Category: جرائم و حادثات

اوچ شریف (نامہ نگار حبیب خان) اوچ شریف کے نواحی علاقے موضع بیٹ احمد بستی کالڑہ میں چوری کی سنگین واردات پیش آئی، جس میں نامعلوم چور ایک محنت کش مجید کالڑہ کی قیمتی گائے چرا کر فرار ہو گئے۔

تفصیلات کے مطابق مجید کالڑہ جو کہ ایک محنت کش ہیں، اپنی گائے پال کر اپنے بچوں کا پیٹ پالتے تھے۔ انہوں نے رات کے وقت اپنی گائے کو گھر کے قریب باڑے میں باندھ کر سو گئے۔ تاہم علی الصبح جب وہ باڑے میں گئے تو گائے غائب تھی۔

گائے کی چوری کی اس واردات کے بعد علاقے میں خوف و ہراس پھیل گیا ہے۔ دیہاتیوں نے پولیس سے اپیل کی ہے کہ چوروں کا جلد از جلد سراغ لگا کر انہیں قانون کے کٹہرے میں لایا جائے اور محنت کش کسان کی قیمتی گائے واپس دلائی جائے۔

متاثرہ شخص نے کہا کہ وہ پہلے ہی مالی مشکلات سے دوچار تھے اور اب ان کی واحد قیمتی ملکیت بھی چوری ہو گئی ہے۔ انہوں نے مقامی انتظامیہ اور اعلیٰ حکام سے انصاف کی فراہمی کی اپیل کی ہے۔

علاقہ مکینوں نے انتظامیہ سے مطالبہ کیا ہے کہ چوری کی بڑھتی ہوئی وارداتوں کے سدباب کے لیے سخت اقدامات کیے جائیں۔

اوچ شریف (نامہ نگار حبیب خان) اوچ شریف میں ایک افسوسناک حادثے میں ٹریکٹر ٹرالی کی موٹر سائیکل کو ٹکر سے نوجوان شدید زخمی ہو گیا۔ حادثے میں نوجوان کی دائیں ٹانگ ٹوٹ گئی۔

تفصیلات کے مطابق رضا علی ولد محمد علی جو کہ اوچ شریف کے رہائشی ہیں، اپنی موٹر سائیکل پر جا رہے تھے کہ اچانک ایک ٹریکٹر ٹرالی نے انہیں ٹکر مار دی۔ عینی شاہدین کے مطابق ٹریکٹر ٹرالی غلط سمت سے آ رہی تھی جس کے باعث یہ حادثہ پیش آیا۔

تصادم کے نتیجے میں رضاعلی سڑک پر گر گئے اور ان کی دائیں ٹانگ ٹوٹ گئی۔ ریسکیو ذرائع کے مطابق، ان کا فیمر (ران کی ہڈی) فریکچر ہو گیا ہے، تاہم زخم بند (کلوزڈ فریکچر) ہے۔ ریسکیو عملے نے فوری طور پر موقع پر پہنچ کر زخمی کو ابتدائی طبی امداد فراہم کی اور انہیں قریبی ہسپتال منتقل کر دیا۔

حادثے کے بعد ٹریکٹر ٹرالی کا ڈرائیور موقع سے فرار ہو گیا۔ پولیس نے واقعے کی تحقیقات شروع کر دی ہیں۔

اوچ شریف ،باغی ٹی وی (نامہ نگارحبیب خان) اوچ شریف شہر میں واقع عمر ٹاؤن میں ایک قرآن اکیڈمی پر تین افراد نے حملہ کر کے استاد پر تشدد کیا، دو لیپ ٹاپ، 15 ہزار روپے نقدی چھین لی اور موبائل فون توڑ دیا۔ پولیس نے مقدمہ درج کر کے تفتیش شروع کر دی ہے۔

تفصیلات کے مطابق، محمد ایاز، جو اکیڈمی میں آن لائن بچوں کو قرآن پڑھاتا ہے، نے تھانہ اوچ شریف میں رپورٹ درج کرائی کہ 27 فروری 2025 کی صبح ساڑھے آٹھ بجے حماد، وقار اور حامد نامی تین افراد اکیڈمی میں داخل ہوئے اور آتے ہی اس پر تشدد شروع کر دیا۔ ایاز کے شور مچانے پر آس پاس کے لوگ جمع ہو گئے۔ملزمان نے ایاز کا موبائل فون توڑ دیا اور اکیڈمی میں موجود دو لیپ ٹاپ اور 15 ہزار روپے نقدی بھی چھین لی۔

ایاز کے مطابق ملزمان نے اس سے سوال کیا کہ وہ ان کے دوست کے بیٹے سفیان کے ساتھ موبائل پر گیم کیوں کھیلتا ہے۔
پولیس نے مقدمہ درج کر کے تفتیش کا آغاز کر دیا ہے۔

اوچ شریف ،باغی ٹی وی(نامہ نگارحبیب خان) انسپکٹر جنرل نیشنل ہائی ویز اینڈ موٹروے پولیس رفعت مختار کی ہدایات پر سیکٹر I، موٹروے ایم-5 پر اوور اسپیڈ گاڑیوں کے خلاف سخت کریک ڈاؤن جاری ہے۔

سیکٹر کمانڈر رانا سرفراز ناصر کے مطابق تیز رفتاری کرنے والے ڈرائیوروں پر جرمانے اور ایف آئی آر درج کی جائے گی۔ جدید آئی ٹی ایس سسٹم اور مینول کیمروں کے ذریعے گاڑیوں کی نگرانی کی جا رہی ہے، جبکہ تمام ٹول پلازہ جات اور سروس ایریاز میں بینرز بھی آویزاں کر دیے گئے ہیں تاکہ عوام کو آگاہی دی جا سکے۔

سیکٹر کمانڈر کا کہنا تھا کہ 150 کلومیٹر فی گھنٹہ کی حد سے تجاوز کرنے پر نہ صرف جرمانہ ہوگا بلکہ ایف آئی آر بھی درج کی جائے گی۔ انہوں نے مزید کہا کہ اوور اسپیڈنگ سے نہ صرف ڈرائیور بلکہ دیگر مسافروں کی زندگیاں بھی خطرے میں پڑ جاتی ہیں، جو کہ کسی بڑے حادثے کا سبب بن سکتی ہیں۔

موٹروے پولیس نے شہریوں سے اپیل کی ہے کہ رفتار کی حد کا خیال رکھیں اور محفوظ سفر کو یقینی بنائیں۔

اوچ شریف،باغی ٹی وی(نامہ نگارحبیب خان) بہاولپور کے علاقے راما پھاٹک، احمد پور روڈ کے قریب افسوسناک حادثہ پیش آیا، جہاں 20 سالہ مہریں دختر محمد فاروق شدید جھلس گئیں۔

ریسکیو ذرائع کے مطابق مہریں کچن میں لیٹی ہوئی تھیں اور چولہا جل رہا تھا، اچانک چولہے سے اٹھنے والی آگ نے ان کی رضائی کو اپنی لپیٹ میں لے لیا۔ آگ کے شعلے تیزی سے بھڑک اٹھے، جس کے نتیجے میں لڑکی کا 70 فیصد جسم جھلس گیا۔

اہلِ خانہ نے فوری طور پر ریسکیو 1122 کو اطلاع دی، جنہوں نے موقع پر پہنچ کر ابتدائی طبی امداد فراہم کی اور لڑکی کو بہاول وکٹوریہ اسپتال (بی وی ایچ) منتقل کر دیا۔

ریسکیو ذرائع کے مطابق حادثے کے وقت مہریں کچن میں اکیلی تھیں جبکہ دیگر اہل خانہ دوسرے کاموں میں مصروف تھے۔ واقعے کے بعد گھر میں خوف و ہراس پھیل گیا، اور اہل خانہ نے میڈیا سے بات کرنے سے گریز کیا۔