Category: جرائم و حادثات

اوچ شریف (باغی ٹی وی، نامہ نگار حبیب خان) اوچ شریف کے قریبی علاقے ہتھیجی میں کھیتوں میں کام کے دوران ایک افسوسناک واقعہ پیش آیا جہاں 13 سالہ بچہ محمد اویس ولد محمد مدنی روٹا ویٹر کی زد میں آ کر شدید زخمی ہو گیا۔ حادثے کی اطلاع ملنے پر فوری طور پر ریسکیو ٹیم موقع پر پہنچ گئی۔

تفصیلات کے مطابق کھیت میں روٹا ویٹر چلایا جا رہا تھا جب محمد اویس کھیلتے ہوئے اچانک اس کے قریب آ گیا اور روٹا ویٹر کی زد میں آ کر بائیں ٹانگ سے شدید زخمی ہو گیا۔ واقعے کے فوری بعد کنٹرول روم کو اطلاع دی گئی، جس پر ریسکیو اہلکاروں نے اوچ شریف سے ایمبولینس روانہ کی۔

ریسکیو ٹیم نے موقع پر پہنچ کر بچے کو ابتدائی طبی امداد فراہم کی۔ ریسکیو اسٹاف کے مطابق بچے کی بائیں ٹانگ میں شدید کرش انجری ہوئی، جس کی وجہ سے فوری طور پر اسے تحصیل ہیڈکوارٹر ہسپتال (ٹی ایچ کیو) اوچ شریف منتقل کر دیا گیا۔

ریسکیو ٹیم کی بروقت کارروائی اور بچے کو فوری طبی امداد کی فراہمی پر اہل خانہ اور مقامی لوگوں نے ریسکیو اہلکاروں کی خدمات کو سراہا۔

بہاولپور (باغی ٹی وی ،نامہ نگارحبیب خان) بغداد پولیس اسٹیشن کے قریب روڈ پر سیوریج لائن کی خرابی کے باعث سڑک کا درمیانی حصہ زمین میں دھنس گیا، جس کے نتیجے میں سڑک پر ایک بڑا گڑھا بن گیا۔

مقامی شہریوں نے اپنی مدد آپ کے تحت درختوں کی ٹہنیاں کاٹ کر گڑھے میں ڈالیں تاکہ حادثات سے بچا جا سکے، لیکن حکام کی جانب سے کوئی حفاظتی اقدامات نہیں کیے گئے۔

میونسپل کارپوریشن کا عملہ موقع پر موجود تو ہے لیکن سڑک پر شہریوں کو خبردار کرنے کے لیے نہ تو کوئی سائن بورڈ نصب کیا گیا اور نہ ہی حفاظتی بیریئرز لگائے گئے۔ اس لاپروائی کے باعث کسی بھی وقت سنگین حادثہ پیش آنے کا خطرہ موجود ہے۔

شہریوں نے شکایت کی ہے کہ حکام کی جانب سے فوری اقدامات نہ کرنے کی وجہ سے عوام کو شدید خطرات لاحق ہیں۔ حادثے سے بچاؤ کے لیے خود ہی عارضی انتظامات کیے گئے ہیں، لیکن یہ ناکافی ہیں۔

علاقہ مکینوں اور شہریوں نے اعلیٰ حکام سے فوری نوٹس لینے اور سڑک کی مرمت کے ساتھ ساتھ حفاظتی اقدامات کرنے کا مطالبہ کیا ہے تاکہ مزید نقصان اور حادثات سے بچا جا سکے۔

اوچ شریف (باغی ٹی وی،نامہ نگارحبیب خان) اوچ شریف کے حساس مقامات اور تاریخی مزارات کی سیکیورٹی انتظامات بدستور ناقص، "ڈنگ ٹپاؤ پالیسی” کے تحت کیے گئے معاہدے ناکافی ثابت ہو رہے ہیں۔ حالیہ دہشت گردی کے خدشات اور ضلع بہاولپور میں مشتبہ دہشت گردوں کی گرفتاری کے بعد شہریوں میں خوف و ہراس پھیل گیا ہے۔

تفصیلات کے مطابق نیکٹا کی جانب سے جاری کردہ دہشت گردی الرٹ کے باوجود اوچ شریف کے اہم مزارات، عبادت گاہوں، سرکاری عمارات، اور تاریخی آثار پر سیکیورٹی نہ ہونے کے برابر ہے۔ حضرت سید جلال الدین سرخ پوش بخاری اور حضرت غوث بندگی کے مزارات پر روزانہ ہزاروں زائرین کی آمد کے باوجود فول پروف سیکیورٹی کا انتظام نہ ہونے سے یہ مقامات ممکنہ خطرات کا شکار ہیں۔

محکمہ اوقاف کی جانب سے نجی سیکیورٹی گارڈز تعینات کیے گئے ہیں جن کی کارکردگی پر شہریوں نے بارہا سوال اٹھائے ہیں۔ ریٹائرڈ فوجیوں پر مشتمل فورس کا قیام صرف ایک وعدہ بن کر رہ گیا جبکہ سیکیورٹی کے لیے نصب میٹل ڈیٹیکٹرز اور سکینرز خراب حالت میں ہیں۔

شہر کے دیگر حساس مقامات جیسے پولیس اسٹیشنز، ہسپتال، تعلیمی ادارے، اور تجارتی مراکز بھی سیکیورٹی اقدامات سے محروم ہیں۔ تجاوزات اور غیر منظم مارکیٹوں کی وجہ سے دہشت گردی کے واقعات کا خطرہ مزید بڑھ گیا ہے۔

شہریوں نے حکومت اور متعلقہ حکام سے سیکیورٹی انتظامات کو فوری بہتر بنانے کا مطالبہ کیا ہے تاکہ عوامی تحفظ کو یقینی بنایا جا سکے۔