ترجمان راولپنڈی پولیس کا کہنا ہے کہ واقعے میں ملوث ملزمان کو گرفتار کرکے قانون کے کٹہرے میں کھڑا کیا جائے گا۔
کوٹ دادو جھانگڑہ روڈ حادثہ، خاتون اور کمسن بچہ جاں بحق
اوچ شریف (باغی ٹی وی، نامہ نگار حبیب خان) احمد پور شرقیہ کے نواحی علاقے کوٹ دادو گھلو جھانگڑہ روڈ پر ایک دلخراش ٹریفک حادثہ پیش آیا، جس میں ہتھیجی سے تعلق رکھنے والی فیملی شدید متاثر ہوئی۔ حادثے کے نتیجے میں ایک خاتون اور تین سالہ کمسن بچہ موقع پر ہی جاں بحق ہو گئے جبکہ دو افراد شدید زخمی ہو گئے۔
ریسکیو ذرائع کے مطابق دو موٹر سائیکلیں آمنے سامنے ٹکرا گئیں، اسی دوران پیچھے سے آنے والا ایک تیز رفتار ٹریلر دونوں موٹر سائیکلوں کے اوپر سے گزرتا ہوا موقع سے فرار ہو گیا۔ حادثے میں شدید سر کی چوٹیں لگنے کے باعث 32 سالہ روبینہ بی بی اور ان کا تین سالہ بیٹا محمد منیب موقع پر ہی دم توڑ گئے۔
زخمی ہونے والے دو افراد کو ابتدائی طبی امداد فراہم کرنے کے بعد بہاول وکٹوریہ ہسپتال منتقل کیا گیا جہاں ان کا علاج جاری ہے۔ جاں بحق افراد کی میتیں قانونی کارروائی مکمل ہونے کے بعد لواحقین کے حوالے کر دی گئیں۔ حادثے کے بعد ہتھیجی اور گردونواح کے علاقوں میں سوگ کی فضا چھا گئی۔
ڈی آئی جی سکھر کا کچہ علاقوں کا ہنگامی دورہ، ڈرون سے نگرانی
گھوٹکی (باغی ٹی وی، نامہ نگار مشتاق علی لغاری) ڈی آئی جی سکھر رینج ناصر آفتاب نے رونتی کچہ اور ماچکہ کچہ کے انتہائی حساس علاقوں کا ہنگامی اور تفصیلی دورہ کیا۔ دورے کے دوران جدید ڈرون ٹیکنالوجی کے ذریعے کچہ کے دشوار گزار اور مشکوک مقامات کا فضائی معائنہ کیا گیا تاکہ جرائم پیشہ عناصر کی نقل و حرکت اور ممکنہ ٹھکانوں پر کڑی نظر رکھی جا سکے۔
ڈی آئی جی ناصر آفتاب نے موقع پر موجود پولیس افسران کو ہدایت کی کہ کچہ کے علاقوں میں ڈاکوؤں اور جرائم پیشہ گروہوں کے خلاف انٹیلیجنس بیسڈ کارروائیاں مزید تیز کی جائیں اور جدید ٹیکنالوجی کا مؤثر استعمال یقینی بنایا جائے۔
انہوں نے کہا کہ کچہ کے علاقوں میں امن و امان کی بحالی، اغواء برائے تاوان، ڈکیتی اور دیگر سنگین جرائم کا خاتمہ پولیس کی اولین ترجیح ہے اور اس مقصد کے لیے کسی قسم کی کوتاہی برداشت نہیں کی جائے گی۔
ڈی آئی جی سکھر نے جوانوں کے حوصلے اور کارکردگی کو سراہتے ہوئے کہا کہ سکھر رینج پولیس عوام کے جان و مال کے تحفظ کے لیے ہر ممکن اقدامات جاری رکھے گی اور جرائم کے مکمل خاتمے تک کارروائیاں جاری رہیں گی۔
کندھ کوٹ : ٹریفک حادثہ، ٹرک کی ٹکر سے دو نوجوان جاں بحق
کندھ کوٹ(نامہ نگار) انڈس ہائی وے انڑ واہ کے قریب تیز رفتار ٹرک نے موٹر سائیکل کو ٹکر مار دی، جس کے نتیجے میں دو نوجوان موقع پر ہی جاں بحق ہو گئے۔
تفصیلات کے مطابق حادثہ اس وقت پیش آیا جب انڈس ہائی وے پر ٹرک اور موٹر سائیکل میں شدید تصادم ہوا۔ موٹر سائیکل پر سوار حب علی چاچڑ اور اویس ملک ٹرک کی زد میں آ کر موقع پر ہی دم توڑ گئے۔
حادثے کے بعد مقامی افراد اور پولیس موقع پر پہنچ گئے، لاشوں کو ضروری کارروائی کے بعد ہسپتال منتقل کر دیا گیا۔ واقعے کے باعث کچھ دیر کے لیے ٹریفک بھی متاثر رہی۔ پولیس نے حادثے کی تحقیقات شروع کر دی ہیں۔
گھوٹکی:جعلی مقابلے کا الزام، نثار سمیجو کے قتل پر ورثاء کا احتجاج
میرپورماتھیلو (باغی ٹی وی، نامہ نگار مشتاق علی لغاری) گھوٹکی پولیس کی جانب سے مبینہ جعلی مقابلے میں نثار سمیجو کے قتل کے خلاف مقتول کے ورثاء نے ایس ایس پی گھوٹکی کے دفتر کے سامنے شدید احتجاج کیا اور انصاف کا مطالبہ کیا۔
احتجاج کرنے والے ورثاء کا کہنا تھا کہ نثار سمیجو کو پہلے گرفتار کیا گیا اور بعد ازاں جان بوجھ کر جعلی مقابلے میں قتل کر دیا گیا، جبکہ اس پر کسی بھی سنگین الزام کو ثابت نہیں کیا جا سکا تھا۔ ان کے مطابق یہ مقابلہ سراسر جھوٹ پر مبنی تھا اور حقیقت چھپانے کے لیے ڈرامہ رچایا گیا۔
ورثاء نے گاؤں بیلو میرپور کے پولیس تھانے کے ایس ایچ او قابل بھائی اور دیگر پولیس اہلکاروں پر قتل میں ملوث ہونے کا الزام عائد کرتے ہوئے کہا کہ پولیس نے اپنے اختیارات کا ناجائز استعمال کر کے ایک بے گناہ نوجوان کی جان لی۔
احتجاج کنندگان نے ایس ایس پی گھوٹکی سے مطالبہ کیا کہ واقعے کی غیر جانبدارانہ اور شفاف تحقیقات کرائی جائیں، ملوث پولیس اہلکاروں کے خلاف سخت قانونی کارروائی عمل میں لائی جائے اور مقتول کے اہلِ خانہ کو فوری انصاف فراہم کیا جائے۔ ورثاء نے خبردار کیا کہ اگر مطالبات تسلیم نہ کیے گئے تو احتجاج کا دائرہ مزید وسیع کیا جائے گا۔
رینالہ خورد میں ٹریفک حادثہ، ایک نوجوان جاں بحق
رینالہ خورد (نامہ نگار) قومی شاہراہ رینالہ خورد شرقی بائی پاس پر افسوسناک ٹریفک حادثہ پیش آیا جہاں ایک مزدا لوڈر وین بے قابو ہو کر سڑک پر جاتے ہوئے موٹر سائیکل پر الٹ گئی۔ حادثے کے نتیجے میں ایک موٹرسائیکل سوار موقع پر ہی جاں بحق جبکہ دوسرا شدید زخمی ہو گیا۔
تفصیلات کے مطابق مزدا لوڈر وین اچانک بے قابو ہوئی اور موٹر سائیکل پر جا گری، جس کے باعث موٹر سائیکل پر سوار 28 سالہ محمد اصغر ولد شمشاد علی، سکنہ چک نمبر 15 ون اے ایل جاں بحق ہو گیا، جبکہ راجہ ٹاؤن اختر آباد کا رہائشی 25 سالہ وقار شدید زخمی ہو گیا۔
حادثے کی اطلاع ملتے ہی ریسکیو ٹیم اور پولیس موقع پر پہنچ گئی، جاں بحق نوجوان کی نعش اور زخمی کو فوری طور پر مقامی ہسپتال منتقل کر دیا گیا۔ پولیس نے واقعے کی تحقیقات شروع کر دی ہیں۔
گوجرانوالہ: پنجاب فوڈ اتھارٹی کی بھرپور کارروائیاں، 400 سے زائد فوڈ پوائنٹس چیک، جرمانے اور یونٹس سیل
گوجرانوالہ (باغی ٹی وی، نامہ نگار محمد رمضان نوشاہی)کھیت سے پلیٹ تک محفوظ خوراک کی فراہمی کے مشن کے تحت ڈپٹی ڈائریکٹر آپریشنز پنجاب فوڈ اتھارٹی گوجرانوالہ کی سربراہی میں فوڈ سیفٹی ٹیموں نے ضلع بھر میں جارحانہ انداز میں کارروائیاں کیں۔ گزشتہ دو روز کے دوران 400 سے زائد فوڈ پوائنٹس کی چیکنگ کی گئی، جس کے دوران 30 فوڈ یونٹس پر مجموعی طور پر 3 لاکھ 58 ہزار روپے جرمانے عائد کیے گئے جبکہ ایک سویٹس شاپ اور واٹر پلانٹ کی پروڈکشن بند کر دی گئی۔
ترجمان پنجاب فوڈ اتھارٹی کے مطابق کارروائیوں کے دوران 2 من سے زائد ایکسپائر اور ممنوعہ اشیائے خورونوش اور 15 لٹر مضرِ صحت بیوریجز کو موقع پر ہی تلف کر دیا گیا۔ یہ کارروائیاں کلاسکے، ڈی سی روڈ، وزیرآباد، ایمن آباد، قلعہ دیدار سنگھ، نوشہرہ ورکاں سمیت ضلع کے مختلف علاقوں میں کی گئیں۔
مزید بتایا گیا کہ 54 فوڈ پوائنٹس کو اصلاحی نوٹسز جاری کیے گئے تاکہ وہاں موجود خامیوں کو دور کیا جا سکے۔ ناکہ بندیوں کے دوران 235 دودھ بردار گاڑیوں اور 35 ملک شاپس پر موجود تقریباً 57 ہزار لٹر دودھ کا معائنہ بھی کیا گیا۔
تفصیلات کے مطابق کلاسکے اڈا میں واقع ایک سویٹس شاپ کے پروڈکشن یونٹ کو سنگین خلاف ورزیوں پر بند کر دیا گیا جبکہ ڈی سی روڈ پر واقع ایک واٹر پلانٹ کو پانی میں سوڈوموناس نامی خطرناک بیکٹیریا کی موجودگی پر سیل کر دیا گیا۔ معائنے کے دوران فوڈ یونٹس کے اسٹوریج ایریاز میں صفائی کے ناقص انتظامات، ملازمین کے میڈیکل و ٹریننگ سرٹیفکیٹس اور لازم ریکارڈ کی عدم موجودگی، جبکہ بدبودار پروسیسنگ ایریاز میں اشیائے خورونوش کو زمین پر رکھنے جیسی سنگین خلاف ورزیاں سامنے آئیں۔
ترجمان پنجاب فوڈ اتھارٹی کا کہنا ہے کہ فوڈ فراڈ مافیا کے خلاف 24/7 کارروائیاں جاری رہیں گی۔ ممنوعہ اور ایکسپائر اجزاء کا استعمال موذی امراض کا سبب بن سکتا ہے۔ وزیراعلیٰ پنجاب کی ہدایات پر عوام کو صحت بخش اور محفوظ خوراک کی فراہمی کے مشن پر سختی سے عمل کیا جا رہا ہے۔ شہری خوراک میں جعل سازی کی اطلاع پنجاب فوڈ اتھارٹی کی ہیلپ لائن 1223 یا سرکاری فیس بک پیج پر دے سکتے ہیں۔
اوکاڑہ: ورچوئل ویمن پولیس اسٹیشن، 94 فیصد کیسز حل
اوکاڑہ (نامہ نگار ملک ظفر)ڈسٹرکٹ پولیس آفیسر اوکاڑہ محمد راشد ہدایت کی زیرِ صدارت ورچوئل ویمن پولیس اسٹیشن کی سالانہ کارکردگی کا جائزہ اجلاس منعقد ہوا، جس میں ضلع بھر کی وکٹم سپورٹ آفیسرز نے شرکت کی۔
اجلاس کے دوران انچارج ورچوئل ویمن پولیس اسٹیشن رمشاء خالد نے سال 2025 کی مجموعی کارکردگی سے متعلق تفصیلی بریفننگ دی۔ بریفننگ کے مطابق سال 2025 میں ورچوئل ویمن پولیس اسٹیشن کو مجموعی طور پر 13 ہزار 952 کیسز موصول ہوئے، جن میں سے 885 مقدمات درج کیے گئے جبکہ 13 ہزار 067 کیسز کامیابی سے حل کیے گئے۔ اس طرح کیسز کے حل کی مجموعی شرح 94 فیصد رہی، جو ایک نمایاں کامیابی قرار دی جا رہی ہے۔
ڈی پی او محمد راشد ہدایت نے اجلاس سے خطاب کرتے ہوئے ہدایت کی کہ ورچوئل ویمن پولیس اسٹیشن پر موصول ہونے والی ہر کال پر فرسٹ رسپانڈنٹ یا گشت افسر فوری طور پر موقع پر پہنچے اور متاثرہ خواتین کو بروقت ریلیف فراہم کیا جائے۔ انہوں نے آن لائن موصول ہونے والی خواتین کی درخواستوں پر فوری کارروائی کو بھی یقینی بنانے کی ہدایت دی۔
ڈی پی او نے اس بات پر زور دیا کہ خواتین کالرز کی انکوائری کے دوران متعلقہ تھانوں میں تعینات لیڈی پولیس افسر کی موجودگی لازمی بنائی جائے۔ انہوں نے وکٹم سپورٹ آفیسرز کو ہدایت کی کہ خواتین سائلین کے ساتھ خوش اسلوبی، ہمدردی اور مکمل ذمہ داری کے ساتھ پیش آیا جائے تاکہ عوام کا پولیس پر اعتماد مزید مضبوط ہو۔
اجلاس کے اختتام پر ڈی پی او اوکاڑہ نے ورچوئل ویمن پولیس اسٹیشن کی مجموعی کارکردگی کو سراہتے ہوئے اسے خواتین کے تحفظ اور فوری انصاف کی فراہمی کی جانب ایک مؤثر قدم قرار دیا۔
