Category: جرائم و حادثات

دولتالہ کے قریب ہولناک واقعہ گھر میں گیس بھرنے سے دھماکہ، ایک ہی خاندان کے 4 افراد جھلس گئے حالت تشویشناک
قیامت خیز دھماکہ میں 24 سالہ دوشیزہ ملبے تلے دب کر جاں بحق، متاثرین کھاریاں برن سینٹر منتقل علاقے کی فضا سوگ

گوجرخان (قمرشہزاد) موضع ٹھاکرہ داخلی نڑالی میں گیس لیکیج کے باعث ہونے والے زوردار دھماکے نے تباہی مچا دی، جس کے نتیجے میں 4 مکانات زمین بوس ہو گئے، ایک نوجوان خاتون جاں بحق جبکہ بچوں سمیت 4 افراد شدید جھلس گئے۔

تقریباً چھ بجے جب علاقہ مکین محوِ خواب تھے، موضع ٹھاکرہ میں گیس لیکیج کے باعث اچانک ایک زوردار دھماکہ ہوا جس کی آواز دور دور تک سنی گئی۔ دھماکہ اس قدر شدید تھا کہ اس نے طالب، فیصل، احمد اور صوبیدار ریاست کے مکانات کو ملبے کا ڈھیر بنا دیا۔ واقعے میں باوا حمد کی 24 سالہ بیٹی موقع پر ہی جاں بحق ہو گئی جبکہ فیصل کی اہلیہ اور اس کے تین معصوم بچے آگ کے شعلوں کی زد میں آکر بری طرح جھلس گئے۔ مقامی افراد نے اپنی مدد آپ کے تحت فوری طور پر امدادی کارروائیاں شروع کیں اور زخمیوں کو ملبے سے نکال کر فوری طور پر محفوظ مقام پر منتقل کیا جبکہ واقعے کی اطلاع پر ریسکیو کی امدادی ٹیمیں فوری جائے حادثہ پہنچیں اور زخمیوں کو کھاریاں برن سینٹر منتقل کیا، جہاں ڈاکٹروں کے مطابق ان کی حالت تشویشناک ہے۔ واقعے کی اطلاع ملتے ہی پولیس اور انتظامیہ کی ٹیمیں جائے وقوعہ پر پہنچ گئیں اور شواہد اکٹھے کرنا شروع کر دیے ہیں۔ ابتدائی تحقیقات کے مطابق حادثہ کمرے میں گیس بھر جانے کے باعث پیش آیا۔ ہولناک دھماکے کے بعد پورے علاقے میں خوف و ہراس پھیل گیا اور علاقے کی فضا سوگوار ہے۔


سندھ کے شہر کوٹری کے علاقے کارو کھو کے قریب دریائے سندھ میں نہاتے ہوئے چار بچے ڈوب کر جاں بحق ہو گئے۔
‎واقعے کی اطلاع ملتے ہی مقامی غوطہ خور موقع پر پہنچ گئے اور تلاش کے بعد بچوں کی لاشیں دریا سے نکال کر گاؤں منتقل کر دیں۔
‎جاں بحق ہونے والوں میں 11 سالہ کشمیرہ، 10 سالہ ساجدہ، 13 سالہ اعجاز اور 9 سالہ قربان شامل ہیں۔ اہل خانہ کے مطابق بچے دریا میں نہانے گئے تھے کہ اچانک گہرے پانی میں چلے جانے کے باعث حادثے کا شکار ہو گئے۔
‎متوفیوں میں ساجدہ اور اعجاز آپس میں بہن بھائی تھے جبکہ دیگر دو بچے بھی اسی گاؤں کے رہائشی تھے۔ واقعے کے بعد گاؤں میں کہرام مچ گیا اور اہل علاقہ غمزدہ دکھائی دیے۔

خوشاب میں سابق شوہر نے مبینہ طور پر خاتون کو پٹرول چھڑک کر آگ لگا دی، 26 سالہ چمن بتول جان کی بازی ہار گئی

افسوسناک واقعے پر چیئرپرسن پنجاب ویمن پروٹیکشن اتھارٹی حنا پرویز بٹ کا نوٹس، ڈی پی او خوشاب سے رپورٹ طلب کر لی،پولیس نے بروقت کارروائی کرتے ہوئے دونوں ملزمان بابر عباس اور طاہر عباس کو حراست میں لے لیا،دونوں ملزمان سے تفتیش جاری ہے، اصل حقائق مکمل تحقیقات کے بعد سامنے آئیں گے. حنا پرویز بٹ کا کہنا ہے کہ متوفیہ کے بھائی کی مدعیت میں مقدمہ درج کر کے جائے وقوعہ سے شواہد اکٹھے کرنے کے لیے پی ایف ایس اے ٹیم بھی طلب کر لی گئی۔ خواتین کے خلاف اس نوعیت کے سنگین جرائم کسی صورت برداشت نہیں کیے جا سکتے۔ شفاف تفتیش کے ذریعے ذمہ دار عناصر کو قرار واقعی سزا دلائی جائے گی۔ متاثرہ خاندان کو قانونی اور ہر ممکن معاونت فراہم کی جائے گی۔ وزیراعلیٰ پنجاب مریم نواز شریف کے وژن کے تحت خواتین کے تحفظ پر کوئی سمجھوتہ نہیں ہوگا۔خواتین کے لیے محفوظ پنجاب ہمارا عزم ہے۔

حوا کی بیٹی کی تذلیل پر زمین لرز اٹھی جبر میں پستول کی نوک پر عصمت دری، سفاک ملزم نے بلیک میلنگ کو ہتھیار بنا لیا
مقدمہ درج، متاثرہ خاتون کا میڈیکل پراسس مکمل، خواتین اور بچوں کیساتھ زیادتی جیسے واقعات ناقابل قبول ہیں اے ایس پی سید دانیال حسن
گوجرخان (قمرشہزاد) جنسی درندگی کے سفاکانہ واقعے نے گوجرخان میں انسانی جان اور عزت کی حفاظت کے تصور کو ہلا کر رکھ دیا ہے۔ جبر کی رہائشی خاتون نے پولیس چوکی قاضیاں میں درخواست میں موقف اختیار کیا کہ وہ والد کے گھر سے شوہر کے گھر واپس آئی تو احتشام طارق نامی ملزم نے اس کے گھر زبردستی داخل ہو کر پسٹل تان کر اسے اور اس کی بچیوں کو قتل کی دھمکیاں دیکر ہوس کا نشانہ بنایا۔ خاتون کے مطابق ملزم نقاب پوش اور کالے دستانوں میں تھا اور اس نے نہ صرف زنا بالجبر کیا بلکہ اس کے انکار پر ننگی تصاویر کو انٹرنیٹ پر وائرل کرنے اور بچوں کو قتل کرنے کی دھمکیاں بھی دیں۔

متاثرہ خاتون نے بتایا کہ یہ پہلی بار نہیں بلکہ پہلے بھی ملزم اس پر بلیک میلنگ کر چکا ہے اور ننگی تصاویر کی دھمکیاں دے کر جنسی زیادتی کرتا رہا ہے۔ پولیس تھانہ گوجرخان نے فوری کارروائی کرتے ہوئے مقدمہ نمبر 199/26 بجرم 376i ت پ درج کرکے متاثرہ خاتون کا میڈیکل کروا لیا اور ملزم کی گرفتاری کے لیے تفتیش کا آغاز کر دیا گیا ہے۔ پولیس کا کہنا ہے کہ ملزم کی جلد گرفتاری کے لیے تمام ممکنہ وسائل بروئے کار لائے جا رہے تاکہ متاثرہ خاتون جلد انصاف کی فراہمی سمیت ملزم کو ٹھوس شواہد کیساتھ چالان عدالت کرکے انصاف کے تقاضے پورے کیے جائیں گے۔ شہری حلقوں کا کہنا ہے کہ اس افسوسناک واقعہ نے نہ صرف علاقے میں خوف و ہراس پیدا کر دیا ہے بلکہ خواتین کی حفاظت اور قانون کی حکمرانی پر سوالیہ نشان بھی اٹھا دیا ہے۔

پنجاب بھر میں سی سی ڈی کے دھواں دار ایکشن، مگر سرکل گوجرخان میں خطرناک مجرم بے لگام، متاثرین پر دباؤ اور نام نہاد صلح کا مکروہ کھیل جاری
بچے اور خواتین غیر محفوظ سنگین جرائم پر عوامی حلقوں کا وزیر اعلیٰ مریم نواز اور سربراہ سی سی ڈی سے فوری سخت نوٹس لینے کا مطالبہ
گوجرخان (قمرشہزاد) سرکل گوجرخان میں خواتین اور معصوم بچوں کے ساتھ زیادتی کے بڑھتے ہوئے واقعات نے شہریوں کو شدید تشویش میں مبتلا کر دیا۔ عوامی و سماجی حلقوں کا کہنا ہے کہ جرائم پیشہ عناصر کو لگام ڈالنے کے لیے جہاں پنجاب کے دیگر اضلاع و تحصیلوں میں سی سی ڈی متحرک کردار ادا کر رہی ہے، وہیں تحصیل گوجرخان میں سنگین جرائم کے باوجود سی سی ڈی کی عدم موجودگی سوالیہ نشان بن چکی ہے۔ عوامی حلقوں کے مطابق جنسی درندگی، قتل و غارت، منشیات فروشی اور دیگر سنگین جرائم میں ملوث ملزمان کے خلاف مؤثر کارروائی نہ ہونے سے مجرموں کے حوصلے بلند ہو رہے ہیں۔ عوامی حلقوں کا کہنا ہے کہ دیگر شہروں میں سی سی ڈی کے خوف سے بڑے بڑے جرائم پیشہ عناصر قانون کے شکنجے میں آتے ہیں، مقابلے ہوتے ہیں اور سخت کارروائیاں دیکھنے میں آتی ہیں، مگر گوجرخان میں صورتحال اس کے برعکس دکھائی دیتی ہے۔ شہریوں کا مزید کہنا ہے کہ سی سی ڈی کی عدم فعالیت کے باعث متاثرین کو دباؤ میں لا کر نام نہاد سفید پوشوں کی جانب سے صلح صفائی یا بھاری رقوم کے عوض معاملات نمٹانے کی کوششیں کی جاتی ہیں، جس سے انصاف کا نظام کمزور اور جرائم پیشہ عناصر مزید مضبوط ہو رہے ہیں۔

شہریوں کا کہنا ہے کہ اگر یہی صورتحال برقرار رہی تو سرکل گوجرخان میں سی سی ڈی کا وہ رعب اور خوف، جو جرائم کی بیخ کنی میں مؤثر ثابت ہوتا ہے، مکمل طور پر ختم ہو جائے گا۔ عوامی حلقوں نے وزیر اعلیٰ پنجاب مریم نواز اور سربراہ سی سی ڈی سہیل ظفر چھٹہ سے مطالبہ کیا ہے کہ تحصیل گوجرخان میں فوری طور پر سی سی ڈی کو متحرک کیا جائے اور زیادتی جیسے حساس اور سنگین جرائم میں ملوث عناصر کے خلاف بلا امتیاز کارروائیاں عمل میں لائی جائیں ۔ شہریوں کا کہنا ہے کہ ہمارے بچے اور خواتین عدم تحفظ کا شکار ہیں اور آئے روز بڑھتے واقعات لمحہ فکریہ بن چکے ہیں۔ عوام نے واضح کیا کہ اگر بروقت اور سخت اقدامات نہ کیے گئے تو صورتحال مزید سنگین ہو سکتی ہے، جس کی ذمہ داری متعلقہ اداروں پر عائد ہوگی۔ شہریوں نے مطالبہ کیا ہے کہ گوجرخان کو بھی وہی توجہ اور تحفظ دیا جائے جو پنجاب کے دیگر اضلاع کو حاصل ہے، تاکہ عوام کے جان و مال اور عزت و آبرو کا تحفظ یقینی بنایا جائے۔

‎صادق آباد کے کچے کے علاقے میں پولیس کو بڑی کامیابی حاصل ہوئی ہے جہاں ایک کروڑ روپے سر کی قیمت رکھنے والا خطرناک ڈاکو تنویر اندھڑ اپنے ساتھی ظفری جھبیل سمیت ہتھیار ڈالنے پر مجبور ہوگیا۔
‎پولیس حکام کے مطابق راجن پور کے پہاڑی علاقے میں خفیہ اطلاعات کی بنیاد پر انٹیلی جنس بیسڈ آپریشن کیا گیا، جس کے بعد دونوں مطلوب ملزمان نے اینٹی ائیرکرافٹ گن سمیت خود کو قانون کے حوالے کر دیا۔
‎حکومت پنجاب نے تنویر اندھڑ کے سر کی قیمت ایک کروڑ روپے جبکہ اس کے ساتھی ظفری جھبیل کے سر کی قیمت پچاس لاکھ روپے مقرر کر رکھی تھی۔
‎ڈی پی او کے مطابق تنویر اندھڑ 12 سے زائد پولیس اہلکاروں کی شہادت اور 13 شہریوں کے قتل میں مرکزی ملزم تھا۔ اس کے خلاف قتل، اقدام قتل، ڈکیتی، اغوا اور دہشتگردی سمیت مجموعی طور پر 45 مقدمات درج تھے۔
‎پولیس کا کہنا ہے کہ ظفری جھبیل بھی سنگین جرائم میں ملوث رہا اور اس کے خلاف 38 مقدمات درج ہیں۔
‎حکام کے مطابق دونوں ملزمان کو قانونی کارروائی کے لیے عدالت میں پیش کیا جائے گا، جبکہ اس پیش رفت کو کچے کے علاقے میں امن و امان کی بحالی کی جانب اہم قدم قرار دیا جا رہا ہے۔
رایئ

میرپورماتھیلو باغی ٹی وی نامہ نگار مشتاق علی لغاری
جروار کے قریب گاؤں خدا بخش لغاری میں مسلح افراد نے ڈکیتی کی سنگین واردات انجام دی۔ تفصیلات کے مطابق مائی سمینان اپنے شوہر سگھیا خان کی تنخواہ کی رقم ڈیڑھ لاکھ روپے لے کر شام کے وقت گھر پہنچی تو گھر کے سامنے گھات لگائے بیٹھے پانچ مسلح ملزمان نے اسے گھیر لیا۔

عینی شاہدین کے مطابق ملزمان نے اسلحے کے زور پر خاتون کو خوفزدہ کیا اور اس سے ڈیڑھ لاکھ روپے نقدی اور موبائل فون چھین لیا۔ ڈکیتی کے بعد ملزمان شام تقریباً چھ بجے موقع سے بآسانی فرار ہونے میں کامیاب ہو گئے۔متاثرہ خاتون نے بتایا کہ ملزمان میں سے دو کی شناخت محمد نواز لغاری اور اس کے بیٹے دل شیر لغاری کے طور پر ہوئی ہے، جبکہ تین ملزمان تاحال نامعلوم ہیں۔ واقعے کے فوراً بعد مائی سمینان کی جانب سے جروار تھانے میں این سی رپورٹ درج کرا دی گئی ہے، تاہم پولیس کی جانب سے تاحال کوئی واضح پیش رفت سامنے نہیں آ سکی۔

واقعے پر شدید تشویش کا اظہار کرتے ہوئے متاثرہ خاتون اور اس کے اہلِ خانہ نے گھوٹکی کے ایس ایس پی، میرپور ماتھیلو کے ڈی ایس پی اور جروار تھانے کے ایس ایچ او سے مطالبہ کیا ہے کہ واقعے کا فوری نوٹس لیتے ہوئے نامزد اور نامعلوم تمام ملزمان کو جلد گرفتار کیا جائے، جبکہ لوٹی گئی رقم اور موبائل فون کی فوری برآمدگی کو یقینی بنایا جائے۔اہلِ علاقہ نے بھی بڑھتی ہوئی وارداتوں پر تشویش کا اظہار کرتے ہوئے پولیس گشت مؤثر بنانے اور ملزمان کے خلاف سخت کارروائی کا مطالبہ کیا ہے۔