Category: جرائم و حادثات

سیالکوٹ(بیوروچیف شاہدریاض) جرائم کی وارداتیں، 2 خواتین سمیت 8 ملزمان گرفتار

سیالکوٹ میں جرائم کی مختلف وارداتوں میں 2 خواتین سمیت 8 ملزمان کو گرفتار کیا گیا ہے۔ ایف آئی اے امیگریشن نے سیالکوٹ ائیرپورٹ پر کارروائی کرتے ہوئے جعلی دستاویزات اور گداگری میں ملوث 2 خواتین سمیت 3 مسافروں کو گرفتار کیا۔ گرفتار خواتین، صغراں اور ذلیخہ جعفری، ایمرجنسی پاسپورٹ پر عراق سے پاکستان پہنچی تھیں اور عراق میں گداگری میں ملوث تھیں۔ تیسرے گرفتار ملزم، محمد شاہزیب، کو جعلی سفری دستاویزات پر سفر کرنے پر گرفتار کیا گیا۔ ملزمان کو انسدادِ انسانی سمگلنگ سرکل گوجرانوالہ منتقل کر دیا گیا ہے، جہاں مزید تفتیش جاری ہے۔

دوسری جانب تھانہ حاجی پورہ کے علاقے عالم چوک کے قریب نامعلوم مسلح ملزمان نے فائرنگ کر کے حمزہ فیاض نامی نوجوان کو قتل کر دیا۔ پولیس نے مقدمہ درج کر لیا ہے اور ملزمان کی گرفتاری کے لیے ٹیمیں تشکیل دے دی گئی ہیں۔ مقدمہ قتل کی تفتیش ہومی سائیڈ انوسٹی گیشن یونٹ سٹی سرکل کے انچارج عرفان اشرف کے سپرد کر دی گئی ہے۔

تھانہ کینٹ کے علاقے رانی چک بوتھ میں سابق عداوت پر نصیر، اسد، اویس اور ان کے 2 نامعلوم ساتھیوں نے سلمان نامی شہری کو میرج ہال سے گھر آتے ہوئے روکا اور ڈنڈوں اور مکوں سے زخمی کر دیا۔ ملزمان نے واقعے کی ویڈیو بھی بنائی اور فرار ہو گئے۔ کینٹ پولیس نے مقدمہ درج کر کے ملزمان کو گرفتار کر لیا ہے۔

ڈی پی او سیالکوٹ فیصل شہزاد کی ہدایت پر تھانہ اگوکی پولیس نے ڈکیتی اور راہزنی کی 40 سے زائد وارداتوں میں ملوث 3 رکنی گینگ طلحہ عرف کدو کو گرفتار کر لیا ہے۔ ملزمان سے لاکھوں روپے مالیت کا مال مسروقہ، 2 لاکھ 50 ہزار روپے نقدی، 3 موٹر سائیکلیں اور 3 پسٹل برآمد ہوئے ہیں۔

سیالکوٹ، باغی ٹی وی( بیوروچیف شاہد ریاض )سیالکوٹ پولیس نے ڈکیتی اور راہزنی کی وارداتوں میں ملوث 3 رکنی طلحہ عرف کدو گینگ کو سرغنہ سمیت گرفتار کر لیا ہے۔ ملزمان کے قبضے سے لاکھوں روپے مالیت کا مسروقہ سامان، 2 لاکھ 50 ہزار روپے نقدی، 3 موٹر سائیکلیں اور 30 بور کے 3 پستول معہ 30 گولیاں برآمد ہوئی ہیں۔

ترجمان پولیس کے مطابق ڈی پی او سیالکوٹ فیصل شہزاد کی خصوصی ہدایات پر ڈی ایس پی صدر سرکل کی زیر نگرانی ایس ایچ او تھانہ اگوکی انسپکٹر نعمان احمد بٹر معہ پولیس ٹیم نے شہریوں سے ڈکیتی اور راہزنی کی 40 سے زائد وارداتوں میں ملوث 3 رکنی گینگ طلحہ عرف کدو کو گرفتار کیا۔

گرفتار ہونے والے ملزمان میں طلحہ عرف کدو ولد امین سکنہ ماناں والا فیصل آباد حال مقیم اگوکی ایم سی بی والی گلی،شہباز عرف لالہ ولد شوکت علی ماناں والا فیصل آباد حال مقیم اگوکی ایم سی بی والی گلی،علی حیدر ولد ذولفقار علی ماناں والا فیصل آباد حال مقیم اگوکی ایم سی بی والی گلی شامل ہیں

ملزمان کے قبضے سے دوران تفتیش تھانہ اگوکی کے علاوہ دیگر تھانہ جات کے 40 مقدمات ٹریس ہوئے ہیں۔ جن میں 25 مقدمات تھانہ اگوکی کے ٹریس ہوئے ہیں۔ مزید تفتیش پر ملزمان سے لاکھوں روپے مالیت کا مال مسروقہ جس میں نقدی 2 لاکھ 50 ہزار، 3 موٹر سائیکلیں اور وارداتوں میں استعمال ہونے والا اسلحہ ناجائز 30 بور کے 3 پستول معہ 30 گولیاں برآمد ہوئیں۔

ڈی پی او سیالکوٹ فیصل شہزاد نے پولیس ٹیم میں شامل تمام افسران و ملازمان کے لیے تعریفی سرٹیفکیٹس اور نقد انعام کا اعلان کیا ہے۔