Category: جرائم و حادثات

سیالکوٹ (باغی ٹی وی، بیوروچیف شاہد ریاض) ایف آئی اے امیگریشن سیالکوٹ نے ایک کامیاب کارروائی کرتے ہوئے جعلی دستاویزات پر سفر کرنے والے مسافر کو گرفتار کر لیا۔ مسافر کو بین الاقوامی پرواز کے ذریعے ساؤتھ افریقہ سفر کرنا تھا۔

تفصیلات کے مطابق گرفتار ہونے والے مسافر کی شناخت شاہزیب علی شاہ کے نام سے ہوئی ہے، جو ساؤتھ افریقہ کے پاسپورٹ پر سفر کر رہا تھا۔ امیگریشن کلیریئنس کے دوران مسافر کی دستاویزات مشکوک پائی گئیں اور مزید تفتیش میں اس کی ٹریول ہسٹری میں ساؤتھ افریقہ کے پاسپورٹ کا کوئی اندراج نہیں تھا۔ اس کے علاوہ، پاسپورٹ پر درج تاریخ پیدائش اور جائے پیدائش مسافر کی فیملی ٹری سے مطابقت نہیں رکھتی تھیں۔

ابتدائی تفتیش میں شاہزیب علی شاہ نے بتایا کہ اس نے سال 2018 میں پاکستانی پاسپورٹ پر ساؤتھ افریقہ کا سفر کیا تھا اور وہاں ایک مقامی ایجنٹ کے ذریعے 90 ہزار افریقی رانڈ کے عوض جعلی ساؤتھ افریقی پاسپورٹ حاصل کیا تھا۔

ملزم کو مزید قانونی کارروائی کے لیے انسدادِ انسانی سمگلنگ سرکل گوجرانوالہ منتقل کر دیا گیا ہے، جہاں اس کے خلاف مزید تحقیقات جاری ہیں۔

سیالکوٹ (باغی ٹی وی،بیوروچیف شاہد ریاض ) پنجاب فوڈ اتھارٹی کا چھاپہ،عوام کوجعلی ڈرنکس پلانے کی کوشش ناکام

تفصیل کے مطابق شہر اقبال کے باسیوں کو جعلی کاربونیٹڈ ڈرنکس پلانے کی سازش کو ناکام بنا دیا گیا۔ پنجاب فوڈ اتھارٹی کی ہدایات پر فوڈ سیفٹی ٹیموں نے پسرور میں واقع ایک ڈرنکس سٹور پر کامیاب چھاپہ مارا۔

ایک گودام سے معروف برینڈز کی 538 لیٹر جعلی کاربونیٹڈ ڈرنکس برآمد کی گئیں، جو مضر صحت تھیں۔ ویجیلنس ونگ کی خفیہ اطلاع پر کی گئی اس کارروائی کے دوران موقع پر کیے گئے ٹیسٹ میں برکس کی مقدار کم پائی گئی، جو کہ مضر صحت ہونے کا ثبوت تھا۔ یہ جعلی بوتلیں سپلائی کے لیے تیار تھیں اور ان پر معروف برانڈز کے جعلی لیبل لگے ہوئے تھے، جنہیں عام صارف کے لیے پہچاننا مشکل ہوتا ہے۔

مضر صحت ڈرنکس کو قوانین کے برعکس تیار کیا گیا تھا اور انہیں دکان کے گودام میں چھپا کر رکھا گیا تھا۔ ان بوتلوں کو پسرور کے مختلف دکانوں اور ریسٹورنٹس میں سپلائی کرنے کی منصوبہ بندی کی گئی تھی۔ فوڈ اتھارٹی کے مطابق کاربونیٹڈ بیوریجز کا استعمال گردوں اور جگر کے عارضے کا سبب بنتا ہے۔

ڈی جی فوڈ اتھارٹی کا کہنا تھا کہ جعلی ڈرنکس کا کاروبار کرنے والوں کے خلاف سخت کارروائی کی جائے گی اور اس گھناؤنے دھندے کو جڑ سے اکھاڑ دیا جائے گا۔

سیالکوٹ (باغی ٹی وی،بیوروچیف شاہدریاض کی رپورٹ) بیوروچیف شاہد ریاض کے مطابق تھانہ ہیڈ مرالہ پولیس نے فوری کارروائی کرتے ہوئے لڑکے سے اجتماعی زیادتی کرنے والے دو ملزمان کو گرفتار کر لیا ہے۔

تفصیلات کے مطابق محمد نواز کی جانب سے تھانہ ہیڈ مرالہ میں دی گئی درخواست کے مطابق اس کا بھتیجا محمد شعبان، جو کہ تقریباً 18 سال کا ہے، مین بازار گوندل میں سامان لینے گیا تھا۔ وہاں ملزمان رخسار عرف رکی ولد گلزار احمد اور ثناء اللہ عرف پاں ولد شمس عرف ٹونڈا نے اسے موٹرسائیکل پر اغوا کیا اور رڈیال گاؤں کے قبرستان کے قریب اسلحہ کے زور پر زبردستی زیادتی کی۔ ملزمان نے واقعے کی ویڈیو بھی بنائی اور دھمکی دی کہ اگر اس نے کسی کو بتایا تو ویڈیو وائرل کر دی جائے گی اور جان سے مار دیا جائے گا۔

اس واقعے کی اطلاع پر فوری نوٹس لیتے ہوئے مقدمہ نمبر 654/24 درج کیا گیا۔ ڈی پی او سیالکوٹ رانا عمر فاروق کی ہدایت پر ڈی ایس پی صدر سرکل کی سربراہی میں ایس ایچ او تھانہ ہیڈ مرالہ سب انسپکٹر کاشف علی نے اپنی ٹیم کے ہمراہ کارروائی کرتے ہوئے دونوں ملزمان کو قلیل وقت میں ٹریس کر کے گرفتار کر لیا۔

ڈی پی او نے اس موقع پر کہا کہ کسی بھی شخص کو قانون ہاتھ میں لینے کی اجازت نہیں دی جائے گی اور غیر انسانی سلوک کسی بھی صورت برداشت نہیں کیا جائے گا۔ متاثرہ بچے کی والدہ کی مدعیت میں واقعے کا مقدمہ درج کر لیا گیا ہے اور انصاف کے تقاضے پورے کرتے ہوئے ملزمان کو قرار واقعی سزا دلوانے کی یقین دہانی کرائی گئی ہے۔