Category: جرائم و حادثات

اوچ شریف ،باغی ٹی وی (نامہ نگارحبیب خان)فتح جنگ حادثہ، فیصل موورز کی غفلت سے قیمتی جانیں ضائع، متاثرین پر دباؤ اور دھمکیاں

تفصیل کے مطابق گذشتہ ہفتے فیصل موورز کی ایک بس فتح جنگ کے قریب ڈرائیور کی غفلت کے باعث المناک حادثے کا شکار ہوئی، جس میں کئی قیمتی جانیں ضائع ہو گئیں اور متعدد افراد زخمی ہوئے۔ متاثرین میں شامل محمد عزیر، جن کی اہلیہ حادثے میں جاں بحق ہوئیں اور معصوم بیٹی زخمی ہوئی، نے اپنی داستان صحافیوں کے سامنے بیان کی۔

محمد عزیر نے بتایا کہ بہاولپور سے اسلام آباد جانے والی بس ڈرائیور کی لاپرواہی کی وجہ سے حادثے کا شکار ہوئی، جس نے کئی خاندانوں کو اجاڑ کر رکھ دیا۔ انہوں نے کہا کہ حادثے کے بعد بھی فیصل موورز کمپنی متاثرین پر دباؤ ڈال رہی ہے اور انشورنس کلیم کے حصول کے لیے زبردستی صلح نامے پر دستخط کرنے کو مجبور کیا جا رہا ہے۔ صلح سے انکار کرنے والے متاثرین کو دھمکایا جا رہا ہے، جس سے ان کے دکھ اور پریشانی میں مزید اضافہ ہو رہا ہے۔

عزیر نے انکشاف کیا کہ فیصل موورز کمپنی اپنی لیبر سے غیر انسانی رویہ اختیار کرتے ہوئے سولہ گھنٹے کی مسلسل ڈیوٹی کرواتی ہے، جس کی وجہ سے ڈرائیور مناسب آرام سے محروم رہتے ہیں اور غفلت کے باعث ایسے حادثات رونما ہوتے ہیں۔ انہوں نے مزید کہا کہ بسوں میں حفاظتی تدابیر کی شدید کمی ہے، خاص طور پر سیٹ بیلٹس کی عدم موجودگی، جو حادثات کے دوران انسانی جانوں کے ضیاع کا ایک بڑا سبب ہے۔

انہوں نے حکومت سے مطالبہ کیا کہ فیصل موورز کمپنی پر فوری پابندی عائد کی جائے اور جب تک کمپنی اپنی بسوں میں بنیادی حفاظتی اقدامات یقینی نہیں بناتی، ان کی سروس کو مکمل طور پر معطل کیا جائے۔ عزیر نے وزیر اعظم پاکستان، وزیر اعلیٰ پنجاب اور وزیر ٹرانسپورٹ سے اپیل کی کہ کمپنی کے خلاف انسانی جانوں کے ضیاع کا مقدمہ درج کر کے سخت کارروائی کی جائے۔

عزیر نے زور دیا کہ بسوں میں سیٹ بیلٹس کی تنصیب اور ڈرائیورز کے لیے مناسب آرام کے انتظامات کو یقینی بنایا جائے تاکہ ایسے حادثات کی روک تھام ہو سکے اور عوام کو محفوظ سفری سہولیات فراہم کی جا سکیں۔

اوچ شریف،باغی ٹی وی (نامہ نگارحبیب خان ) چوکی مقبول شہید کی غیر فعال عمارت جرائم پیشہ افراد کی پناہ گاہ بن گئی

تفصیلات کے مطابق اوچ شریف کے علاقے ہیڈ پنجند روڈ پر واقع چوکی مقبول شہید کی غیر فعال عمارت جرائم پیشہ افراد کی پناہ گاہ بن چکی ہے۔ یہ عمارت جو ماضی میں امن و امان کے قیام میں اہم کردار ادا کرتی تھی اب غیر قانونی سرگرمیوں کا مرکز بن گئی ہے۔

مقامی شہریوں کے مطابق چوکی کی عمارت میں گذشتہ چند ہفتوں سے مشتبہ افراد کی سرگرمیاں بڑھ گئی ہیں، جس سے علاقے میں خوف و ہراس کی فضا قائم ہو چکی ہے۔ پولیس اور انتظامیہ کی عدم دلچسپی کے باعث یہ عمارت جرائم پیشہ عناصر کے لیے محفوظ ٹھکانہ بن چکی ہے، جہاں مختلف غیر قانونی سرگرمیاں جاری ہیں۔

شہریوں کا کہنا ہے کہ اگر اس عمارت کی جلد بحالی نہ کی گئی تو جرائم کی شرح مزید بڑھ سکتی ہے اور عوام کی حفاظت کو سنگین خطرات لاحق ہو سکتے ہیں۔ مقامی افراد نے حکومت سے اپیل کی ہے کہ چوکی مقبول شہید کو دوبارہ فعال کیا جائے تاکہ جرائم کی روک تھام ممکن ہو اور عوام کو تحفظ فراہم کیا جا سکے۔

شہریوں نے کہا کہ اس عمارت کی بحالی سے نہ صرف علاقے میں امن و سکون کی صورتحال بہتر ہوگی بلکہ پولیس اور دیگر حکومتی اداروں کے لیے جرائم کے خاتمے میں بھی مدد ملے گی۔ انہوں نے حکومت سے فوری کارروائی کا مطالبہ کرتے ہوئے کہا کہ یہ قدم عوام کے تحفظ کے لیے ناگزیر ہے۔

اوچ شریف ،باغی ٹی وی (نامہ نگار حبیب خان)بہاولپورمیں نادرا آفس کی ملازمہ نے شوہر سے جھگڑے کے بعد خودکشی کر لی

تفصیل کے مطابق بہاولپور کی اسلامیہ کالونی 100 فٹ روڈ پر ایک افسوسناک واقعہ پیش آیا، جہاں گھریلو جھگڑے کے باعث نادرا آفس کی ایک خاتون ملازمہ نے خودکشی کر لی۔

ریسکیو 1122 کے مطابق واقعے کی اطلاع صبح 11 بج کر 33 منٹ پر موصول ہوئی، جس پر تین منٹ کے اندر امدادی ٹیمیں موقع پر پہنچ گئیں۔

ریسکیو عملے کے مطابق 30 سالہ سیماب اشرف زوجہ محمد اشرف کا اپنے شوہر کے ساتھ کسی بات پر جھگڑا ہوا تھا۔ اہل خانہ کے مطابق خاتون نے غصے میں آ کر پنکھے سے لٹک کر اپنی جان دے دی۔ ریسکیو ٹیم کے پہنچنے سے پہلے ہی خاتون کو پھندے سے اتارا جا چکا تھ ا لیکن وہ موقع پر ہی دم توڑ چکی تھیں۔

ریسکیو عملے نے فوری طور پر واقعے کی اطلاع پولیس کو دے دی۔ پولیس نے جائے وقوعہ کا معائنہ شروع کر دیا ہے اور معاملے کی مزید تحقیقات جاری ہیں۔ ابتدائی طور پر یہ واقعہ گھریلو تنازع کا نتیجہ معلوم ہوتا ہے۔