Category: جرائم و حادثات

اوچ شریف،باغی ٹی وی (نامہ نگارحبیب خان) بہاولپور کے علاقے ساجد اعوان ٹاؤن میں افسوسناک حادثہ پیش آیا، جہاں گیس لیکج کے باعث دو کمسن بچیاں جان کی بازی ہار گئیں، جبکہ ان کی والدہ بے ہوش ہو گئیں۔

ریسکیو 1122 کنٹرول روم کو اطلاع ملی کہ ایک گھر میں گیس بھر جانے کے باعث ماں اور بچے بے ہوش ہو گئے ہیں۔ ریسکیو ٹیم فوری طور پر جائے حادثہ پر پہنچی، جہاں معلوم ہوا کہ تحریم اعجاز زوجہ اعجاز نصیر اپنے بچوں کے ہمراہ کمرے میں سو رہی تھیں۔ رات کے وقت گیس چولہے کا بٹن کھلا رہ جانے کے باعث کمرے میں گیس بھر گئی، جس سے دو سالہ مناحل اور آٹھ ماہ کی نوال دم گھٹنے سے جاں بحق ہو گئیں، جبکہ والدہ نیم بے ہوشی کی حالت میں پائی گئیں۔

ریسکیو ٹیم نے فوری طبی امداد فراہم کرتے ہوئے تینوں افراد کو وکٹوریہ ہسپتال بہاولپور منتقل کیا، جہاں ڈاکٹرز نے بچیوں کی موت کی تصدیق کر دی، جبکہ ان کی والدہ کو طبی امداد دی جا رہی ہے۔

واقعے کی اطلاع پولیس کو بھی دے دی گئی ہے، جو مزید تحقیقات کر رہی ہے۔ یہ افسوسناک واقعہ گیس کے غیر محفوظ استعمال کے باعث پیش آیا، جس نے ایک ہی خاندان کی خوشیاں چھین لیں۔

اوچ شریف،باغی ٹی وی(نامہ نگارحبیب خان) موٹر وے انٹرچینج اوچ شریف پر لال شہباز قلندر کے عرس سے واپس جانے والی زائرین کی بس میں جھگڑے کے دوران 35 سالہ شخص جان کی بازی ہار گیا۔

تفصیلات کے مطابق، چنیوٹ جانے والی بس میں زائرین کے درمیان تلخ کلامی کے بعد جھگڑا شدت اختیار کر گیا، جس میں ڈنڈوں اور سوٹوں کا آزادانہ استعمال کیا گیا۔ ریسکیو ذرائع کے مطابق، ثناء اللہ ولد حبیب خان کو شدید سر کی چوٹیں آئیں، جس کے باعث وہ موقع پر ہی دم توڑ گیا۔

واقعے کی اطلاع ملتے ہی مقامی پولیس اور ریسکیو ٹیمیں موقع پر پہنچ گئیں اور جاں بحق شخص کی لاش تحویل میں لے لی۔ پولیس نے واقعے کی تحقیقات شروع کر دی ہیں جبکہ بس میں موجود دیگر زائرین سے بھی پوچھ گچھ جاری ہے۔

اوچ شریف،باغی ٹی وی (نامہ نگارحبیب خان )خیرپور ٹامیوالی ، چک نمبر 23 میں ظلم کی انتہا، بیوہ خاتون مبینہ طور پر دیور کے ہاتھوں زیادتی کا نشانہ بن گئی، پولیس نے مقدمہ تو درج کر لیا لیکن پانچ روز گزرنے کے باوجود ملزم گرفتار نہ ہو سکا، متاثرہ خاتون انصاف کے لیے دربدر۔

تفصیلات کے مطابق ریاض مائی دختر غلام قادر نے میڈیا کو بتایا کہ اس کا شوہر چند ماہ قبل وفات پا چکا ہے اور وہ اپنی کمسن بیٹی کے ساتھ رہائش پذیر ہے۔ خاتون کے مطابق اس کا دیور محمد اقبال گزشتہ کئی دنوں سے اسے ہراساں کر رہا تھا اور چار روز قبل رات ساڑھے نو بجے زبردستی گھر میں داخل ہو کر زیادتی کا نشانہ بنایا۔

متاثرہ خاتون کا کہنا ہے کہ اس کی چیخ و پکار پر محلے دار موقع پر پہنچے، جس پر ملزم فرار ہو گیا۔ واقعے کی اطلاع ملنے پر پولیس نے مقدمہ درج کر لیا، مگر تاحال ملزم کو گرفتار نہیں کیا جا سکا۔ خاتون نے الزام عائد کیا ہے کہ ملزم سرعام گھوم رہا ہے اور مقدمہ واپس لینے کے لیے سنگین نتائج کی دھمکیاں دے رہا ہے۔

ریاض مائی نے وزیر اعلیٰ پنجاب مریم نواز اور ڈی پی او بہاولپور اسد سرفراز خان سے اپیل کی ہے کہ ملزم کو فوری گرفتار کر کے قرار واقعی سزا دی جائے، تاکہ اسے انصاف مل سکے۔

اوچ شریف,باغی ٹی وی(نامہ نگارحبیبخان) تھانہ مسافرخانہ پولیس کی بڑی کارروائی، چوری، ڈکیتی اور سرقہ بالجبر کی وارداتوں میں ملوث خطرناک سعید کٹانہ گینگ کے سرغنہ سمیت 6 ملزمان گرفتار، 2 کروڑ روپے سے زائد مالیت کا ڈکیتی و چوری شدہ سامان برآمد کر لیا گیا۔

تفصیلات کے مطابق ریجنل پولیس آفیسر رائے بابر سعید اور ڈسٹرکٹ پولیس آفیسر اسد سرفراز خان کی ہدایات پر ایس ایچ او تھانہ مسافرخانہ محسن سردار نے جدید ٹیکنالوجی کے ذریعے خصوصی ٹیمیں تشکیل دے کر کامیاب کارروائی کی۔ پولیس نے چھاپہ مار کر گینگ کے 6 ارکان کو گرفتار کر لیا، جن سے 5 ٹریکٹر، 5 موٹر سائیکل اور 10 لاکھ روپے نقد برآمد کیے گئے۔ ملزمان سے وارداتوں میں استعمال ہونے والا ناجائز اسلحہ، بشمول MP5 رائفل اور 30 بور کے 2 پسٹل بھی برآمد کیے گئے۔

ایس ڈی پی او صدر سرکل بہاولپور کے مطابق ملزمان بہاولپور، مسافرخانہ، احمد پور شرقیہ اور یزمان کے علاقوں میں رات کے وقت لوٹ مار کی وارداتیں کرتے تھے۔ مزید تفتیش جاری ہے، جبکہ دیگر ساتھیوں کی گرفتاری کے لیے چھاپے مارے جا رہے ہیں۔

ڈی پی او بہاولپور اسد سرفراز خان نے کہا کہ شہریوں کے جان و مال کا تحفظ اولین ترجیح ہے، جرائم پیشہ عناصر کے خلاف سخت کارروائی جاری رہے گی اور کسی کو بھی رعایت نہیں دی جائے گی۔ علاقہ مکینوں نے پولیس کی کامیاب کارروائی کو سراہتے ہوئے اظہار تشکر کیا۔