Category: جرائم و حادثات

سیالکوٹ،باغی ٹی وی(بیوروچیف شاہد ریاض)چونڈہ پھاٹک کے قریب ایک افسوسناک ٹرین حادثے میں 40 سالہ نامعلوم خاتون جاں بحق اور 3 سالہ بچہ شدید زخمی ہو گیا۔

حادثہ اس وقت پیش آیا جب خاتون اور بچہ ٹرین کی زد میں آ گئے۔ خاتون موقع پر ہی دم توڑ گئیں، جبکہ 3 سالہ عبداللہ شدید زخمی ہوا۔

ریسکیو 1122 نے فوری طور پر جائے حادثہ پر پہنچ کر امدادی کارروائی شروع کی۔ انہوں نے جاں بحق خاتون کی لاش کو ہسپتال منتقل کیا اور زخمی بچے کو ابتدائی طبی امداد فراہم کرنے کے بعد ہسپتال منتقل کر دیا۔

فی الحال حادثے کی وجہ معلوم نہیں ہو سکی ہے۔ حکام اس واقعے کی مزید تحقیقات کر رہے ہیں۔

سیالکوٹ ،باغی ٹی وی(بیوروچیف شاہد ریاض): پنجاب وائلڈ لائف ریڈ اسکواڈ اور وائلڈ لائف سٹاف سیالکوٹ نے مشترکہ کارروائی کرتے ہوئے سیالکوٹ میں سوشل میڈیا کے ذریعے آن لائن جنگلی حیات کی غیر قانونی خرید و فروخت میں ملوث بریڈنگ فارم پر چھاپہ مارا۔

وائلڈ لائف ٹیم نے ڈپٹی ڈائریکٹر وائلڈ لائف عاصم کامران کی سربراہی میں سیالکوٹ کے علاقہ کوٹلی فرید ایمن آباد روڈ پر واقع H&R نامی بریڈنگ فارم پر چھاپہ مارا، جو جنگلی پرندوں اور جانوروں کی غیر قانونی خرید و فروخت میں ملوث تھا۔

کارروائی کے دوران وائلڈ لائف ٹیم نے درجنوں جنگلی پرندے برآمد کیے، جن میں 16 کونجیں (Demoiselle Cranes)، 2 جوڑے مگھ (Bar Headed Geese)، مرغابیاں (نیل سر Mallard، Pochards) اور مختلف اقسام کے مور شامل ہیں۔ ٹیم نے فارم کے مالک سمیت 3 ملزمان کو بھی گرفتار کر لیا ہے۔

ملزمان کے خلاف پنجاب وائلڈ لائف ایکٹ ترمیمی 2025 کے تحت کارروائی کا آغاز کر دیا گیا ہے۔ ابتدائی تفتیش کے مطابق، ملزم کونجیں، مگھ اور مرغابیاں ضلع بنوں KPK سے منگوا کر فروخت کرتے تھے۔

یہ کارروائی وائلڈ لائف ٹیم کی جانب سے جنگلی حیات کے تحفظ کے لیے کی جانے والی کوششوں کا حصہ ہے۔ ٹیم نے عوام سے اپیل کی ہے کہ وہ جنگلی حیات کی غیر قانونی خرید و فروخت میں ملوث افراد کی اطلاع دیں۔

ڈسکہ ،باغی ٹی وی(نامہ نگار ملک عمران) سرکل ڈسکہ کے تھانہ ستراہ پولیس نے جدید ٹیکنالوجی کا استعمال کرتے ہوئے چینی شہری سے 1 کروڑ 20 لاکھ روپے چرانے والے ملزم حماد کو خیبر پختونخوا سے گرفتار کر لیا۔ پولیس نے ملزم سے چوری شدہ رقم بھی برآمد کر لی ہے۔

تفصیلات کے مطابق، چینی شہری لینائی (Linhai) فیصل آباد سے موٹر وے کے ذریعے وڈالہ سندھواں انٹرچینج پر آیا تھا۔ جہاں اس کی گاڑی میں رکھی 1 کروڑ 20 لاکھ روپے کی رقم چوری ہو گئی۔ ڈرائیور حماد بھی موقع سے فرار ہو گیا۔

ایس ایچ او تھانہ ستراہ عادل مصطفیٰ باجوہ نے ڈی پی او سیالکوٹ کی ہدایت پر اپنی ٹیم کے ہمراہ جدید ٹیکنالوجی کا استعمال کرتے ہوئے ملزم حماد شاہد کو خیبر پختونخوا سے گرفتار کر لیا۔ پولیس نے ملزم سے چوری شدہ رقم بھی برآمد کر لی ہے۔ ملزم کو مزید تفتیش کے لیے حراست میں لے لیا گیا ہے۔

سیالکوٹ (باغی ٹی وی/بیوروچیف شاہدریاض): پنجاب پولیس سپیشل آپریشنز سیل نے ایک کامیاب کارروائی کرتے ہوئے بیرون ملک فرار ہونے کی کوشش کرنے والے اشتہاری ملزم عمر عرف عمیر کو گرفتار کر لیا ہے۔

پنجاب پولیس کے ترجمان کے مطابق، ملزم عمر عرف عمیر کا نام پی این آئی ایل (PNIL) میں شامل کیا گیا تھا۔ ملزم پر 2022ء میں ایک شہری کو آتشیں اسلحہ سے زخمی کرنے اور رواں سال بھی فائرنگ کرکے ایک شہری کو زخمی کرنے کا الزام ہے۔

ترجمان نے مزید بتایا کہ سپیشل آپریشنز سیل نے ملزم کو سیالکوٹ ایئرپورٹ سے اس وقت حراست میں لیا جب وہ بیرون ملک فرار ہونے کی کوشش کر رہا تھا۔ پولیس حکام نے ملزم کو گرفتار کر کے قانونی کارروائی شروع کر دی ہے۔