Category: جرائم و حادثات

اوچ شریف (باغی ٹی وی، نامہ نگار حبیب خان) احمد پور شرقیہ روڈ پر تیز رفتار کار کی ٹکر سے 30 سالہ نوجوان لوڈر رکشہ ڈرائیور محمد عاصم جاں بحق ہو گیا، حادثے کے بعد علاقے میں کہرام مچ گیا اور فضا سوگوار ہو گئی۔

محمد عاصم جو بستی میجر حق نواز اوچ شریف کا رہائشی تھا معمول کے مطابق اپنے رکشے پر جانوروں کا چارہ لے کر جا رہا تھا کہ اچانک پیچھے سے آنے والی جی ایل آئی کار (نمبر LEH-1708) نے اسے شدید ٹکر مار دی۔ عینی شاہدین کے مطابق ٹکر اتنی زور دار تھی کہ رکشہ الٹ گیا اور محمد عاصم نیچے دب کر شدید زخمی ہو گیا۔ موقع پر موجود لوگوں نے فوری طور پر اسے ملبے سے نکالا، مگر سر پر گہری چوٹیں لگنے کے باعث وہ موقع پر ہی دم توڑ گیا۔

ریسکیو ٹیم نے جائے حادثہ پر پہنچ کر قانونی کارروائی مکمل کی اور لاش ورثاء کے حوالے کر دی۔ واقعے کے بعد اہلِ علاقہ نے شدید غم و غصے کا اظہار کرتے ہوئے مطالبہ کیا ہے کہ حادثے کے ذمہ دار کار ڈرائیور کو فوری گرفتار کر کے قانون کے کٹہرے میں لایا جائے۔

اوچ شریف (باغی ٹی وی، نامہ نگار حبیب خان)اوچ شریف کے نواحی علاقے بخت واہ نہر، بستی جندو خان بلوچ کے مقام پر آج ایک ہولناک ٹریفک حادثہ اس وقت پیش آیا جب ایک تیز رفتار لوڈر منی ٹرک پل پر چڑھتے ہوئے اچانک موڑ کاٹتے وقت بے قابو ہو کر پل سے نیچے جا گرا۔ حادثہ اس قدر شدید تھا کہ دیکھنے والوں کے دل دہل گئے، تاہم خوش قسمتی سے ڈرائیور معجزانہ طور پر محفوظ رہا۔

عینی شاہدین کے مطابق لوڈر منی ٹرک جیسے ہی نہر کے پل پر پہنچا، تو تیز رفتاری کے باعث ڈرائیور نے کنٹرول کھو دیا اور ٹرک نیچے نہر کے کنارے جا گرا۔ حادثہ ہوتے ہی قریبی علاقے کے رہائشی جائے وقوعہ پر پہنچ گئے اور فوری طور پر امدادی کارروائیوں کا آغاز کیا۔ مقامی افراد نے ڈرائیور کو گاڑی سے بحفاظت نکال لیا، جسے صرف معمولی چوٹیں آئیں۔

علاقہ مکینوں نے واقعے پر اطمینان کا اظہار کرتے ہوئے کہا کہ اگرچہ حادثہ خطرناک نوعیت کا تھا، لیکن اللہ تعالیٰ کے فضل و کرم سے انسانی جان کا ضیاع نہیں ہوا، جو کہ ایک بڑا معجزہ ہے۔ واقعے نے ایک بار پھر سڑکوں پر تیز رفتاری کے سنگین نتائج کی طرف توجہ مبذول کرائی ہے۔

مقامی انتظامیہ سے اپیل کی گئی ہے کہ ایسے مقامات پر احتیاطی سائن بورڈز نصب کیے جائیں اور ٹریفک قوانین کی مؤثر نگرانی کی جائے تاکہ مستقبل میں ایسے حادثات سے بچا جا سکے۔

اوچ شریف (باغی ٹی وی، نامہ نگار حبیب خان)تھانہ اوچ شریف کی حدود میں واقع پل موہانہ کے قریب گزشتہ روز دن دیہاڑے ایک سنگین ڈکیتی کی واردات پیش آئی، جس میں تین موٹر سائیکل سوار مسلح ڈاکوؤں نے کریانہ سٹور سے نقدی اور قیمتی موبائل فون لوٹ لیے۔ واردات کے بعد ڈاکو ہوائی فائرنگ کرتے ہوئے فرار ہو گئے، جس سے علاقے میں شدید خوف و ہراس پھیل گیا۔

عینی شاہدین کے مطابق تینوں ملزمان سرخ رنگ کی ہنڈا 125 موٹر سائیکل پر سوار ہو کر دکان پر پہنچے۔ اسلحہ کے زور پر دکاندار کو یرغمال بنایا گیا اور دکان میں موجود کیش اور موبائل فون چھین لیے گئے۔ ڈاکو واردات کے بعد فائرنگ کرتے ہوئے فرار ہو گئے۔

واقعے کی اطلاع ملتے ہی پولیس تھانہ اوچ شریف حرکت میں آ گئی۔ پولیس نے جائے وقوعہ پر پہنچ کر شواہد اکٹھے کیے اور قریبی سی سی ٹی وی کیمروں کی فوٹیج حاصل کر کے تفتیش شروع کر دی۔ پولیس ذرائع کے مطابق سی سی ٹی وی کی مدد سے ملزمان کی تصاویر حاصل کر لی گئی ہیں، جنہیں شناخت کے لیے عوام سے شیئر کیا گیا ہے۔

پولیس نے شہریوں سے اپیل کی ہے کہ اگر کسی کو ان ملزمان کے بارے میں کوئی معلومات حاصل ہوں تو فوری طور پر تھانہ اوچ شریف سے رابطہ کریں۔ پولیس نے یقین دہانی کرائی ہے کہ معلومات فراہم کرنے والے کا نام صیغہ راز میں رکھا جائے گا۔

ضلعی پولیس نے عوام سے مطالبہ کیا ہے کہ وہ چوکنا رہیں اور کسی بھی مشتبہ سرگرمی کی فوری اطلاع قریبی پولیس اسٹیشن کو دیں تاکہ شہر میں امن و امان کی فضا کو قائم رکھا جا سکے۔