Category: جرائم و حادثات

کبھی کبھی حقیقت افسانے سے بھی زیادہ حیران کن ہوتی ہے، اور کرناٹک کے ضلع کوڈاگو کے ایک چھوٹے سے گاؤں بسونہلی میں پیش آنے والا واقعہ اس کی زندہ مثال ہے۔

یہ کہانی ہے سُریش کی، جو اپنی بیوی ملیگے کے ساتھ ایک پُرامن زندگی گزار رہا تھا۔ سال 2019 میں ملیگے اچانک لاپتہ ہو گئی۔ سُریش نے ہر جگہ تلاش کیا، خاندان سے رابطے کیے، اور اُسے ڈھونڈنے کی ہر ممکن کوشش کی۔ اُسے کچھ لوگوں سے ملیگے کے مبینہ غیر ازدواجی تعلقات کی باتیں سننے کو ملیں، لیکن اس نے ہمت نہیں ہاری۔سُریش نے اپنی بیوی سے التجا کی کہ وہ بچوں کی خاطر کم از کم رابطے میں رہے، مگر کوئی جواب نہ آیا۔ دو سال بعد، 2021 میں، اس نے کشالن نگر پولیس اسٹیشن میں گمشدگی کی رپورٹ درج کروائی۔

2022 میں پولیس نے سُریش کو اطلاع دی کہ بیٹّا پورہ (تحصیل پیریا پٹنہ) کے قریب ایک انسانی ڈھانچہ ملا ہے، جو ان کی بیوی ملیگے کا ہو سکتا ہے۔ سُریش اپنی ساس کے ہمراہ موقع پر پہنچا، اور پولیس کے مطابق وہی ملیگے کی باقیات تھیں۔ دل شکستہ سُریش نے اُس ڈھانچے کی آخری رسومات ادا کیں۔مگر جلد ہی حالات نے نیا موڑ لیا۔ پولیس نے سُریش کو ہی بیوی کے قتل کے الزام میں گرفتار کر لیا۔ اس کی تمام تر تردیدوں کے باوجود، اُسے جیل بھیج دیا گیا۔بعد ازاں، فرانزک لیب سے آنے والی ڈی این اے رپورٹ نے ثابت کر دیا کہ وہ باقیات ملیگے کی نہیں تھیں۔ سُریش کو بے گناہ قرار دے کر رہا کر دیا گیا۔

برسوں بعد، زندہ بیوی اور نیا عاشق
1 اپریل 2025 کو یہ کہانی ایک اور چونکا دینے والے موڑ سے گزری، جب سُریش کے دوستوں نے ملیگے کو مدی کیری کے ایک ہوٹل میں اپنے نئے عاشق کے ساتھ دیکھا۔ وہ حیرت زدہ رہ گئے۔ انہوں نے تصاویر لے کر فوراً پولیس کو اطلاع دی۔پولیس نے فوری کارروائی کرتے ہوئے ملیگے کو حراست میں لے لیا اور اُسے میسورو کی عدالت میں پیش کیا گیا۔

اب کئی سوالات جنم لے چکے ہیں،پولیس نے بغیر مکمل فرانزک تصدیق کے سُریش کو کیسے مجرم ٹھہرایا؟ملیگے کہاں غائب تھی، اور کیوں؟اُس نے اپنے شوہر اور بچوں کو کیوں چھوڑا؟اور کیا وہ جان بوجھ کر سُریش کو پھنسانا چاہتی تھی؟یہ معاملہ اب پولیس تفتیش کے تحت ہے، مگر سُریش کی زندگی میں جو اندھیرے کے سال گزرے، اُن کا حساب شاید کوئی عدالت بھی نہ چُکا سکے۔

شوہر نے بیوی پر شک کرتے ہوئے سر پر ہتھوڑا مار کر قتل کر دیا

واقعہ بھارت کا ہے،نوئیڈا کے سیکٹر 15 میں جمعہ کے روز ایک دل دہلا دینے والا واقعہ پیش آیا، جہاں 55 سالہ شخص نے بیوی پر ناجائز تعلقات کا شک ہونے پر اسے ہتھوڑے سے مار کر موت کے گھاٹ اتار دیا۔ پولیس کے مطابق ملزم نوراللہ حیدر نے بحث کے دوران اپنی بیوی اسماء خان کے سر پر ہتھوڑے سے حملہ کیا، جس سے اس کی موقع پر ہی موت واقع ہوگئی۔پولیس حکام نے بتایا کہ مقتولہ 42 سالہ اسماء خان ایک سافٹ ویئر انجینئر تھیں اور نوئیڈا کے سیکٹر 62 میں واقع ایک نجی کمپنی میں ملازمت کرتی تھیں۔ وہ دہلی میں مقیم تھیں اور جامعہ ملیہ اسلامیہ سے انجینئرنگ میں گریجویشن کی ڈگری حاصل کر چکی تھیں۔ نوراللہ حیدر، جو بہار سے تعلق رکھتا ہے، خود بھی انجینئرنگ کا گریجویٹ ہے لیکن اس وقت بیروزگار ہے۔

دونوں کی شادی 2005 میں ہوئی تھی اور ان کے دو بچے ہیں ، ایک بیٹا جو انجینئرنگ کا طالب علم ہے اور ایک بیٹی جو آٹھویں جماعت میں پڑھتی ہے۔واقعے کی اطلاع سب سے پہلے جوڑے کے بیٹے نے پولیس کو دی، جب اُس نے 112 ایمرجنسی نمبر پر فون کیا۔ پولیس ٹیم اور فرانزک ماہرین فوراً موقع پر پہنچے اور لاش کو پوسٹ مارٹم کے لیے بھیج دیا۔ نوراللہ حیدر کو موقع پر ہی گرفتار کر لیا گیا۔

ڈپٹی کمشنر پولیس رامبدن سنگھ نے میڈیا کو بتایا،”ابتدائی تفتیش سے پتا چلا ہے کہ نوراللہ کو اپنی بیوی پر ناجائز تعلقات کا شک تھا۔ ہم نے ملزم کو حراست میں لے لیا ہے اور تفتیش جاری ہے۔”مقتولہ کے برادر نسبتی نے میڈیا سے بات کرتے ہوئے کہا،”بیٹی نے مجھے صبح فون کر کے واقعے کے بارے میں بتایا۔ دونوں کے درمیان کئی دنوں سے جھگڑے ہو رہے تھے، لیکن کسی نے سوچا بھی نہیں تھا کہ بات یہاں تک پہنچ جائے گی۔”پولیس مزید تفتیش کر رہی ہے اور اس بات کا جائزہ لے رہی ہے کہ آیا واقعہ پہلے سے منصوبہ بند تھا یا اچانک جذبات کی رو میں آ کر کیا گیا اقدام،
مزید تفصیلات آنے تک پولیس کا کہنا ہے کہ مقتولہ کا موبائل فون اور دیگر ڈیجیٹل شواہد بھی قبضے میں لے لیے گئے ہیں تاکہ معاملے کی تہہ تک پہنچا جا سکے۔