کراچی:کراچی: گولیمار سانحے میں جاں بحق افراد کی تعداد تعداد 26 ہو گئی،30 شدید زخمی ،اطلاعات کےمطابق گولیمار میں منہدم ہونے والی رہائشی عمارتوں کے ملبے سے ماں اور بچے سمیت مزید 6 افراد کی لاشیں نکال لی گئیں جس کے بعد جاں بحق افراد کی تعداد 26 ہو گئی ہے۔ریسکیو ذرائع کے مطابق ملبے سے مزید 4 لاشیں نکال لی گئی ہیں جس میں ایک ماں اور بچے کی لاش بھی شامل ہے۔
ریسکیو حکام کے مطابق گرنے والی عمارت 6 منزلہ تھی، پانی کا ٹینک بہت بڑا تھا جسے بہت احتیاط سے توڑا گیا۔ تاہم ملبے تلے مزید افراد کے دبے ہونے کے خدشے کے پیش نظر ریسکیو آپریشن جاری ہے اور آج رات تک دبے افراد کو نکالنے کا آپریشن مکمل کر لیا جائے گا۔
حکام کا کہنا ہے کہ آپریشن کے دوران ملنے والا کیش اور قیمتی سامان واپس کردیا گیا ہے جس میں پرائز بانڈ بھی شامل ہیں۔وزیر بلدیات سندھ ناصر حسین شاہ کہتے ہیں عمارت گرنے کی تحقیقات جاری ہیں۔انہوں نے کہا کہ واقعے کے ذمے دار ایس بی سی اے کے افسران کو معطل کیا گیا ہے، تحقیقات کے بعد مزید ذمہ داروں کے خلاف بھی کارروائی بھی ہو گی۔
رپورٹ کے مطابق 40 گز کے پلاٹ پر بنی پانچ منزلہ عمارت پر اس کا مالک چھٹی منزل بھی بنا رہا تھا کہ پوری عمارت گر گئی جس کی زد میں دیگر دو عمارتیں بھی آگئیں۔قریب موجود چوتھی عمارت کو بھی مخدوش قرار دیا گیا ہے۔ پاک فوج کے جوان اور دیگر ادارے ریسکیو آپریشن میں مصروف ہیں جب کہ تنگ گلیوں کے باعث امدادی کارروائیوں میں مشکلات کا سامنا ہے۔
یاد رہے کہ 5 مارچ کو رضویہ سوسائٹی کے قریب گولیمار نمبر 2 میں تین رہائشی عمارتیں گر گئی تھیں ,ملبے تلے اب بھی کئی افراد کے دبے ہونے کا خدشہ ہے جس کے پیش نظر ملبہ ہٹانے کا کام احتیاط سے کیا جا رہا ہے۔
