پشاور: رنگ روڈ کے قریب موٹر سائیکل سوار سے خودکش جیکٹ برآمد کر لی گئی۔
باغی ٹی وی : ایکسائز پولیس کے مطابق رنگ روڈ کے قریب ایک موٹر سائیکل کو رکنے کا اشارہ کیا جس پر موٹر سائیکل سوار خودکش جیکٹ پھینک کر فرار ہو گئے، بم ڈسپوزل یونٹ کی مدد سے جیکٹ کو ناکارہ بنا دیا گیا، جیکٹ میں 6 سے 7 کلو گرام بارودی مواد تھا، موٹر سائیکل افراد کی تلاش جاری ہے۔
مئیڈوگری: نائیجیریا میں آئل ٹینکر کی گاڑی سے ٹکر کے بعد دھماکے کے نتیجے 48 افردا جاں بحق جبکہ متعدد زخمی ہوگئے۔
باغی ٹی وی: غیر ملکی خبر ایجنسی کی رپورٹ کے مطابق مقامی حکام کا کہنا تھا کہ نائیجیریا کے علاقے مئیڈوگری آئل ٹینکر کی سڑک سے گزرتے ہوئے مسافروں اور مویشیوں سے بھرے ٹرک سے ٹکر ہوگئی تھی،ٹکر کے نتیجے میں آئل ٹینکر دھماکے سے پھٹ گیا اور مسافر بردار ٹرک سمیت دیگر گاڑیوں کو آگ نے اپنی لپیٹ میں لے لیا۔
حکام کا کہنا تھا کہ حادثے میں 48 افراد جاں بحق ہوگئے جبکہ متعدد زخمی ہوگئے ہیں، زخمیوں کو طبی امداد کیلئے قریبی اسپتال منتقل کردیا گیا ہے، آئل ٹینکر دھماکے میں کئی زخمیوں کی حالت نازک ہے جس کے باعث ہلاکتوں میں اضافے کا خدشہ ہے۔
جڑانوالہ (باغی ٹی وی) جڑانوالہ تحصیل ہیڈ کوارٹر ہسپتال میں ایک دل دہلا دینے والا واقعہ پیش آیا ہے۔ ہسپتال انتظامیہ کی غفلت کی وجہ سے ایک لاوارث مریض کو وارڈ سے اٹھا کر مردہ خانے میں منتقل کر دیا گیا، جہاں اس نے سسک سسک کر جان دے دی۔
آج نیوز کی ایک رپورٹ کے مطابق رات کے وقت ہسپتال کے عملے نے لاوارث مریض کو وارڈ سے مردہ خانہ منتقل کر دیا۔ ذرائع کا کہنا ہے کہ کسی بھی ڈاکٹر نے مریض کی حالت پر توجہ نہیں دی اور اسے مردہ خانے میں چھوڑ دیا گیا۔ مریض نے مردہ خانے میں دردناک موت کا سامنا کیا۔
آج نیوز نے مردہ خانے میں پڑی مریض کی لاش کی ویڈیو حاصل کر لی ہے۔ مقامی لوگوں کا کہنا ہے کہ سرکاری ہسپتالوں میں مریضوں کے ساتھ اس طرح کا سلوک معمول کی بات ہو چکی ہے۔ ان کا کہنا ہے کہ ڈاکٹروں اور انتظامیہ کی بے حسی کی وجہ سے مریضوں کو شدید مشکلات کا سامنا کرنا پڑتا ہے۔
سماجی حلقوں کاکہنا ہے کہ اس واقعہ سےسرکاری ہسپتالوں میں مریضوں کی دیکھ بھال پر سنجیدہ سوالات اٹھ گئے ہیں،عوامی حلقوں نے مطالبہ کیا ہے کہ اس واقعے کی مکمل تحقیقات کی جائیں اور ذمہ دار افراد کے خلاف کارروائی کی جائے۔
پیر محل(باغی ٹی وی رپورٹ) کم جہیز کیوں لائی،بہو پربہیمانہ تشدد، ہسپتال میں داخل
تفصیل کے مطابق پیر محل کے ایک گاؤں میں دل دہلا دینے والا واقعہ پیش آیا ہے جہاں ایک شادی شدہ خاتون کو جہیز نہ لانے پر اس کے شوہر اور سسرال والوں نے تشدد کا نشانہ بنایا ہے۔ متاثرہ خاتون20 سالہ آمنہ شفیق کو شدید زخمی حالت میں ہسپتال منتقل کیا گیا ہے۔
آمنہ شفیق نے بتایا ہے کہ اس کے شوہر اسد اور سسرال والوں نے اسے کمرے میں بند کرکے تشدد کیا اور اسے شدید مارا پیٹا۔ اس نے مزید بتایا کہ شادی کے وقت جہیز نہ لانے کی وجہ سے اسے بار بار تشدد کا سامنا کرنا پڑتا رہا ہے۔
مقامی پولیس نے واقعے کی اطلاع ملنے پر فوری کارروائی کرتے ہوئے مقدمہ درج کر لیا ہے اور ملزمان کی گرفتاری کے لیے چھاپے مارے جا رہے ہیں۔ متاثرہ خاتون کو عدالتی کارروائی کے لیے پیش کیا جائے گا۔
سینئر وزیر شرجیل انعام میمن کی جانب سے مرحوم اینکر عبداللہ حسن کے لواحقین سے تعزیت کا اظہار کیا گیا.
باغی ٹی وی کی رپورٹ کے مطابق شرجیل انعام میمن نے افسوسناک حادثے پر جاری بیان میں کہا ہے کہ دکھ کی اس گھڑی میں مرحوم عبداللہ حسن کے اہلخانہ کے ساتھ ہیں، صحافت کے میدان میں عبداللہ حسن کی خدمات کو ہمیشہ یاد رکھا جائے گا، اللہ تعالی مرحوم کی مغفرت اور اہلخانہ کو صبر جمیل عطا فرمائے، آمین.
واضح رہے کہ افسوسناک واقعہ کراچی میں شاہراہ فیصل آواری ٹاور سگنل کے قریب پیش آیا جہاں کار فٹ پاتھ سے ٹکرا گئی جس کے نتیجے میں ایک شخص جاں بحق ہوگیا۔کار حادثے میں جاں بحق شخص کی شناخت عبداللہ حسن کے نام سے ہوئی جو مختلف پرائیویٹ ٹی وی چینلز میں نیوز اینکر کے فرائض سرانجام دے چکے ہیں۔ریسکیو حکام نے عبداللہ کی لاش ہسپتال منتقل کردی پولیس کا کہنا ہے کہ حادثے سے متعلق مزید تفتیش جاری ہے۔
وزیر اعلیٰ سندھ سید مراد علی شاہ نے بھی نیوز اینکر عبداللہ حسن کے روڈ حادثے میں انتقال پر گہرے دکھ کا اظہار کیا اور مرحوم کے بلند درجات اور خاندان کے صبر کے لیے دعا کی۔
اوچ شریف (باغی ٹی وی ،نامہ نگارحبیب خان) چار دیواری سے محروم قبرستان آوارہ کتوں کی آماجگاہ بن گئے
تفصیل کے مطابق اوچ شریف میں درجنوں قبرستان چار دیواری سے محروم ہونے کی وجہ سے آوارہ کتوں کی آماجگاہ بن چکے ہیں۔ یہ کتے قبروں کو کھودتے ہیں، ان پر پیشاب پاخانہ کرتے ہیں اوریہیں پر کھاتےپیتے ہیں۔ اس سے نہ صرف مردوں کی بے حرمتی ہو رہی ہے بلکہ قبرستانوں کی صفائی ستھرائی بھی متاثر ہو رہی ہے۔
مقامی لوگوں اور سماجی تنظیموں کا کہنا ہے کہ قبرستانوں میں آوارہ کتوں کی پھیلائی گندگی سے بدبو اورتعفن پھیل رہا ہے۔ قبروں پر لکھی ہوئی قرآنی آیات اور ناموں پر بھی گندگی پائی جاتی ہے۔
شہریوں نے خدشہ ظاہر کیا ہے کہ اگر جلد ہی اس مسئلے کا حل نہ نکالا گیا تو آوارہ کتے قبروں کو کھود کر مردوں کی بھی بے حرمتی کریں گے۔ انہوں نے انتظامیہ سے مطالبہ کیا ہے کہ وہ آوارہ کتوں کو تلف کرکے اس مسئلے کا حل نکالیں اور قبرستانوں کی چاردیواریاں بنوائی جائیں تاکہ قبرستان کاتقدس پامال نہ ہو.
اوچ شریف(باغی ٹی وی نامہ نگارحبیب خان):ضلع مظفرگڑھ کی تحصیل علی پور کے نواحی علاقے بستی بدھوانی میں ایک دل دہلا دینے والا واقعہ پیش آیا ہے جہاں دو مسلح افراد نے ایک بزرگ پر تشدد کیا اور ان کی دھوتی اتار کر انہیں بے عزت کیا۔
متاثرہ بزرگ، مٹھو خان ولد گجر خان نے بتایا کہ وہ اپنے کھیت میں تل کی فصل کی کٹائی کروا رہے تھے کہ اچانک بابر ولد عطاء اللہ اور اس کا ایک ساتھی مسلح ہو کر آئے اور انہوں نے گالی گلوچ اور دھمکیاں دینا شروع کردیں۔ اس کے بعد انہوں نے مجھ پر تشدد کیا اور میری دھوتی بھی اتار دی۔ مٹھو خان نے بتایا اس دوران جب لوگ اورمیرابیٹا موقع پر پہنچے تو ملزمان اسلحہ لہرا کر فرار ہوگئے۔
متاثرہ بزرگ نے الزام لگایا ہے کہ پولیس تھانہ سیت پور سفارش کے باعث ملزمان کو گرفتار کرنے سے انکاری ہے۔ انہوں نے آئی جی پنجاب اور آر پی او ڈیرہ غازی خان سے نوٹس لیتے ہوئے ملزمان کی فوری گرفتاری کا مطالبہ کیا ہے۔
شہری حلقوں کاکہنا ہے کہ اس واقعہ نےایک بار پھر ہمارےمعاشرے میں بڑھتی ہوئی ناانصافی اور قانون شکنی کی یاد تازہ کردی ہے۔ ایک بزرگ شہری کے ساتھ اس طرح کا سلوک انتہائی افسوسناک ہے۔ اس واقعے نے علاقے میں خوف و ہراس کا ماحول پیدا کردیا ہے۔
اوچ شریف (باغی ٹی وی ،نامہ نگارحبیب خان)علی پور میں انسانیت شرمسار,ماں بیٹی پر وحشیانہ تشدد,ملزمان نے برہنہ حالت میں بالوں سے پکڑ کر گھسیٹا
تفصیل کے مطابق معمولی بات پر ایک خاتون اور اس کی والدہ کو 11 افراد کے گروہ نے تشدد کا نشانہ بنایا ہے۔ متاثرہ خاتون فرزانہ بی بی اور اس کی والدہ فضاں مائی دوائی لے کر گھر جا رہی تھیں کہ عبدالغفور، سیفل، شاکر، طارق، عبدالخالق، ساجد، پنوں، اقبال، رفیق سمیت دیگر افراد نے ان پر حملہ کردیا۔
ملزمان نے خواتین کے کپڑے پھاڑ کر انہیں برہنہ کردیا اور پھر طارق، رفیق اور سیفل نے انہیں بالوں سے پکڑ کر گلیوں میں گھسیٹا۔ اس دوران لوگ جمع ہوگئے تو ملزمان موقع سے فرار ہوگئے۔ شدید زخمی خاتون اور اس کی والدہ کو فوری طور پر قریبی ہسپتال منتقل کردیا گیا ہے۔
متاثرہ خاتون نے الزام لگایا ہے کہ پولیس نے مقدمہ تو درج کر لیا ہے لیکن ابھی تک ملزمان کو گرفتار نہیں کیا گیا۔ انہوں نے آئی جی پنجاب سے مطالبہ کیا ہے کہ وہ اس واقعے کا نوٹس لیں اور ملزمان کے خلاف سخت کارروائی کریں۔
تفتیشی پولیس آفیسرکا کہنا ہے کہ وہ اس معاملے کی تحقیقات کر رہے ہیں اور جلد ہی ملزمان کو گرفتار کرلیا جائے گا۔
کراچی پولیس نے شہر میں مختلف کاروائیوں کے دوران 15 ملزمان گرفتار کر لیے.
باغی ٹی وی کی رپورٹ کے مطابق ڈسٹرکٹ ویسٹ پولیس نے جعلی کھاد، زرعی ادویات اور سیمنٹ کیمیکل بنانے والے ملزمان کو گرفتار کرلیا۔ ملزمان محمد خان کالونی منگھوپیر فیکٹری ایریاء میں غیر قانونی ادویات/کیمیکل کی فیکٹری آپریٹ کررہے تھے۔ملزمان ایک ہی فیکٹری نما گودام میں جعلی کھاد اور سیمنٹ میں استعمال ہونے والا جعلی کیمیکل کی فیکٹری آپریٹ کررہے تھے۔ ایس ایچ او منگھوپیر نے ہمراہ ٹیم خفیہ اطلاع پر چھاپہ مار کاروائی کرتے ہوئے 12 ملزمان کو گرفتار کیا۔ فیکٹری سے 293 بورے سمینٹ پاؤڈر، 55 بورے کھاد پاؤڈر، 150 بورے خالی، 200 ایچ آر شیڈ مارٹن، کئی ٹن کے حساب سے کیمکل، ریتی و دیگر اشیاء برآمد ہوئی۔ملزمان مضر صحت کیمیکلز اور خراب ٹائر کو کاٹ کر جعلی کھاد اور سیمنٹ کا کیمیکل تیار کرکے جعلی ناموں سے سپلائی/فروخت کرتے ہیں۔ملزمان کے خلاف ضابطے کے تحت مقدمات درج کرلئے گئے ہیں جبکہ فرار ملزمان کی گرفتاری کے لئے کاروائیاں جاری ہیں۔ گرفتار ملزمان میں ابراہیم، محمد خالد، صداقت، شوکت، عبدالجبار، بسم اللّٰہ، سہراب، عنایت اللّٰہ، محمد ہاشم، ثمر خان، نذیر احمد اور واحد بخش شامل ہیں۔
دوسری طرف کورنگی زمان ٹاؤن پولیس نے گٹکے ماوے کے کارخانے پر چھاپے کے دوران رہائشی مقام پر گٹکا ماوا تیار کرکے فروخت کرنے والے تین ملزمان گرفتارکیے پولیس کارروائی کورنگی سیکٹر 51 سی کے علاقے میں کی گئی، گرفتار ملزمان سے بھاری مقدار میں مضر صحت گٹکا ماوا برآمد کرلیا گیا،گٹکے ماوے کا مکسچر بھیگی ہوئی چھالیہ تمباکو اور پیکنگ کا سازو سامان بھی برآمد کیا. گرفتار ملزمان آپس میں سگے بھائی ہیں جو رہائشی مقام پر گٹکے کی ترسیل کرتے تھے، ملزمان کی شناخت زبیر عمیر اور وہاب کے نام سے ہوئی، ملزمان کے خلاف تھانہ زمان ٹاؤن میں مقدمہ درج کیا جارہا ہے.
لاہور: ایف آئی اے نے لاہور سے انسانی اسمگلنگ کا بین الاقوامی نیٹ ورک پکڑ لیا۔
باغی ٹی وی: انٹیلی جنس ایجنسیوں کی نشاندہی پر ایف آئی اے لاہور سرکل نے مشترکہ کارروائی کرتے ہوئے انسانی اسمگلنگ کا بین الاقوامی نیٹ ورک رنگے ہاتھوں پکڑ لیا نیٹ ورک سادہ لوح عوام کو بیرون ملک روزگار کے جھانسے دے کر لوٹنے میں ملوث تھا جس نے سادہ لوح عوام سے کروڑوں روپے ہتھیا لیے لاہور سے پکڑا گیا گروہ جعلی دستاویزات اپنے پرنٹنگ پریس میں بناتا تھا، پرنٹنگ پریس میں کئی ملکوں کی جعلی دستاویزات تیار کی جاتی تھیں۔
ترجمان ایف آئی اے کے مطابق لاہور سے گرفتار نیٹ ورک کا انٹرنیشنل ڈنکی گروہوں سے بھی رابطے کا انکشاف ہوا ہے،مختلف ممالک میں سیاسی پناہ لینے والے افراد بھی اس گروہ سے معاونت لیتے رہے، دورانِ تفتیش پاکستان کو بدنام کرنے کی بھارتی سازش بھی بے نقاب ہوئی، مجرمانہ سرگرمیوں میں بھارتی اور افغانی باشندے ملوث ہیں۔
وزیر داخلہ محسن نقوی نے نیٹ ورک پکڑنے پر انٹیلی جنس ایجنسی اور ایف آئی اےکو شاباش دیتے ہوئے کہا کہ لاہور میں کامیاب آپریشن انسانی اسمگلنگ کے خلاف کارروائیوں میں اہم سنگ میل ہے، انسانی اسمگلنگ روکنے کے اس طرز پر مزید آپریشن جاری رکھیں جائیں گے، انسانی اسمگلنگ کے خاتمے کیلئے آخری حد تک جائیں گے اور انسانی اسمگلنگ میں ملوث مافیا سے آہنی ہاتھوں سے نمٹا جائے گا۔