Category: جرائم و حادثات

حافظ آباد(خبرنگارشمائلہ) ہیڈ قادر آباد کے قریب ایک افسوسناک واقعہ پیش آیا جہاں جلالپور بھٹیاں سے گوجرانوالہ جانے والا چاول سے بھرا ایک ٹرک نکی چھٹہ پل پر بے قابو ہو کر نہر میں جا گرا۔ حادثے کے فوری بعد، ٹرک کو نکالنے کی کوشش کی گئی اور رات کی تاریکی میں جتنی چاول کی بوریاں بچائی جا سکتی تھیں، نکال لی گئیں۔

تاہم، صبح ہوتے ہی مقامی افراد نے موقع سے فائدہ اٹھاتے ہوئے نہر میں موجود باقی چاول کی بوریوں پر دھاوا بول دیا۔ نہر میں گری ہوئی چاول کی بوریوں کو نکال کر لے جانے لگے۔ کچھ لوگ رکشوں اور موٹر سائیکلوں پر بوریاں لے جاتے نظر آئے، جبکہ کئی افراد نے سر پر رکھ کر چاول اٹھائے اور چلتے بنے۔ اطلاعات کے مطابق، تقریباً 100 کے قریب چاول کی بوریاں لوٹ لی گئیں۔

یہ واقعہ معاشرتی بے حسی کو بے نقاب کرتا ہے کہ کس طرح لوگ موقع پرستی کا فائدہ اٹھاتے ہیں۔ رمضان المبارک، جو صبر، ایثار اور دوسروں کی مدد کا درس دیتا ہے، اس مقدس مہینے میں بھی بعض افراد نے چاول کو مالِ مفت سمجھ کر لوٹ لیا۔ روزے دار ہونے کے باوجود، لوگوں نے کسی اخلاقی یا مذہبی تقاضے کی پرواہ کیے بغیر چاول کی بوریوں پر ہاتھ صاف کر دیا۔

یہ واقعہ انتظامیہ کی نااہلی اور بے حسی پر بھی سوالیہ نشان چھوڑ گیا ہے۔ مقامی افراد اور سماجی حلقوں نے مطالبہ کیا ہے کہ اس واقعے کی تحقیقات کی جائیں اور معاشرتی بے حسی کے اس رویے کے خلاف سخت اقدامات کیے جائیں تاکہ مستقبل میں اس قسم کی لوٹ مار کی روک تھام ممکن ہو سکے۔

حافظ آباد(خبرنگارشمائلہ)تھانہ صدر پنڈی بھٹیاں کی حدود میں چوری کی ایک بڑی واردات پیش آئی ہے، جس میں نامعلوم چور رات کی تاریکی میں پانچ ٹرانسفارمرز چوری کر کے فرار ہو گئے۔ یہ واقعہ نواحی علاقوں شوری مانیکی اور میاں راجہ میں پیش آیا، جہاں مقامی زمیندار اور رہائشی صبح بیدار ہوئے تو اپنے علاقوں کو بجلی سے محروم پایا۔

ذرائع کے مطابق، چوروں نے منظم طریقے سے واردات انجام دی اور بغیر کسی رکاوٹ کے قیمتی ٹرانسفارمرز اتار کر لے گئے۔ اس چوری کے باعث علاقے میں شدید پریشانی پائی جا رہی ہے، اور زمینداروں کو فصلوں کی آبپاشی میں مشکلات کا سامنا ہے۔

اطلاع ملتے ہی تھانہ صدر پنڈی بھٹیاں پولیس موقع پر پہنچ گئی اور قانونی کارروائی کا آغاز کر دیا۔ پولیس کا کہنا ہے کہ ملزمان کی گرفتاری کے لیے مختلف پہلوؤں پر تفتیش کی جا رہی ہے، جبکہ چوروں کی تلاش کے لیے خصوصی ٹیم بھی تشکیل دی جا چکی ہے۔

علاقہ مکینوں نے متعلقہ حکام سے مطالبہ کیا ہے کہ وہ جلد از جلد چوروں کو گرفتار کر کے ان کے خلاف سخت کارروائی کریں تاکہ ایسے واقعات کی روک تھام کی جا سکے۔